1-3. (a) Iha dalan saida mak Jesus husik hela ninia dixípulu sira? Tanbasá mak ita bele dehan katak Jesus la husik hela ninia dixípulu sira ba nafatin? (b) Tanbasá mak importante atu ita hatene saida mak Jesus halo depois nia fila fali ba lalehan?

 MANE naʼin-11 hamriik hamutuk iha foho leten ida. Sira hateke hela ba mane ida seluk neʼebé sira hadomi no respeitu tebes. Maski mane neʼe haree hanesan ema ida, maibé tuir loloos nia mak Jesus neʼebé moris-hiʼas ona nuʼudar Maromak Jeová nia anju neʼebé forsa boot liu. Jesus konvida ninia apóstolu sira atu hasoru fali nia ba dala ikus iha fatin neʼe, iha Foho Oliveira.

² Foho neʼe la dook husi Jerusalém, no klaru katak fatin neʼe halo Jesus hanoin fali buat barak neʼebé akontese. Hanoin toʼok kona-ba buat neʼebé Jesus halo iha fatin sira neʼebé besik foho neʼe. Porezemplu, semana balu antes neʼe, Jesus laʼo husi sidade Betfage neʼebé besik Foho Oliveira atu bá Jerusalém. Nia saʼe kuda-burru hodi tama ba Jerusalém nuʼudar liurai. Iha tempu seluk, Jesus halo Lázaro moris hiʼas iha sidade Betânia neʼebé iha foho neʼe nia sorin. No karik foho neʼe mós inklui jardín Getsémani. Iha jardín neʼe mak Jesus harohan ho laran-susar tebes antes ema-lubun mai atu kaer nia. Agora, iha foho neʼebé hanesan, Jesus prepara ona atu husik hela ninia belun diʼak no ninia dixípulu sira. Ho laran-diʼak nia hatoʼo ninia lia-menon ikus ba sira. Tuirmai, nia komesa saʼe ba lalehan! Apóstolu sira hamriik hodi la book an no hateke ba sira-nia Naʼi neʼebé sira hadomi nuʼudar nia saʼe ba leten. Ikusmai, kalohan ida taka netik Jesus no tan neʼe dixípulu sira la haree tan nia.—Apóstolu 1:6-12.

³ Situasaun neʼe hatudu katak Jesus sei husik hela ninia dixípulu sira ba nafatin ka lae? Lae. Tuir loloos, hanesan anju  rua hatete ba apóstolu sira, Jesus sei hanoin nafatin sira. (Apóstolu 1:10, 11) Kuandu Jesus saʼe ba lalehan, neʼe la ramata ninia serbisu atu apoia ninia dixípulu sira. Maromak nia Liafuan ajuda ita atu hatene saida mak Jesus halo depois neʼe. Tuir loloos, importante atu hatene saida mak Jesus halo depois nia fila fali ba lalehan. Tanbasá? Hanoin-hetan Jesus nia liafuan neʼebé nia hatoʼo ba Pedro, neʼebé dehan: “Kontinua laʼo tuir haʼu.” (João 21:19, 22, MF) Ita hotu presiza tuir Jesus laʼós ba tempu uitoan deʼit, maibé durante ita-nia moris tomak. Atu halo ida-neʼe, ita tenke hatene saida mak ita-nia Naʼi halo agora daudaun no knaar saida mak nia simu ona iha lalehan.

4. Oinsá mak Bíblia fó sai nanis kona-ba buat neʼebé akontese depois Jesus fila ba lalehan?

⁴ Bíblia la esplika ho klaru buat neʼebé akontese kuandu Jesus hasoru malu fali ho anju sira no mós hamutuk fali ho ninia Aman. Maibé, Bíblia fó sai nanis kona-ba buat neʼebé Jesus halo depois nia fila ba lalehan. Hanoin toʼok serimónia santu ida neʼebé ema Israel halo durante tinan 1.500 liu, neʼebé hahú husi tempu Moisés nian. Dala ida tinan-tinan, iha loron Halo Dame nian, amlulik boot tama ba Fatin neʼebé Santu Liu Hotu iha templu, hodi hisik raan husi sakrifísiu iha arka aliansa nia oin. Iha loron neʼe, amlulik boot reprezenta Mesias. Serimónia neʼe halaʼo atu hetan perdua ba ema nia sala. No Jesus kumpre ida-neʼe dala ida deʼit ba nafatin hodi ema bele hetan perdua. Nia tama iha Maromak Jeová nia fatin iha lalehan, fatin neʼebé santu liu hotu, hodi entrega ba ninia Aman folin husi ninia sakrifísiu. (Ebreu 9:11, 12, 24) Maromak Jeová simu ida-neʼe ka lae?

