JOSIAS tinan ualu deʼit bainhira nia sai liurai ba Izraél nia suku rua iha súl. Tanba nia sei kiʼik tebes atu sai liurai, ulukliu, ema balu neʼebé boot liu mak ajuda nia atu ukun nasaun neʼe.

Liutiha tinan hitu depois Josias sai liurai, nia hahú buka Jeová. Nia banati-tuir ezemplu husi liurai diʼak, hanesan David, Jeosafá, no Ezequias. Tuirmai, kuandu sei tinan sanulu resin deʼit, Josias halo buat ruma ho brani.

Ba tempu kleur, ema Izraél barak aat tebetebes. Sira adora maromak sira neʼebé falsu. Sira hakruʼuk ba estátua sira. Tan neʼe, Josias bá hamutuk ho ninia ema no hahú halakon adorasaun falsu husi rai neʼebá. Serbisu neʼe boot, tanba ema barak tebes adora maromak sira neʼebé falsu. Ó haree Josias no ninia ema harahun estátua sira-neʼe.

Tuirfalimai, Josias hili ema naʼin-tolu atu toma konta ba serbisu atu hadiʼa Jeová nia templu. Povu fó osan ba ema naʼin-tolu neʼe atubele selu ba serbisu neʼe. Kuandu sira serbisu daudauk iha templu, amlulik boot Hilquias hetan buat ida neʼebé importante tebes. Neʼe mak livru neʼebé uluk, iha tempu kleur liubá, Jeová haruka Moisés atu hakerek ukun-fuan. Livru neʼe lakon tiha ba tinan barak.

Livru neʼe lori tiha ba Josias, no nia haruka ema atu lee. Kuandu rona daudauk, Josias bele haree katak povu la halo tuir Jeová nia ukun-fuan. Nia sente triste tebes, no lees ninia roupa, hanesan ita haree iha neʼe. Nia hatete: ‘Jeová hirus ita, tanba ita-nia aman sira la halo tuir ukun-fuan sira neʼebé hakerek tiha iha livru neʼe.’

Josias haruka amlulik boot Hilquias atu buka-hatene saida mak Jeová sei halo ba sira. Hilquias bá hasoru no husu ba feto naran Hulda, profeta ida. Hulda fó-hatene mensajen husi Jeová atu lori fali ba Josias, dehan: ‘Jeruzalein no povu hotu sei hetan kastigu tanba sira adora maromak sira neʼebé falsu no rai neʼe nakonu ho hahalok aat. Maibé, tanba ó, Josias, halo buat neʼebé diʼak, kastigu neʼe sei la akontese durante tempu neʼebé ó moris.’