1, 2. (a) Ita presiza halo tuir sé nia matadalan? (b) Ita sei hetan resposta ba pergunta saida deʼit iha kapítulu neʼe?

 BAINHIRA Ita kiʼik, karik Ita-nia inan-aman husu Ita atu halo buat neʼebé Ita la gosta. Ita hadomi Ita-nia inan-aman no hatene katak Ita tenke halo tuir sira. Maibé, dala ruma Ita lakohi halo tuir.

² Ita hatene katak ita-nia Aman Jeová hadomi ita. Nia tau matan ita no fó buat hotu neʼebé ita presiza atu bele moris kontente. Nia fó matadalan neʼebé ita presiza atu hetan susesu. Dala ruma, nia uza ema seluk atu fó matadalan ba ita. Ita presiza respeitu Jeová nia podér. (Provérbios 24:21) Maibé tanbasá dala ruma susar atu halo tuir matadalan sira? Tanbasá Jeová husu ita atu halo tuir matadalan sira? No oinsá ita hatudu katak ita respeitu ninia podér?​—Haree Apéndise 9.

3, 4. Tanbasá ema sai la perfeitu? Tanbasá dala ruma susar atu simu matadalan?

³ Ita ema sente susar atu sempre halo tuir matadalan. Neʼe komesa husi tempu neʼebé mane no feto  primeiru, Adão no Eva, halo sala. Maromak kria sira nuʼudar ema perfeitu, maibé sira kontra hasoru Maromak nia podér. Hahú husi tempu neʼebá, ema hotu la perfeitu ona. Neʼe mak razaun ida tanbasá susar ba ita atu simu matadalan husi Jeová no husi ema. Razaun seluk mak ema sira neʼebé Jeová uza atu fó matadalan ba ita mós la perfeitu.​—Génesis 2:15-17; 3:1-7; Salmo 51:5; Roma 5:12.

⁴ Tanba ita la perfeitu, fasil ba ita atu sai foti an. Neʼe halo susar ba ita atu simu matadalan. Porezemplu, iha Izraél antigu, Jeová hili Moisés atu dirije ninia povu. Mane ida naran Kora, neʼebé serbí Jeová ba tinan barak ona, sai foti an no la hatudu respeitu ba Moisés. Maski Moisés dirije Jeová nia povu, maibé nia la foti an. Bíblia dehan katak nia mak ema haraik an liu hotu iha tempu neʼebá. Maibé Kora la simu Moisés nia matadalan. Nia mós dada ema-lubun boot atu apoia nia no kontra hasoru Moisés. Saida mak akontese ba Kora no kontradór seluk? Sira mate. (Números 12:3; 16:1-3, 31-35) Bíblia fó ezemplu barak neʼebé hanorin ita katak foti an mak perigozu.​—2 Krónikas 26:16-21; haree Apéndise 10.

5. Oinsá mak ema balu uza sala sira-nia podér?

⁵ Durante ema nia istória, ema barak uza sala sira-nia podér, no neʼe halo ema la respeitu tan autoridade sira. (Lee Eclesiastes 8:9.) Porezemplu, bainhira Jeová hili Saul atu sai liurai iha Izraél, nia mak ema diʼak no haraik an. Maibé nia husik hahalok foti an no laran-moras sai buras iha ninia laran, no neʼe  book nia atu fó-terus ba David neʼebé laran-moos. (1 Samuel 9:20, 21; 10:20-22; 18:7-11) Tuirmai David sai liurai, no nia mak liurai ida neʼebé diʼak iha Izraél. Maibé dala ruma, David mós uza sala ninia podér. Nia halo relasaun seksuál ho Bat-Seba, Urias nia feen, no tuirmai, nia koko atu subar ninia sala hodi haruka Urias bá funu atu ema bele oho Urias.​—2 Samuel 11:1-17.

6, 7. (a) Ita-nia domin ba Jeová book ita atu halo saida? (b) Saida mak ajuda ita atu halo tuir maski dala ruma susar?