5, 6. (a) Saida mak hatudu katak Jeová simu Kristu nia sakrifísiu? (b) Sé deʼit mak hetan buat diʼak husi Jesus nia sakrifísiu? Oinsá?

⁵ Ita bele hetan resposta hodi hanoin kona-ba buat neʼebé akontese loron balu depois Jesus fila ba lalehan. Grupu  kristaun ida neʼebé hamutuk ema naʼin-120, halibur an iha fatin ida iha andár leten iha Jerusalém, no derrepente deʼit tarutu boot ida hanesan anin-boot halo nakonu fatin neʼe. Ahi-lakan mosu iha sira-nia ulun leten no sira sai nakonu ho espíritu santu, tuirmai sira hahú koʼalia língua oioin. (Apóstolu 2:1-4) Ida-neʼe mak sinál neʼebé hatudu katak Maromak harii ona nasaun foun ida, neʼe mak Israel espirituál, neʼebé “Maromak hili” nuʼudar “amlulik raan liurai sira-nian”. Neʼe katak Maromak hili sira nuʼudar amlulik no liurai hodi kumpre ninia hakarak iha rai. (1 Pedro 2:9) Ida-neʼe mós hatudu katak Maromak Jeová simu ona folin husi Kristu nia sakrifísiu. Espíritu santu neʼebé dixípulu sira simu iha loron neʼe mak hanesan bensaun primeiru neʼebé sira hetan tanba Jesus nia sakrifísiu.

⁶ Hahú husi tempu neʼebá, Kristu nia sakrifísiu lori buat diʼak ba ninia dixípulu hotu iha mundu tomak. Maski Ita mak ema kose-mina neʼebé parte ba “bibi luhan kiʼik” neʼebé sei ukun hamutuk ho Kristu iha lalehan, ka Ita mak parte ba “bibi seluk” neʼebé sei moris iha rai kuandu nia ukun, klaru katak ita hotu hetan buat diʼak husi Jesus nia sakrifísiu. (Lucas 12:32; João 10:16) Tanba Jesus nia sakrifísiu, ita bele hetan esperansa no mós hetan perdua ba ita-nia sala. Nuʼudar ita kontinua hatudu “fiar” ba Jesus nia sakrifísiu no laʼo tuir nia loron ba loron, ita bele iha laran neʼebé moos no iha esperansa furak kona-ba futuru.—João 3:16.

7. Saida mak Jesus halo kuandu nia fila fali ba lalehan? Oinsá mak ita apoia nia?

⁷ Saida mak Jesus halo hahú husi tempu neʼebé nia fila fali ba lalehan toʼo agora? Nia hetan pozisaun neʼebé boot. (Mateus 28:18) Maromak hili ona Jesus atu ukun kongregasaun kristaun. Nia halaʼo ona ninia knaar neʼe ho domin no justisa. (Koloso 1:13) Hanesan fó-hatene nanis iha Bíblia, Jesus foti mane balu hodi tau matan ba ninia bibi sira-nia presiza. (Éfeso 4:8) Porezemplu, nia hili Paulo atu sai “apóstolu ba jentiu sira”, no haruka nia atu habelar lia-foun diʼak toʼo  fatin neʼebé dook. (Roma 11:13; 1 Timóteo 2:7) Iha apóstolu sira-nia tempu, Jesus rasik fó konsellu, fó dixiplina, no gaba kongregasaun hitu iha provínsia Ásia nian neʼebé Roma mak ukun. (Apokalipse, kapítulu 2-3) Ita apoia Jesus nuʼudar ulun ba kongregasaun kristaun ka lae? (Éfeso 1:22) Atu bele kontinua laʼo tuir Jesus, ita presiza apoia no halo tuir arranju hotu iha ita-nia kongregasaun.

