Klaru katak buat neʼebé Ita aprende husi Bíblia toʼo agora ajuda Ita atu haburas Ita-nia domin ba Jeová. Maibé Ita presiza kontinua haburas liután domin neʼe. (1 Pedro 2:2) Ita-nia esperansa atu moris ba nafatin depende ba Ita-nia hakaʼas atu hakbesik ba Maromak hodi kontinua estuda ninia Liafuan.​—Lee João 17:3; Judas 21.

Kuandu Ita aprende liután kona-ba Maromak, Ita-nia fiar mós sei sai metin liután. Fiar bele ajuda Ita atu halo Maromak kontente. (Ebreu 11:1, 6) Ida-neʼe sei book Ita atu arrepende an no hadiʼa Ita-nia moris.​—Lee Apóstolu 3:19.

Baibain kuandu ita rona liafuan diʼak, ita gosta konta ida-neʼe ba ema seluk, loos ka lae? Kuandu Ita kontinua estuda Bíblia, Ita sei aprende oinsá atu uza Bíblia hodi esplika Ita-nia fiar kona-ba Jeová no kona-ba liafuan diʼak.​—Lee Roma 10:13-15.

Ema barak komesa fahe liafuan diʼak ba sira-nia família no kolega. Maibé kuandu ita halo ida-neʼe, ita presiza uza matenek. Porezemplu, duké hatete katak sira-nia relijiaun mak la loos, diʼak liu fó-hatene kona-ba Maromak nia promesa sira. Ita mós labele haluha katak ita-nia hahalok diʼak mak iha kbiit liu fali ita-nia liafuan atu book ema nia laran.​—Lee 2 Timóteo 2:24, 25.

Estuda Bíblia ajuda Ita atu hakbesik ba Maromak Jeová. Ikusmai Ita mós bele dedika an ba Jeová no iha relasaun espesiál ho nia. Ita bele sai parte iha Jeová nia família nuʼudar ninia oan.​—Lee 2 Korinto 6:18.

Hodi kontinua estuda Maromak nia Liafuan, neʼe bele hametin liután ita-nia fiar ba Maromak. (Ebreu 5:13, 14) Husu Testemuña ba Jeová ida atu estuda Bíblia ho Ita hodi uza livru Ita Bele Komprende Bíblia! Se Ita aprende liután Maromak nia Liafuan, Ita-nia moris sei sai kontente liu.​—Lee Salmo 1:1-3; 73:27, 28.

Liafuan diʼak mai husi Maromak Jeová neʼebé kontente. Ita bele hakbesik ba nia hodi ransu hamutuk ho ninia povu. (Ebreu 10:24, 25) Hodi hakaʼas an nafatin atu halo Jeová kontente, Ita bele hetan moris neʼebé loloos, katak moris ba nafatin. Sin, hakbesik ba Maromak mak buat neʼebé diʼak liu hotu.​—Lee 1 Timóteo 1:11; 6:19.