1, 2. Jeová sente oinsá bainhira ita hakaʼas an atu hatudu laran-moos?

 BAINHIRA labarik-mane ida fila husi eskola, nia haree karteira ida neʼebé nakonu ho osan monu hela iha rai. Saida mak nia sei halo? Nia bele foti osan sira-neʼe. Maibé nia deside atu fó fila karteira neʼe ba ninia naʼin. Labarik nia amá rona kona-ba neʼe no sente orgullu tebes ba ninia oan.

² Inan-aman barak sente kontente bainhira sira-nia oan hatudu laran-moos. Ita-nia Aman Jeová iha lalehan mak “Maromak lia-loos nian” no nia sente kontente bainhira ita hatudu laran-moos. (Salmo 31:5) Ita hakarak atu halo nia kontente no “hatudu laran-moos iha buat hotu”. (Ebreu 13:18) Mai ita haree situasaun haat neʼebé karik bele halo susar ba ita atu hatudu laran-moos. Tuirmai ita sei koʼalia kona-ba benefísiu neʼebé ita bele hetan kuandu ita hatudu laran-moos.

3-5. (a) Tanbasá ita presiza buka-hatene kona-ba ita-nia an? (b) Saida mak sei ajuda ita atu buka-hatene ita-nia fraku?

³ Atu bele hatudu laran-moos ba ema seluk, ita presiza buka-hatene uluk kona-ba ita-nia an rasik no  rekoñese ita-nia fraku. La fasil atu halo ida-neʼe. Iha apóstolu sira-nia tempu, irmaun-irmán sira iha kongregasaun Laodiseia lohi sira-nia an katak sira halo Maromak kontente, maibé tuir loloos lae. (Apokalipse 3:17) Se ita la kuidadu, ita mós bele lohi ita-nia an.

⁴ Dixípulu Tiago esplika: “Se ema ida hanoin katak nia adora Maromak, maibé la kontrola ninia nanál, nia bosok ninia laran rasik no ninia adorasaun saugati deʼit.” (Tiago 1:26) Ita lohi ita-nia an rasik se ita hanoin katak hodi halo buat diʼak balu, Maromak sei la preokupa kuandu ita koʼalia aat, hatún ema, ka bosok. Saida mak bele ajuda ita atu la lohi ita-nia an?

⁵ Bainhira ita haree ba espellu, ita bele haree ita-nia an husi liʼur. Maibé bainhira ita lee Bíblia, ita bele haree ho loloos ita mak ema hanesan saida iha laran. Bíblia bele ajuda ita atu buka-hatene ita-nia fraku no ita-nia kbiit. Bíblia mós ajuda ita buka-hatene ita-nia hanoin, hahalok no liafuan neʼebé presiza atu hadiʼa. (Lee Tiago 1:23-25.) Maibé se ita hanoin katak ita la iha fraku, ita labele hadiʼa ita-nia an. Tan neʼe, ita presiza uza Bíblia atu buka-hatene ho loloos kona-ba ita-nia an. (Lamentasaun 3:40; Ageu 1:5) Orasaun mós bele ajuda ita atu halo nuneʼe. Ita bele husu Jeová atu buka-hatene kona-ba ita-nia an no ajuda ita atu haree ita-nia fraku sira atu nuneʼe ita bele hadiʼa. (Salmo 139:23, 24) Ita hatene katak “Jeová hakribi ema neʼebé laran-makerek, maibé nia sai belun neʼebé besik ho ema laran-loos”.—Provérbios 3:32.