8, 9. Jesus hetan pozisaun saida iha tinan 1914? Oinsá mak ida-neʼe kona desizaun neʼebé ita halo iha ita-nia moris?

⁸ Maromak fó pozisaun neʼebé boot liu tan ba Jesus iha tinan 1914. Iha tinan neʼe Maromak Jeová foti Jesus nuʼudar Liurai Mesias atu ukun husi lalehan. Kuandu Jesus komesa nia ukun, “funu hahú iha lalehan”. Ida-neʼe lori rezultadu saida? Jesus no ninia anju sira soe tun tiha Satanás no nia anju aat sira mai iha rai, no neʼe lori susar barak ba raiklaran tomak. Iha rai barak mosu funu, krime, moras, rai-nakdoko, no hamlaha, buat sira-neʼe hatudu mai ita katak Jesus ukun ona iha lalehan. Maski agora Satanás ukun daudaun nuʼudar “liurai mundu neʼe nian”, maibé ninia ukun sei tahan ba tempu uitoan deʼit. (Apokalipse 12:7-12; João 12:31; Mateus 24:3-7; Lucas 21:11) Agora daudaun, Jesus fó oportunidade ba ema hotu iha mundu tomak atu simu ninia ukun.

⁹ Importante atu ita hili hodi apoia Jesus nia ukun. Iha ita-nia moris loroloron nian, ita presiza halo desizaun neʼebé hatudu katak ita apoia nia duké apoia mundu aat neʼe. Nuʼudar “Liurai liurai sira-nian no Naʼi naʼi sira-nian”, kuandu Jesus haree ba ema, ninia laran sai hirus tebes no iha tempu hanesan nia haksolok tebes. (Apokalipse 19:16) Tanbasá?

10. Jesus mak ema oinsá? Maibé, saida mak halo ita-nia Naʼi Jesus sai hirus?

¹⁰ Hanesan ninia Aman, ita-nia Naʼi Jesus mós nafatin kontente. (1 Timóteo 1:11) Kuandu Jesus iha rai, nia nunka muramura kona-ba ema nia hahalok ka buka deʼit ema nia  sala. Maibé, ohin loron buat barak neʼebé akontese iha mundu neʼe halo nia sai hirus. Klaru katak nia hirus duni ho relijiaun sira neʼebé dehan katak sira reprezenta nia, maski loloos sira la laʼo tuir ninia ain-fatin. Jesus rasik fó-hatene nanis hodi dehan: “Laʼós ema hotu neʼebé dehan mai haʼu: ‘Naʼi, Naʼi!’ sei tama iha reinu lalehan, maibé nia deʼit neʼebé halo tuir haʼu Aman iha lalehan nia hakarak. Ema barak sei dehan mai haʼu iha loron neʼebá: ‘Naʼi, Naʼi, laʼós hodi Ita-Boot nia naran mak ami . . . halo milagre barak?’ Iha oras neʼebá haʼu sei hatán momoos ba sira: ‘Haʼu la hatene imi; hadook an tiha husi haʼu, imi sira neʼebé halo aat.’”—Mateus 7:21-23.

11-13. Tanbasá mak ema balu hakfodak ho liafuan makaʼas neʼebé Jesus koʼalia ba sira neʼebé halo buat diʼak iha ninia naran? Tanbasá mak nia sai hirus? Konta ai-knanoik ida.

¹¹ Ohin loron, ema barak neʼebé bolu sira-nia an kristaun karik hakfodak ho liafuan sira-neʼe. Tanbasá mak Jesus fó konsellu makaʼas ba ema sira neʼebé halo buat diʼak iha ninia naran? Relijiaun kristaun barak fó ajuda atu apoia ema neʼebé kiak, harii ospitál no eskola, no halo serbisu barak seluk. Maibé atu komprende tansá Jesus sai hirus ho sira, hanoin toʼok kona-ba ai-knanoik tuirmai neʼe.

