JOSÉ tinan 17 deʼit bainhira ema lori nia ba Ejitu. Sira faʼan nia ba ema naran Potifar. Potifar serbisu ba Ejitu nia liurai, neʼebé iha títulu Faraó.

José serbisu makaʼas ba nia naʼi, Potifar. Tan neʼe, kuandu José sai boot, Potifar fó nia knaar atu toma konta ba nia umakain tomak. Se nuneʼe, tanbasá mak ita haree José iha kadeia laran? Tanba Potifar nia feen nia hahalok.

José sai mane neʼebé bonitu tebes, no Potifar nia feen hakarak toba hamutuk ho nia. Maibé José hatene katak ida-neʼe sala, no nia lakohi halo nuneʼe. Potifar nia feen hirus tebes. Nuneʼe, kuandu nia laʼen fila ba uma, nia bosok hodi dehan: ‘José, ema aat neʼe, koko atu toba hamutuk ho haʼu!’ Potifar fiar nia feen, no sai hirus tebes ba José. Tan neʼe, nia hatama José iha komarka laran.

Lakleur, ema neʼebé toma konta iha komarka haree katak José ema diʼak. Tan neʼe, nia fó José knaar atu toma konta ba dadur seluk. Depois, Faraó sai hirus ho ema neʼebé toma konta ba ninia hemu, no ba ninia padeiru, no hatama sira iha komarka laran. Kalan ida, sira naʼin-rua, ida-ida iha mehi espesiál, maibé sira la hatene mehi sira-neʼe katak sá. Loron tuirmai José hatete: ‘Konta mehi sira-neʼe mai haʼu.’ Kuandu sira konta ba José, Maromak ajuda nia atu fó-hatene mehi neʼe katak sá.

José hatete ba ema neʼebé toma konta ba Faraó nia hemu: ‘Iha loron tolu tuirmai, Ita sei sai husi komarka, no Ita sei sai fali ema neʼebé toma konta ba Faraó nia hemu.’ Nuneʼe, José hatutan: ‘Kuandu Ita sai tiha ona, fó-hatene Faraó kona-ba haʼu, no ajuda haʼu atu sai husi fatin neʼe.’ Maibé, nia dehan ba padeiru: ‘Iha loron tolu tuirmai, Faraó sei haruka koʼa Ita-nia ulun.’

Iha loron tolu tuirmai, buat neʼebé José hatete sai loos duni. Faraó haruka koʼa padeiru nia ulun. No ema neʼebé toma konta ba Faraó nia hemu sai husi komarka, no serbí fali liurai. Maibé, ema neʼe haluha tiha José! Nia la fó-hatene Faraó kona-ba nia, nuneʼe José hela nafatin iha komarka laran. Dezeñu iha pájina tomak