1. Esplika toʼok kona-ba Jonas nia viajen. Nia sente oinsá kona-ba fatin neʼebé nia atu bá?

 JONAS iha tempu barak atu hanoin kona-ba buat oioin. Nia presiza halo viajen ba fulan ida ka liu hodi laʼo rai dook maizumenus kilómetru 800. Ulukliu, Jonas presiza hili dalan atu toʼo fatin neʼebé nia atu bá. Nia sei hili dalan neʼebé korta maibé iha perigu, ka hili dalan neʼebé naruk maibé seguru liu? Loron ba loron nia laʼo tuir dalan neʼebé nia hili hodi tun-saʼe foho no laʼo liu mota sira. Karik Jonas laʼo-lemo iha rai-fuik maran iha rai-Síria no hakur Mota Eufrates neʼebé boot tebes. Nia mós presiza buka fatin atu toba iha suku no aldeia sira iha rai-Síria, Mesopotámia, no Asíria. Nuʼudar Jonas hakbesik ba Nínive, nia mós sai taʼuk liután.

2. Oinsá mak Jonas haree katak nia la bele halai-sees husi ninia knaar?

² Maibé Jonas hatene ho klaru kona-ba buat ida. Nia la bele halai-sees husi ninia knaar. Nia koko ona atu halo ida-neʼe. Hanesan ita haree iha kapítulu uluk, ho pasiénsia Jeová korrije Jonas nia hahalok hodi halo anin-fuik iha tasi no depois uza ikan boot atu salva nia. Liutiha loron tolu, ikan boot neʼe muta fali Jonas iha tasi-ibun. Esperiénsia neʼe halo Jonas sai haraik-an no prontu atu halaʼo ninia knaar.—Jonas (Yunus), kapítulu 1, 2.

3. Hahalok saida mak Jeová hatudu ba Jonas? Ida-neʼe hamosu pergunta saida?

³ Bainhira Jeová haruka fali Jonas atu bá Nínive, Jonas halo tuir hodi komesa laʼo-rai atu bá lorosaʼe. (Lee Jonas  [Yunus] 3:1-3. *) Maibé dixiplina neʼebé Jeová fó, troka duni Jonas nia hahalok ka lae? Maski foufoun Jonas la halo tuir, maibé Maromak Jeová hatudu laran-sadiʼa ba Jonas hodi salva nia atu la bele mout no fó oportunidade ida tan ba nia atu halaʼo ninia knaar. Ida-neʼe hanorin Jonas atu mós hatudu laran-sadiʼa ba ema seluk ka lae? Atu hatudu laran-sadiʼa mak buat ida neʼebé susar ba ema sala-naʼin atu halo. Mai ita haree oinsá mak Jonas nia esperiénsia bele ajuda ita.

4, 5. Tanbasá Nínive mak “sidade boot” tuir Jeová nia haree? Ita bele aprende saida kona-ba Jeová?

⁴ Jonas nia hanoin kona-ba Nínive la hanesan duni ho Jeová nia hanoin. Bíblia hatete: “Nínive mak sidade boot ba  Maromak.” (Jonas [Yunus] 3:3) Livru Jonas temi dala tolu Jeová nia liafuan neʼebé hatete: “Nínive sidade boot neʼe.” (Jonas [Yunus] 1:2; 3:2; 4:11) Tanbasá mak sidade neʼe “boot”, ka importante, ba Jeová?

⁵ Nínive mak sidade antigu ida, neʼebé uluk Nimrod mak harii depois Rai-Nabeen. Nínive mak sidade boot tebes no iha sidade kiʼik sira iha laran. Presiza loron tolu atu laʼo husi sorin ida ba sorin seluk. (Gênesis [Kejadian] 10:11; Jonas [Yunus] 3:3) Sidade neʼe iha templu sira neʼebé boot no furak, moru neʼebé mahar, no uma boot oioin. Maibé, sidade Nínive sai importante ba Jeová laʼós tanba buat hirak-neʼe, maibé tanba ema sira neʼebé hela iha sidade neʼe. Iha tempu neʼebá, Nínive iha ema barak tebes. Maski sira halo buat oioin neʼebé aat, maibé Jeová hanoin sira. Nia hafolin sira ida-idak nia moris no haree katak sira bele arrepende an no troka sira-nia hahalok.

