BESIK tinan rua mak liu tiha ona depois Babilónia monu iha ema Média no Pérsia nia liman. Agora, haree saida mak akontese! Loos, ema Izraél sira sai daudauk husi Babilónia. Oinsá mak sira sai livre? Sé mak husik sira atu sai?

Liurai Ciro husi Pérsia mak halo hanesan neʼe. Kleur antes Ciro moris, Jeová haruka profeta Isaías hakerek nanis kona-ba Ciro: ‘Ó sei halo buat neʼebé haʼu hakarak ó atu halo. Odamatan sira sei husik nakloke atu ó bele hadau sidade neʼe.’ No Ciro duni mak hadau Babilónia. Iha kalan, ema Média no Pérsia tama sidade neʼe liuhusi odamatan sira neʼebé husik nakloke.

Jeová nia profeta Isaías hatete mós katak Ciro sei haruka ema Izraél atu harii fali Jeruzalein no templu. Ciro haruka duni ka lae? Loos. Ciro hatete ba ema Izraél sira: ‘Agora, bá Jeruzalein no harii imi-nia Maromak Jeová nia templu.’ Tan neʼe mak ema Izraél neʼe laʼo daudauk sai husi Babilónia.

Maibé, laʼós ema Izraél hotu iha Babilónia bele laʼo dook atu fila fali ba Jeruzalein. Jeruzalein dook tebes toʼo maizumenus kilómetru 800, no iha ema barak neʼebé ferik-katuas ka moras demais atu laʼo dook hanesan neʼe. Iha mós razaun seluseluk neʼebé halo ema la bá. Maibé, Ciro hatete ba sira neʼebé la bá: ‘Fó osan-mutin no osan-mean no prezente seluseluk ba sira neʼebé bá atu harii fali Jeruzalein no templu.’

Tan neʼe, ema Izraél sira neʼebé atu bá Jeruzalein simu prezente barak. No mós, Ciro fó fali manko no kopu neʼebé Liurai Nabucodonosor hadau tiha husi Jeová nia templu bainhira nia sobu Jeruzalein. Agora sira iha sasán barak atu lori.

Laʼo tiha maizumenus fulan haat, ema Izraél toʼo Jeruzalein ho tempu neʼebé loos. Sira toʼo loloos tinan 70 husi tempu neʼebé sidade neʼe monu, no sai fatin neʼebé la iha ema ida hela. Maibé, maski ema Izraél sira fila fali ba sira rasik nia rai, sira sei hasoru susar ruma, hanesan ita sei aprende tuirmai.