1-4. (a) Saida mak akontese kuandu Pilatos hatudu sai Jesus ba ema-lubun neʼebé halibur iha governadór nia uma liʼur? (b) Oinsá mak Jesus nia hahalok kuandu ema hamoe no fó-terus ba nia? Ida-neʼe hamosu pergunta saida deʼit?

 “HAREE! Mane neʼe!” Ho liafuan sira-neʼe, Governadór Roma nian ida iha Jerusalém naran Pónsio Pilatos, hatudu sai Jesus Kristu ba ema-lubun neʼebé hirus loos, neʼebé hamriik iha governadór nia uma liʼur. Ida-neʼe akontese iha dadeer-saan iha tempu Páskua iha tinan 33. (João 19:5) Loron balu antes neʼe, kuandu Jesus tama ba Jerusalém, ema-lubun hahiʼi Jesus nuʼudar Liurai neʼebé Maromak hili. Maibé, iha loron neʼe, ema-lubun la haree tan Jesus nuʼudar Liurai ida.

² Ema tau unuk mean ba Jesus, no unuk neʼe hanesan ida neʼebé liurai-oan sira uza. Ema mós tau koroa neʼebé halo husi ai-tarak ba Jesus nia ulun. Ema tau unuk no koroa ba Jesus atu goza nia kona-ba ninia pozisaun nuʼudar liurai. Raan suli sai husi Jesus nia ulun no mós husi ninia kotuk neʼebé iha kanek barak tanba ema baku ho xikote. Ulun-naʼin ba amlulik sira soran povu atu la simu mane neʼebé hamriik iha sira-nia oin. Amlulik sira hakilar hodi dehan: “Oho nia iha ai-riin! Oho nia iha ai-riin!” Povu sira hakarak atu oho nia no sira hakilar dehan: “Nia tenke mate.”—João 19:1-7, MF.

³ Kuandu ema hamoe no fó-terus ba Jesus, nia tahan ida-neʼe ho aten-brani no kalma. a Nia prontu ona atu mate.  Iha loron Páskua nian neʼe, Jesus prontu atu saran nia an ba ema hodi prega nia iha ai-riin ida, maski neʼe lori moras boot ba nia.—João 19:17, 18, 30.

⁴ Hodi saran nia moris, Jesus hatudu katak nia mak belun neʼebé loos ba sira neʼebé tuir nia. Jesus hatete: “Ema ida la bele hadomi liu fali ema neʼebé saran nia moris tan nia belun sira.” (João 15:13) Ida-neʼe hamosu pergunta importante balu. Jesus presiza duni atu hasoru terus no mate iha dalan hanesan neʼe ka lae? Tanbasá mak nia prontu atu halo ida-neʼe? Nuʼudar ninia “belun” no ninia dixípulu, oinsá mak ita bele banati-tuir ninia ezemplu?

5. Oinsá mak Jesus hatene kona-ba susar neʼebé sei mosu ba nia?

⁵ Nuʼudar Mesias neʼebé Maromak promete nanis ona, Jesus hatene susar sira neʼebé nia sei hetan. Nia hatene kona-ba Eskritura Lia-Ebraiku sira neʼebé fó-hatene nanis ho klaru kona-ba terus neʼebé Mesias sei hasoru no dalan neʼebé ema oho nia. (Isaias 53:3-7, 12; Daniel 9:26) Dala balu, nia ajuda ninia dixípulu sira atu komprende kona-ba susar neʼebé sei kona nia. (Marcos 8:31; 9:31) Nuʼudar sira laʼo ba Jerusalém atu tuir Páskua ba dala ikus, nia esplika ho klaru ba ninia dixípulu sira hodi dehan: “Ema sei saran Oan-Mane ba amlulik boot no eskriba sira. Sira sei tesi lia todan ba nia ba mate, no saran nia ba ema jentiu sira, neʼebé sei hasara nia no tafui ba nia no baku nia no oho nia.” (Marcos 10:33, 34) Jesus nia liafuan sira-neʼe sai loos duni. Hanesan ita haree ona, ema goza Jesus, tafui kabeen ba nia, baku nia ho xikote, no oho nia.

