1-3. (a) Saida mak Jesus halo kuandu ema matan-delek naʼin-rua husu ajuda ba nia? (b) Liafuan “hanoin tebetebes sira” katak sá? (Haree nota-rodapé.)

 IHA sidade Jerikó nia liʼur, iha mane naʼin-rua neʼebé tuur hela iha dalan ninin. Sira naʼin-rua mak ema matan-delek. No loroloron, sira tuur iha fatin neʼe hodi bele husu ezmola ba ema barak neʼebé liu bá-mai. Maibé, iha loron neʼe, buat ida akontese neʼebé sei troka duni sira-nia moris.

² Derrepente deʼit sira rona ema-lubun nia lian neʼebé barullu. Tanba la bele haree saida mak akontese, matan-delek sira-neʼe ida husu tansá ema barullu, no ema ida hatán ba nia dehan: “Jesus husi Nazaré liu daudaun.” Jesus laʼo daudaun ba Jerusalém ba dala ikus. No nia laʼós laʼo mesak, maibé ema-lubun laʼo tuir nia. Tanba rona katak Jesus laʼo liu daudaun, ema matan-delek sira-neʼe hakilar makaʼas dehan: “Naʼi, David nia Oan, sadiʼa ami!” Ema-lubun sai hirus no hatete ba sira atu nonook, maibé sira la nonook. Sira hakilar makaʼas liután.

³ Maski ema-lubun barullu tebes, maibé Jesus rona ema matan-delek sira-neʼe nia lian hakilar. Saida mak nia sei halo? Iha buat barak neʼebé Jesus hanoin hela iha ninia neon no laran. Semana ida tan nia sei ramata ninia moris iha rai. Nia hatene katak iha Jerusalém nia sei hetan terus makaʼas no mate. Maski nuneʼe, nia la taka matan ba ema sira-neʼe nia halerik. Nia para no husu atu ema-lubun lori matan-delek sira-neʼe ba nia. Sira husu: “Naʼi, ami hakarak haree.” Tanba “Jesus hanoin tebetebes sira”, nia tau nia liman ba sira-nia matan, no sira komesa haree  fali. a Sira hahú kedas atu laʼo tuir Jesus.—Lucas 18:35-43; Mateus 20:29-34.

4. Oinsá mak Jesus kumpre liafuan husi Bíblia neʼebé dehan katak “nia sei hanoin ema kiʼik”?

⁴ Jesus sempre hatudu laran-sadiʼa iha situasaun oioin. Tanba nia hanoin tebetebes ema, ida-neʼe book nia atu hatudu laran-sadiʼa. Bíblia fó-hatene nanis kona-ba nia hodi dehan katak “nia sei hanoin ema kiʼik”. (Salmo 72:13) Sin, Jesus hanoin tebes buat neʼebé ema seluk sente. Nia buka dalan atu ajuda ema. Ninia laran-sadiʼa book nia atu hakaʼas an iha ninia serbisu haklaken. Mai ita haree buat neʼebé Evanjellu sira fó sai kona-ba laran-sadiʼa neʼebé Jesus hatudu liuhusi ninia liafuan no hahalok. No ita mós sei haree oinsá ita bele hatudu laran-sadiʼa hanesan nia.

5, 6. Ezemplu saida mak hatudu katak Jesus mak mane ida neʼebé hatudu laran-sadiʼa?

⁵ Jesus hanoin duni buat neʼebé ema seluk sente. Jesus komprende oinsá mak ema sente kuandu hasoru susar. Maski nia rasik la hasoru susar hotu neʼebé ema hasoru, maibé nia sente duni ema seluk nia terus iha ninia laran. (Ebreu 4:15) Kuandu Jesus kura feto ida neʼebé moras fakar raan ba tinan 12 ona, nia dehan katak feto neʼe iha “moras neʼebé todan tebes”. Liafuan sira-neʼe hatudu katak Jesus komprende oinsá moras neʼe lori terus no susar boot ba feto neʼe. (Marcos 5:25-34) Kuandu nia haree Maria no ema seluk neʼebé tanis tanba Lázaro mate, ida-neʼe book nia atu sente neon-susar. Maski nia hatene katak nia sei fó moris-hiʼas ba Lázaro, maibé hodi haree sira-nia laran-susar, neʼe book nia atu tanis.—João 11:33, 35.