⁶ Ita respeitu matadalan husi Jeová tanba ita hadomi nia. Ita hadomi Jeová liu fali ema ka buat hotu, tan neʼe ita hakarak atu halo nia kontente. (Lee Provérbios 27:11; Marcos 12:29, 30.) Hahú husi tempu neʼebé ema primeiru hela iha jardín Eden, Satanás hakarak ema atu hanoin katak Jeová la iha direitu atu fó-hatene kona-ba saida mak ita tenke halo. Maibé ita hatene katak neʼe la loos. Ita konkorda ho liafuan sira tuirmai: “Jeová, ami-nia Maromak, Ita-Boot merese simu glória, respeitu no kbiit, tanba Ita kria ona buat hotu, no tanba Ita-nia hakarak mak buat hotu iha no kria tiha.”​—Apokalipse 4:11.

⁷ Bainhira Ita kiʼik, karik Ita-nia inan-aman hanorin Ita atu halo tuir sira maski dala ruma susar. Nuneʼe mós, Jeová nia atan sira dala ruma sente susar atu halo tuir nia. Maibé ita hadomi no respeitu Jeová, tan neʼe ita hakaʼas an atu halo tuir nia. Jesus hatudu ezemplu diʼak mai ita. Nia sempre halo tuir  Jeová maski dala ruma susar. Tan neʼe mak nia bele dehan ba ninia Aman: “Laʼós tuir haʼu-nia hakarak, maibé halo tuir Ita-nia hakarak bá.”​—Lucas 22:42; haree Apéndise 11.

8. Liuhusi dalan saida deʼit mak Jeová fó matadalan ba ita? (Haree kaixa “ Rona ba konsellu”.)

⁸ Ohin loron, Jeová fó matadalan ba ita liuhusi dalan oioin. Porezemplu, nia fó Bíblia ba ita. Nia mós fó katuas kongregasaun sira ba ita. Ita hatudu respeitu ba Jeová nia podér bainhira ita respeitu sira neʼebé Jeová uza atu dirije ita. Se ita lakohi simu sira-nia ajuda, neʼe hanesan ita kontra Jeová. Bainhira ema Izraél kontra Moisés, Jeová haree ida-neʼe nuʼudar problema sériu. Neʼe hanesan ema Izraél kontra nia.​—Números 14:26, 27; haree Apéndise 12.

9. Oinsá mak domin bele book ita atu halo tuir matadalan sira?

⁹ Bainhira ita respeitu ema neʼebé dirije ita, neʼe hatudu katak ita hadomi ita-nia irmaun-irmán sira. Imajina toʼok, bainhira akontese dezastre naturais, baibain ema serbisu hamutuk atu salva ema barak. Atu bele halo serbisu ho didiʼak, tenke iha ema ida mak organiza no ema hotu neʼebé hola parte tenke halo tuir matadalan sira. Maibé oinsá se ema ida lakohi halo tuir matadalan no halo tuir deʼit ninia hakarak rasik? Maski nia iha hanoin neʼebé diʼak, maibé tanba nia lakohi rona, neʼe bele hamosu problema ba ema seluk, no karik halo ema seluk hetan susar. Nuneʼe mós, se ita lakohi halo tuir matadalan husi Jeová no husi ema sira neʼebé Jeová fó ona responsabilidade, karik neʼe lori susar  ba ema seluk. Maibé bainhira ita halo tuir Jeová, ita hatudu katak ita hadomi ita-nia irmaun-irmán sira no respeitu Jeová nia arranju.​—1 Korinto 12:14, 25, 26.

10, 11. Ita sei koʼalia liután kona-ba saida?

¹⁰ Buat hotu neʼebé Jeová haruka ita atu halo mak lori benefísiu ba ita rasik. Bainhira ita hatudu respeitu ba sira neʼebé iha podér iha governu, no sira neʼebé iha responsabilidade iha família laran, no iha kongregasaun, neʼe sei lori benefísiu ba ita hotu.​—Deuteronómio 5:16; Roma 13:2-4; Éfeso 6:2, 3; Ebreu 13:17.

¹¹ Bainhira ita komprende tanbasá Jeová hakarak ita hatudu respeitu ba ema seluk, neʼe bele ajuda ita atu hatudu respeitu. Mai ita koʼalia liután kona-ba dalan tolu atu hatudu respeitu.

