IHA-NEʼE, Jesus hirus tebes, loos ka lae? Hatene tansá nia hirus tebes hanesan neʼe? Tanba ema sira neʼebé iha Maromak nia templu iha Jeruzalein mak kaan-teen tebes. Sira buka atu manán osan barak husi ema neʼebé mai iha neʼe atu adora Maromak.

Ó haree karau, bibi, no manu-pombu ka lae? Entaun, ema sira-neʼe mak faʼan animál hirak-neʼe iha templu neʼe nia laran. Hatene tanbasá? Tanba ema Izraél sira presiza animál no manu atu fó ba Maromak nuʼudar sakrifísiu.

Maromak nia ukun-fuan hatete katak kuandu ema Izraél ida halo sala ruma, nia tenke hasaʼe sakrifísiu ba Maromak. Iha mós tempu seluk neʼebé ema Izraél tenke hasaʼe sakrifísiu. Maibé, iha neʼebé mak sira bele buka manu no animál atu hasaʼe sakrifísiu ba Maromak?

Ema Izraél balu hakiak sira-nia animál. Nuneʼe, sira bele hasaʼe buat sira-neʼe. Maibé, ema Izraél barak la iha animál ka manu. No mós, balu hela dook husi Jeruzalein no la bele lori sira-nia animál ba templu. Nuneʼe sira mai iha neʼe no sosa animál ka manu neʼebé sira presiza. Maibé, ema sira iha neʼe tau folin neʼebé aas demais. Sira bosok ema. No tuir loloos, sira labele faʼan iha Maromak nia templu laran.

Tan neʼe mak Jesus sai hirus. Nuneʼe, nia fila ema sira-neʼe nia meza, no halo osan iha meza neʼe namkari ba rai. No mós, nia halo xikote husi tali no duni animál hotu sai husi templu. Nia haruka ema sira neʼebé faʼan manu-pombu: ‘Lori hotu sai tiha husi neʼe! Keta halo haʼu-nia Aman nia uma sai fali fatin atu fila liman.’

Jesus nia dixípulu balu hamutuk ho nia iha templu iha Jeruzalein. Sira hakfodak hodi haree buat neʼebé Jesus halo daudauk. Ida-neʼe halo sira hanoin-hetan eskritura ida iha Bíblia neʼebé dehan kona-ba Maromak nia Oan: ‘Domin ba Maromak nia uma sei hamanas nia hanesan ahi.’

Durante tempu neʼebé Jesus tuir Páskua iha Jeruzalein, nia halo milagre barak. Depois neʼe, Jesus husik Judéia atu fila fali ba Galiléia. Maibé nia laʼo liuhusi distritu Samaria. Mai ita haree saida mak akontese iha neʼebá.