6. Tanbasá mak feen-laʼen presiza hatudu laran-moos ba malu?

⁶ Importante tebes atu hatudu laran-moos iha família laran. Bainhira laʼen no feen koʼalia nakloke ba malu, sira sente seguru no bele tau fiar ba malu. Maibé dala ruma feen-laʼen la hatudu laran-moos ba malu. Porezemplu, karik sira ida hatudu sentimentu romántiku ba ema seluk ka haree pornografia ka namora subasubar ho ema seluk. Ema neʼebé hakerek salmo ida hatete: “Haʼu la ransu ho ema sira neʼebé bosok-teen, no haʼu hasees an husi sira neʼebé subar sira-nia hakarak aat.” (Salmo 26:4) Se Ita la laran-moos ba  Ita-nia kaben maski iha neon deʼit, ida-neʼe bele estraga Ita-nia moris kaben nian.

7, 8. Oinsá mak Ita bele uza Bíblia atu hanorin oan sira katak hahalok laran-moos mak importante?

⁷ Oan sira mós presiza aprende katak laran-moos mak importante. Inan-aman bele uza Bíblia atu hanorin oan sira kona-ba ida-neʼe. Bíblia iha ezemplu kona-ba ema neʼebé la hatudu laran-moos hanesan Acan neʼebé sai naʼok-teen, Geazi neʼebé bosok atu hetan osan, no Judas neʼebé naʼok osan no faʼan Jesus ho osan-mutin 30.​—Josué 6:17-19; 7:11-25; 2 Reis 5:14-16, 20-27; Mateus 26:14, 15; João 12:6.

⁸ Bíblia mós iha ezemplu diʼak barak kona-ba ema neʼebé hatudu laran-moos hanesan Jacob neʼebé anima ninia oan atu fó fila osan neʼebé ninia oan hetan, Jefte no ninia oan-feto neʼebé kumpre promesa ba Maromak, no Jesus neʼebé nafatin hatudu laran-moos maski situasaun susar. (Génesis 43:12; Juís 11:30-40; João 18:3-11) Ezemplu sira-neʼe bele ajuda oan sira atu hatene tanbasá hahalok laran-moos mak importante.

9. Se inan-aman laran-moos, oinsá ida-neʼe bele ajuda sira-nia oan?

⁹ Inan-aman bele aprende husi Bíblia nia prinsípiu neʼe: “Ó neʼebé hanorin ema seluk, ó mós hanorin ó-nia an ka lae? Ó dehan: ‘Keta naʼok’, maibé ó rasik naʼok ka lae?” (Roma 2:21) Kuandu inan-aman la halo tuir sira-nia liafuan, oan bele nota ida-neʼe. Se ita haruka ita-nia oan atu laran-moos maibé ita rasik la laran-moos, sira sei konfuzaun. Se oan sira nota katak sira-nia inan-aman bosok maski kona-ba buat kiʼik, karik sira mós sei halo buat neʼebé hanesan. (Lee Lucas 16:10.) Maibé se oan sira haree katak  sira-nia inan-aman mak laran-moos, ida-neʼe bele ajuda oan atu hatudu laran-moos kuandu sira sai inan-aman.​—Provérbios 22:6; Éfeso 6:4.

10. Oinsá ita bele hatudu laran-moos bainhira koʼalia ho maluk Kristaun?

¹⁰ Dalan ida atu hatudu laran-moos ba ita-nia maluk Kristaun mak hodi koʼalia buat loos. Se ita la kuidadu, ita-nia liafuan bele sai fali konta ema nia vida ka koʼalia aat hodi hafoʼer ema nia naran. Se ita repete fali istória ruma neʼebé ita rasik la hatene ho loloos, karik ita bele habelar lia-bosok. Diʼak liu atu ‘kontrola ita-nia ibun’. (Provérbios 10:19) Hatudu laran-moos la dehan katak ita tenke hatete sai buat hotu neʼebé ita hanoin, hatene ka rona. Maski buat neʼebé ita atu koʼalia mak loos, maibé husu ba Ita-nia an: ‘Neʼe hatudu laran-diʼak ka lae? Haʼu iha direitu atu mete ida-neʼe ka lae? Ida-neʼe importante ka lae?’ (1 Tesalónika 4:11) Ema balu buka razaun oioin atu koʼalia hodi la hanoin ema, no dehan: “Haʼu koʼalia nakloke deʼit.” Maibé nuʼudar Jeová nia povu, ita sempre hakarak koʼalia iha dalan neʼebé hatudu laran-diʼak.​—Lee Koloso 4:6.

