FETO ida neʼebé tinan 25, hatete: “Iha tinan 1981, haʼu-nia inan-hakiak mate tanba kankru. Ninia mate halo haʼu no haʼu-nia alin-mane triste tebes. Iha tempu neʼebá haʼu tinan 17 no haʼu-nia alin tinan 11. Haʼu hanoin tebes haʼu-nia inan-hakiak. Nia mak haʼu-nia belun neʼebé diʼak liu. Tanba haʼu aprende katak nia agora iha lalehan, ida-neʼe halo haʼu hakarak oho an hodi haʼu bele bá neʼebá atu hamutuk ho nia.”

Dala ruma ita sente katak la justisa kuandu mate foti ema neʼebé ita hadomi husi ita-nia sorin. Kuandu ida-neʼe akontese, susar tebes atu simu katak agora ita la bele ona atu koʼalia tan ho sira, la bele ona hamnasa hamutuk, ka la bele ona atu hakoʼak sira. Ita-nia sentimentu neʼe la fasil atu halakon maski ema hatete ba ita katak agora ema neʼebé ita hadomi bá ona lalehan.

Maibé, Bíblia esplika kona-ba esperansa neʼebé oin-seluk fali. Hanesan ita haree tiha ona, Bíblia fó sai katak iha futuru Ita bele hasoru fali ema neʼebé Ita hadomi neʼebé mate ona, la’ós iha lalehan maibé iha rai neʼe, neʼebé sei iha dame, no hakmatek. Iha tempu neʼebá ema sei haksolok tanba sira bele iha saúde diʼak, no sira lalika mate tan. Maibé ema balu karik hatete: ‘Neʼe mehi deʼit!’

Entaun, oinsá mak Ita bele fiar ba esperansa neʼe? Baibain kuandu ema ida promete buat ruma ba ita, ita bele fiar ba ninia promete neʼe se ita hatene katak nia mak ema neʼebé iha kbiit no hakarak atu kumpre buat neʼebé nia promete. Entaun, sé mak promete katak ema mate sei moris fali?

Iha tinan 31, Jesus Kristu ho fiar metin promete hodi dehan: “Basá nuʼudar Aman halo ema mate sira moris hiʼas fali hodi halo sira moris, nuneʼe mós Oan fó moris ba ema neʼebé nia fihir. Imi keta hakfodak ho buat neʼe, basá oras toʼo daudaun wainhira sira hotu neʼebé iha rate laran sei rona nia lia, no . . . saʼe ba moris-hiʼas.” (Joao 5:21, 28, 29) Sin, Jesus Kristu promete katak ema rihun ba rihun neʼebé mate ona sei moris hiʼas fali iha rai neʼe no iha esperansa atu moris ba nafatin iha fatin neʼebé dame no neʼebé hanesan jardín furak. (Joao 3:16; 17:3; kompara ho Salmo [Mazmur] 37:29; Mateus 5:5.) Tanba Jesus mak  promete kona-ba neʼe, ita bele fiar duni katak nia hakarak tebes atu kumpre ida-neʼe. Maibé, nia iha kbiit duni atu kumpre ninia promete neʼe ka lae?

Maizumenus tinan ida liu tiha, depois Jesus halo promete neʼe, nia hatudu ho klaru oinsá nia iha duni kbiit no hakarak atu halo ema moris hiʼas.

Hanoin toʼok situasaun tuirmai neʼe neʼebé triste. Lázaro moras tebetebes. Ninia feton naʼin-rua, Maria no Marta, haruka lia-menon ba Jesus, neʼebé sei iha hela iha Mota Jordaun nia sorin, hodi dehan: “Naʼi, ida neʼebé Ita hadomi moras.” (Joao 11:3) Sira hatene katak Jesus hadomi Lázaro, tan neʼe klaru katak Jesus sei bá atu haree nia. Maibé, duké bá kedas Betânia, Jesus hela tan loron rua iha fatin neʼe.—Joao 11:5, 6.

Lakleur depois sira haruka lia-menon neʼe ba Jesus, Lázaro mate. Jesus hatene bainhira mak Lázaro mate, no nia iha planu atu halo buat ruma kona-ba neʼe. Iha tempu neʼebé Jesus toʼo Betânia, ninia belun diʼak Lázaro mate ona ba loron haat. (Joao 11:17, 39) Jesus bele fó moris-hiʼas ba ema neʼebé mate ona ba loron balu ka lae?