6. (a) Tuir Ita-nia hanoin, saida mak halo Jonas taʼuk? (Haree mós nota-rodapé.) (b) Saida mak ita aprende husi dalan neʼebé Jonas halaʼo ninia serbisu haklaken?

⁶ Bainhira Jonas toʼo sidade Nínive, karik nia sente taʼuk tebes hodi haree sidade neʼe iha ema barak, ema naʼin-120.000 liu. * Nia laʼo ba loron ida tomak atu tama iha sidade laran, karik hodi buka fatin neʼebé diʼak atu hatoʼo Jeová nia mensajen. Oinsá mak Jonas konsege koʼalia ho ema sira iha fatin neʼe? Nia hatene koʼalia ema Asíria nia lian ka lae? Ka, Jeová mak halo milagre ida atu Jonas bele hatene koʼalia sira-nia lian? Ka, Jonas koʼalia ninia lian ebraiku no husu ema seluk atu tradús fali ba ema Nínive? Maski ita la hatene kona-ba neʼe, maibé klaru katak mensajen neʼe laʼós mensajen neʼebé lori haksolok, tanba nia tenke hatete: “Hela loron haatnulu tan, Nínive sei harahun.” (Jonas [Yunus] 3:4) Jonas haklaken Maromak nia mensajen ho aten-brani no fiar. Hahalok sira-neʼe mak hahalok neʼebé ema kristaun ohin loron presiza hatudu.

7, 8. (a) Bainhira ema iha Nínive rona Jonas nia avizu, sira halo saida? (b) Saida mak liurai iha Nínive halo?

 ⁷ Ema barak komesa see tilun ba Jonas nia mensajen. Karik Jonas mós prepara ninia an atu hasoru ema neʼebé sei sai hirus ka atu baku nia. Maibé, buat neʼebé akontese halo nia hakfodak. Sira rona duni ba Jonas! Ninia mensajen neʼe habelar lalais iha sidade laran hanesan ahi-lakan. Lakleur, ema hotu koʼalia ba malu kona-ba Maromak nia tesi-lia neʼebé Jonas hatoʼo ba sira. (Lee Jonas [Yunus] 3:5. *) Depois, sira hotu iha sidade laran, inklui ema riku no kiak, labarik, ema boot, no ferik-katuas sira komesa arrepende an hodi halo jejún. Ikusmai, liurai rasik mós rona kona-ba buat neʼebé akontese daudaun iha sidade laran.

⁸ Bainhira liurai rona kona-ba Jonas nia avizu, nia mós arrepende an kedas. Nia hamriik husi ninia kadunan, hasai roupa liurai nian no hatais hena karón hanesan ninia povu sira, no nia mós “tuur iha ahi-kadesan”. Liután neʼe, hamutuk ho ninia ema-boot sira, liurai fó sai ba povu neʼebé halo hela jejún katak neʼe mak mandamentu ida neʼebé sira hotu tenkesér halo. Nia haruka povu hotu atu hatais hena karón, no atu halo nuneʼe mós ba sira-nia animál sira. * Ho haraik-an, liurai neʼe rekoñese katak nia ho ninia povu merese simu todan tanba hahalok aat no violénsia makaʼas. Hodi hein katak Maromak neʼebé loos sei haree sira-nia hahalok arrepende an no hatudu laran-sadiʼa, nia hatete: “Karik Maromak . . . sei troka ninia hanoin no hadook tiha ninia laran-nakali, atu ita la mohu.”—Jonas (Yunus) 3:6-9.

9. Ema balu la fiar saida kona-ba ema Nínive? Maibé tanbasá mak ita bele fiar katak ida-neʼe akontese duni?

⁹ Ema balu la fiar katak ema iha Nínive bele arrepende an kedas hanesan neʼe. Maibé matenek-naʼin sira kona-ba Bíblia esplika katak nasaun balu iha tempu antigu iha toman atu fiar deʼit ba ema nia liafuan oioin no sira iha sentimentu makaʼas neʼebé tun-saʼe lalais. Maibé, razaun importante liu ba ita atu fiar katak ema Nínive troka duni sira-nia hahalok mak tanba Jesus  Kristu rasik mós temi kona-ba neʼe. (Lee Mateus 12:41.) Bainhira ema Nínive arrepende an, Jesus sei iha lalehan no haree sira halo nuneʼe. (João 8:57, 58) Entaun, maski ema ida haree hanesan ema neʼebé aat tebetebes, ita labele hanoin katak nia la bele arrepende an no troka ninia hahalok. Sin, só Jeová deʼit mak bele hatene ema nia laran.

