1, 2. (a) Konta toʼok kona-ba Noemi no Rute nia viajen no susar neʼebé sira sente. (b) Oinsá mak Rute nia viajen la hanesan ho Noemi?

 RUTE laʼo iha Noemi nia sorin tuir dalan naruk iha rai-Moab. Sira naʼin-rua laʼo mesak deʼit iha rai-luan neʼe. Hanoin toʼok, nuʼudar loro-matan monu daudaun, Rute haree sira-nia lalatak neʼebé sai naruk. Nia hateke ba ninia banin-feto no hanoin se agora mak tempu atu buka fatin atu toba iha kalan neʼe ka lae. Nia hadomi tebes Noemi no hakarak halo buat hotu hodi tau matan ba nia.

² Feto naʼin-rua neʼe laran-triste tebes. Noemi sai faluk ba tinan balu ona, maibé foin daudaun ninia oan-mane naʼin-rua naran Quilion no Maalon mate. Rute mós triste tanba Maalon mak ninia laʼen. Rute ho Noemi atu bá fatin ida deʼit, neʼe mak sidade kiʼik naran Belein iha rai-Izraél. Maibé, iha buat ida neʼebé la hanesan kona-ba sira naʼin-rua nia viajen. Ba Noemi, neʼe mak viajen atu fila fali ba ninia rai rasik. Maibé ba Rute, neʼe mak viajen atu bá fatin neʼebé nia seidauk hatene, no nia foin husik ninia família rasik, ninia moris-fatin, no ninia kultura hotu, inklui mós ninia maromak sira.—Lee Rute 1:3-6. *

3. Resposta ba pergunta saida deʼit mak sei ajuda ita atu banati-tuir Rute nia fiar?

³ Saida mak book feto Moab neʼe atu simu mudansa boot hanesan neʼe? Oinsá mak Rute hetan forsa atu komesa ninia moris foun no tau matan ba Noemi? Nuʼudar ita buka-hatene resposta ba pergunta sira-neʼe, ita sei aprende buat barak hodi banati-tuir Rute nia fiar. (Haree mós kaixa “ Livru kiʼik neʼebé furak tebes”.)  Ulukliu, mai ita haree tansá mak feto naʼin-rua neʼe laʼo daudaun iha dalan atu bá Belein.

4, 5. (a) Tanbasá mak Noemi nia família muda ba rai-Moab? (b) Susar saida deʼit mak Noemi hasoru iha rai-Moab?

⁴ Rute moris no sai boot iha rai-Moab, rai kiʼik iha parte leste husi Tasi Mate. Fatin neʼe mak foho tetuk neʼebé mota mak fahe ho rai sorin. Rai-Moab iha hahán barak maski iha tempu neʼebé rai-hamlaha kona Izraél. Tan neʼe mak Rute koñese malu ho Maalon no ninia família.—Rute 1:1.

⁵ Bainhira rai-hamlaha iha rai-Izraél, Noemi nia laʼen naran Elimélec halo desizaun atu lori ninia feen no oan-mane naʼin-rua no husik sira-nia rai hodi hela iha rai-Moab neʼebé sira seidauk hatene. Karik mudansa neʼe halo susar ba ninia família atu kontinua fiar-metin ba Jeová, tanba ema Izraél presiza bá beibeik iha Jeová nia fatin santu hodi halaʼo sira-nia adorasaun. (Deuteronômio [Ulangan] 16:16, 17) Maibé Noemi fiar-metin nafatin. Maski nuneʼe, bainhira ninia laʼen mate, ida-neʼe halo nia triste tebes.—Rute 1:2, 3.

6, 7. (a) Tanbasá mak Noemi sai laran-tun kuandu ninia oan-mane naʼin-rua kaben ho feto Moab? (b) Noemi haree ninia feto-foun sira oinsá?