Kuandu rona katak Jesus toʼo ona, Marta, feto neʼebé isin-moris, nia halai lalais atu hasoru Jesus. (Kompara ho Lucas 10:38-42.) Bainhira haree Marta nia triste, ida-neʼe book Jesus nia laran no nia fó laran-kmaan ba Marta hodi dehan: “Ó-nia maun sei moris hiʼas.” Kuandu Marta hatudu katak nia iha fiar kona-ba moris-hiʼas iha futuru, Jesus esplika momoos ba nia hodi dehan: “Haʼu neʼe moris-hiʼas no moris. Ema neʼebé fiar haʼu, maski mate ona, nia sei moris.”—Joao 11:20-25.

Kuandu toʼo ona iha fatuk-kuak neʼebé ema tau Lázaro nia isin-mate, Jesus haruka ema atu hasai  tiha fatuk neʼebé taka netik fatin neʼe. No depois Jesus halo tiha orasaun ho lian makaʼas, nia hatete: “Lázaro, sai mai liʼur!”—Joao 11:38-43.

Ema nia matan hotu hateke ba Lázaro nia rate. Tuirmai, neineik-neineik mane ida sai husi fatin nakukun neʼe. Ninia ain no liman bobar metin hela, no ninia oin mós bobar ho hena. Jesus haruka hodi dehan: “Kore tiha nia hodi husik nia laʼo bá.” Depois sira kore tiha nia, haree! nia mak Lázaro, mane neʼebé mate ona ba loron haat!—Joao 11:44.

Evanjellu Joao hakerek istória kona-ba Lázaro nia moris-hiʼas nuʼudar buat neʼebé akontese duni. Buat hotu neʼebé akontese iha tempu neʼebá hakerek ho klaru, tan neʼe ita bele fiar katak istória neʼe la’ós istória bosok. Se ita duvida kona-ba istória Lázaro nian, neʼe katak ita mós duvida kona-ba milagre hotu neʼebé hakerek iha Bíblia laran, inklui mós Jesus nia moris-hiʼas. No se ita nega Jesus nia moris-hiʼas, neʼe katak ita nega fiar kristaun nian hotu.—1 Korinto 15:13-15.

Tuir loloos, se ita fiar katak Maromak iha duni, ita mós sei fiar katak moris-hiʼas akontese duni. Atu komprende kona-ba neʼe, hanoin toʼok ezemplu tuirmai neʼe: Ema ida bele grava kona-ba ninia hakarak atu fahe liman-rohan ba nia oan no bei-oan sira. No depois nia mate tiha, ema seluk bele haree no rona nia. Tinan atus ida liubá, susar ba ema atu imajina kona-ba neʼe. No ba ema balu neʼebé agora seidauk haree buat sira hanesan neʼe, karik sira mós la komprende kona-ba teknolojia atu grava ema nia isin-lolon, no ba sira ida-neʼe hanesan milagre ida. Se ema bele uza buat neʼebé Maromak kria atu grava ema nia oin ka lian, klaru katak Maromak bele halo buat neʼebé boot liu fali ida-neʼe, loos ka lae? Tan neʼe, ita bele fiar duni katak, Ida neʼebé kria moris, nia rasik bele fó fali moris ba ema neʼebé mate ona.

Milagre neʼebé Jesus halo hodi fó moris-hiʼas ba Lázaro mak sai nuʼudar prova ida neʼebé bele hametin ita-nia fiar ba Jesus no mós fiar kona-ba moris-hiʼas. (Joao 11:41, 42; 12:9-11, 17-19) No liután neʼe, Lázaro nia moris-hiʼas hatudu katak Maromak Jeová no ninia Oan prontu no hakarak atu fó moris-hiʼas ba ema.

Sentimentu neʼebé Jesus hatudu iha tempu neʼebá sai nuʼudar prova katak Maromak nia Oan hakarak tebes atu halo ema moris hiʼas fali. Bíblia hatete: “Toʼo tiha iha fatin neʼebé Jesus hela bá hodi haree nia, Maria monu ba Jesus nia ain dehan: ‘Naʼi, Ita iha neʼe karik, haʼu-nia maun la mate!’ Haree tiha nia tanis no mós haree judeu sira neʼebé mai ho nia tanis hotu, Jesus nia laran taridu tebetebes, neon-susar, tan hanoin. Hafoin nia husu: ‘Imi tau nia iha neʼebé?’ Sira hatán: ‘Naʼi, mai haree.’ Jesus tanis. Judeu sira dehan: ‘Haree bá oinsá Naʼi hadomi nia!’”—Joao 11:32-36.

