ISTÓRIA 11
Arkiris primeiru
HATENE saida mak Noé halo kuandu nia no ninia família foin sai husi ró boot? Nia oferese prezente ida ba Maromak. Bele haree nia halo ida-neʼe iha dezeñu iha kraik. Noé oferese animál sira atu fó obrigadu ba Maromak tanba salva nia família husi rai-nabeen boot.
Ó hanoin katak Jeová kontente ho prezente neʼe ka lae? Sin, nia kontente. Tan neʼe, nia promete ba Noé katak nia sei nunka tan halakon mundu ho rai-nabeen.
Lakleur, rai sai maran, no Noé no nia família komesa sira-nia moris foun iha ró boot nia liʼur. Maromak fó bensaun ba sira no dehan ba sira: ‘Imi tenke iha oan barak no sai barak toʼo ema moris iha mundu tomak.’
Maibé depois, kuandu ema rona kona-ba rai-nabeen boot, karik sira sei taʼuk katak rai-nabeen hanesan neʼe sei mosu fali. Nuneʼe, Maromak fó buat ida hodi fó-hanoin ba ema kona-ba Ninia promesa atu nunka tan halakon mundu tomak ho rai-nabeen. Hatene saida mak nia fó? Arkiris.
Dala barak, ita bele haree arkiris bainhira loro-matan naroman iha tempu udan. Arkiris iha kór barak neʼebé furak. Haree tiha ona ka lae? Bele haree ida iha dezeñu neʼe?
Maromak dehan: ‘Haʼu promete katak haʼu sei nunka tan halakon ema no animál hotu ho rai-nabeen. Haʼu sei tau arkiris iha kalohan. Bainhira arkiris mosu, haʼu sei haree no hanoin-hetan haʼu-nia promesa.’
Nuneʼe, kuandu ó haree arkiris, neʼe fó-hanoin kona-ba saida? Sin, kona-ba Maromak nia promesa, katak nia sei nunka tan halakon mundu ho rai-nabeen boot.