DEPOIS David oho Golias, Izraél nia xefe-tropa, Abner, lori David ba Saul. Saul kontente tebes ho David. Nia foti David sai xefe-tropa ida no lori nia atu hela iha liurai nia uma.

Iha loron ida seluk, kuandu tropa fila fali husi funu ho ema Filístia, feto sira kanta: ‘Saul oho tiha ona ema rihun ba rihun, maibé David ema rihun sanulu ba rihun sanulu.’ Tanba ema hahiʼi David liu fali Saul, Saul sai laran-moras. Maibé, Saul nia oan-mane Jónatas la laran-moras. Nia hadomi tebes David, no David mós hadomi nia. Sira promete malu katak sira sei sai belun ba nafatin.

David matenek tebes fekit arpa, no Saul gosta rona múzika neʼe. Maibé loron ida, Saul halo buat neʼebé aat tebes tanba nia laran-moras. Bainhira David fekit arpa, Saul foti ninia diman no soe ba David hodi dehan: ‘Haʼu sei prega David ba didin!’ Maibé, David hasees an, no diman la kona nia. Loron ida seluk, Saul koko atu soe diman ba David dala ida tan. Tan neʼe, David hatene katak nia tenke kuidadu tebes.

Hanoin-hetan Saul nia promesa ka lae? Nia hatete katak nia sei fó ninia oan-feto nuʼudar feen ba mane neʼebé oho Golias. Agora, Saul hatete katak David bele kaben ho ninia oan-feto Mical, maibé antes neʼe, David tenke oho inimigu Filístia naʼin-100. Hanoin toʼok! Tuir loloos, Saul hakarak ema Filístia atu oho David. Maibé sira la oho nia, no Saul fó ninia oan-feto nuʼudar David nia feen.

Loron ida, Saul fó-hatene Jónatas no atan sira hotu katak nia hakarak oho David. Maibé, Jónatas hatete ba ninia aman: ‘Labele halo aat David. Nia nunka halo aat Ita. Maibé, buat hotu neʼebé nia halo ajuda Ita. Nia tau ninia an iha perigu bainhira nia oho Golias, no kuandu Ita haree ida-neʼe, Ita kontente.’

Saul rona ba ninia oan, no promete atu la halo aat ba David. David mai fali, no serbí iha Saul nia uma hanesan uluk. Maibé loron ida, kuandu David toka múzika, Saul soe diman ba David dala ida tan. David hasees an, no diman neʼe kona didin. Ida-neʼe ba dala tolu ona! David hatene katak agora, nia tenke halai!

Kalan neʼe David bá ninia uma rasik. Maibé, Saul haruka ema balu atu oho nia. Mical hatene ninia aman nia planu. Nuneʼe, nia hatete ba ninia laʼen: ‘Se ó la halai kalan neʼe, ó sei mate kalan neʼe duni.’ Mical ajuda David atu halai liuhusi janela. Maizumenus tinan hitu nia laran, David tenke subar iha fatin ida no muda ba fatin seluk atu Saul la bele hetan nia.