MAI ita fila fali ba tinan balu antes Esdras bá Jeruzalein. Mordecai no Ester mak ema Izraél sira neʼebé importante tebes iha reinu Pérsia. Ester mak liurai-feto, no ninia primu Mordecai iha pozisaun segundu tuir liurai. Mai ita haree oinsá ida-neʼe akontese.

Ester nia inan-aman mate tiha kuandu nia sei kiʼik, no Mordecai mak hakiak nia. Liurai Pérsia naran Assuero iha palásiu iha sidade Susan, no Mordecai mak ninia atan ida. Loron ida, liurai nia feen Vasti la halo tuir nia, tan neʼe liurai hili feen foun ida atu sai ninia liurai-feto. Ó hatene nia hili sé? Ester, feto-klosan ida neʼebé bonita.

Ó haree ka lae, mane neʼebé foti-an no ema sira hakruʼuk ba nia? Mane neʼe mak Haman. Nia ema-boot tebes iha Pérsia. Haman hakarak Mordecai, neʼebé ó haree tuur iha neʼe, mós hakruʼuk ba nia. Maibé Mordecai lakohi hakruʼuk. Nia hanoin katak laloos atu hakruʼuk ba ema aat hanesan Haman. Haman sai hirus tebes. Mai ita haree saida mak nia koko atu halo.

Haman hatete ba liurai lia-bosok kona-ba ema Izraél. Nia hatete: ‘Sira ema aat no la halo tuir Ita-Boot nia lei. Sira hotu tenke mate.’ Assuero la hatene katak ninia feen Ester mós ema Izraél ida. Tan neʼe, nia halo tuir Haman, no halo lei ida atu oho ema Izraél hotu iha loron neʼebé nia hili tiha.

Kuandu Mordecai rona kona-ba lei ida-neʼe, nia laran-susar tebes. Nia haruka mensajen ida ba Ester: ‘Ó tenke fó-hatene liurai, no husu nia atu salva ita.’ Rai Pérsia nia lei bandu ema atu labele hasoru liurai se la iha konvite husi nia. Maibé, Ester bá hasoru liurai maski liurai la konvida nia. Liurai lolo ninia tonka osan-mean ba nia atu hatudu katak liurai sei la oho Ester. Ester konvida liurai no Haman atu han hamutuk. Kuandu sira han, liurai husu Ester saida mak nia hakarak liurai atu halo. Ester hatete katak nia sei fó-hatene se liurai no Haman mai atu han hamutuk dala ida tan iha loron tuirmai.

Kuandu sira han fali, Ester hatete ba liurai: ‘Ema sei oho haʼu-nia povu no haʼu.’ Liurai sai hirus. Nia husu: ‘Sé mak brani atu halo hanesan neʼe?’

Ester hatete: ‘Mane aat neʼe, inimigu neʼe, mak Haman!’

Agora liurai sai hirus loos. Nia haruka ema atu oho Haman. Tuirmai, liurai hili Mordecai atu iha pozisaun segundu tuir nia. Mordecai arranja atu halo lei foun ida neʼebé husik ema Izraél funu fali ba sira-nia moris iha loron neʼebé ema sei oho sira. Tanba Mordecai mak ema importante tebes agora, ema barak ajuda povu Izraél, no povu Izraél hetan salvasaun husi inimigu sira-nia liman.