¹² Inan-aman ida halo viajen ba fatin seluk. Sira la bele lori sira-nia oan hamutuk ho sira, tan neʼe sira selu feto ida atu tau matan ba sira-nia oan. Sira haruka nia hodi dehan: “Tau matan ba ami-nia oan sira. Fó han ba sira, tau matan ba sira atu moos nafatin, no proteje sira.” Maibé, kuandu inan-aman fila, sira hakfodak hodi haree sira-nia oan hamlaha tebes. Sira-nia oan foʼer tebes, moras no triste. Sira-nia oan tanis hodi husu ajuda, maibé feto neʼe la ajuda sira. Tanbasá? Tanba nia serbisu hela hodi hamoos janela. Inan-aman neʼe sai hirus tebes no husu feto neʼe atu esplika kona-ba tansá nia la tau matan sira-nia oan. Feto neʼe hatán: “Haʼu halo serbisu barak tebes. Haʼu hamoos janela sira no hadiʼa uma! Buat hotu neʼe haʼu halo ba Ita-boot!” Entaun, ida-neʼe sei halo inan-aman neʼe sente kmaan fali ka lae? Klaru katak lae! Sira la husu nia atu halo serbisu sira-neʼe. Buat neʼebé  sira hakarak mak atu nia tau matan ba sira-nia oan. No kuandu nia la halo tuir buat neʼebé sira haruka, ida-neʼe halo sira hirus tebes.

¹³ Relijiaun kristaun falsu sira mós hatudu hahalok hanesan feto neʼe. Jesus fó mandamentu ba sira neʼebé reprezenta nia atu fó ai-han espirituál ba ema, hodi hanorin lia-loos husi Maromak nia Liafuan no ajuda ema atu adora Maromak iha dalan neʼebé moos nafatin. (João 21:15-17) Maibé, relijiaun kristaun falsu sira la halo tuir mandamentu neʼe. Sira la fó hahán espirituál ba ema, sira hanorin lia-bosok neʼebé halo ema bilán, no sira halo ema barak la hatene lia-loos neʼebé simples husi Bíblia. (Isaias 65:13; Amós 8:11) Maski relijiaun kristaun falsu halo buat barak atu hadiʼa mundu neʼe, maibé neʼe laʼós razaun neʼebé loos ba sira atu la halo tuir mandamentu neʼebé Jesus fó. Tuir loloos, Satanás nia mundu neʼe mak hanesan uma aat ida neʼebé presiza atu sobu tiha! Maromak nia Liafuan hatudu ho klaru katak lakleur tan Maromak sei halakon Satanás nia mundu aat neʼe.—1 João 2:15-17.

14. Ohin loron, serbisu saida mak halo Jesus kontente? Tanbasá?

¹⁴ Iha parte seluk, ita hatene katak Jesus sente kontente tebes kuandu nia haree husi lalehan no hetan ema rihun ba rihun halo serbisu haklaken no hanorin, hodi kumpre mandamentu neʼebé nia fó antes nia husik hela mundu. (Mateus 28:19, 20) Ita iha oportunidade espesiál tebes atu lori ksolok ba Liurai Mesias! Mai ita hakaʼas an atu nunka para hodi fó apoia ba ‘atan laran-metin no matenek’. (Mateus 24:45) La hanesan ulun-naʼin ba relijiaun kristaun falsu sira, grupu kiʼik neʼe hatudu ona sira-nia laran-metin hodi halo serbisu haklaken no fó han ba Kristu nia bibi sira.

15, 16. (a) Ohin loron, oinsá mak Jesus sente kuandu nia haree ema la hanoin malu? Oinsá mak ita hatene kona-ba neʼe? (b) Tanbasá mak Jesus sai hirus ba relijiaun kristaun falsu?

¹⁵ Ita bele fiar katak Liurai sai hirus tebes kuandu nia haree ema barak iha mundu neʼe la hanoin ema seluk. Kuandu Jesus kura ema iha loron Sábadu, ema fariseu sira koʼalia aat  Jesus. Ema fariseu sira laran-aat no ulun-toos. Sira sadere deʼit ba sira-nia matenek rasik atu esplika Moisés nia Ukun-Fuan no mós ba lei neʼebé sira halo. Jesus nia milagre sira lori buat diʼak barak ba ema! Maski Jesus nia milagre sira fó ksolok no kmaan ba ema, no hametin ema nia fiar, maibé ema fariseu sira la hafolin buat sira-neʼe. Oinsá mak Jesus sente kona-ba ema aat sira-neʼe? Bíblia fó sai katak dala ida Jesus “hateke ba ema hotu neʼebé haleʼu nia, no laran-nakali tebes hodi laran-susar tan sira-nia laran-toos”.—Marcos 3:5.

