Durante tempu neʼebé sai dadur iha Babilónia, povu Izraél hasoru buat barak neʼebé koko sira-nia fiar. Ema soe Sadraque, Mesaque, Abednego iha fornu neʼebé ahi lakan makaʼas, maibé Maromak hasai sira husi mate. Tuirmai, depois Babilónia monu ba ema Média no Pérsia, ema soe Daniel ba leaun kuak, maibé Maromak mós proteje nia hodi taka leaun sira-nia ibun.

Ikusmai, liurai Pérsia naran Ciro halo povu Izraél sai livre. Tinan 70 foin liu tiha husi tempu neʼebé ema lori sira ba Babilónia nuʼudar dadur, sira fila fali ba sira-nia rai. Buat ida neʼebé sira halo ulukliu kuandu sira toʼo tiha Jeruzalein mak harii Jeová nia templu. Maibé lakleur, inimigu sira hapara sira-nia serbisu. Tan neʼe, maizumenus tinan 22 liu tiha husi tempu neʼebé sira fila ba Jeruzalein mak foin sira ramata sira-nia serbisu atu harii templu.

Tuirmai, ita aprende kona-ba Esdras nia viajen atu fila ba Jeruzalein atu hadiʼa templu neʼe sai kapás liu. Ida-neʼe akontese maizumenus tinan 47 depois sira ramata harii templu neʼe. Liutiha tinan 13 husi Esdras nia viajen, Neemias ajuda atu harii fali moru Jeruzalein neʼebé naksobu tiha ona. Parte LIMA mak istória neʼebé akontese durante tinan 152.