11, 12. (a) Tanbasá ema neʼebé halo sala presiza koʼalia nakloke ba katuas sira? (b) Se Ita hatene Ita-nia kolega halo ona sala sériu, Ita presiza husu pergunta saida deʼit ba Ita-nia an? (c) Oinsá ita bele hatudu laran-moos ba Jeová nia organizasaun?

¹¹ Jeová fó knaar ba katuas sira atu ajuda kongregasaun. Fasil liu ba katuas sira atu ajuda ita se ita koʼalia nakloke ka koʼalia buat loos ba sira. Tanbasá? Se Ita moras no Ita bá konsulta ho doutór, Ita sei  subar sintoma balu husi doutór ka lae? Hanesan neʼe mós, se ita halo sala sériu, ita labele bosok kona-ba neʼe. Maibé ita tenke bá hasoru katuas sira no koʼalia nakloke ba sira. (Salmo 12:2; Apóstolu 5:1-11) Agora imajina toʼok situasaun neʼebé la hanesan: Oinsá se Ita hatene katak Ita-nia kolega halo ona sala sériu? (Levítico 5:1) Ema balu karik hanoin: “Haʼu mak ninia kolega, tan neʼe haʼu tenke rai segredu neʼe.” Ita mós hanoin hanesan neʼe ka lae? Ka Ita hanoin-hetan katak katuas sira prontu atu ajuda nia hodi bele iha fali relasaun diʼak ho Jeová?​—Ebreu 13:17; Tiago 5:14, 15.

¹² Ita mós presiza hatudu laran-moos ba Jeová nia organizasaun bainhira ita hatama relatóriu kona-ba ita-nia serbisu haklaken. Ita mós hatudu laran-moos bainhira prenxe formuláriu pioneiru nian ka formuláriu sira seluk.​—Lee Provérbios 6:16-19.

13. Oinsá ita bele hatudu laran-moos kuandu ita halo negósiu ho maluk Kristaun sira?

¹³ Ema Kristaun labele kahur adorasaun ho negósiu. Porezemplu ita labele halo negósiu iha Reuniaun-Fatin no bainhira haklaken. No bainhira halo negósiu, Ita la aproveita irmaun ka irmán sira. Se Ita mak patraun ida, no Ita-nia serbisu-naʼin mak maluk Testemuña, Ita presiza selu sira-nia saláriu tuir tempu, fó ba sira tuir buat neʼebé Ita promete ona, no kumpre lei kona-ba serbisu-naʼin. Neʼe inklui lei kona-ba seguransa sosiál ka loron feriadu. (1 Timóteo 5:18; Tiago 5:1-4) No se Ita mak serbisu hamutuk ho maluk Testemuña, keta hein sira atu trata Ita iha dalan espesiál. (Éfeso 6:5-8) Hakaʼas an atu serbisu tuir tempu no halo serbisu ho didiʼak tuir kontratu.​—2 Tesalónika 3:10.

14. Ema Kristaun presiza halo saida antes halo negósiu hamutuk?

 ¹⁴ Oinsá se ita halo negósiu ho irmaun ida ka irmán ida? Karik ida-neʼe envolve osan neʼebé boot ka fó-empresta osan. Iha situasaun hanesan neʼe, ita bele aplika Bíblia nia prinsípiu ida: Hakerek buat hotu! Kuandu profeta Jeremias sosa rai, nia hakerek dokumentu rua, no sasin sira asina dokumentu ida, no nia rai dokumentu rua neʼe hotu atu bele uza iha futuru. (Jeremias 32:9-12; haree mós Génesis 23:16-20.) Ema balu hanoin katak hakerek akordu halo sira haree hanesan la fiar sira-nia maluk Kristaun. Maibé tuir loloos, hodi hakerek akordu hanesan neʼe, ita bele prevene problema oioin hanesan la komprende malu, laran-kanek no istori malu. No hanoin-hetan katak dame iha kongregasaun mak importante liu fali negósiu sira.​—1 Korinto 6:1-8; haree Apéndise 30.

