IHA dezeñu neʼe, saida mak la hanesan? Loos, iha ema iha neʼe. Sira mak mane no feto primeiru. Sé mak halo sira? Maromak. Hatene Maromak nia naran ka lae? Jeová. Mane no feto neʼe naran Adão no Eva.

Maromak Jeová halo Adão hanesan neʼe. Nia foti rai-rahun husi rai no halo neʼe sai ema nia isin neʼebé furak tebes. Depois nia huu iis ba ema neʼe nia inus, no Adão sai moris.

Maromak Jeová fó serbisu ida ba Adão. Nia haruka Adão atu fó naran ba animál hotu-hotu. Kleur ona Adão karik haree animál sira-neʼe, tan neʼe nia bele hili naran neʼebé loos. Maibé, kuandu nia fó naran ba animál sira, nia hahú hatene buat ruma. Hatene saida mak neʼe?

Iha animál inan no animál aman. Iha elefante-inan no elefante-aman, no iha leaun-inan no leaun-aman. Maibé, Adão mesak deʼit. Nuneʼe, Jeová halo Adão toba-dukur tebes, no nia foti ruin sorin ida husi Adão nia isin. Ho ruin neʼe, Jeová halo feto ida ba Adão, no nia sai Adão nia feen.

Agora, Adão laran-kontente tebes! No Eva mós kontente tebes atu hela iha jardín furak hanesan neʼe! Agora, sira bele hetan oan no moris kontente hamutuk.

Jeová hakarak Adão no Eva atu moris ba nafatin. Nia hakarak sira atu halo mundu tomak sai kapás hanesan jardín Eden. Adão no Eva laran-ksolok tebes kuandu sira hanoin kona-ba serbisu neʼe! Se ó iha neʼebá, ó mós gosta ka lae, atu ajuda halo Rai sai fatin kapás? Maibé, lakleur, Adão no Eva lakon sira-nia moris neʼebé kontente. Mai ita haree tanbasá.