AIÁ! Saida mak akontese daudauk iha neʼe? Joven neʼebé latan iha neʼe moras tebes ka lae? Haree bá! Mane ida neʼebé sai daudauk husi uma mak Paulo! Haree mós Timóteo ka lae? Joven neʼebé latan iha neʼe monu husi janela ka lae?

Loos, ida-neʼe mak akontese duni. Paulo fó diskursu ba dixípulu sira iha neʼe iha Tróade. Nia hatene ona katak nia sei la hasoru tan sira ba tempu kleur tanba nia atu saʼe ró iha loron tuirmai. Tan neʼe, nia koʼalia toʼo kalan-boot.

Entaun, joven ida-neʼe naran Éutico tuur iha janela, no nia dukur tiha. Nia monu husi janela iha andár tolu, tun toʼo rai! Tan neʼe, ita haree ema hotu laran-susar tebes. Kuandu ema foti nia, buat neʼebé sira hanoin mak mosu duni. Nia mate tiha.

Haree katak joven neʼe mate ona, Paulo toba iha ninia leten no hakoʼak nia. Nia hatete: ‘Keta hanoin barak. Nia diʼak hela!’ Loos, nia sai diʼak duni! Milagre ida! Paulo halo nia moris filafali! Ema hotu sai kontente tebes.

Sira hotu fila fali ba andár-leten no han hamutuk. Paulo kontinua koʼalia toʼo rai naroman. Maibé, ita bele fiar katak Éutico la dukur tan! Ikusmai, Paulo, Timóteo no sira neʼebé laʼo hamutuk saʼe ró. Hatene sira atu bá neʼebé?

Paulo atu ramata ninia viajen terseiru ba haklaken, no nia atu fila fali ba uma. Iha viajen neʼe, nia gasta tinan tolu iha Éfezu, no mós gasta tempu iha fatin seluk. Tan neʼe, viajen neʼe sai kleur liu duké viajen segundu.

Sai tiha husi Tróade, ró para uitoan iha Miletu. Tan Éfezu ladook husi Miletu, Paulo haruka ema bá Éfezu atu bolu katuas sira iha kongregasaun neʼe mai Miletu atubele koʼalia ho sira ba dala ikus. Kuandu toʼo tempu neʼebé Paulo saʼe ró atu bá ona, sira triste tebes!

Ikusmai, ró fila fali ba Sezareia. Kuandu Paulo hela iha neʼe iha dixípulu Filipe nia uma, profeta ida naran Agabo fó avizu ba Paulo. Nia dehan katak ema sei kaer Paulo kuandu nia bá Jeruzalein. Loos duni, ida-neʼe mak akontese. Tuirmai, nia iha komarka iha Sezareia ba tinan rua. Depois, ema haruka fali Paulo ba Roma atu Sezar, ukun-naʼin iha Roma, tesi lia ba nia. Mai ita haree saida mak akontese iha viajen ba Roma.