⁶ Liutiha tempu balu, Noemi nia oan-mane sira kaben ho feto Moab, no karik ida-neʼe mós halo Noemi laran-triste. (Rute 1:4) Noemi hatene katak ninia beiʼala Abraão hakaʼas an tebes atu buka feen ba ninia oan-mane Isaac, tanba hakarak nia atu kaben ho feto neʼebé adora Maromak Jeová. (Gênesis [Kejadian] 24:3, 4) Depois neʼe, Moisés nia Ukun-Fuan mós fó avizu ba ema Izraél atu labele husik sira-nia oan-mane no oan-feto kaben ho ema husi rai seluk, hodi sira labele adora maromak falsu sira.—Deuteronômio (Ulangan) 7:3, 4.

⁷ Maibé, Maalon no Quilion kaben ho feto Moab. Maski Noemi sai laran-tun no hanoin barak kona-ba neʼe, maibé nia hakaʼas an atu hatudu laran-diʼak no domin ba ninia feto-foun, Rute no Orpa. Karik Noemi mós iha esperansa katak aban-bainrua sira mós komesa adora Jeová. Maski ita ladún hatene kona-ba neʼe, maibé Rute no Orpa hadomi Noemi. Bainhira Rute no Orpa nia laʼen mate, sira-nia relasaun diʼak ba malu ajuda duni sira atu tahan hasoru susar neʼe. Liután neʼe, feto naʼin-rua neʼe sai faluk maski sira seidauk iha oan.—Rute 1:5.

8. Saida deʼit mak book Rute atu hakbesik ba Jeová?

⁸ Rute nia relijiaun ajuda nia atu tahan hasoru terus boot  hanesan neʼe ka lae? Karik lae. Ema Moab adora maromak barak, no maromak sira-neʼe nia ulun mak Camós. (Números [Bilangan] 21:29) No hanesan relijiaun sira seluk iha tempu neʼebá, ema Moab nia relijiaun mós envolve ho hahalok violénsia, inklui mós oho labarik sira atu hasaʼe nuʼudar sakrifísiu. Tan neʼe, bainhira Maalon no Noemi fó-hatene ba Rute kona-ba ema Izraél nia Maromak, Jeová, neʼebé nakonu ho domin no laran-sadiʼa, karik ida-neʼe kona loos Rute nia laran. La hanesan ho ema Moab nia maromak sira, Jeová hatudu domin ba ema no nia la ukun ema hodi halo sira taʼuk. (Lee Deuteronômio [Ulangan] 6:5. *) No bainhira Rute lakon ninia laʼen, karik nia sai besik liu ho Noemi no kontente atu rona Noemi konta kona-ba Maromak Jeová, Ninia hahalok furak sira, no dalan neʼebé Nia tau matan ba Ninia povu ho domin.

9-11. (a) Noemi, Rute no Orpa deside atu halo saida? (b) Saida mak ita aprende husi susar neʼebé Noemi, Rute no Orpa hasoru?

⁹ Iha rai-Moab, Noemi hein hela atu rona informasaun husi ninia rai. Loron ida, nia rona katak rai-hamlaha iha Izraél la iha ona, karik nia rona neʼe husi ema laʼo-rai neʼebé faʼan sasán. Jeová tau fali ninia atensaun ba ninia povu. Sidade Belein sai fali fatin neʼebé la kuran ai-han hodi tuir ninia naran neʼebé iha arti katak “Uma paun nian”. Tan neʼe, Noemi deside atu fila fali ba ninia rai.—Rute 1:6.

¹⁰ Rute no Orpa sei halo saida? (Rute 1:7) Tanba sira foin hasoru susar hamutuk, sira naʼin-tolu sai besik malu duni. Liuliu Rute, nia gosta tebes Noemi nia hahalok laran-diʼak no ninia fiar-metin ba Jeová. Tan neʼe, feto-faluk naʼin-tolu neʼe komesa laʼo hamutuk atu bá rai-Judá.

