Imajina toʼok situasaun neʼe: Karina foin toʼo iha festa ida. Lakleur deʼit, nia rona lian ida neʼebé nia koñese husi ninia kotuk, dehan:

Karina hateke ba kotuk, neʼe mak Jesika. Jesika lori serveja botir rua iha ninia liman, tuirmai nia lolo botir ida ba Karina, hodi dehan: “Ó-nia tinan toʼo ona atu goza moris.”

Tuir loloos, Karina lakohi hemu. Maibé nia mós lakohi halo Jesika hanoin sala katak nia la hatene ransu. Jesika mak Karina nia kolega joven ida neʼebé diʼak. Karina komesa hanoin: ‘Se Jesika mós hemu, neʼe katak la sala atu hemu serveja. Neʼe mak serveja deʼit, laʼós buat aat hanesan droga.’

Se ó mak iha Karina nia situasaun, saida mak ó sei halo?

Atu bele foti desizaun diʼak iha situasaun hanesan neʼe, ó presiza duni atu hatene ho loloos ó mak ema hanesan saida, no ó moris tuir prinsípiu saida. Kuandu ó hatene ida-neʼe, ó bele iha forsa atu kontrola ó-nia moris duké husik ema seluk mak kontrola ó, no ó-nia desizaun.—1 Korinto 9:26, 27.

Oinsá mak ó bele hatene didiʼak ó-nia an hodi bele kontrola ó-nia moris rasik? Koko toʼok atu hatán pergunta balu tuirmai neʼe.

Hodi hatene didiʼak ó-nia talentu no hahalok diʼak, neʼe ajuda ó atu fiar an.

EZEMPLU HUSI BÍBLIA: Apóstolu Paulo hakerek: “Maski haʼu la hatene atu koʼalia ho didiʼak, maibé haʼu iha duni matenek.” (2 Korinto 11:6) Tanba Paulo hatene didiʼak Eskritura sira, nia bele hamriik metin maski ema koʼalia la diʼak kona-ba ninia matenek. Nia la husik ema seluk nia liafuan atu halo nia la fiar an.—2 Korinto 10:10; 11:5.

HATENE DIDIʼAK Ó-NIA AN: Hakerek toʼok talentu ka matenek neʼebé ó iha.

Hakerek hahalok diʼak sira neʼebé ó iha. (Porezemplu, ó mak ema neʼebé laran-luak? ó hanoin ema seluk? ema bele tau fiar ba ó? ó tuir oras?)

Korrente neʼebé metin bele kotu se iha parte ida neʼebé fraku, hanesan neʼe mós ho ita-nia naran diʼak bele lakon, se ita la hadiʼa ita-nia fraku.

EZEMPLU HUSI BÍBLIA: Paulo hatene ninia fraku sira. Nia hakerek: “Haʼu haksolok duni ho Maromak nia ukun-fuan, maibé haʼu haree ukun-fuan seluk iha haʼu-nia isin neʼebé halo funu kontra ukun-fuan iha haʼu-nia neon, no ida-neʼe lori haʼu hodi sai atan ba sala nia ukun-fuan.”—Roma 7:22, 23.

HATENE DIDIʼAK Ó-NIA AN: Hakerek toʼok ó-nia fraku sira neʼebé presiza atu hadiʼa.

Bainhira ó saʼe taksi, ó husu xofér atu halai hodi haleʼu bairru ida deʼit toʼo mina sai maran ka lae? Lae! Hahalok hanesan neʼe mak la matenek duni, no estraga deʼit osan!

Saida mak ita aprende? Planu mak sei ajuda ó atu kumpre ó-nia hakarak. Ó hatene fatin neʼebé ó hakarak atu bá no ó iha planu oinsá atu toʼo iha fatin neʼe.

EZEMPLU HUSI BÍBLIA: Paulo hakerek: “Haʼu halai laʼós hanesan ema neʼebé la hatene atu bá neʼebé.” (1 Korinto 9:26) Duké husik ninia an atu halaʼo ninia moris arbiru, nia halo planu no hakaʼas an atu kumpre ida-neʼe.—Filipe 3:12-14.

HATENE DIDIʼAK Ó-NIA AN: Hakerek planu tolu neʼebé ó hakarak atu kumpre durante tinan ida nia laran.

Se ó mak la iha prinsípiu, ó sei halo tuir deʼit ema seluk nia hakarak, hanesan ai-kakeu neʼebé anin huu bá-mai. Neʼe hatudu katak ó la hatene didiʼak ó mak ema hanesan saida.

Maibé bainhira ó halo desizaun neʼebé metin hodi bazeia ba ó-nia prinsípiu, ó-nia moris sei la depende ba ema seluk, no ó bele kontente ho ó-nia an.

EZEMPLU HUSI BÍBLIA: Bainhira profeta Daniel sei joven, nia “deside nanis ona iha ninia laran” katak nia sei halo tuir Maromak nia ukun-fuan maski nia hela iha fatin neʼebé dook husi ninia família. (Daniel 1:8) Daniel laran-metin nafatin ba ninia desizaun rasik. Nia moris tuir ninia fiar no prinsípiu.

HATENE DIDIʼAK Ó-NIA AN: Ó-nia prinsípiu mak saida? Porezemplu ó fiar Maromak ka lae? Se fiar, tanbasá? Evidénsia saida deʼit mak halo ó fiar katak Maromak iha?

Ó fiar katak moris tuir Maromak nia matadalan kona-ba morál sei lori buat diʼak ba ó-nia moris ka lae? Se fiar, tanbasá?

Ó hili ida-neʼebé, sai hanesan ai-hun neʼebé abut metin ka la metin? Atu sai hanesan ai-hun neʼebé metin no tahan maski anin-boot, importante mak ó tenke iha planu no prinsípiu neʼebé metin. Entaun, tuirmai ó bele hatán ba pergunta: Tuir loloos, haʼu mak ema hanesan saida?