6. Tanbasá mak Jesus presiza hasoru terus no mate?

⁶ Maibé, tanbasá mak Jesus presiza hasoru terus no mate? Tanba razaun importante balu. Primeiru, hodi halo tuir Maromak nafatin, Jesus hatudu katak nia laran-metin no nia mós apoia Maromak nia ukun. Hanoin-hetan, Satanás  duun katak ema serbí Maromak tan deʼit sira hakarak hetan buat ruma. (Job 2:1-5) Hodi laran-metin nafatin “toʼo mate” iha ai-riin terus nian, Jesus hatudu katak lia neʼebé Satanás hasaʼe mak bosok. (Filipe 2:8; Provérbios 27:11) Segundu, Mesias nia terus no mate taka ema nia sala. (Isaias 53:5, 10; Daniel 9:24) Jesus “saran nia moris atu soi ema barak”, no ida-neʼe loke dalan ba ita atu bele iha relasaun diʼak ho Maromak. (Mateus 20:28) Terseiru, hodi tahan terus no susar oioin, Jesus sai amlulik boot neʼebé laran-sadiʼa no “hatene hanoin ita-nia kbiit-laek”.—Ebreu 2:17, 18; 4:15.

7. Buat saida deʼit mak Jesus husik kuandu nia mai iha rai?

⁷ Atu komprende buat neʼebé Jesus halo, hanoin toʼok kona-ba ida-neʼe: Mane sé mak prontu atu husik ninia família no uma hodi muda ba rai seluk kuandu nia hatene katak ema barak neʼebé hela iha fatin neʼe sei la simu nia, hamoe nia, fó-terus ba nia, no mós ikusmai sei oho nia? Haree toʼok saida mak Jesus halo. Antes nia mai iha rai, nia iha pozisaun espesiál iha ninia Aman nia sorin iha lalehan. Maibé, nia prontu atu husik ninia hela-fatin iha lalehan no mai iha rai nuʼudar ema. Nia halo ida-neʼe maski nia hatene katak ema barak sei la simu nia, hamoe nia, fó-terus makaʼas ba nia, no ikusmai oho nia. (Filipe 2:5-7) Tanbasá mak Jesus prontu atu halo buat sira-neʼe?

8, 9. Saida mak book Jesus atu saran nia moris ba ita?

⁸ Jesus prontu atu tahan susar hotu tanba nia hadomi tebes ninia Aman. Domin ba Maromak Jeová book nia atu hanoin uluk kona-ba ninia Aman nia naran. (Mateus 6:9; João 17:1-6, 26) Buat neʼebé importante liu ba Jesus mak hamoos ninia Aman nia naran husi lia-bosok hotu. Jesus hafolin ninia knaar atu halo buat neʼebé loos, maski nia hetan terus. Nia hatene katak hodi laran-metin nia sei hola parte atu halo santu ninia Aman nia naran neʼebé furak.—1 Krónikas 29:13.

 ⁹ Iha razaun seluk tansá Jesus prontu atu mate. Razaun neʼe mak nia hadomi ema. Jesus nia domin ba ema hahú kedas kuandu Maromak foin kria ema. Antes Jesus mai iha rai, Bíblia hatudu oinsá Jesus sente kona-ba ema, hodi dehan: “Buat neʼebé haʼu gosta liu mak ema.” (Provérbios 8:30, 31) Kuandu nia iha rai, nia hatudu ho klaru liután katak nia hadomi ema. Hanesan ita haree ona iha Kapítulu 14, 15, no 16, Jesus hatudu ninia domin ba ema hotu iha dalan oioin no liuliu ba ninia dixípulu sira. Iha loron 14 Nisan, tinan 33 EC, Jesus fó nia moris atu salva ita. (João 10:11) Klaru katak neʼe mak dalan boot liu neʼebé Jesus hatudu nia domin ba ita. Entaun ita mós presiza banati-tuir ninia domin neʼe ka lae? Sin, presiza duni! Tuir loloos, ita simu mandamentu atu halo nuneʼe.

10, 11. Ukun-fuan foun saida mak Jesus fó ba ninia dixípulu sira? Ida-neʼe katak sá? Tanbasá mak importante atu halo tuir ida-neʼe?