¹¹ Istória kona-ba Rute fó-hanoin mai ita katak susar no dezastre bele kona ema diʼak no ema aat hotu. (Eclesiastes [Pengkhotbah] 9:2, 11) Istória neʼe mós hatudu katak kuandu ita hasoru terus boot hanesan família mate, diʼak atu hetan kmaan husi ema seluk, liuliu sira neʼebé buka mahon husi Maromak Jeová.—Provérbios (Amsal) 17:17.

12, 13. Tanbasá mak Noemi hakarak Rute no Orpa atu fila fali ba sira ida-idak nia uma duké kontinua laʼo hamutuk ho nia? Maibé saida mak feto-faluk sira-neʼe hatete?

¹² Depois sira naʼin-tolu laʼo dook tiha, Noemi komesa hanoin barak. Nia hanoin kona-ba ninia feto-foun sira neʼebé laʼo  daudaun iha ninia sorin no kona-ba domin neʼebé sira hatudu ona ba nia no ba ninia oan-mane sira. Nia lakohi duni atu aumenta ninia feto-foun sira-nia susar. Noemi hanoin: ‘Se sira husik sira-nia rai no tuir haʼu, haʼu sei halo saida ba sira iha Belein?’

¹³ Ikusmai, Noemi hatete: “Fila bá, imi fila fali ba ida-idak nia inan nia uma. Haʼu hein katak Jeová sei hatudu laran-diʼak neʼebé nakonu ho domin ba imi, hanesan imi hatudu ba mane sira neʼebé mate ona no ba haʼu.” Noemi mós fó sai ninia esperansa katak Jeová sei fó kolen ba sira hodi fó laʼen foun. Bíblia hatete: “Tuirmai nia reʼi sira, no sira komesa tanis ho lian makaʼas.” Ita bele komprende tansá Rute ho Orpa hadomi sira-nia banin-feto neʼebé laran-diʼak no la hanoin nia rasik nia diʼak. Tan neʼe, feto-foun sira-neʼe kontinua hatete: “Lae, ami sei bá hamutuk ho Ita atu fila fali ba Ita-nia povu.”—Rute 1:8-10.

14, 15. (a) Orpa fila fali ba saida? (b) Oinsá mak Noemi hakaʼas Rute atu husik nia?

¹⁴ Maibé Noemi la simu sira-nia liafuan. Nia esplika ho didiʼak katak iha rai-Izraél, nia sei la bele halo buat ida atu ajuda sira. Sin, nia la iha ona laʼen neʼebé tau matan ba nia, la iha mós oan-mane seluk neʼebé bele kaben ho feto sira-neʼe, no nia mós la iha esperansa atu iha tan oan-mane. Noemi hatudu sai katak nia la iha kbiit atu tau matan ba sira, no tan neʼe mak nia laran-triste tebes. Noemi nia liafuan neʼe halo Orpa hanoin hikas fali. Karik Orpa hanoin: ‘Loos duni, iha rai-Moab, haʼu iha família, inan no uma neʼebé haʼu bele hela fali. Karik diʼak liu ba haʼu atu hela nafatin iha rai-Moab.’ Tan neʼe, ho laran-triste, Orpa reʼi Noemi hodi fó adeus ba nia no fila fali ba ninia rai.—Rute 1:11-14.

¹⁵ Oinsá ho Rute? Buat neʼebé Noemi hatete kona mós Rute. Maibé Bíblia dehan: ‘Rute la husik Noemi.’ Karik Noemi komesa laʼo iha dalan, maibé Rute laʼo tuir iha ninia kotuk. Noemi haruka Rute atu fila fali ba ninia rai, hodi dehan: “Haree! Ó-nia  kuñada faluk neʼe fila fali ba ninia povu no ninia maromak sira. Bá hamutuk ho ó-nia kuñada faluk neʼe.” (Rute 1:15) Liafuan neʼe hatudu sai buat ida neʼebé importante. Sin, Orpa fila fali laʼós deʼit ba ninia povu, maibé mós ba “ninia maromak sira”. Nia kontente atu kontinua adora Camós no maromak falsu sira seluk. Rute mós sente hanesan ka lae?

