LOT ho nia família hela hamutuk ho Abraão iha rai Kanaan. Loron ida Abraão hatete ba Lot: ‘Rai neʼe la toʼo ba ita-nia animál sira. Halo favór, ita haketak malu lai. Se ó bá fatin ida, haʼu sei bá fatin seluk.’

Lot haree didiʼak ba rai. Nia haree fatin kapás ida neʼebé iha bee no duʼut buras barak ba nia animál sira. Fatin neʼe mak Distritu Jordaun. Entaun Lot muda nia família no animál sira ba neʼebá. Ikusliu, sira hela iha sidade Sodoma.

Ema iha Sodoma aat tebes. Ida-neʼe halo Lot laran-nakali, tanba nia ema diʼak. Maromak mós sente laran-nakali. Ikusliu, Maromak haruka anju rua atu fó avizu ba Lot katak Maromak sei halakon Sodoma no Gomorra, sidade neʼebé besik malu, tanba ema nia hahalok aat.

Anju sira-neʼe hatete ba Lot: ‘Lalais! Lori ó-nia feen no oan-feto naʼin-rua, no sai husi neʼe!’ Lot no nia família demora uitoan atu bá, nuneʼe anju kaer sira-nia liman no lori sai sira husi sidade neʼe. Depois, anju ida hatete: ‘Halai atu salva imi-nia moris! Keta hateke ba kotuk. Halai ba foho, hodi imi la mate.’

Lot no nia oan-feto sira halo tuir no halai husi Sodoma. Sira la para, no sira la hateke ba kotuk. Maibé, Lot nia feen la halo tuir. Depois sira dook uitoan husi Sodoma, nia para no hateke ba kotuk. Iha tempu neʼebá kedas, Lot nia feen sai masin fatuk. Bele haree nia iha dezeñu ka lae?

Ita bele aprende lisaun diʼak husi ida-neʼe. Neʼe hatudu katak Maromak salva sira neʼebé halo tuir nia, maibé sira neʼebé la halo tuir sei lakon sira-nia moris.