¹⁰ Kalan antes Jesus mate, nia fó-hatene ba ninia dixípulu sira neʼebé besik nia hodi dehan: “Haʼu fó ba imi ukun-fuan foun: imi sei hadomi malu; nuʼudar haʼu hadomi imi, nuneʼe mós imi sei hadomi malu. Nuneʼe mak ema hotu sei hatene katak imi haʼu-nia eskolante sira: wainhira imi hadomi malu.” (João 13:34, 35) Tanbasá mak mandamentu atu “hadomi malu” mak “ukun-fuan foun”? Moisés nia Ukun-Fuan fó ona mandamentu dehan: “Ó tenke hadomi ó-nia maluk hanesan ó-nia an rasik.” (Levítico 19:18) Maibé Jesus nia ukun-fuan foun haruka ita atu hatudu domin iha dalan neʼebé boot liu fali ida-neʼe. Domin neʼe sei book ita atu fó ita-nia moris rasik ba ema seluk. Jesus esplika kona-ba neʼe hodi dehan: “Haʼu-nia ukun-fuan mak ida-neʼe: imi hadomi malu nuʼudar haʼu hadomi tiha imi. Ema ida la bele hadomi liu fali ema neʼebé saran nia moris tan nia belun sira.” (João 15:12, 13) Ukun-fuan foun neʼe haruka ita laʼós deʼit atu hadomi ema seluk hanesan ita-nia  an, maibé liu fali ida-neʼe. Liuhusi dalan neʼebé nia halaʼo nia moris no hodi laran-metin toʼo mate, Jesus hatudu ezemplu diʼak kona-ba domin neʼe.

¹¹ Tanbasá mak importante atu halo tuir ukun-fuan foun neʼe? Hanoin-hetan Jesus nia liafuan neʼebé dehan: “Nuneʼe [hodi hatudu domin neʼebé la hanoin an deʼit] mak ema hotu sei hatene katak imi haʼu-nia eskolante sira.” Sin, domin neʼe sei hatudu katak ita mak ema kristaun loos. Ita bele kompara domin neʼe ho kartaun naran nian. Ema neʼebé tuir reuniaun boot husi Testemuña ba Jeová uza kartaun naran nian. Kartaun neʼe fó sai ema neʼe nia naran no ninia kongregasaun. Domin neʼebé la hanoin an mak hanesan ‘kartaun’ neʼebé hatudu sai ema kristaun neʼebé loos. Neʼe katak, domin neʼebé ita hatudu ba malu tenke sai hanesan sinál ka kartaun neʼebé ema bele haree, hodi sira bele hatene katak ita mak Kristu nia dixípulu neʼebé loos. Entaun, diʼak atu ita ida-idak husu ba ita-nia an: ‘Ema bele haree katak haʼu hatudu domin neʼebé la hanoin an deʼit ka lae?’

12, 13. (a) Saida mak ita prontu atu lakon hodi hatudu domin ba ita-nia maluk? (b) Domin neʼebé la hanoin an deʼit katak sá?

¹² Nuʼudar Jesus nia dixípulu, ita presiza hadomi malu hanesan nia hadomi ita. Neʼe katak ita prontu atu lakon buat ruma atu ajuda ita-nia maluk fiar-naʼin. Entaun, saida deʼit mak ita prontu atu lakon? Bíblia fó-hatene ita dehan: “Ita hatene domin saida nuneʼe: Kristu saran nia moris tanba ita, no ita mós sei saran ita-nia moris tanba ita-nia maluk sira.” (1 João 3:16) Hanesan Jesus, ita prontu atu mate ba ita-nia maluk se ida-neʼe presiza. Kuandu ema fó susar, ita sei la saran ita-nia maluk kristaun ba ema aat maski ida-neʼe katak ita sei lakon ita-nia moris rasik. Iha rai neʼebé ema haketak malu tanba rasa ka kultura, ita prontu atu lakon ita-nia moris hodi proteje ita-nia irmaun-irmán, maski sira-nia rasa no kultura la hanesan ita. Kuandu nasaun sira halo funu, ita prontu atu tama komarka ka mate duké kaer  kilat hodi kontra hasoru ita-nia maluk fiar-naʼin ka ema seluk.—João 17:14, 16; 1 João 3:10-12.

