AGORA, Jesus iha Foho Oliveira. Mane naʼin-haat neʼebé tuur hamutuk nia mak ninia apóstolu sira. Maun-alin André no Pedro, no mós maun-alin seluk Tiago no João. Husi dook neʼebá, ó bele haree Maromak nia templu iha Jeruzalein.

Loron rua liu tiha husi tempu neʼebé Jesus saʼe kuda-burru oan ida no tama iha Jeruzalein. Agora mak loron-tersa. Dadeer-saan iha loron neʼe, Jesus iha templu. Iha neʼebá, amlulik sira koko atu kaer Jesus no oho nia. Maibé, sira taʼuk atu halo nuneʼe tanba povu gosta Jesus.

Jesus hatete ba naʼi-ulun relijiaun sira: ‘Imi mak samea no samea nia oan sira!’ Tuirmai, Jesus hatete katak Maromak sei kastigu sira tanba buat aat hotu neʼebé sira halo tiha ona. Depois neʼe, Jesus laʼo saʼe Foho Oliveira, no apóstolu naʼin-haat neʼe hahú husu pergunta ba nia. Hatene pergunta saida mak sira husu daudauk ba Jesus?

Apóstolu sira husu kona-ba futuru. Sira hatene katak Jesus sei halakon buat aat hotu husi mundu. Maibé, sira hakarak hatene bainhira buat sira-neʼe sei akontese. Bainhira mak Jesus mai fali atu ukun nuʼudar Liurai?

Jesus hatene katak ninia dixípulu sira iha Rai sei la bele haree nia kuandu nia mai fali. Ida-neʼe tanba Jesus sei iha lalehan, no sira la bele haree nia iha neʼebá. Tan neʼe, Jesus fó-hatene ba ninia apóstolu sira kona-ba buat balu neʼebé sei akontese kuandu nia sei ukun nuʼudar Liurai iha lalehan. Buat saida deʼit mak sei akontese?

Jesus hatete katak sei iha funu boot, ema barak sei sai moras no hamlaha, krime sei sai aat liután, sei iha rai-nakdoko boot. No mós, Jesus hatete katak lia-foun diʼak kona-ba Maromak nia reinu sei haklaken iha fatin hotu-hotu iha mundu. Ita haree tiha ona buat hirak-neʼe mosu daudauk iha ita-nia tempu, loos ka lae? Loos! Nuneʼe, ita fiar katak agora Jesus ukun daudauk iha lalehan. Lakleur tan, nia sei halakon buat aat hotu husi mundu.