 ⁶ Iha situasaun seluk, ema moras-lepra ida hakbesik ba Jesus no husu: “Ita hakarak karik, Ita bele hamoos haʼu.” Ita hatene katak Jesus sala-laek no nunka sai moras, entaun oinsá mak nia sente? Nia sente kasian tebes ba ema moras-lepra neʼe. Bíblia dehan katak “Jesus hanoin nia”. (Marcos 1:40-42) Tuirmai nia halo buat neʼebé ema barak iha tempu neʼebá nunka halo. Nia hatene ho klaru katak tuir Moisés nia Ukun-Fuan, ema neʼebé moras-lepra mak la moos no labele laʼo kahur ho ema seluk neʼebé la moras. (Levítico 13:45, 46) Jesus mós iha kbiit atu kura mane neʼe husi dook deʼit, la presiza atu kona nia. (Mateus 8:5-13) Maibé, nia hili atu lolo liman no kona ema moras-lepra neʼe, hodi dehan: “Haʼu hakarak; sai moos bá!” Iha tempu neʼe kedas moras-lepra lakon. Jesus hatudu duni laran-sadiʼa neʼebé boot!

7. Saida mak ajuda ita atu haburas laran-sadiʼa? Oinsá mak ita bele hatudu ida-neʼe?

⁷ Nuʼudar ema kristaun, ita presiza banati-tuir Jesus kona-ba hatudu laran-sadiʼa. Bíblia haruka ita atu “hanoin malu”. b (1 Pedro 3:8) Dala barak la fasil ba ita atu komprende buat neʼebé ema sente kuandu sira hetan moras boot ka sai laran-tun, liuliu se ita seidauk hasoru susar hanesan neʼe. Maibé, hanoin-hetan katak laʼós deʼit hetan ona susar mak ita bele hatudu laran-sadiʼa ba ema seluk. Jesus hatudu laran-sadiʼa ba ema moras maski nia rasik nunka hetan moras. Entaun, oinsá mak ita bele haburas hahalok laran-sadiʼa? Importante atu rona didiʼak kuandu ema neʼebé hasoru susar fó sai buat neʼebé iha sira-nia laran. Ita bele husu ita-nia an: ‘Se haʼu hasoru situasaun hanesan ninian, oinsá mak haʼu sente?’ (1 Korinto 12:26) Se ita hakaʼas an atu sente buat neʼebé ema seluk sente, ida-neʼe sei ajuda ita atu “fó aten-barani” ba ema sira neʼebé sente laran-tun. (1 Tesalónika 5:14) Dala ruma, ita bele hatudu laran-sadiʼa laʼós deʼit ho liafuan maibé mós ho  matabeen. Roma 12:15 dehan: “Tanis ho sira neʼebé tanis.”

8, 9. Oinsá mak Jesus hatudu katak nia hanoin ema seluk?

⁸ Jesus hanoin ema seluk, no nia hakaʼas an atu la hakanek ema seluk nia laran. Hanoin toʼok kona-ba tempu neʼebé ema lori ba nia mane ida neʼebé monok no tilun-diuk. Karik tanba Jesus haree katak mane neʼe sente moe, nia halo buat neʼebé nia baibain la halo kuandu kura ema. Bíblia hatete: “[Jesus] hadook tiha ema neʼe husi ema-lubun boot.” Kuandu sira naʼin-rua mesak no ema-lubun la hateke ba sira, Jesus kura mane neʼe.—Marcos 7:31-35.

⁹ Jesus mós halo buat neʼebé hanesan kuandu ema lori ba nia mane matan-delek ida no husu nia atu kura mane neʼe. Bíblia dehan: “Kaer tiha ema matan-delek neʼe nia liman, [Jesus] lori nia ba knua nia liʼur.” Depois neʼe nia kura mane neʼe neineik-neineik. Karik Jesus halo ida-neʼe atu fó tempu ba mane neʼe nia neon no matan atu sai toman ho naroman no buat foun neʼebé nia haree. (Marcos 8:22-26) Sin, istória sira-neʼe hatudu katak Jesus hanoin duni ema seluk!

10. Iha dalan saida deʼit mak ita bele hatudu katak ita hanoin kona-ba buat neʼebé ema sente?

¹⁰ Nuʼudar Jesus nia dixípulu, ita mós presiza hatudu katak ita hanoin kona-ba buat neʼebé ema sente. Tan neʼe ita presiza kuidadu ho dalan neʼebé ita koʼalia. Hanoin-hetan katak koʼalia hodi la hanoin uluk bele hakanek ema seluk nia laran. (Provérbios 12:18; 18:21) Ema kristaun hanoin kona-ba buat neʼebé ema seluk sente, tan neʼe sira la uza liafuan makaʼas, la kritika malu, ka la koʼalia liafuan neʼebé la respeitu. (Éfeso 4:31) Katuas kristaun sira, oinsá mak imi bele hatudu katak imi hanoin uluk kona-ba buat  neʼebé ema seluk sente? Kuandu imi fó konsellu, importante atu koʼalia ho laran-diʼak hodi hatudu respeitu ba rona-naʼin. (Galásia 6:1) Inan-aman sira, oinsá mak imi bele hatudu katak imi hanoin buat neʼebé oan sira sente? Kuandu imi fó dixiplina, hakaʼas an atu halo ida-neʼe iha dalan neʼebé la hamoe imi-nia oan.—Koloso 3:21.