12. Oinsá mak laʼen ida bele hatudu respeitu ba Jeová nia podér?

¹² Jeová kria família no fó knaar ba ema ida-idak iha família laran. Bainhira ema ida-idak komprende saida mak Jeová hakarak sira atu halo, arranju família nian sei laʼo ho diʼak no família tomak sei hetan benefísiu. (1 Korinto 14:33) Jeová hili laʼen atu sai nuʼudar família nia ulun. Neʼe katak Jeová hakarak laʼen atu tau matan no dirije ninia feen no oan sira ho domin. Laʼen sei hatán ba Jeová kona-ba dalan neʼebé nia tau matan ba ninia família. Laʼen Kristaun tenke hatudu laran-diʼak, domin no trata didiʼak ninia família hanesan Jesus trata kongregasaun. Bainhira laʼen halo nuneʼe, nia hatudu respeitu ba Jeová.​—Éfeso 5:23; haree Apéndise 13.

13. Oinsá mak feen ida hatudu respeitu ba ninia laʼen?

 ¹³ Feen Kristaun mós iha knaar importante. Nia apoia ninia laʼen neʼebé hakaʼas an atu sai família nia ulun neʼebé diʼak. Feen no laʼen iha responsabilidade atu treinu oan sira. Dalan ida atu feen hanorin oan sira kona-ba hatudu respeitu mak liuhusi ninia ezemplu rasik. (Provérbios 1:8) Nia respeitu ninia laʼen no apoia ninia laʼen nia desizaun. Maski dala ruma nia la konkorda ho ninia laʼen nia hanoin, maibé nia fó sai ninia sentimentu ho laran-diʼak no respeitu. Se feen Kristaun ida nia laʼen laʼós Testemuña, neʼe bele lori situasaun susar. Maibé se nia kontinua hadomi no respeitu ninia laʼen, karik loron ida ninia laʼen mós hakarak hatene no adora Jeová.​—Lee 1 Pedro 3:1.

14. Oinsá mak oan sira bele hatudu respeitu ba sira-nia inan-aman?

¹⁴ Oan sira mak prezente folin-boot husi Jeová, no sira presiza protesaun no matadalan. Bainhira oan sira halo tuir sira-nia inan-aman, sira halo inan-aman kontente. Importante liu mak sira hatudu respeitu ba Jeová no halo nia kontente. (Provérbios 10:1) Iha família barak, inan ka aman deʼit mak haboot oan. Situasaun hanesan neʼe mak susar ba inan ka aman no mós oan. Maibé bainhira oan halo tuir no apoia inan ka aman, moris família nian sei sai diʼak liu. Maski la iha família ida neʼebé perfeitu, maibé família hotu bele sai kontente bainhira ema ida-idak iha família laran halo tuir Jeová nia matadalan. Neʼe lori glória ba Jeová, Ida neʼebé kria família hotu.​—Éfeso 3:14, 15.

15. Jeová fó ona responsabilidade ba sé deʼit atu tau matan ba kongregasaun? Oinsá ita bele hatudu respeitu ba sira?

¹⁵ Jeová fó matadalan ba ita liuhusi kongregasaun Kristaun, no nia fó ona podér tomak ba Jesus atu tau matan ba kongregasaun. (Koloso 1:18) No Jesus fó responsabilidade ba “atan laran-metin no matenek” atu tau matan ba Maromak nia povu iha rai. (Mateus 24:45-47) Ohin loron, “atan laran-metin no matenek” mak Grupu Administradór. Grupu Administradór fó buat neʼebé ita presiza iha tempu neʼebé loos atu ajuda hametin ita-nia fiar. Iha mundu tomak, katuas kongregasaun, atan ba kongregasaun, no katuas área apoia kongregasaun no simu matadalan husi Grupu Administradór. Irmaun sira-neʼe hotu iha responsabilidade atu tau matan ba ita. Sira sei hatán ba Jeová kona-ba dalan neʼebé sira halaʼo sira-nia responsabilidade neʼe. Kuandu ita respeitu irmaun sira-neʼe, ita respeitu Jeová.​—Lee 1 Tesalónika 5:12; Ebreu 13:17; haree Apéndise 14.

16. Tanbasá mak ita bele dehan katak espíritu santu mak hili katuas no atan ba kongregasaun?

¹⁶ Katuas no atan ba kongregasaun ajuda kongregasaun atu laran-metin nafatin no iha unidade. Maibé sira mós la perfeitu hanesan ita. Entaun oinsá sira bele simu knaar neʼe? Irmaun sira-neʼe tenke kumpre kritéria iha Bíblia laran. (1 Timóteo 3:1-7, 12; Tito 1:5-9) Jeová uza ninia espíritu santu atu dirije ema hakerek kritéria sira-neʼe. Bainhira katuas sira koʼalia hamutuk kona-ba sé mak bele serbí nuʼudar katuas ka atan ba kongregasaun, katuas sira halo orasaun ba  Jeová atu husu ninia espíritu santu. Klaru katak Jeová no Jesus mak dirije kongregasaun. (Apóstolu 20:28) Mane sira neʼebé simu knaar atu apoia no tau matan ba ita mak prezente husi Maromak.​—Éfeso 4:8.

