1, 2. Ita bele halo saida atu hela nafatin iha Maromak nia domin?

 ITA hotu hakarak iha isin forte no saúde diʼak. Tan neʼe ita koko atu han ai-han neʼebé diʼak, halo ezersísiu beibeik, no tau matan ba ita-nia isin. Maski la fasil atu halo nuneʼe, maibé ita la rende an tanba ita gosta rezultadu neʼebé ita hetan. Tuir loloos, ita mós presiza sai forte no iha saúde diʼak iha dalan seluk.

² Maski ita komesa ona koñese Jeová, maibé ita presiza hametin ita-nia relasaun diʼak ho nia. Bainhira Judas anima ema Kristaun atu “hela nafatin iha Maromak nia domin”, nia esplika ba sira oinsá atu halo ida-neʼe. Nia hatete: “Hametin imi-nia fiar neʼebé santu.” (Judas 20, 21) Entaun oinsá mak ita bele hametin ita-nia fiar?

3-5. (a) Satanás hakarak Ita atu sente oinsá kona-ba halo tuir Jeová? (b) Oinsá Ita sente kona-ba Jeová nia lei no prinsípiu sira?

³ Importante atu fiar katak Jeová nia dalan sira mak diʼak. Satanás hakarak Ita atu hanoin katak susar liu atu halo tuir Jeová no Ita sei kontente liu se Ita deside rasik saida mak diʼak no saida mak aat. Hahú husi jardín  Eden, Satanás koko atu halo ema hanoin hanesan neʼe. (Génesis 3:1-6) No nia mós koko atu halo nuneʼe ohin loron.

⁴ Satanás mak loos ka lae? Jeová nia matadalan sira halo ita la livre ka lae? Lae. Imajina katak Ita laʼo daudaun iha jardín furak ida. Ita haree lutu aas taka netik área ida. Karik Ita hanoin: ‘Tanbasá ema tau lutu neʼe?’ Maibé iha momentu neʼe kedas, Ita rona leaun ida hasai lian iha lutu laran. Agora Ita sente oinsá kona-ba lutu neʼe? Ita sente agradese tebes tanba lutu neʼe proteje Ita atu leaun la han Ita. Jeová nia prinsípiu sira mak hanesan lutu neʼe, no Diabu mak hanesan leaun. Bíblia fó avizu mai ita: “Proteje imi-nia neon no matan-moris bá! Imi-nia inimigu, Diabu, laʼo bá-mai hanesan leaun ida neʼebé hasai lian makaʼas no buka atu han ema ruma.”​—1 Pedro 5:8.

⁵ Jeová hakarak ita atu iha moris diʼak. Nia lakohi Satanás lohi ita. Tan neʼe mak nia fó ita ukun-fuan no prinsípiu sira atu proteje ita no halo ita kontente. (Éfeso 6:11) Tiago hakerek: “Ema neʼebé hateke didiʼak ba ukun-fuan neʼebé perfeitu no fó liberdade, no kontinua halo tuir ukun-fuan neʼe . . . sei haksolok ho ninia serbisu.”​—Tiago 1:25.

6. Oinsá mak ita bele iha konfiansa katak Jeová nia dalan sira mak diʼak?

⁶ Bainhira ita halo tuir Jeová nia matadalan, ita-nia moris sai diʼak liu no ita-nia relasaun diʼak ho nia sai metin liután. Porezemplu, ita hetan benefísiu bainhira ita simu ninia konvite atu halo orasaun beibeik ba nia. (Mateus 6:5-8; 1 Tesalónika 5:17) Ita kontente bainhira halo tuir ninia matadalan atu halibur  hamutuk hodi adora nia no anima malu no mós bainhira ita hola parte beibeik atu haklaken no hanorin ema seluk. (Mateus 28:19, 20; Galásia 6:2; Ebreu 10:24, 25) Se ita hanoin kona-ba oinsá buat sira-neʼe ajuda ona ita atu iha fiar metin, ita sei iha konfiansa liután katak Jeová nia dalan sira mak diʼak.

7, 8. Saida mak bele ajuda ita atu la hanoin demais kona-ba koko neʼebé ita sei hetan iha futuru?

⁷ Karik ita hanoin barak katak ita-nia fiar sei hetan koko neʼebé makaʼas iha futuru. Se Ita sente hanesan neʼe, hanoin-hetan Jeová nia liafuan tuirmai neʼe: “Haʼu, Jeová, mak imi-nia Maromak, haʼu hanorin imi kona-ba buat neʼebé diʼak liu ba imi, no dirije imi iha dalan neʼebé imi tenke laʼo bá. Haʼu hakarak  atu imi halo tuir haʼu-nia mandamentu sira! Se imi halo nuneʼe, imi-nia dame sei sai hanesan mota no imi-nia hahalok loos sei sai hanesan tasi nia laloran.”​—Isaias 48:17, 18.