10, 11. (a) Bainhira ema Nínive troka sira-nia hahalok, Jeová halo saida? (b) Tanbasá mak ita bele fiar katak Jeová nia tesi-lia ba ema Nínive mak la sala?

¹⁰ Bainhira ema Nínive troka sira-nia hahalok, Jeová halo saida? Livru Jonas hatete: “Maromak neʼebé loos haree sira-nia hahalok, katak sira husik sira-nia dalan neʼebé aat; nuneʼe Maromak neʼebé loos sente triste kona-ba susar neʼebé nia hatete ona atu fó ba sira; no nia la halo susar neʼe monu ba sira.”—Jonas (Yunus) 3:10.

¹¹ Ida-neʼe dehan katak uluk Jeová nia dalan atu tesi-lia ba ema Nínive mak sala ka lae? Lae. Bíblia hatete katak Jeová nia tesi-lia mak sempre loos. (Lee Deuteronômio [Ulangan] 32:4. *) Maibé, Jeová halo mudansa ba ninia desizaun tanba nia la hirus ona ba ema Nínive. Nia haree katak sira troka sira-nia hahalok, no ida-neʼe book nia atu deside katak nia la presiza tan atu fó kastigu todan ba sira. Sin, Jeová hatene duni tempu neʼebé loos atu hatudu ninia laran-sadiʼa ba ema.

12, 13. (a) Oinsá mak Jeová hatudu katak nia hanoin ema ida-idak? (b) Tanbasá mak buat neʼebé Jonas fó-hatene nanis mak la bosok?

¹² Maski ulun-naʼin relijiaun balu hanorin kona-ba Maromak nuʼudar Maromak neʼebé laran-aat no la hanoin ema, maibé Jeová la hanesan neʼe. Tuir loloos, Jeová mak Maromak neʼebé hanoin ita ida-idak nia situasaun no prontu atu hatudu laran-sadiʼa ba ita. Kuandu nia deside atu fó kastigu ba ema aat, nia sempre fó avizu uluk ba sira tanba nia hakarak sira atu arrepende an no troka sira-nia hahalok, hanesan ho ema Nínive. (Ezequiel [Yehezkiel] 33:11) Jeová hatete ba ninia profeta Jeremias: “Bainhira haʼu koʼalia hasoru nasaun ida no ukun ida atu sobu, hamohu no halakon ida-neʼe, no nasaun neʼe loloos fila fali hodi husik ninia hahalok aat neʼebé haʼu fó sai, haʼu mós  sei sente triste kona-ba susar neʼebé haʼu hanoin ona atu halo ba ida-neʼe.”—Jeremias (Yeremia) 18:7, 8.

¹³ Entaun, buat neʼebé Jonas fó-hatene nanis mak bosok ka lae? Lae. Tanba Jonas fó-hatene kona-ba buat neʼebé loloos sei akontese ba ema Nínive se sira la troka sira-nia hahalok. Se sira fila fali ba sira-nia hahalok aat hanesan uluk, Maromak sei tesi-lia todan ba sira. No ikusmai ida-neʼe duni mak buat neʼebé akontese ba sidade neʼe.—Sofonias (Zefanya) 2:13-15.

14. Bainhira Jeová hatudu laran-sadiʼa ba Nínive, Jonas sente oinsá?

¹⁴ Bainhira Jonas hatene katak Maromak sei la halakon sidade Nínive, nia sente oinsá? Bíblia hatete: “Ba Jonas, ida-neʼe la halo nia kontente, no nia sai laran-nakali.” (Jonas [Yunus] 4:1) Jonas sai hirus tebes toʼo halo orasaun iha dalan neʼebé kritika fali Jeová! Jonas hatete katak diʼak liu nia lalika bá Nínive no hela deʼit iha ninia rai. Nia mós dehan katak nia hatene nanis ona ida-neʼe atu akontese, tan neʼe mak nia halai ba Társis. No ikusmai, Jonas husu ba Jeová atu halo nia mate. Nia hatete katak diʼak liu mate duké moris.—Lee Jonas (Yunus) 4:2, 3. *

15. (a) Tanbasá mak Jonas sai hirus no sente kasian ba ninia an? (b) Saida mak Jeová halo ba ninia profeta neʼe?

