TANBASÁ mak moru Jerikó monu daudauk? Haree hanesan bomba mak kona. Maibé, iha tempu neʼebá bomba la iha; kilat mós la iha. Ida-neʼe mak milagre ida tan husi Jeová! Mai ita buka-hatene oinsá mak ida-neʼe mosu.

Rona saida mak Jeová fó-hatene Josué: ‘Ó, hamutuk ho ó-nia soldadu sira, tenke marxa haleʼu sidade. Loron-loron marxa haleʼu sidade dala ida, toʼo loron neen. Lori arka aliansa nian hamutuk ho imi. Amlulik naʼin-hitu tenke laʼo iha arka nia oin no huu bibi-dikur.

‘Iha loron hitu, marxa haleʼu sidade dala hitu. Depois, huu dikur ho lian naruk, no haruka ema hotu hakilar makaʼas atu funu. No moru sei monu hotu!’

Josué no povu halo tuir Jeová. Iha tempu sira marxa, ema hotu-hotu nonook deʼit. La iha ema ida neʼebé koʼalia ba malu. Bele rona deʼit dikur nia lian, no ain marxa. Karik, Maromak nia inimigu sira iha Jerikó taʼuk tebes. Ó bele haree tali mean neʼe tara iha janela ka lae? Janela neʼe sé-nian? Sin, Raab halo duni buat neʼebé espiaun naʼin-rua haruka. Nia hamutuk ho ninia família tomak haree daudauk saida mak akontese.

Ikusmai, iha loron hitu, Josué ho ninia ema marxa haleʼu sidade dala hitu, sira huu dikur, soldadu sira hakilar, no moru sira monu. Depois Josué hatete: ‘Oho tiha ema hotu iha sidade laran no sunu sidade. Sunu buat hotu. Foti deʼit osan-mutin, osan-mean, riti no besi, no fó ba ema neʼebé toma konta rikusoin ba Jeová nia tenda.’

Josué hatete ba espiaun naʼin-rua: ‘Bá tama Raab nia uma, lori nia ho ninia família sai.’ Nuneʼe, Raab no ninia família hetan salvasaun, hanesan duni espiaun sira promete uluk.