16-18. (a) Oinsá mak Rute hatudu domin ho laran-metin? (b) Saida mak ita bele aprende husi Rute kona-ba domin ho laran-metin? (Haree mós dezeñu kona-ba feto naʼin-rua neʼe.)

¹⁶ Rute hateke ba Noemi iha dalan fuik neʼe. Rute nia laran la namlele. Ninia laran nakonu ho domin ba Noemi no mós ba Maromak neʼebé Noemi adora. Rute hatete: “Labele obriga haʼu atu husik Ita, atu fila fali hodi la laʼo hamutuk tan ho Ita. Fatin neʼebé Ita bá haʼu sei bá, no iha fatin neʼebé Ita toba iha kalan haʼu mós sei toba. Ita-nia povu sei sai haʼu-nia povu, no Ita-nia Maromak, haʼu-nia Maromak. Iha fatin neʼebé Ita mate haʼu mós sei mate, no iha neʼebá mak ema sei hakoi haʼu. Husik Jeová fó kastigu mai haʼu no liután ida-neʼe, se karik laʼós mate mak haketak haʼu husi Ita.”—Rute 1:16, 17.

¹⁷ Rute nia liafuan neʼe kapás tebes. Maski maizumenus tinan 3.000 mak liu tiha ona, maibé ema barak sei hatene no temi beibeik liafuan neʼe. Ida-neʼe haleno Rute nia hahalok furak ida, neʼe mak domin ho laran-metin. Rute nia domin neʼe makaʼas no metin tebes, tan neʼe nia sei tuir Noemi iha fatin naran deʼit neʼebé nia bá. Mate deʼit mak bele haketak sira naʼin-rua. Noemi nia povu sei sai Rute nia povu, tanba Rute prontu atu husik buat hotu iha Moab, inklui mós ema Moab nia maromak sira. La  hanesan ho Orpa, Rute bele hatete ho laran katak nia hakarak Noemi nia Maromak Jeová atu sai ninia Maromak rasik. *

¹⁸ Tan neʼe, sira naʼin-rua kontinua laʼo iha dalan atu bá Belein. Karik sira laʼo kleur toʼo semana ida. Maibé ita bele fiar katak sira sente kontente tanba sira bele fó kmaan ba malu bainhira sira sente laran-triste no susar.

19. Oinsá mak ita bele banati-tuir Rute nia ezemplu kona-ba hatudu domin ho laran-metin ba ita-nia família, belun sira, no iha kongregasaun laran?

¹⁹ Ohin loron, ema barak hasoru susar oioin iha mundu neʼe. Bíblia dehan katak iha ita-nia tempu, ita sei hasoru “problema barak neʼebé susar atu tahan”, tan neʼe ita hasoru terus oioin no ema neʼebé ita hadomi mate. (2 Timóteo 3:1) Tan neʼe, importante liután ba ita atu hatudu hahalok neʼebé Rute hatudu, neʼe mak domin ho laran-metin. Hahalok neʼe book ita atu kaer metin ba buat neʼebé ita hadomi. Domin hanesan neʼe ajuda ita iha nakukun laran iha mundu neʼe. Ita presiza hatudu hahalok ida-neʼe ba ita-nia kaben, família, belun sira, no mós iha kongregasaun laran. (Lee 1 João 4:7, 8, 20.) Kuandu ita haburas hahalok neʼe, ita hatudu katak ita banati-tuir duni Rute nia ezemplu diʼak.

20-22. (a) Noemi nia moris iha rai-Moab kona nia oinsá? (b) Noemi iha hanoin sala saida kona-ba ninia terus? (Haree mós Tiago 1:13.)

²⁰ Klaru katak fasil atu koʼalia ho ibun-tutun kona-ba domin ho laran-metin, maibé la fasil duni atu hatudu hahalok neʼe iha ita-nia moris. Rute iha oportunidade atu hatudu ninia domin ho laran-metin laʼós ba Noemi deʼit, maibé mós ba Maromak Jeová neʼebé nia deside atu serbí.