11, 12. Istória saida deʼit husi Bíblia hatudu katak Jesus la hein atu ema husu mak nia foin hatudu hahalok laran-sadiʼa?

¹¹ Jesus la hein atu ema husu mak nia foin hatudu hahalok laran-sadiʼa. Tuir loloos, laran-sadiʼa laʼós deʼit hahalok neʼebé ita sente iha laran, maibé neʼe mak hahalok neʼebé ita hatudu sai ba ema seluk. Tan neʼe, Jesus nia laran-sadiʼa book nia atu ajuda ema. Porezemplu, iha tempu neʼebé ema-lubun boot hamutuk ho nia ba loron tolu, no la iha ai-han, Jesus la hein atu ema seluk fó-hatene nia katak ema-lubun neʼe hamlaha. No nia mós la hein atu ema husu nia atu halo buat ruma. Bíblia hatete: “Bolu tiha nia eskolante sira, Jesus dehan ba sira: ‘Haʼu hanoin ema-lubun neʼe, basá loron tolu ona mak sira laʼo tuir haʼu, la han buat ida. Haʼu lakohi haruka sira bá ho kabun mamuk. Keta sira monu iha dalan karik.’” Tuirmai, ho ninia hakarak rasik, nia halo milagre hodi fó-han ema-lubun neʼe.—Mateus 15:32-38.

¹² Hanoin toʼok kona-ba situasaun ida tan. Nuʼudar Jesus laʼo besik sidade Naim iha tinan 31 EC, nia hasoru ema-lubun neʼebé triste hela. Ema sira-neʼe lori mate-isin sai husi sidade neʼe, karik atu bá hakoi iha rate besik fatin neʼe. Sira bá atu hakoi “feto-faluk ida nia oan-mane mesak”. Hanoin toʼok oinsá inan neʼe sente iha nia laran! Nia lori daudaun ninia oan-mane mesak atu bá hakoi, no nia la iha laʼen neʼebé bele apoia nia iha tempu susar neʼe. Maski feto-faluk neʼe laʼo iha ema-lubun nia leet, maibé Jesus bele “haree” ninia triste, no ida-neʼe book tebes Jesus nia sentimentu. Sin, “[Jesus] hanoin nia ho laran”. La iha ema ida neʼebé husu Jesus atu halo buat ruma. Jesus  nia laran-sadiʼa book nia atu ajuda feto neʼe. Tan neʼe, “nia hakbesik, hodi kona kaixaun” no fó moris-hiʼas ba mane joven neʼe. Saida mak akontese tuirmai? Jesus la husu mane joven neʼe atu laʼo hamutuk ema-lubun neʼebé tuir Jesus. Duké halo ida-neʼe, “Jesus saran nia ba nia inan”, hodi sira bele hamutuk fali no feto-faluk neʼe bele iha ema ida neʼebé tau matan ba nia.—Lucas 7:11-15.

13. Oinsá mak ita bele banati-tuir Jesus hodi buka dalan atu apoia ema neʼebé presiza ajuda?

¹³ Oinsá mak ita bele banati-tuir Jesus nia ezemplu? Klaru katak, ita la bele halo milagre atu fó han ba ema ka halo ema moris fali. Maibé, ita bele banati-tuir Jesus hodi buka dalan atu apoia ema neʼebé presiza ajuda. Porezemplu, karik maluk fiar-naʼin ida lakon osan ka sasán barak, ka karik lakon serbisu. (1 João 3:17) Karik feto-faluk ida nia uma sai aat ona no presiza atu hadiʼa lalais. (Tiago 1:27) Karik iha família neʼebé foin lakon ema neʼebé sira hadomi tanba mate, no tan neʼe presiza simu laran-manas husi ema seluk ka simu ajuda ruma. (1 Tesalónika 5:11) Ita lalika hein toʼo ema husu ita-nia ajuda mak ita foin halo buat ruma. (Provérbios 3:27) Ita-nia laran-sadiʼa sei book ita atu buka dalan atu ajuda ema tuir ita-nia kbiit. Keta haluha katak hatudu laran-diʼak maski iha dalan neʼebé kiʼik, ka hodi hatoʼo liafuan badak deʼit atu fó laran-manas, ida-neʼe bele hatudu sai ho klaru ita-nia laran-sadiʼa.—Koloso 3:12.

