DEPOIS Adão no Eva sai tiha husi jardín Eden, sira hetan susar barak. Sira tenke serbisu makaʼas atu buka hahán. La iha ai neʼebé fó fuan barak, maibé ai-tarak no duʼut fuik mak barak iha fatin hotu. Ida-neʼe mak akontese ho Adão no Eva kuandu sira la halo tuir Maromak no la sai Maromak nia belun tan.

Maibé, buat aat liu mak Adão no Eva sei mate. Hanoin-hetan ka lae, Maromak fó-hatene ona katak se sira han ai-fuan husi ai-hun ida, sira sei mate. Neʼe duni, loron neʼe kedas neʼebé sira han ai-fuan neʼe, sira hahú mate. Sira beik duni tanba la rona Maromak!

Depois Maromak hasai Adão no Eva husi jardín Eden mak sira iha oan. Tan neʼe, oan sira mós sei sai katuas-ferik no mate.

Se Adão no Eva halo tuir Jeová karik, sira ho sira-nia oan hotu sei moris kontente. Sira hotu bele moris kontente ba nafatin iha Rai. Sei la iha ema ida neʼebé sai katuas-ferik, hetan moras, no mate.

Maromak hakarak ema atu moris kontente ba nafatin, nuneʼe Nia promete katak ida-neʼe sei akontese duni. La’ós deʼit katak mundu tomak sei sai furak, maibé mós ema hotu sei iha saúde neʼebé diʼak. No ema hotu iha Rai sei sai belun diʼak ba malu no ho Maromak.

Maibé, Eva laʼós Maromak nia belun tan. Nuneʼe, kusta tebes kuandu nia tuur ahi. Nia hetan moras tebes. Tanba la halo tuir Maromak, nia tenke hetan susar barak. Neʼe loos ka lae?

Adão no Eva iha oan-mane no feto barak. Bainhira sira hetan oan-mane primeiru, sira hanaran Caim. Oan-mane segundu, sira hanaran Abel. Saida mak akontese ho sira naʼin-rua? Hatene ka lae?