LABARIK-FETO neʼebé ó haree iha neʼe, nia tinan 12. Jesus kaer ninia liman, no ninia inan no aman hamriik besik nia. Hatene tansá sira kontente tebes? Mai ita haree hamutuk.

Labarik neʼe nia aman mak ema-boot ida naran Jairo. Loron ida, ninia oan-feto sai moras, no nia latan deʼit iha toba-fatin. Maibé, nia la sai diʼak ida. Nia moras sai todan nafatin. Jairo no nia feen laran-susar tebes, tanba sira haree labarik-feto neʼe besik atu mate. Nia mak sira-nia oan mesak deʼit. Nuneʼe, Jairo bá atu buka Jesus. Nia rona kona-ba milagre neʼebé Jesus halo daudauk.

Bainhira Jairo hetan Jesus, iha ema-lubun boot hobur nia. Maibé, Jairo hakaʼas atu tama lubun boot neʼe no hakneʼak iha Jesus nia ain. Nia hatete: ‘Haʼu-nia oan-feto moras todan tebes.’ Nia husu: ‘Halo favór, mai no halo nia sai diʼak fali.’ Jesus hatete katak nia sei bá.

Tuir dalan, ema-lubun boot dudu malu nafatin atu hakbesik Jesus. Derrepente, Jesus para. Nia husu: ‘Sé mak kona haʼu?’ Jesus sente ninia forsa sai husi nia, nuneʼe nia hatene katak ema ruma kona nia. Maibé sé? Feto ida neʼebé moras tebes durante tinan 12. Nia hakbesik Jesus no kona Jesus nia roupa, no ninia moras lakon kedas!

Ida-neʼe halo Jairo sente diʼak liu, tanba nia bele haree katak lasusar ida ba Jesus atu kura ema nia moras. Maibé ema ida mai atu fó-hatene ba Jairo: ‘Lalika hakole tan Jesus. Ita-nia oan-feto mate tiha ona.’ Jesus rona ida-neʼe no hatete ba Jairo: ‘Keta laran-susar, nia sei diʼak fali.’

Bainhira sira toʼo Jairo nia uma, ema tanis tanba triste tebes. Maibé Jesus hatete: ‘Keta tanis. Labarik neʼe la mate. Nia toba deʼit.’ Maibé sira hamnasa no goza Jesus, tanba sira hatene katak nia mate duni.

Jesus lori labarik neʼe nia aman no inan no apóstolu naʼin-tolu ba kuartu neʼebé sira tau labarik neʼe. Jesus kaer nia liman no hatete: ‘Hadeer bá!’ Nia moris filafali, hanesan ó haree iha neʼe. Nia hadeer no hahú laʼo! Tan neʼe mak ninia inan no aman kontente tebetebes.

Labarik ida-neʼe laʼós ema primeiru neʼebé Jesus fó moris fali husi mate. Ema primeiru neʼebé Bíblia temi mak feto-faluk ida nia oan-mane neʼebé hela iha sidade Naim. Ikusmai, Jesus mós halo Lázaro, Maria no Marta nia maun, moris filafali husi mate. Kuandu Jesus ukun nuʼudar Maromak nia liurai, nia sei fó moris fali ba ema barak tebes neʼebé mate tiha ona. Ita sente kontente kona-ba ida-neʼe ka lae?