⁸ Bainhira ita halo tuir Jeová, ita-nia dame sei sai hanesan mota neʼebé nunka maran, no ita-nia hahalok loos sei sai hanesan tasi nia laloran neʼebé kontinua baku bá-mai. Maski buat oioin akontese iha ita-nia moris, ita bele laran-metin nafatin. Bíblia promete: “Entrega ó-nia laran-susar ba Jeová, no nia sei apoia ó. Nia sei nunka husik ema laran-loos atu monu.”​—Salmo 55:22.

9, 10. “Sai ema maduru” katak sá?

⁹ Se Ita hametin Ita-nia relasaun ho Jeová, Ita sei “laʼo ba oin hodi sai ema maduru”. (Ebreu 6:1) Sai ema maduru katak sá?

¹⁰ Ita la sai ema Kristaun neʼebé maduru tan deʼit ita-nia idade aumenta. Maibé atu sai maduru, Ita tenke haree Jeová nuʼudar Ita-nia Belun neʼebé diʼak liu no hakaʼas an atu iha hanoin hanesan nia. (João 4:23) Paulo hakerek: “Sira neʼebé moris tuir hakarak isin nian hanoin beibeik kona-ba hakarak isin nian, maibé sira neʼebé moris tuir espíritu hanoin beibeik kona-ba buat espíritu nian.” (Roma 8:5) Ema neʼebé maduru la hanoin deʼit atu buka ksolok ka rikusoin. Maibé, nia tau fokus atu serbí Jeová no halo desizaun diʼak iha ninia moris. (Provérbios 27:11; lee Tiago 1:2, 3.) Nia la husik ema seluk book nia atu halo sala. Ema neʼebé maduru hatene saida mak loos no hakaʼas an atu halo ida-neʼe.

11, 12. (a) Saida mak Paulo dehan kona-ba ema Kristaun nia “kbiit atu tetu didiʼak”? (b) Saida mak hanesan entre sai ema Kristaun neʼebé maduru no sai atleta?

 ¹¹ Atu sai ema maduru, ita presiza hakaʼas an duni. Apóstolu Paulo hakerek: “Ai-han toos mak ba ema maduru, ba sira neʼebé uza beibeik sira-nia kbiit atu tetu didiʼak, hodi halo nuneʼe sira treinu ona sira-nia kbiit neʼe atu hatene saida mak loos no saida mak sala.” (Ebreu 5:14) Liafuan “treinu” karik halo ita hanoin kona-ba atleta.

¹² Bainhira ita haree atleta profisionál, ita hatene katak nia presiza tempu no treinu atu bele sai atleta profisionál. Nia la moris mai nuʼudar atleta. Bainhira bebé ida moris, nia la hatene ho loloos oinsá atu uza ninia liman no ain. Maibé liutiha tempu balu, nia aprende oinsá kaer sasán ruma no oinsá atu laʼo. Liuhusi treinu, ema bele sai atleta profisionál. Nuneʼe mós ita presiza tempu no treinu atu sai ema Kristaun neʼebé maduru.

13. Saida mak bele ajuda ita atu iha hanoin hanesan Jeová?

¹³ Iha livru neʼe, ita aprende ona kona-ba oinsá ita bele iha hanoin hanesan Jeová. Ita aprende ona atu hafolin no gosta Jeová nia matadalan sira. Bainhira ita halo desizaun, husu ba Ita-nia an: ‘Bíblia nia ukun-fuan ka prinsípiu saida mak aplika iha situasaun neʼe? Oinsá haʼu bele aplika ida-neʼe? Jeová hakarak haʼu atu halo saida?’​—Lee Provérbios 3:5, 6; Tiago 1:5.

14. Se ita hakarak hametin ita-nia fiar, ita presiza halo saida?

¹⁴ Ita presiza kontinua hametin ita-nia fiar ba Jeová. Hanesan han ai-han neʼebé iha vitamina ajuda ita-nia isin sai forte, aprende kona-ba Jeová ajuda ita atu hametin ita-nia fiar. Bainhira ita komesa estuda Bíblia, ita aprende lia-loos báziku kona-ba Jeová no ninia dalan  sira. Maibé nuʼudar tempu liu daudaun, ita presiza komprende buat kleʼan husi Bíblia. Paulo hatete: “Ai-han toos mak ba ema maduru.” “Ai-han toos” neʼebé temi iha neʼe refere ba buat kleʼan husi Bíblia. Hodi aplika buat neʼebé ita aprende, ita bele hetan matenek. Bíblia fó-hatene ita: “Matenek mak buat neʼebé importante liu.”​—Provérbios 4:5-7; 1 Pedro 2:2.

15. Tanbasá importante atu hadomi Jeová no irmaun-irmán sira?

¹⁵ Atu nafatin iha isin forte no saúde diʼak, ita presiza kontinua tau matan ba ita-nia an. Nuneʼe mós, ema neʼebé maduru tenke kontinua hakaʼas an atu iha relasaun neʼebé metin ho Jeová. Paulo fó-hanoin ita: “Kontinua koko imi-nia an atu hatene se imi moris tuir fiar ka lae. Kontinua haree didiʼak imi ema oinsá.” (2 Korinto 13:5) Maibé, la toʼo atu iha deʼit fiar neʼebé metin, ita presiza buat seluk tan. Ita-nia domin ba Jeová no irmaun-irmán sira tenke kontinua sai boot. Paulo hatete: “Se haʼu [iha] . . . koñesimentu hotu, no se haʼu iha fiar boot toʼo bele muda foho, maibé haʼu la iha domin, haʼu la vale buat ida.”​—1 Korinto 13:1-3.