¹³ Sin, hodi prontu atu mate ba ita-nia irmaun-irmán ita hatudu duni domin neʼebé la hanoin an deʼit! Maibé iha mós dalan seluk tan neʼebé ita bele hatudu domin. Tuir loloos, laʼós ita hotu mak hasoru situasaun neʼebé ita presiza saran ita-nia moris. Maski nuneʼe, se ita hadomi ita-nia irmaun-irmán toʼo prontu atu mate ba sira, klaru katak ita tenke prontu atu hakaʼas an hodi ajuda sira iha dalan oioin. Atu hatudu domin neʼebé la hanoin an deʼit, neʼe katak ita prontu atu husik ita-nia hakarak rasik tanba ema seluk nia diʼak. Ita tau uluk sira-nia presiza no sira-nia diʼak, duké ita-nian rasik. (1 Korinto 10:24) Iha dalan saida deʼit mak ita bele hatudu domin hanesan neʼe?

14. (a) Saida deʼit mak katuas kristaun sira halo? (b) Imi sente oinsá kona-ba katuas sira neʼebé serbisu makaʼas iha imi-nia kongregasaun?

¹⁴ Katuas kristaun sira lakon buat barak atu bele “tau matan ba Maromak nia luhan”. (1 Pedro 5:2, 3) Maski sira presiza tau matan ba sira-nia família rasik, maibé sira mós karik uza tempu durante kalan ka iha loron-sábadu no domingu atu tau matan ba kongregasaun, ida-neʼe inklui prepara ba diskursu sira, halo vizita bibi-atan nian, ka hola parte iha grupu tesi-lia nian atu rezolve problema ruma. Katuas kristaun balu mós halo buat seluk tan. Sira serbisu makaʼas iha reuniaun boot sira, serbí iha Komisaun neʼebé Komunika ho Ospitál, serbí iha Grupu neʼebé Vizita Pasiente. Sira balu serbí nuʼudar Serbisu-naʼin voluntáriu ba Planeamentu no Konstrusaun Lokál. Katuas sira, hanoin-hetan katak hodi prontu atu uza imi-nia tempu, forsa, no rikusoi atu tau matan ba Maromak nia bibi sira, imi hatudu katak imi iha domin neʼebé la hanoin an deʼit. (2 Korinto 12:15) Klaru katak Maromak Jeová hafolin tebes imi-nia  hakaʼas-an. Laʼós neʼe deʼit, imi-nia kongregasaun neʼebé imi tau matan, mós hafolin tebes imi.—Filipe 2:29; Ebreu 6:10.

15. (a) Katuas kristaun sira-nia feen prontu atu husik saida? (b) Oinsá mak ita sente kona-ba feen sira neʼebé apoia sira-nia laʼen atu tau matan ba kongregasaun?

¹⁵ Maibé, oinsá ho katuas sira-nia feen? Klaru katak kuandu laʼen halo serbisu atu tau matan ba kongregasaun, neʼe bele hamenus tempu atu hamutuk ho ninia feen no oan sira. Maibé, irmán sira-neʼe mós prontu atu husik sira-nia hakarak rasik atu bele apoia sira-nia laʼen, hodi sira-nia laʼen bele tau matan ba Maromak nia bibi. Hanoin toʼok mós kona-ba katuas área sira-nia feen. Irmán sira-neʼe prontu atu husik buat barak hodi bele laʼo hamutuk ho sira-nia laʼen atu vizita kongregasaun no área sira. Sira la iha uma rasik no dala ruma presiza toba iha uma neʼebé la hanesan semana-semana. Sin, ita hafolin duni feen sira neʼebé tau uluk kongregasaun nia presiza no hatudu domin neʼebé la hanoin an deʼit.—Filipe 2:3, 4.

16. Saida deʼit mak inan-aman kristaun prontu atu halo ba oan sira?

¹⁶ Oinsá mak ita bele hatudu domin neʼebé la hanoin an deʼit iha família laran? Inan-aman sira, klaru katak imi halo ona buat barak atu ajuda imi-nia oan no atu “hanorin sira dixiplina no Naʼi nia doutrina loloos”. (Éfeso 6:4) Karik imi presiza serbisu ba tempu naruk atu manán osan no ida-neʼe halo imi kole tebes. Maski nuneʼe, imi prontu atu halo ida-neʼe tanba imi hakarak atu fó ai-han ba imi-nia família no atu imi-nia família bele iha hela-fatin no roupa. Imi prontu atu husik imi-nia hakarak rasik atu tau matan ba imi-nia oan sira-nia presiza. Imi mós hakaʼas an atu estuda ho imi-nia oan, lori sira ba reuniaun, no haklaken hamutuk ho sira. (Deuteronómio 6:6, 7) Imi bele fiar katak Ida neʼebé hahú moris família nian hafolin tebes imi-nia domin neʼebé la hanoin an deʼit, no imi-nia hakaʼas-an karik sei ajuda imi-nia oan atu hetan moris rohan-laek.—Provérbios 22:6; Éfeso 3:14, 15.

