HATENE feto iha dezeñu neʼe naran sá? Nia naran Rebeca. Mane neʼebé nia atu hasoru mak naran Isaac. Nia sei sai Isaac nia feen. Oinsá mak ida-neʼe akontese?

Sin, Isaac nia aman Abraão, hakarak hetan feen diʼak ida ba nia oan. Nia lakohi Isaac kaben ho feto husi Kanaan, tanba sira adora maromak falsu sira. Tan neʼe, Abraão bolu nia atan no dehan: ‘Haʼu hakarak ó atu fila fali ba Haran, haʼu-nia família nia rai, atu hetan feen ida ba haʼu-nia oan Isaac.’

Iha tempu neʼebá kedas, Abraão nia atan lori kuda-kamelu sanulu no laʼo-rai dook toʼo Haran. Kuandu nia besik tiha Abraão nia família nia rai, nia para iha bee-matan ida. Lokraik ona, no feto sira atu mai hodi kuru bee. Entaun, Abraão nia atan halo orasaun ba Jeová. Nia dehan: ‘Halo favór, haruka feto neʼebé ó hili nuʼudar Isaac nia feen fó bee mai haʼu no kuda-kamelu hotu.’

Lakleur Rebeca mai atu kuru bee. Kuandu atan neʼe husu atu fó bee ba nia, Rebeca fó. Depois, nia kuru bee barak ba kuda-kamelu hotu neʼebé hamrook. Neʼe mak serbisu makaʼas tebes, tanba kuda-kamelu hemu bee barak la halimar.

Kuandu Rebeca halo neʼe hotu, Abraão nia atan husu Rebeca nia aman nia naran. Nia mós husu atu toba iha sira-nia uma. Rebeca hatete: ‘Haʼu-nia aman naran Betuel, no ami iha fatin hodi Ita-Boot bele hela hamutuk ho ami.’ Atan neʼe hatene katak Betuel mak Abraão nia sobriñu, Abraão nia alin Naor nia oan. Nuneʼe, nia hakneʼak no fó obrigadu ba Jeová tanba lori nia ba Abraão nia família.

Kalan neʼe Abraão nia atan fó-hatene Betuel no nia oan-mane Labão, tansá nia mai. Sira husik Rebeca bá atu kaben ho Isaac. Saida mak Rebeca hatete kuandu sira husu nia? Nia hatete: ‘Sin, haʼu hakarak bá.’ Nuneʼe, loron tuirmai, sira sai kuda-kamelu no komesa laʼo-rai dook toʼo Kanaan.

Kuandu sira toʼo, lokraik ona. Rebeca haree mane ida laʼo iha toʼos. Mane neʼe Isaac. Nia kontente atu hasoru Rebeca. Tinan tolu liubá, nia inan Sara mate tiha, no nia triste hela. Maibé lakleur, Isaac hadomi tebes Rebeca, no nia kontente fali.