SALOMÃO sai liurai kuandu nia sei joven. Nia hadomi Jeová, no nia halo tuir ninia aman nia konsellu sira. Jeová kontente ho Salomão, no tan neʼe, kalan ida Jeová koʼalia ba Salomão iha mehi hodi dehan: ‘Salomão, hakarak haʼu fó saida ba ó?’

Nuneʼe, Salomão hatán: ‘Jeová, haʼu-nia Maromak, haʼu sei joven no la hatene oinsá atu ukun. Tan neʼe, fó matenek mai haʼu hodi haʼu bele ukun Ita-nia povu iha dalan neʼebé loos.’

Jeová kontente tanba Salomão husu hanesan neʼe. Tan neʼe, Jeová hatete: ‘Tanba ó husu atu sai matenek, no la husu atu moris naruk ka sai riku, haʼu sei halo ó sai ema matenek liu fali ema hotu-hotu. No mós, haʼu sei fó buat neʼebé ó la husu, neʼe mak rikusoin no glória.’

Lakleur, feto naʼin-rua hasoru Salomão ho problema boot. Feto ida fó-hatene: ‘Feto neʼe no haʼu hela hamutuk iha uma ida. Haʼu hahoris oan-mane ida, no liutiha loron rua, nia mós hahoris oan-mane ida. Kalan ida, ninia bebé mate. Maibé kuandu haʼu toba hela, nia tau ninia oan mate iha haʼu-nia sorin no foti haʼu-nia oan. Kuandu haʼu hadeer no hetan bebé mate neʼe, haʼu haree katak neʼe laʼós haʼu-nian.’

Feto seluk hatete kedas: ‘Lae! Bebé neʼebé moris neʼe mak haʼu-nian, no bebé neʼebé mate mak ninian!’ Feto primeiru hatán: ‘Lae! Bebé mate mak ó-nian, no bebé moris mak haʼu-nian!’ Feto naʼin-rua neʼe haksesuk hanesan neʼe. Saida mak Salomão sei halo?

Nia haruka ema ida foti surik, no hatete: ‘Koʼa fahe ba rua bebé moris neʼe, no fó sorin ba feto ida no sorin ba feto ida.’

Inan loos hakilar: ‘Lae! Favór ida, labele oho bebé neʼe. Fó deʼit ba nia!’ Maibé feto seluk hatete: ‘Labele fó ami ida; koʼa fahe deʼit.’

Ikusmai Salomão hatete: ‘Keta oho bebé neʼe! Fó deʼit ba feto primeiru. Nia mak inan loos.’ Salomão hatene katak nia mak inan loos tanba nia hadomi ninia bebé toʼo nia salva bebé neʼe fó ba feto seluk. Kuandu povu rona oinsá Salomão rezolve problema neʼe, sira kontente tanba iha liurai neʼebé matenek.

Durante Salomão nia ukun, Maromak fó bensaun ba rai hodi iha natar, uvas, no ai-fuan seluk no modo barak. Povu iha roupa kapás no uma diʼak. Iha sasán diʼak ba ema hotu-hotu.