17. Oinsá mak laʼen kristaun sira bele banati-tuir Jesus nia domin neʼebé la hanoin an deʼit?

 ¹⁷ Laʼen sira, oinsá mak imi bele banati-tuir Jesus atu hatudu domin neʼebé la hanoin an deʼit? Bíblia hatete: “Laʼen sira, kontinua hadomi imi-nia feen, hanesan Kristu mós hadomi kongregasaun no fó ninia moris ba kongregasaun.” (Éfeso 5:25, MF) Hanesan ita haree ona, Jesus hadomi ninia dixípulu sira toʼo saran nia moris ba sira. Laʼen kristaun sira banati-tuir Jesus nia hahalok hodi ‘la buka fó ksolok ba sira-nia an’ deʼit. (Roma 15:3) Laʼen hanesan neʼe prontu atu tau uluk ninia feen nia hakarak no presiza, duké ninian rasik. Nia la obriga ninia feen atu halo tuir deʼit ninia hakarak, maibé nia hatudu katak nia prontu atu troka se ninia feen nia hakarak la kontra Bíblia nia matadalan. Maromak Jeová hafolin laʼen sira neʼebé hatudu domin neʼebé la hanoin an deʼit. Liután neʼe, kuandu laʼen hatudu domin neʼebé la hanoin an deʼit, ninia feen no oan sira sei hadomi no respeitu nia.

18. Saida mak book ita atu halo tuir ukun-fuan foun kona-ba hadomi malu?

¹⁸ Klaru katak la fasil atu halo tuir ukun-fuan foun kona-ba hadomi malu, maibé ita iha razaun importante atu halo ida-neʼe. Paulo hatete: “Basá Kristu nia domin book ami makaʼas basá ami hatene loloos katak ida mate tiha tan ema hotu nia diʼak . . . Kristu mate duni tan ema hotu-hotu, atu sira neʼebé moris, la moris tan ba sira an rasik, maibé moris ba ida neʼebé mate no moris hiʼas tanba sira.” (2 Korinto 5:14, 15) Sin, tanba Jesus mate ba ita, ida-neʼe book ita atu uza ita-nia moris ba nia, loos ka lae? Ita bele halo ida-neʼe hodi banati-tuir Jesus nia ezemplu kona-ba hatudu domin neʼebé la hanoin an deʼit.

19, 20. Maromak Jeová fó ita prezente folin-boot saida? Oinsá mak ita bele hatudu katak ita simu ida-neʼe?

¹⁹ Jesus koʼalia buat neʼebé loos kuandu nia dehan: “Ema  ida la bele hadomi liu fali ema neʼebé saran nia moris tan nia belun sira.” (João 15:13) Nia prontu atu saran nia moris ba ita, no ida-neʼe hatudu ho klaru ninia domin boot ba ita. Maibé, iha Ida neʼebé hatudu domin boot liu fali ida-neʼe. Jesus hatete: “Basá Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.” (João 3:16) Sin, Maromak hadomi tebes ita toʼo nia fó nia Oan nuʼudar sakrifísiu, hodi nuneʼe bele salva ita husi sala no mate. (Éfeso 1:7) Jesus nia sakrifísiu mak prezente neʼebé folin-boot husi Maromak Jeová, maibé Maromak la obriga ita atu simu prezente neʼe.

²⁰ Atu simu Maromak Jeová nia prezente ka lae, neʼe depende ba ita ida-idak. Oinsá? Ita presiza tau “fiar” ba ninia Oan. Maibé, fiar laʼós deʼit ho liafuan. Ita hatudu fiar liuhusi ita-nia hahalok, no liuhusi dalan neʼebé ita halaʼo ita-nia moris. (Tiago 2:26) Ita hatudu katak ita tau fiar ba Jesus Kristu hodi laʼo tuir nia loron ba loron. Halo ida-neʼe sei lori bensaun mai ita agora no iha futuru. Iha kapítulu tuirmai sei esplika liután kona-ba neʼe.