“Imi tenke sai ona mestre.” (Ebreu 5:12) Imajina toʼok! Jeová, Mestre boot liu hotu iha universu konvida ita atu hanorin ema seluk kona-ba nia. Knaar atu hanorin lia-loos kona-ba Jeová iha família laran, kongregasaun ka iha serbisu haklaken mak priviléjiu no responsabilidade neʼebé sériu. Oinsá mak ita bele halo ida-neʼe ho susesu?

Ita bele hetan resposta iha karta neʼebé Paulo hakerek ba Timóteo: “Kontinua hakaʼas an hodi halaʼo ó-nia knaar atu lee iha ema nia oin, atu fó konsellu, no atu hanorin.” (1 Timóteo 4:13, 16) Mensajen neʼebé Ita hatoʼo bele salva ema nia moris. Tan neʼe importante atu hadiʼa nafatin dalan neʼebé Ita lee no hanorin. Broxura neʼe bele ajuda Ita atu halo nuneʼe. Haree toʼok saida deʼit mak iha broxura neʼe.

Jeová mak “Mestre Boot”. (Isaias 30:20) Broxura neʼe ajuda Ita atu sai lee-naʼin no mestre neʼebé diʼak, maibé keta haluha, só Jeová deʼit mak hun ba Ita-nia mensajen no nia deʼit mak bele dada ema atu hakbesik ba nia. (João 6:44) Tan neʼe, Ita presiza halo orasaun atu husu Maromak nia espíritu santu. Uza beibeik Maromak nia Liafuan. Dada ema nia atensaun ba Jeová, laʼós ba Ita-nia an. Hakaʼas an atu book rona-naʼin haburas sira-nia domin ba Maromak.

Ita hetan ona konvite atu hanorin ema kona-ba mensajen neʼebé importante liu hotu. Ami fiar katak Ita sei hetan susesu hodi sadere ba “kbiit neʼebé Maromak fó”.—1 Pedro 4:11.

Ita-nia maluk serbisu-naʼin,

Grupu Administradór husi Testemuña ba Jeová