¹⁵ Tanbasá mak Jonas sai hirus hanesan neʼe? Maski ita la hatene ho loloos saida mak nia hanoin, maibé ita hatene Jonas fó avizu ona katak sidade neʼe sei mohu lakon, no ema Nínive fiar kona-ba neʼe. Maibé ikusmai, susar ida la kona sidade neʼe. Karik Jonas sai taʼuk katak ema sei goza nia ka hatete aat katak nia mak profeta falsu. Bíblia hatudu katak duké sente kontente kona-ba ema neʼebé arrepende an no Jeová nia laran-sadiʼa, maibé Jonas sai hirus, sente kasian ba ninia an, no hanoin  deʼit kona-ba ninia naran rasik. Maski nuneʼe, Maromak hatudu laran-sadiʼa ba Jonas hodi haree deʼit ba buat neʼebé diʼak iha ninia laran. Duké fó kastigu ba Jonas, Jeová husu nia ho laran-diʼak: “Ó iha direitu atu sai laran-nakali ka lae?” (Jonas [Yunus] 4:4) Jonas hatán ba pergunta neʼe ka lae? Bíblia la hatete.

16. Dala ruma ema iha hanoin la hanesan ho Maromak kona-ba saida deʼit? Saida mak ita aprende husi Jonas nia ezemplu?

¹⁶ Maski fasil ba ita atu tesi lia ba Jonas, maibé ita hotu presiza hanoin-hetan katak nuʼudar ema sala-naʼin dala ruma ita-nia hanoin la hanesan ho Maromak nian. Porezemplu, ema balu karik hanoin katak Jeová tenke hanetik dezastre ruma, ka Nia tenke oho kedas ema aat sira, ka diʼak liu Jeová halakon kedas mundu aat neʼe. Maibé husi istória kona-ba Jonas, ita bele aprende katak kuandu ita-nia hanoin la hanesan ho Jeová nian, ita mak tenke troka ita-nia hanoin, laʼós Jeová.

17, 18. (a) Depois Jonas husik sidade Nínive, saida mak nia halo? (b) Jonas sente oinsá bainhira Jeová halo milagre ho lakeru-patola hun?

¹⁷ Ho oin-buis no laran-tun, profeta Jonas husik sidade Nínive. Maibé duké fila fali ba ninia rai, nia laʼo hodi bá fali parte leste neʼebé iha foho barak. Husi foho nia tutun Jonas bele hateke tun ba área Nínive tomak. Iha fatin neʼe, Jonas harii barraka ida no hateke ba Nínive. Karik nia hein hela atu haree sidade Nínive sei lakon mohu. Jonas ulun-toʼos no lakohi fó perdua. Entaun, oinsá mak Jeová bele hanorin ninia profeta neʼe atu hatudu laran-sadiʼa?

¹⁸ Iha kalan ida deʼit, Jeová halo lakeru-patola hun ida moris no halo sai buras kedas. Bainhira Jonas hadeer, lakeru-patola hun neʼe nani saʼe aas toʼo ninia tahan taka tomak Jonas nia barraka leten hodi fó mahon kapás. Ida-neʼe halo Jonas “haksolok tebes”. Karik nia hanoin katak Maromak mak halo milagre neʼe hodi fó bensaun ba nia. Maibé, Jeová halo ida-neʼe laʼós deʼit atu halo Jonas kontente hodi fó mahon husi loro-manas, maibé mós atu hanorin Jonas iha dalan neʼebé sei book duni ninia laran. Tan neʼe, Maromak halo milagre seluk tan. Ulukliu, nia halo ular ida atu hamate lakeru-patola neʼe. Tuirmai, nia halo “anin manas husi lorosaʼe” atu huu toʼo halo Jonas oin-halai tanba manas tebes. Ida-neʼe halo Jonas sai laran-tun fali, no dala ida tan nia hatete ba Maromak katak nia hakarak mate.—Jonas (Yunus) 4:6-8.

