HAREE ba Caim no Abel agora. Sira sai boot ona. Caim sai toʼos-naʼin. Nia kuda ai-fuan no modo.

Abel sai bibi-atan. Nia gosta hakiak bibi-oan sira. Bibi-oan neʼe sai boot, no depois Abel iha bibi-lubun atu hein.

Iha loron ida Caim no Abel fó prezente ba Maromak. Caim fó modo no ai-fuan husi ninia toʼos. No Abel fó bibi diʼak liu hotu. Jeová kontente ho Abel no ninia prezente. Maibé, nia la kontente ho Caim no ninia prezente. Hatene tanbasá?

La’ós tanba Abel nia prezente mak diʼak liu deʼit. Maibé tanba Abel ema diʼak. Nia hadomi Jeová no nia maun. Maibé Caim aat; nia la hadomi nia alin.

Nuneʼe, Maromak fó-hatene Caim katak nia tenke troka nia an. Maibé Caim lakohi rona. Nia hirus tebes tanba Maromak gosta liu Abel. Nuneʼe Caim hatete ba Abel: ‘Mai ita bá toʼos.’ Iha neʼebá, kuandu sira mesak deʼit, Caim baku nia alin Abel. Nia baku Abel makaʼas, no Abel mate. Caim nia hahalok aat tebes, loos ka lae?

Maski Abel mate tiha ona, Maromak hanoin hela kona-ba nia. Abel diʼak, no Jeová nunka haluha ema hanesan neʼe. Nuneʼe Jeová sei fó moris fali ba Abel. Depois Abel bele moris iha Rai ba nafatin. Kontente ka lae atu koñese ema hanesan Abel?

Maibé Maromak la kontente ho ema hanesan Caim. Tan neʼe, depois Caim oho nia alin, Maromak fó kastigu ba Caim hodi haruka nia ba fatin dook husi nia família. Kuandu Caim bá moris iha fatin seluk, nia lori mós alin-feto ida atu sai ninia feen.

Depois Caim no nia feen iha oan sira. Adão no Eva nia oan-mane no oan-feto seluk mós kaben, no sira mós iha oan sira. Lakleur iha ema barak iha mundu. Mai ita aprende kona-ba ema balu neʼe.