14. Tanbasá mak Jesus tau uluk serbisu haklaken?

¹⁴ Hanesan ita haree ona iha Parte 2 iha livru neʼe, Jesus hatudu ezemplu neʼebé diʼak liu hotu kona-ba haklaken lia-foun diʼak. Nia hatete: “Haʼu sei haklaken mós lia-foun diʼak Maromak nia reinu nian ba rai seluseluk; tan neʼe mak haʼu mai.” (Lucas 4:43) Tansá mak Jesus tau ulukliu serbisu neʼe iha ninia moris? Razaun primeiru mak nia hadomi Maromak. Maibé, iha mós razaun seluk tan. Jesus nia laran-sadiʼa book nia atu ajuda ema hodi bele iha  relasaun diʼak ho Maromak. Husi dalan hotu neʼebé nia hatudu ninia laran-sadiʼa, dalan neʼebé importante liu mak ajuda ema neʼebé hamlaha ba lia-loos. Mai ita koʼalia kona-ba situasaun rua neʼebé hatudu oinsá Jesus nia haree kona-ba ema neʼebé nia haklaken. Estuda kona-ba ida-neʼe bele ajuda ita atu hanoin fali tansá ita rasik hakarak hola parte iha serbisu haklaken.

15, 16. Esplika toʼok situasaun rua neʼebé hatudu oinsá Jesus haree ema neʼebé nia hanorin.

¹⁵ Iha tinan 31 EC, Jesus haluan ninia serbisu haklaken hodi “laʼo lemo sidade ho knua sira” iha Galileia. Iha tempu neʼe, Jesus halaʼo ona ninia serbisu haklaken ba tinan rua. Buat neʼebé nia haree kuandu nia haklaken kona ninia laran. Apóstolu Mateus hatete: “Haree tiha ema-lubun boot, nia hanoin tebetebes sira basá sira kole no neon nakraik, hanesan bibi sira neʼebé bibi-atan la iha.” (Mateus 9:35, 36) Jesus hanoin ema baibain sira-neʼe. Nia komprende didiʼak kona-ba sira-nia situasaun. Nia hatene katak ulun-naʼin relijiaun sira neʼebé iha knaar atu tau matan ba bibi sira la hafolin no la ajuda povu sira atu bele hatene kona-ba Maromak no iha relasaun diʼak ho Maromak. Laran-sadiʼa book Jesus  atu halo serbisu makaʼas hodi fahe mensajen neʼebé fó esperansa kapás ba ema. Sin, klaru katak buat neʼebé ema presiza liu mak lia-foun diʼak kona-ba Maromak nia Ukun.

¹⁶ Buat neʼebé hanesan akontese fulan balu depois neʼe. Besik tempu Páskua iha tinan 32 EC, Jesus no ninia apóstolu sira saʼe ró ida atu hakur Tasi Galileia hodi buka fatin neʼebé hakmatek atu bele deskansa. Maibé, ema-lubun halai tuir tasi-ninin no toʼo uluk ba fatin neʼe antes ró toʼo. Saida mak Jesus halo? Bíblia hatete: “Wainhira Jesus tun husi ró, nia hetan ema-lubun boot ida. Nia hanoin ema sira-neʼe tebetebes, basá sira hanesan bibi neʼebé bibi-atan la iha. Nia hahú hanorin sira buat barak.” (Marcos 6:31-34) Dala ida tan Jesus “hanoin ema sira-neʼe tebetebes” tanba sira-nia situasaun neʼebé dook husi Maromak. “Hanesan bibi neʼebé bibi-atan la iha”, sira hamlaha ba lia-loos no la iha ema ida atu tau matan no ajuda sira. Jesus haklaken ba sira laʼós deʼit tanba atu kumpre ninia knaar, maibé ninia laran-sadiʼa mak book nia atu halo ida-neʼe.

17, 18. (a) Saida mak book ita atu hola parte iha serbisu haklaken? (b) Oinsá mak ita bele haburas hahalok laran-sadiʼa?

