HAREE ba Josué. Nia hatete: ‘Loro-matan, para!’ No loro-matan para duni. Ba loron tomak loro-matan la book an. Jeová mak halo ida-neʼe akontese! Maibé, mai ita haree tanbasá Josué lakohi loro-matan monu.

Kuandu liurai aat naʼin-lima mai funu hasoru ema Jibeón, ema Jibeón haruka mane ida atu bá husu ajuda husi Josué. Ema neʼe hatete: ‘Mai lalais! Salva ami! Liurai hotu husi foho mai ona atu funu hasoru imi-nia atan sira.’

Iha tempu neʼebá kedas, Josué no soldadu hotu bá. Sira marxa kalan tomak. Kuandu sira toʼo Jibeón, soldadu inimigu sira taʼuk no halai-sees. Iha tempu neʼebá, Jeová halo jelu-fatuk boot monu husi lalehan. Josué nia soldadu oho inimigu barak, maibé jelu-fatuk neʼe oho barak liu fali.

Josué haree katak loro-matan besik atu monu no atu sai nakukun. Se nuneʼe, soldadu inimigu barak bele halai tiha. Tanba ida-neʼe Josué harohan ba Jeová no depois dehan: ‘Loro-matan, para!’ No kuandu loro-matan fó naroman nafatin, ema Izraél bele funu tan hodi manán.

Iha liurai aat barak iha rai Kanaan neʼebé odi Maromak nia povu. Durante maizumenus tinan neen Josué ho ninia tropa sira manán liurai naʼin-31. Depois, Josué buka duni atu fahe rai Kanaan ba suku Izraél sira neʼebé seidauk simu rai.

Tinan barak liu tiha, no ikusliu, Josué mate bainhira tinan 110. Kuandu nia no ninia maluk sira sei moris, povu halo tuir Jeová. Maibé, kuandu ema diʼak sira-neʼe mate, povu komesa atu halo aat no hetan susar. Iha tempu neʼebá mak sira presiza duni Maromak nia ajuda.