FATIN ida neʼebé ema hela depois Rai-Nabeen mak Ur. Ur sai sidade importante ho uma kapás barak. Maibé, ema iha neʼebá adora maromak falsu sira, hanesan sira halo kuandu iha Babel. Ema iha Ur no Babel la hanesan Noé no nia oan-mane Sem, neʼebé serbí Jeová nafatin.

Ikusliu, tinan 350 depois rai-nabeen, Noé, neʼebé fiar-metin, mate. Tinan rua tuirmai, ema iha dezeñu neʼe moris. Nia espesiál tebes ba Maromak. Nia naran Abraão. Nia moris hamutuk ho nia família iha Ur.

Loron ida, Jeová hatete ba Abraão: ‘Husik Ur no ó-nia maluk sira, no bá rai ida neʼebé haʼu sei hatudu ba ó.’ Abraão halo tuir Maromak hodi husik buat diʼak hotu iha Ur ka lae? Sin, nia halo duni. Tanba Abraão sempre halo tuir Maromak mak ita koñese nia nuʼudar Maromak nia belun.

Abraão nia família balu husik Ur no bá ho nia. Ninia aman Tera bá. Ninia sobriñu Lot mós bá. Loos duni, Abraão nia feen Sara bá hotu. Tuirmai, sira toʼo sidade naran Haran, no iha neʼe mak Tera mate. Sira dook husi Ur.

Depois tempu uitoan, Abraão ho nia umakain husik Haran no bá rai naran Kanaan. Iha neʼebá Jeová dehan: ‘Rai neʼe mak haʼu sei fó ba ó-nia oan sira.’ Abraão hela iha Kanaan no moris iha tenda.

Maromak ajuda Abraão, no nia hetan bibi-lubun boot no animál seluk barak, no atan atus ba atus. Maibé, nia no Sara la iha oan.

Kuandu Abraão tinan 99, Jeová hatete: ‘Haʼu promete katak ó sei sai aman ba nasaun barak.’ Maibé, oinsá mak ida-neʼe bele mosu, tanba Abraão no Sara katuas no ferik ona, no la bele hetan oan?