HAREE saida mak akontese agora. Adão no Eva laʼo sai husi jardín Eden neʼebé furak. Hatene tanbasá?

Tanba sira halo buat ruma neʼebé aat tebes. Nuneʼe Jeová kastigu sira. Hatene buat aat saida mak Adão no Eva halo?

Sira halo buat ruma neʼebé Maromak hatete labele halo. Maromak dehan ba sira katak sira bele han ai hotu nia fuan. Maibé husi ai-hun ida, Maromak hatete labele han nia fuan. Se han karik, sira sei mate. Ai-hun neʼe mak Maromak nian. No ita hatene katak sala atu foti ema seluk nia sasán, loos ka lae? Entaun, saida mak akontese?

Loron ida, kuandu Eva mesamesak iha jardín laran, samea ida koʼalia ba nia. Hanoin toʼok! Samea neʼe haruka Eva atu han ai-fuan husi ai-hun neʼebé Maromak bandu. Maibé uluk, Jeová la halo samea neʼebé bele koʼalia. Entaun, ida-neʼe hatudu katak iha kriatura seluk mak halo samea neʼe bele koʼalia. Sé mak neʼe?

La’ós Adão. Hanoin-hetan ka lae, Jeová halo kriatura barak tempu kleur ona molok nia halo mundu. Nuneʼe, tenkesér husi sira-neʼe ida. Sira-neʼe mak anju, no ita la haree anju sira-neʼe. Iha anju ida neʼebé sai foti-an tebes. Nia hahú hanoin katak nia mak tenke sai ukun-naʼin hanesan Maromak. No mós, nia hakarak ema atu halo tuir nia, laʼós halo tuir Jeová. Anju ida-neʼe mak halo samea neʼe bele koʼalia.

Anju ida-neʼe bosok Eva. Nia hatete ba Eva katak se han ai-fuan neʼe, nia sei sai hanesan Maromak. Eva fiar ida-neʼe. Nuneʼe, nia han ai-fuan neʼe, no Adão mós han. Adão no Eva la halo tuir Maromak, tan neʼe mak sira lakon sira-nia hela-fatin iha jardín neʼebé furak.

Maibé, loron ida, Maromak sei halo Rai tomak sai fatin kapás hanesan jardín Eden. Ita sei aprende oinsá mak ó mós bele ajuda atu halo Rai sai fatin kapás. Agora, mai ita haree saida mak akontese ba Adão no Eva.