²¹ Ikusmai, feto naʼin-rua neʼe toʼo Belein, sidade kiʼik ida neʼebé dook maizumenus kilómetru 10 husi Jeruzalein. Karik iha tempu uluk, Noemi ho ninia família iha naran-boot iha sidade kiʼikoan neʼe, tanba ema barak komesa koʼalia kona-ba Noemi neʼebé foin mai fali. Feto sira hateke ba Noemi no husu ba malu: “Nia mak Noemi ka?” Karik tanba Noemi hela iha rai-Moab ba tempu kleur, nia oin haree oin-seluk uitoan. Noemi nia oin no ninia jeitu hatudu katak nia hetan terus no susar barak iha tinan hirak-neʼe nia laran.—Rute 1:19.

²² Noemi fó sai ninia laran-susar ba ninia família no viziñu sira uluk nian. Nia hatete katak nia tenke troka ninia naran hodi  husik tiha naran Noemi neʼebé iha arti katak “Haʼu-nia haksolok” no simu fali naran foun Mara, katak “Moruk”. Kasian loos Noemi! Liután neʼe, hanesan ho Job, Noemi mós hanoin katak Maromak Jeová mak lori terus oioin ba nia.—Rute 1:20, 21; Jó (Ayub) 2:10; 13:24-26.

23. Rute komesa atu hanoin saida? Moisés nia Ukun-Fuan inklui ukun-fuan saida ba ema kiak sira? (Haree mós nota-rodapé.)

²³ Feto naʼin-rua neʼe komesa hela iha Belein. Rute hanoin oinsá atu tau matan ba ninia an no ba Noemi. Nia rona katak Jeová nia Ukun-Fuan ba ninia povu inklui ukun-fuan neʼebé ajuda ema kiak. Ema kiak sira bele bá ema seluk nia toʼos iha tempu koʼa nian, no bele laʼo tuir sira neʼebé koʼa hodi hili restu neʼebé serbisu-naʼin husik hela, no koʼa buat neʼebé moris iha toʼos ninin. *—Levítico (Imamat) 19:9, 10; Deuteronômio (Ulangan) 24:19-21.

24, 25. Saida mak Rute halo kuandu nia tama iha Boas nia toʼos? Serbisu hili restu envolve saida deʼit?

²⁴ Iha tempu koʼa sevada nian, karik iha fulan-Abríl tuir ita-nia kalendáriu, Rute bá ema nia toʼos hodi haree se ema ruma sei husik nia atu hili sevada. Nia tama iha mane ida naran Boas nia toʼos. Maski Rute la hatene, maibé Boas mak ema riku no família ida husi Noemi nia laʼen Elimélec. Tuir loloos, Rute iha direitu atu hili sevada iha ema seluk nia toʼos hodi la husu uluk, maibé Rute la halo hanesan neʼe. Nia husu lisensa ba mane joven neʼebé tau matan ba serbisu-naʼin sira. Mane neʼe hatán, no Rute komesa kedas serbisu.—Rute 1:22–2:3, 7.

²⁵ Hanoin toʼok nuʼudar Rute tuir serbisu-naʼin sira neʼebé koʼa sevada ho sabit, nia hakruʼuk hodi hili buat neʼebé sira halo monu ka husik hela. Depois, nia futu sevada-kain no lori ba fatin ida hodi orasida nia bele hasai sevada nia musan. Serbisu neʼe kleur no todan.  Loro-matan saʼe daudaun, nia kosar-been suli. Maski nuneʼe, Rute kontinua serbisu ho badinas, hodi para deʼit atu hamoos ninia kosar-been no han hahán simples iha fatin mahon neʼebé serbisu-naʼin sira deskansa.

26, 27. Boas mak ema hanesan saida no nia haree Rute oinsá?

