TINAN sanulu resin mak liu tiha ona husi tempu neʼebé Liurai Nabucodonosor lori ema Izraél sira hotu neʼebé iha edukasaun boot liu bá Babilónia. Agora, haree bá saida mak akontese daudauk! Ema sunu Jeruzalein. No ema Izraél neʼebé sei moris bá Babilónia nuʼudar dadur.

Hanoin-hetan, Jeová nia profeta sira fó-hatene nanis katak buat sira-neʼe sei akontese se ema Izraél la troka sira-nia hahalok aat. Maibé, ema Izraél la rona ba profeta sira. Sira adora nafatin maromak sira neʼebé falsu duké adora Jeová. Tan neʼe, sira merese atu hetan kastigu. Ita hatene kona-ba neʼe tanba Maromak nia profeta Ezequiel fó-hatene kona-ba hahalok aat neʼebé ema Izraél halo.

Hatene sé mak Ezequiel? Nia mak mane-klosan ida husi joven sira neʼebé Liurai Nabucodonosor lori ba Babilónia tinan sanulu resin antes Jeruzalein naksobu. Iha tempu neʼe mós, liurai Nabucodonosor lori Daniel no ninia kolega naʼin-tolu, Sadraque, Mesaque no Abednego bá Babilónia.

Kuandu Ezequiel sei iha Babilónia, Jeová hatudu ba nia buat aat neʼebé akontese daudauk iha templu Jeruzalein. Jeová halo ida-neʼe liu husi milagre. Tuir loos, Ezequiel sei iha Babilónia, maibé, Jeová halo Ezequiel haree buat neʼebé ema halo daudauk iha templu neʼe. Ezequiel haree buat aat tebes!

Jeová hatete ba Ezequiel: ‘Haree bá ema nia hahalok aat iha templu. Haree bá didin neʼebé nakonu ho ilas husi samea no animál seluseluk. No mós haree bá ema Izraél sira neʼebé adora ba buat hirak-neʼe!’ Ezequiel bele haree buat hirak-neʼe, no nia hakerek kona-ba saida mak akontese daudauk.

Jeová husu ba Ezequiel: ‘Ó haree saida mak ema Izraél nia ulun-naʼin sira halo subasubar?’ Loos, nia mós bele haree ida-neʼe. Iha mane naʼin-70, no sira hotu adora maromak sira neʼebé falsu. Sira hatete: ‘Jeová la haree ita. Nia husik tiha ona rai neʼe.’

Tuirmai, Jeová hatudu Ezequiel feto balu iha templu nia odamatan iha norte. Sira tuur iha neʼebá hodi adora maromak falsu Tamuz. Jeová hatudu mós mane sira iha fatin neʼebé atu tama ba Jeová nia templu. Sira maizumenus naʼin-25. Ezequiel haree sira. Sira hakruʼuk ba loro-saʼe hodi adora loro-matan!

Jeová hatete: ‘Ema sira-neʼe la iha respeitu ba haʼu. Sira laʼós deʼit halo buat neʼebé aat, maibé tama iha haʼu-nia templu no halo nuneʼe iha neʼebá kedas!’ Tan neʼe, Jeová promete: ‘Sira sei hatene haʼu-nia hirus neʼebé makaʼas. No haʼu sei la hanoin sira kuandu sira sei lakon.’

Liutiha tinan tolu deʼit depois Jeová hatudu buat hirak-neʼe ba Ezequiel, ema Izraél sira kontra hasoru Liurai Nabucodonosor. Tan neʼe, liurai neʼe mai atu funu hasoru sira. Tinan ida ho balu depois neʼe, ema Babilónia konsege sobu moru Jeruzalein no sunu sidade neʼe. Sira oho ema barak, no lori sira seluk bá Babilónia nuʼudar dadur.

Tansá mak Jeová husik buat aat neʼe akontese ba ema lzraél sira? Loos, tanba sira la rona Jeová no la halo tuir ninia ukun-fuan. Ida-neʼe hatudu katak importante tebes atu ita sempre halo saida mak Maromak hatete mai ita.

Uluk, Liurai Nabucodonosor husik ema uitoan hela iha rai Izraél. Nia hili ema judeu ida naran Gedalias atu ukun sira. Maibé, ema Izraél balu oho tiha Gedalias. Agora, sira sai taʼuk katak ema Babilónia sei mai atu oho sira tanba buat aat neʼebé sira halo. Tan neʼe, sira obriga Jeremias atu halai-sees bá Ejitu hamutuk ho sira.

Rai Izraél sai fatin neʼebé mamuk. Durante tinan 70, ema ida la hela iha neʼebá. Maibé, Jeová promete katak liutiha tinan 70, nia sei lori ninia povu fila fali ba rai neʼe. Durante tempu neʼe, saida mak akontese ba Maromak nia povu iha rai Babilónia, fatin neʼebé ema lori sira bá? Mai ita haree hamutuk.