LAKLEUR depois kura ema matan-delek naʼin-rua neʼebé moris nuʼudar ezmola-naʼin, Jesus toʼo aldeia kiʼik ida besik Jeruzalein. Nia hatete ba ninia dixípulu naʼin-rua: ‘Tama bá aldeia neʼe no imi sei hetan kuda-burru oan ida. Kore tiha no lori mai haʼu.’

Bainhira sira lori kuda-burru ida-neʼe, Jesus saʼe no bá toʼo Jeruzalein neʼebé ladook husi neʼebá. Bainhira nia besik ona ba sidade neʼe, ema-lubun boot mai atu hasoru nia. Ema barak hasai sira-nia hatais no tau iha dalan. Ema seluk tesi ai-tali nia sanak. Sira mós tau sanak neʼe iha dalan no haklalak: ‘Maromak fó-bensa ba liurai neʼebé mai hodi Jeová nia naran!’

Tempu uluk iha Izraél, liurai foun sira saʼe kuda-burru oan no tama Jeruzalein atu hatudu sira-nia an ba povu. Ida-neʼe mak buat neʼebé Jesus halo daudauk. Ema hirak-neʼe mós hatudu katak sira hakarak Jesus atu sai sira-nia liurai. Maibé, laʼós ema hotu mak gosta nia. Ita hatene nuneʼe hodi aprende saida mak akontese bainhira Jesus tama iha templu.

Iha templu, Jesus kura ema neʼebé matan-delek no kudeʼik. Bainhira labarik kiʼik sira haree ida-neʼe, sira hahiʼi Jesus. Maibé, amlulik sira sai hirus, no hatete ba Jesus: ‘Ó rona ka lae buat neʼebé labarik sira hatete daudauk?’

Jesus hatán: ‘Haʼu rona duni. Imi nunka lee iha Bíblia neʼebé dehan: “Husi labarik kiʼikoan sira-nia ibun mak Maromak lori glória”?’ Nuneʼe labarik sira kontinua hahiʼi Maromak nia liurai.

Ita hakarak sai hanesan labarik sira-neʼe, loos ka lae? Ema balu karik koko hapara ita atu koʼalia kona-ba Maromak nia reinu. Maibé, ita sei kontinua atu koʼalia ba ema seluk kona-ba buat furak neʼebé Jesus sei halo ba ema.

Bainhira Jesus iha mundu, tempu seidauk toʼo atu hahú ninia ukun nuʼudar liurai. Bainhira mak tempu neʼe toʼo mai? Jesus nia dixípulu sira hakarak hatene kona-ba neʼe. Ita sei lee kona-ba neʼe iha istória tuirmai.