15. Oinsá Jeová sente kona-ba negósiu-naʼin neʼebé la laran-moos?

¹⁵ Ita tenke laran-moos ba ema hotu, inklui ba sira neʼebé laʼós Testemuña ba Jeová. Laran-moos mak importante tebes ba Jeová. “Jeová hakribi dasin neʼebé la loos, maibé nia kontente ho dasin-fuan neʼebé loos.” (Provérbios 11:1; 20:10, 23) Iha Bíblia nia tempu, baibain ema uza dasin atu halo negósiu. Maibé negósiu-naʼin balu lohi ema hodi la fó tuir akordu neʼebé sira halo ona ka haruka ema selu osan barak liu fali folin neʼebé loloos. Nuneʼe mós ohin loron, negósiu-naʼin barak la laran-moos. No hanesan uluk, Jeová odi nafatin hahalok la laran-moos.

16, 17. Iha situasaun saida deʼit mak ita presiza kuidadu atu la hatudu laran-moos?

 ¹⁶ Ita hotu bele hasoru situasaun oioin neʼebé bele book ita atu la hatudu laran-moos, hanesan bainhira aplika ba serbisu, prenxe dokumentu legál ka ezame iha eskola. Ema barak sente katak la sala atu bosok, aumenta informasaun, ka la fó sai informasaun ho loloos. Ita la hakfodak ho ida-neʼe tanba Bíblia fó sai nanis katak iha loron ikus sira, ema sei “hadomi deʼit sira-nia an, hadomi osan, . . . la hadomi buat neʼebé diʼak”.​—2 Timóteo 3:1-5.

¹⁷ Dala ruma, ita haree ema neʼebé la laran-moos hetan susesu iha mundu neʼe. (Salmo 73:1-8) Karik ema Kristaun ida bele lakon ninia serbisu, lakon osan ka ema trata aat nia iha serbisu-fatin tanba hatudu laran-moos. Maibé ita-nia hakaʼas an atu hatudu laran-moos sei la saugati deʼit. Tanbasá?

18. Tanbasá naran diʼak mak folin-boot?

¹⁸ Atu iha naran diʼak nuʼudar ema laran-moos no ema bele konfia mak iha folin-boot, no ohin loron susar tebes atu hetan ema hanesan neʼe. Ita ida-idak iha oportunidade atu sai ema neʼebé iha naran diʼak hanesan neʼe. (Miqueias 7:2) Loos, ema balu karik goza Ita no dehan katak Ita beik-teen tanba Ita laran-moos. Maibé iha mós ema neʼebé hafolin Ita no tau fiar ba Ita. Iha mundu tomak, ema koñese Testemuña ba Jeová nuʼudar ema neʼebé laran-moos. Patraun balu gosta liu atu hili Testemuña sira nuʼudar serbisu-naʼin tanba patraun hatene katak Testemuña sira sei laran-moos.  No kuandu patraun hasai serbisu-naʼin seluk tanba la laran-moos, Testemuña sira la lakon serbisu.

19. Oinsá mak laran-moos liga ho Ita-nia relasaun diʼak ho Jeová?

¹⁹ Hatudu laran-moos iha buat hotu sei ajuda Ita iha konxiénsia neʼebé moos no dame iha laran. Ita bele banati-tuir Paulo neʼebé hakerek: “Ami fiar katak ami-nia konxiénsia moos.” (Ebreu 13:18) Importante liu mak Jeová, Ita-nia Aman domin nian, sei haree Ita-nia hakaʼas an atu laran-moos iha buat hotu, no nia hafolin ida-neʼe.​—Lee Salmo 15:1, 2; Provérbios 22:1.