Maromak konvida ema husi nasaun hotu atu hakbesik ba nia liuhusi orasaun. (Salmo 65:2) Maibé neʼe laʼós katak Maromak rona orasaun hotu. Porezemplu, se laʼen ida trata aat ninia feen, Maromak sei la rona ninia orasaun. (1 Pedro 3:7) No mós bainhira ema Izraél sira iha tempu uluk kontinua halo hahalok aat, Maromak la rona sira-nia orasaun. Maski nuneʼe, se ema ida neʼebé halo sala boot arrepende ninia sala, Maromak sei rona ninia orasaun. Sin, koʼalia ho Maromak liuhusi orasaun mak buat neʼebé espesiál tebes.​—Lee Isaias 1:15; 55:7.

Haree vídeo Maromak rona orasaun hotu ka lae?

Orasaun mak parte husi ita-nia adorasaun, tan neʼe ita tenke hatoʼo ita-nia orasaun ba deʼit ita-nia Kriadór Jeová. (Mateus 4:10; 6:9) No mós, nuʼudar ema sala-naʼin, ita tenke halo orasaun liuhusi Jesus nia naran tanba nia mate atu kasu ita-nia sala. (João 14:6) Jeová lakohi ita repete beibeik orasaun neʼebé ita dekór ka lee deʼit husi livru. Maromak hakarak ita atu fó sai buat neʼebé iha ita-nia laran.​—Lee Mateus 6:7; Filipe 4:6, 7.

Ita-nia Kriadór bele rona orasaun neʼebé ita hatoʼo iha ita-nia laran. (1 Samuel 1:12, 13) Nia konvida ita atu halo orasaun iha tempu naran deʼit hanesan kuandu ita foin hadeer ka atu toba, kuandu atu han, no kuandu hasoru problema ruma.​—Lee Salmo 55:22; Mateus 15:36.

Atu hakbesik ba Maromak, neʼe la fasil tanba ema barak neʼebé haleʼu ita la iha fiar ba Maromak no la hafolin ninia promesa kona-ba futuru. (2 Timóteo 3:1, 4; 2 Pedro 3:3, 13) Tan neʼe, ita presiza halibur hamutuk ho ita-nia maluk fiar-naʼin sira hodi fó laran-manas ba malu, no sira mós presiza ita.​—Lee Ebreu 10:24, 25.

 Halibur hamutuk ho ema neʼebé hadomi Maromak ajuda ita atu hakbesik ba Maromak. Hodi tuir reuniaun sira husi Testemuña ba Jeová, ita bele hetan ajuda atu hametin ita-nia fiar liuhusi ema seluk nia fiar.​—Lee Roma 1:​11, 12.

Ita bele hakbesik ba Maromak hodi hanoin kleʼan buat neʼebé Ita aprende ona husi ninia Liafuan. Hanoin kleʼan kona-ba ninia hahalok, ninia matadalan no promesa sira. Halo orasaun no hanoin kleʼan ajuda ita atu hafolin Maromak nia domin no matenek.​—Lee Josué 1:8; Salmo 1:1-3.

Atu bele hakbesik ba Maromak, Ita tenkesér tau fiar ba nia. Hanesan ai-hun presiza bee atu bele buras, ita presiza aumenta koñesimentu atu bele haburas ita-nia fiar. Ita bele halo ida-neʼe hodi hanoin kona-ba Ita-nia fiar nia hun.​—Lee Mateus 4:4; Ebreu 11:1, 6.

Jeová tau matan ba ema neʼebé hadomi nia. Nia bele proteje sira husi buat neʼebé bele halakon sira-nia fiar no sira-nia esperansa kona-ba moris ba nafatin. (Salmo 91:1, 2, 7-10) Nia fó avizu mai ita kona-ba hahalok sira neʼebé lori perigu ba saúde no hamosu susar ba ita. Jeová hanorin ita oinsá atu halaʼo ita-nia moris iha dalan neʼebé diʼak liu.​—Lee Salmo 73:27, 28; Tiago 4:4, 8.