¹⁶ Ohin loron mós Jesus haree buat barak neʼebé halo nia “laran-susar” tebes. Ulun-naʼin relijiaun kristaun falsu sira gosta atu tuir deʼit ema nia tradisaun no doutrina sira neʼebé kontra Bíblia, no ida-neʼe taka sira-nia matan ba lia-loos. Liután neʼe, sira odi ema sira neʼebé haklaken lia-foun diʼak kona-ba Maromak nia Ukun. Iha rai oioin, ulun-naʼin relijiaun sira book ema atu kontra makaʼas ema kristaun sira neʼebé ho laran-loos hakarak atu haklaken mensajen neʼebé Jesus mós haklaken. (João 16:2; Apokalipse 18:4, 24) Iha tempu neʼebé hanesan, ulun-naʼin sira-neʼe dala barak fó laran-manas ba sira-nia povu atu apoia funu hodi oho ema seluk. Sira hanoin katak hodi halo ida-neʼe lori ksolok ba Jesus Kristu!

17. Oinsá mak Jesus nia dixípulu neʼebé loos halo nia laran kontente?

¹⁷ La hanesan ema barak iha mundu neʼe, Jesus nia dixípulu neʼebé loos hatudu domin ba ema naran deʼit. Hanesan Jesus, sira fahe liafuan diʼak ba “ema hotu” maski ema kontra sira. (1 Timóteo 2:4) No domin neʼebé sira hatudu ba malu mak sinál importante ida atu hatudu katak sira mak Jesus nia dixípulu. (João 13:34, 35) Sira banati-tuir Jesus hodi hatudu domin no respeitu ba sira-nia maluk, no ida-neʼe halo Liurai Mesias sente kontente!

18. Saida mak halo ita-nia Naʼi laran-triste? Oinsá mak ita bele halo nia kontente?

¹⁸ Keta haluha katak ita-nia Naʼi sente laran-triste kuandu ninia atan sira la laran-metin tan ba nia hodi husik sira-nia domin ba Jeová sai malirin no para atu serbí Jeová. (Apokalipse 2:4, 5) Maibé, Jesus haksolok ho sira neʼebé tahan toʼo  rohan. (Mateus 24:13) Tan neʼe, mai ita hanoin nafatin Jesus nia mandamentu neʼebé dehan: “Kontinua laʼo tuir haʼu.” (João 21:19, MF) Agora, mai ita koʼalia kona-ba bensaun sira neʼebé Liurai Mesias sei haraik ba sira neʼebé tahan toʼo rohan.

19, 20. (a) Halo tuir Jesus lori bensaun saida agora? (b) Oinsá mak halo tuir Jesus ajuda ita atu hetan fali “Aman Rohan-Laek”?

¹⁹ Halo tuir Jesus mak dalan diʼak liu atu moris no ida-neʼe lori bensaun ba ita-nia moris agora. Se ita simu Kristu nuʼudar ita-nia Naʼi hodi halo tuir ninia mandamentu no banati-tuir ninia ezemplu, ita sei hetan rikusoi neʼebé ema barak iha mundu neʼe buka maibé la hetan. Porezemplu, Maromak fó ba ita serbisu neʼebé lori kontente ba ita-nia moris, ita mós sai parte ba família ida neʼebé iha unidade tanba iha domin ba malu, ita iha laran neʼebé moos, no sente dame iha laran. Sin, ita hetan moris neʼebé nakonu ho ksolok. No ita mós sei hetan buat barak tan.