¹⁷ Nuʼudar Jesus nia dixípulu, saida mak book ita atu hola parte iha serbisu haklaken? Hanesan ita haree ona iha Kapítulu 9 husi livru neʼe, ita iha knaar no iha responsabilidade atu haklaken no hanorin ema. (Mateus 28:19, 20; 1 Korinto 9:16) Maibé ita lakohi atu hola parte iha serbisu neʼe tan deʼit atu kumpre ita-nia knaar. Buat neʼebé importante liu mak domin ba Maromak Jeová, no ida-neʼe book ita atu haklaken lia-foun diʼak kona-ba Maromak nia Ukun. Ita mós hakarak atu haklaken tanba ita hanoin sira neʼebé fiar la hanesan ita. (Lucas 10:27) Entaun, oinsá mak ita bele haburas hahalok laran-sadiʼa?

¹⁸ Hanesan Jesus, ita mós presiza hanoin kona-ba ema nia situasaun. Ema barak nia situasaun mak “hanesan bibi sira neʼebé bibi-atan la iha”. Hanoin toʼok katak ita hetan bibi-oan ida neʼebé lakon dalan. Bibi-oan neʼe la iha bibi-atan neʼebé bele lori nia ba fatin neʼebé iha duʼut matak no bee.  Bibi neʼe hamlaha tebes no hamrook. Iha situasaun neʼe ita sei sente hanoin tebes ba bibi-oan neʼe, loos ka lae? Ita mós sei hakaʼas an atu fó hahán no fó bee ba bibi neʼe, loos ka lae? Bibi-oan neʼe nia situasaun mak hanesan ema barak neʼebé seidauk hatene lia-foun diʼak. Tanba bibi-atan husi relijiaun falsu la tau matan, bibi sira sai hamlaha no hamrook iha dalan espirituál no la iha esperansa ba futuru. Maibé, ita iha buat neʼebé ema presiza. Ita iha hahán espirituál no bee lia-loos nian husi Maromak nia Liafuan neʼebé bele halo ema sente kmaan. (Isaias 55:1, 2) Kuandu ita hanoin kleʼan kona-ba ema nia situasaun neʼebé dook husi Maromak, ita sei sente laran-sadiʼa ba sira. Hanesan Jesus, se ita hanoin ema, ita sei hakaʼas an atu fahe ba sira esperansa kona-ba Maromak nia Ukun.

19. Saida mak ita bele halo atu book ita-nia estudante Bíblia nian hodi hola parte iha serbisu haklaken?

¹⁹ Oinsá mak ita bele ajuda ema seluk atu bele halo tuir Jesus nia ezemplu? Hanoin toʼok se ita hakarak atu fó laran-manas ba ita-nia estudante Bíblia nian atu komesa haklaken hamutuk ho kongregasaun. Ka karik ita hakarak atu fó laran-manas ba haklaken-naʼin neʼebé la haklaken ona, hodi nia bele hola parte fali iha serbisu haklaken. Oinsá mak ita bele ajuda ema sira-neʼe? Diʼak atu book sira-nia laran. Ulukliu Jesus “hanoin tebetebes” ema, no tuirmai nia hanorin sira. (Marcos 6:34) Se ita bele ajuda estudante Bíblia ka maluk ida neʼebé la ativu atu haburas hahalok laran-sadiʼa, ida-neʼe bele book sira atu banati-tuir Jesus no atu fahe lia-foun diʼak ba ema. Karik ita bele husu sira: “Oinsá mak simu lia-foun diʼak  troka ita-nia moris atu sai diʼak liu? Oinsá ho ema neʼebé seidauk hatene lia-foun diʼak? Sira mós presiza ida-neʼe ka lae? Saida mak ita bele halo atu ajuda sira?” Maski nuneʼe, razaun importante liu atu hola parte iha serbisu haklaken mak ita hadomi Maromak no hakarak atu serbí nia.

20. (a) Sai Jesus nia dixípulu katak sá? (b) Ita sei koʼalia kona-ba saida iha kapítulu tuirmai?

²⁰ Sai Jesus nia dixípulu laʼós deʼit katak hanorin ema kona-ba ninia liafuan sira, no mós laʼós deʼit hatudu sai iha liʼur katak ita tuir ninia hahalok. Maibé, ita presiza haburas hanoin hanesan Kristu nian. (Filipe 2:5) Tan neʼe, ita agradese tebes tanba Bíblia fó sai Jesus nia hanoin neʼebé book nia atu koʼalia no ajuda ema. Hodi hatene didiʼak Kristu “nia hanoin”, ida-neʼe bele ajuda ita atu haburas hahalok laran-sadiʼa, no neʼe bele book ita atu haree ema seluk hanesan nia haree. (1 Korinto 2:16) Iha kapítulu tuirmai, ita sei koʼalia kona-ba dalan oioin neʼebé Jesus hatudu ninia domin ba ninia dixípulu sira.