Iha eskritura neʼe, iha liafuan tolu neʼebé hatudu sai Jesus nia domin, liafuan sira-neʼe mak Jesus nia “laran taridu tebetebes”, “neon-susar”, no nia “tanis”. Liafuan sira-neʼe iha lia orijinál hatudu katak Jesus nia laran book nia toʼo ninia matan-been suli tanba nia haree Lázaro nia mate no mós haree Lázaro nia feton nia tanis.

Antes tempu neʼe, Jesus fó ona moris-hiʼas ba ema naʼin-rua. No nia mós hakarak duni atu halo buat neʼebé hanesan ba Lázaro. (Joao 11:11, 23, 25) Maski nuneʼe, nia “tanis”. Entaun, neʼe mak buat neʼebé furak tebes tanba ida-neʼe hatudu katak ba Jesus, halo ema moris hiʼas mak la’ós  hanesan knaar deʼit. Domin neʼebé nia sente iha tempu neʼebá no ninia laran-sadiʼa, hatudu ho klaru katak nia hakarak duni atu halakon mate.

Tanba Jesus mak “Maromak [Jeová] nia ilas loloos”, ita bele fiar katak ita-nia Aman iha lalehan mós hakarak duni atu halakon mate. (Ebreu 1:3) Ema ida iha Bíblia laran, naran Job, hatene katak Maromak Jeová hakarak duni atu halo ema moris hiʼas, tan neʼe nia dehan: “Se mane ida mate nia bele moris fali ka lae? . . . Ita sei bolu, no haʼu rasik sei hatán ba Ita. Ita sei hanoin ba buat neʼebé Ita halo ho Ita-nia liman.” (Jó [Ayub] 14:14, 15) Iha eskritura neʼe, lia orijinál neʼebé tradús nuʼudar “hanoin ba” bele hatudu katak Maromak hakarak tebetebes atu halo ema moris hiʼas fali. (Gênesis [Kejadian] 31:30; Salmo 84:2) Sin, Maromak Jeová hein namanas atu halo ema moris hiʼas.

Ita bele tau fiar duni ba promete neʼebé Maromak fó kona-ba moris-hiʼas ka lae? Sin bele duni! Tanba Maromak Jeová no ninia Oan iha duni kbiit no hakarak atu kumpre promete neʼe. Ida-neʼe katak sá ba Ita? Ita iha esperansa atu bele hasoru fali ema neʼebé Ita hadomi neʼebé mate ona. Sin, Ita bele hasoru fali sira iha rai neʼe, maibé iha kondisaun neʼebé la hanesan agora!

Maromak Jeová, Ida neʼebé kria ema primeiru no tau sira iha jardín furak, promete ona atu halo fali rai foun. Nia sei halo nuneʼe liuhusi ninia Governu iha lalehan neʼebé Jesus Kristu mak ukun. (Gênesis 2:7-9; Mateus 6:10; 2 Pedro 3:13) Iha rai foun neʼe, ema sei bele haksolok hodi moris ba nafatin, livre husi moras hotu. (Apokalipse 21:1-4; kompara ho Jó 33:25; Isaías [Yesaya] 35:5-7.) Iha fatin neʼe mós, la iha tan odi, violénsia tanba rasa ka kultura la hanesan, no susar tanba ekonomia. Iha rai furak neʼe mak Maromak Jeová sei halo ema mate sira moris hiʼas fali liuhusi Jesus Kristu.

Feto kristaun ida neʼebé temi iha parte neʼe, agora iha esperansa hanesan neʼe. Tinan balu depois ninia inan mate, Testemuña ba Jeová ajuda nia hodi estuda Bíblia. Nia hatete: “Haʼu tanis kuandu haʼu aprende kona-ba esperansa moris-hiʼas. Haʼu kontente tebes atu hatene katak haʼu bele hasoru fali haʼu-nia inan.”

Se Ita mós hakarak tebes atu hasoru fali ema neʼebé Ita hadomi, Testemuña ba Jeová sei kontente atu ajuda Ita aprende kona-ba oinsá Ita bele kaer metin ba esperansa neʼe. Entaun, diʼak atu kontaktu ka koʼalia ho Testemuña ba Jeová iha sira-nia reuniaun-fatin neʼebé besik Ita, ka bele mós hakerek ba diresaun neʼebé temi iha pájina 32.