²⁰ Maromak Jeová halo Jesus nuʼudar “Aman Rohan-Laek” nian ba sira neʼebé iha esperansa atu moris ba nafatin iha rai. Jesus mak troka ita-nia aman primeiru, Adão, neʼebé lori susar barak ba ninia oan sira hotu. (Isaias 9:6, 7) Hodi simu Jesus nuʼudar ita-nia “Aman Rohan-Laek” nian no hatudu fiar ba nia, ita iha esperansa atu moris ba nafatin. Liután neʼe, ida-neʼe sei halo ita hakbesik liu ba Maromak Jeová. Hanesan ita aprende ona, hakaʼas an loron ba loron atu banati-tuir Jesus nia ezemplu mak dalan diʼak liu atu halo tuir Maromak nia mandamentu neʼebé dehan: “Banati-tuir Maromak, nuʼudar nia oan doben sira.”—Éfeso 5:1.

21. Oinsá mak Kristu nia dixípulu sira haleno naroman iha mundu aat neʼe?

²¹ Nuʼudar ita banati-tuir Jesus no ninia Aman, Jeová, ita halo buat ida neʼebé furak loos. Ita haleno sira-nia naroman neʼebé nabilan tebes. Mundu neʼe iha nakukun laran no Satanás lohi ema barak hodi tuir deʼit ninia hahalok. Maibé,  ita neʼebé halo tuir Kristu, haleno naroman neʼebé furak tebes, neʼe mak naroman kona-ba lia-loos husi Bíblia, naroman kona-ba hahalok diʼak kristaun nian, naroman kona-ba kontente neʼebé loos, dame neʼebé loos no domin neʼebé loos. Iha tempu neʼebé hanesan, ita sei sai besik liután ba Maromak Jeová, no neʼe mak buat neʼebé diʼak liu no furak liu atu halo.

22, 23. (a) Bensaun saida deʼit mak ema sira neʼebé kontinua laʼo tuir Jesus sei hetan iha futuru? (b) Ita hakarak hakaʼas an atu halo saida?

²² Hanoin mós kona-ba buat neʼebé Maromak Jeová hakarak halo ba ita iha futuru liuhusi Liurai Mesias. Lakleur tan, Liurai neʼe sei halo funu hasoru Satanás nia mundu aat neʼe. Ita bele fiar katak Jesus sei manán duni funu neʼe! (Apokalipse  19:11-15) Depois neʼe, Kristu sei hahú ninia Ukun ba Tinan Rihun Ida. Liuhusi ninia ukun, nia sei uza folin husi sakrifísiu neʼebé nia halo, hodi haraik bensaun ba ema neʼebé laran-metin no sei halo sira sai perfeitu fali. Hanoin toʼok bensaun tuirmai neʼe. Ita sei iha saúde neʼebé diʼak, sai joven no iha forsa, no ita mós sei haksolok atu halo serbisu hamutuk ho ema barak atu halo rai neʼe sai jardín furak ida. Depois Jesus ukun tiha ba tinan rihun ida, nia sei entrega fali ukun neʼe ba ninia Aman. (1 Korinto 15:24) Se ita ho laran-metin laʼo tuir Kristu, ita bele simu bensaun neʼebé furak tebes. Bensaun neʼe mak atu sai “Maromak nia oan”. (Roma 8:21) Sin, ita sei hetan bensaun hotu neʼebé Adão no Eva lakon. Nuʼudar Maromak Jeová nia oan-mane no oan-feto sira iha rai, ita sei sai livre ba nafatin husi sala neʼebé ita simu husi Adão. Tuir loloos, “mate la iha ona”.—Apokalipse 21:4.

²³ Hanoin fali mane-klosan ida neʼebé riku, neʼebé ita koʼalia ona iha Kapítulu 1 iha livru neʼe. Nia la simu Jesus nia konvite neʼebé dehan: “Mai tuir haʼu.” (Marcos 10:17-22) Keta halo desizaun neʼebé sala hanesan nia! Mai ita simu Jesus nia konvite neʼe ho ksolok no laran-manas. Mai ita hakaʼas an atu tahan no kontinua laʼo tuir ita-nia Bibi-Atan Diʼak loron ba loron, no tinan ba tinan. Hodi halo nuneʼe, ita sei haree ho matan rasik Jesus kumpre Maromak Jeová nia hakarak hotu iha dalan neʼebé furak!