²⁶ Karik Rute la hanoin ema ruma haree nia, no nia mós la hein ema atu hatene kona-ba nia. Maibé, Boas haree nia no husu ba ema neʼebé tau matan ba serbisu-naʼin sira feto neʼe mak sé. Boas neʼebé fiar-naʼin, kumprimenta ninia serbisu-naʼin sira, karik sira balu ema neʼebé serbisu ba loron ida deʼit ka ema estranjeiru sira. Nia hatete: “Maromak Jeová hela ho imi.” Serbisu-naʼin sira mós kumprimentu Boas ho liafuan hanesan. Katuas Boas neʼe neʼebé hamtaʼuk Jeová hanoin Rute nia situasaun.—Rute 2:4-7.

²⁷ Boas bolu Rute “haʼu-nia oan”, no hatete ba Rute atu mai beibeik iha ninia toʼos, no hatete mós katak diʼak liu ba Rute atu besik nafatin ho feto joven sira husi ninia umakain hodi nuneʼe serbisu-naʼin mane sira labele book nia. Boas mós hanoin kona-ba buat neʼebé Rute sei han iha tempu han-meiudia. (Lee Rute 2:8, 9, 14. *) Liután neʼe, Boas gaba Rute no fó laran-manas ba nia. Tanbasá?

28, 29. (a) Ema hatene Rute nuʼudar ema oinsá? (b) Hanesan ho Rute, oinsá mak Ita rasik bele hetan protesaun husi Jeová?

 ²⁸ Bainhira Rute husu Boas tansá mak nia hatudu laran-diʼak hanesan neʼe ba feto estranjeiru hanesan nia, Boas hatete katak nia rona ona kona-ba buat hotu neʼebé Rute halo ba ninia banin-feto, Noemi. Karik Noemi gaba Rute bainhira nia konta ninia istória ba feto sira iha Belein toʼo ikusmai Boas mós rona kona-ba neʼe. Boas mós hatene katak Rute foti ona desizaun atu adora Jeová. Nia hatete ba Rute: “Haʼu hein katak Jeová sei fó ó kolen ba buat neʼebé ó halo ona, no sei iha kolen neʼebé diʼak tebes ba ó husi Jeová, Izraél nia Maromak, neʼebé iha nia liras okos ó mai atu buka protesaun.”—Rute 2:12.

²⁹ Klaru katak liafuan neʼe fó laran-manas ba Rute! Loos duni, nia deside atu hetan protesaun iha Maromak Jeová nia liras okos, hanesan manu-oan neʼebé subar iha ninia inan nia liras okos. Nia fó-agradese ba Boas tanba ninia liafuan ho laran-diʼak. Depois, Rute kontinua serbisu toʼo kalan.—Rute 2:13, 17.

30, 31. Saida mak ita bele aprende husi Rute kona-ba serbisu ho badinas, hatudu agradese, no hatudu domin ho laran-metin?

³⁰ Rute nia fiar neʼebé hatudu liuhusi ninia hahalok fó ezemplu diʼak mai ita hotu neʼebé hakaʼas an atu buka moris iha tempu neʼe neʼebé nakonu ho susar. Rute la hanoin katak ema seluk mak tenke fó ajuda ba nia, no nia hafolin buat neʼebé ema fó ho laran-diʼak. Maski serbisu neʼe kiʼik deʼit, maibé nia la moe atu halo serbisu todan hodi bele tau matan ba ninia família. Nia mós halo tuir ema seluk nia konsellu kona-ba oinsá atu sees husi perigu no ransu ho ema neʼebé diʼak. No buat neʼebé importante liu mak Rute la haluha atu buka protesaun husi ninia Aman, Maromak Jeová.

³¹ Se ita mós hatudu domin ho laran-metin, no banati-tuir Rute nia ezemplu kona-ba hatudu haraik-an, badinas, no hatudu agradese, se nuneʼe, ita bele sai ezemplu diʼak ba ema seluk no sira sei banati-tuir ita-nia fiar. Maibé, oinsá mak Jeová tau matan ba Rute no Noemi? Ita sei aprende kona-ba neʼe iha kapítulu tuirmai.