AIÁ! Ita haree katak Daniel iha problema boot. Maibé leaun la hakanek nia! Hatene tansá? Sé mak hatama Daniel iha neʼe atu hamutuk ho leaun sira-neʼe hotu? Mai ita haree.

Agora, liurai iha Babílonia mak naran Dario. Nia gosta tebetebes Daniel tanba Daniel laran-diʼak no matenek tebes. Dario foti Daniel nuʼudar xefe ba ukun-naʼin sira iha ninia reinu. Ida-neʼe halo ema seluseluk iha reinu neʼe sai laran-moras ba Daniel, no sira halo hanesan neʼe.

Sira bá hasoru Dario no hatete: ‘Ami hatán malu tiha ona, Liurai neʼebé mak ami respeitu, katak Ita-Boot tenke halo lei ida neʼebé haruka ema atu labele halo orasaun ba maromak ruma no ema ruma durante loron 30, maibé sei halo orasaun ba Ita-Boot deʼit. Se ema ruma la halo tuir karik, tenke soe nia iha leaun kuak.’ Dario la hatene tansá mak ema sira-neʼe hakarak halo lei hanesan neʼe. Maibé, nia gosta sira-nia ideia, no nia haruka atu hakerek tiha lei neʼe. Agora, ema ida la bele troka lei ida-neʼe.

Bainhira Daniel rona kona-ba lei neʼe, nia bá uma no halo orasaun, hanesan nia halo baibain. Ema aat sira-neʼe hatene katak Daniel sei la para atu halo orasaun ba Jeová. Sira kontente, tanba sira hanoin katak sira-nia planu atu halakon Daniel laʼo didiʼak.

Bainhira Liurai Dario hatene tansá ema sira-neʼe hakarak halo lei neʼe, nia triste tebes. Maibé, nia la bele troka lei, tan neʼe nia tenke haruka ema atu soe Daniel ba leaun kuak. Maibé liurai hatete ba Daniel: ‘Haʼu hein deʼit katak ó-nia Maromak neʼebé ó serbí sei salva ó.’

Dario laran-susar tebes toʼo nia la bele toba iha kalan neʼe. Dadeer-saan tuirmai, nia halai ba leaun kuak. Ó haree nia iha leten neʼebá. Nia hakilar: ‘Daniel, Maromak moris nia atan! Maromak neʼebé ó serbí salva ó husi leaun ka lae?’

Daniel hatán: ‘Maromak haruka ninia anju atu taka leaun sira-nia ibun atu la book haʼu.’

Liurai sai kontente tebes. Nia haruka ema atu hasai Daniel husi kuak neʼe. Tuirmai, nia haruka atu soe fali ema aat sira ba leaun kuak tanba sira koko atu halakon Daniel. Seidauk toʼo okos, leaun kaer sira no halo rahun sira-nia ruin hotu.

Tuir fali mai, Liurai Dario hakerek ba povu hotu iha ninia reinu: ‘Haʼu haruka katak ema hotu tenke fó respeitu ba Daniel nia Maromak. Maromak neʼe halo milagre boot, no salva Daniel hodi halo leaun la han nia.’