17. Atu hatudu respeitu ba arranju kona-ba ulun, dala ruma irmán ida presiza halo saida?

¹⁷ Dala ruma kongregasaun balu la iha katuas ka atan ba kongregasaun atu tau matan ba knaar ruma. Entaun, baibain irmaun ida neʼebé hetan ona batizmu bele ajuda, maibé se la iha irmaun, karik irmán ida presiza halo knaar neʼebé baibain irmaun sira mak halo. Se nuneʼe, irmán neʼe tenke taka ninia ulun ho hena ka xapeu. (1 Korinto 11:3-10) Hodi halo ida-neʼe, irmán neʼe hatudu katak nia respeitu Jeová nia arranju kona-ba ulun iha família laran no mós iha kongregasaun.​—Haree Apéndise 15.

18, 19. (a) Ita aprende saida husi Roma 13:1-7? (b) Oinsá ita hatudu respeitu ba ema iha governu no mós ema seluk neʼebé iha podér?

¹⁸ Ohin loron, Jeová husik governu sira atu kaer podér ruma, no ita tenke hatudu respeitu ba sira. Sira tau matan ba nasaun no komunidade sira atu bele laʼo ho diʼak no sira halaʼo serbisu oioin neʼebé povu presiza. Ema Kristaun halo tuir matadalan neʼebé hakerek iha Roma 13:1-7. (Lee.) Ita respeitu “autoridade sira” no halo tuir lei iha nasaun ka komunidade neʼebé ita hela bá. Lei sira-neʼe karik fó-hatene ita saida mak ita tenke halo iha família, negósiu, no mós ita-nia rikusoin. Porezemplu, ita selu taxa no prenxe ho loloos dokumentu sira husi governu. Maibé ita sei  halo saida se governu husu ita atu halo buat neʼebé kontra Maromak nia ukun-fuan? Apóstolu Pedro dehan: “Ami tenke halo tuir Maromak nuʼudar ukun-naʼin duké halo tuir ema.”​—Apóstolu 5:28, 29.

¹⁹ Ita tenke hatudu respeitu nafatin bainhira koʼalia ho autoridade sira, hanesan juís ka polísia. Joven Kristaun sira respeitu sira-nia mestre no serbisu-naʼin seluk iha eskola. Iha serbisu-fatin, ita respeitu patraun maski serbisu-naʼin seluk la halo nuneʼe. Bainhira ita hatudu respeitu, ita banati-tuir apóstolu Paulo, neʼebé respeitu ema-boot sira maski dala ruma susar. (Apóstolu 26:2, 25) Maski ema trata aat ita, ita kontinua hatudu respeitu.​—Lee Roma 12:17, 18; 1 Pedro 3:15.

20, 21. Ita bele hetan benefísiu saida bainhira ita hatudu respeitu ba ema seluk?

²⁰ Iha mundu tomak, ema barak liután la hatudu respeitu ba ema seluk. Maibé Jeová nia povu la hanesan neʼe. Ita hakaʼas an atu hatudu respeitu ba ema hotu. Ita halo tuir matadalan husi apóstolu Pedro neʼebé dehan: “Hatudu respeitu ba ema oioin.” (1 Pedro 2:17) Ema nota bainhira ita hatudu respeitu. Jesus hatete: “Husik imi-nia naroman nabilan iha ema nia oin, atu sira bele haree imi-nia hahalok diʼak no fó hahiʼi ba imi-nia Aman neʼebé iha lalehan.”​—Mateus 5:16.

²¹ Bainhira ita hatudu respeitu iha ita-nia família, iha kongregasaun, no iha área seluk, ita-nia ezemplu diʼak dala ruma bele book ema seluk atu aprende liután kona-ba Jeová. Hodi respeitu ema seluk, ita hatudu katak ita respeitu Jeová. Ida-neʼe halo Jeová kontente no hatudu ba nia katak ita hadomi nia.