19, 20. Oinsá mak Jeová uza lakeru-patola hun atu hanorin Jonas?

¹⁹ Dala ida tan, Jeová husu Jonas se nia iha direitu atu sai hirus, maibé iha tempu neʼe Jeová husu kona-ba lakeru-patola hun neʼebé foin mate. Maibé Jonas la simu ninia sala. Duké arrepende an, Jonas hatán: “Haʼu iha direitu duni atu sai laran-nakali toʼo mate.” Bainhira Jonas koʼalia hanesan neʼe, Jeová komesa hanorin nia.—Jonas (Yunus) 4:9.

²⁰ Maromak Jeová hatete ba Jonas katak maski laʼós Jonas mak kuda ka halo moris lakeru-patola hun neʼe, maibé nia sente kasian ba ida-neʼe. Tuirmai, Maromak hatete: “Haʼu la bele ka lae, sente kasian ba Nínive, sidade boot neʼe, neʼebé iha ema naʼin-120.000 liu neʼebé la hatene buat neʼebé loos husi sala, no mós sira-nia animál neʼebé barak?”—Jonas (Yunus) 4:10, 11. *

21. (a) Jeová uza saida atu hanorin Jonas? (b) Oinsá mak istória kona-ba Jonas ajuda ita atu hanoin didiʼak kona-ba ita-nia laran?

 ²¹ Ita komprende buat neʼebé Jeová hakarak hanorin ba Jonas ka lae? Jonas la halo buat ida atu tau matan ba lakeru-patola hun neʼe, maibé Jeová halo buat barak ona ba ema Nínive. Porezemplu, Jeová fó moris ba sira no fó buat hotu neʼebé sira presiza atu moris, hanesan nia halo ba ema hotu iha mundu neʼe. Tan neʼe, Jeová hakarak Jonas atu haree katak ema naʼin-120.000 ho sira-nia animál hotu nia moris mak folin-boot liu fali lakeru-patola hun ida. Karik iha tempu neʼe Jonas hanoin deʼit kona-ba ninia an duké ema seluk nian. Porezemplu, nia sente kasian ba lakeru-patola hun tan deʼit ida-neʼe fó mahon ba nia. Nuneʼe mós kona-ba sidade Nínive, Jonas sai hirus tanba nia hanoin demais kona-ba ninia rasik nia diʼak no lakohi hamoe ninia an. Istória neʼe ajuda ita atu hanoin didiʼak kona-ba ita-nia laran. Nuʼudar ema sala-naʼin, dala ruma ita hotu hanoin demais kona-ba ita-nia an, loos ka lae? Sin, ita hotu presiza agradese ba Jeová tanba nia hanorin ita atu buka ema seluk nia diʼak no hatudu laran-sadiʼa ba sira hodi halo tuir ninia ezemplu!

22. (a) Oinsá mak ita bele fiar katak Jonas simu Jeová nia hanorin? (b) Ita hotu presiza aprende atu hatudu hahalok saida?

²² Jonas aprende buat ruma husi buat hotu neʼe ka lae? Livru Jonas ramata deʼit ho Jeová nia pergunta no la fó sai Jonas nia resposta. Karik ema balu neʼebé lee livru Jonas hatete katak Jonas la simu Jeová nia konsellu tanba nia la hatán ba Jeová. Maibé, ita bele fiar katak Jonas simu duni Jeová nia konsellu. Tanbasá mak ita fiar ida-neʼe? Tanba nia rasik mak hakerek livru Jonas iha Bíblia laran. Hanoin toʼok, tinan barak liutiha kuandu profeta Jonas hela fali iha ninia rai, nia hakerek ninia istória rasik. Nuʼudar profeta neʼebé katuas ona, nia ho haraik-an hakerek kona-ba ninia sala rasik, hahalok ulun-toos, no oinsá nia la hatudu laran-sadiʼa. Karik nuʼudar nia hakerek ninia istória neʼe, nia doko ninia ulun ho laran-triste. Jonas aprende duni lisaun importante husi Jeová nia hanorin, no ikusmai nia sai ema neʼebé hatudu laran-sadiʼa ba ema seluk. Oinsá ho ita?—Lee Mateus 5:7.