16. Satanás hakarak ita sente oinsá?

¹⁶ Satanás hakarak ita atu hanoin katak ita sei nunka bele halo Jeová kontente. Satanás hakarak ita sente laran-kraik no hanoin katak la iha solusaun ba ita-nia problema sira. Nia lakohi ita atu tau konfiansa ba ita-nia maluk Kristaun, no nia mós lakohi ita sente kontente. (Éfeso 2:2) Satanás hatene katak hanoin negativu bele estraga ita no mós ita-nia relasaun diʼak ho Maromak. Maibé Jeová fó ona esperansa ba ita no neʼe bele ajuda ita luta hasoru hanoin negativu.

17. Tanbasá esperansa importante?

 ¹⁷ Iha 1 Tesalónika 5:8, Bíblia bolu “esperansa salvasaun nian” nuʼudar kapasete no kompara neʼe ho kapasete neʼebé soldadu uza atu proteje sira-nia ulun iha funu. Bainhira ita tau esperansa ba Jeová nia promesa, neʼe bele proteje ita-nia neon no ajuda ita atu kontra hasoru ita-nia hanoin negativu.

18, 19. Oinsá mak esperansa fó forsa ba Jesus?

¹⁸ Jesus mós hetan forsa husi ninia esperansa. Iha ninia kalan ikus iha rai, nia hasoru situasaun susar neʼebé tuituir malu. Ninia belun diʼak ida sai traidór. Belun seluk nega nia. Belun sira seluk tan husik hela nia no halai. Ninia maluk ema Judeu sira kontra hasoru nia, no husu atu fó kastigu-mate ba nia. Saida mak ajuda nia atu tahan susar sira-neʼe? Bíblia hatán: “Tanba ksolok neʼebé tau ona iha ninia oin, nia tahan  iha ai-riin terus nian hodi la sente moe, no tuur ona iha Maromak nia kadunan sorin loos.”​—Ebreu 12:2.

¹⁹ Jesus iha esperansa katak hodi laran-metin ba ninia Aman, nia sei lori glória ba ninia Aman no hatudu katak Satanás bosok-teen. Neʼe halo nia kontente. Nia mós iha esperansa katak lakleur tan nia sei hamutuk fali ho ninia Aman iha lalehan. Neʼe mós ajuda nia atu tahan susar sira. Hanesan Jesus, ita mós tenke tau fokus ba ita-nia esperansa. Neʼe ajuda ita atu tahan buat hotu neʼebé akontese.

20. Saida mak bele ajuda Ita atu iha hanoin pozitivu nafatin?

²⁰ Jeová haree Ita-nia fiar no mós haree bainhira Ita tahan susar sira. (Isaias 30:18; lee Malaquias 3:10.) Nia promete atu ‘fó buat neʼebé Ita-nia laran hakarak’. (Salmo 37:4) Tan neʼe kontinua tau fokus ba Ita-nia  esperansa. Satanás hakarak Ita atu lakon esperansa no sente katak Jeová nia promesa nunka sai loos. Hakaʼas an bá atu kontra hasoru hanoin negativu! Se Ita nota katak Ita-nia esperansa sai fraku, husu Jeová nia ajuda. Hanoin-hetan liafuan iha Filipe 4:6, 7: “Keta hanoin resin kona-ba buat ida, maibé iha situasaun hotu husu ajuda husi Maromak liuhusi orasaun no harohan no mós fó agradese, no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.”

21, 22. (a) Saida mak Jeová nia hakarak ba rai? (b) Ita hakarak atu halo saida?

²¹ Uza tempu atu medita beibeik kona-ba futuru furak. Lakleur tan, ema hotu iha mundu sei adora Jeová. (Apokalipse 7:9, 14) Hanoin toʼok kona-ba moris iha mundu foun. Neʼe sei furak liu fali buat neʼebé ita bele imajina! Satanás no anju aat sira, no buat aat hotu sei lakon. Ita sei la moras no la mate tan. Maibé, loroloron Ita sei hadeer ho saúde neʼebé diʼak no kontente. Ema hotu sei serbisu hamutuk atu halo mundu sai paraízu. Ema hotu sei iha ai-han diʼak no fatin seguru atu hela. Ema aat ka ema neʼebé halo violénsia sei la iha tan, maibé iha deʼit ema neʼebé hatudu laran-diʼak ba malu. Tuirmai, ema hotu iha rai sei haksolok tanba “hetan liberdade neʼebé furak nuʼudar Maromak nia oan sira”.​—Roma 8:21.

²² Jeová hakarak Ita atu haree nia nuʼudar Ita-nia Belun neʼebé diʼak liu. Tan neʼe, hakaʼas an atu halo tuir Jeová no hakbesik liután ba nia loroloron. Mai ita hotu hela nafatin iha Maromak nia domin tinan ba tinan ba nafatin!​—Judas 21.