1-3. (a) Saida mak toʼos-naʼin halo se ninia toʼos luan liu ba nia atu koʼa mesak? (b) Susar saida mak Jesus hasoru iha tinan 33? Oinsá mak nia hadiʼa situasaun neʼe?

 HANOIN toʼok kona-ba situasaun tuirmai neʼe. Toʼos-naʼin ida prepara ninia toʼos no kuda fini. Kuandu fini neʼe nia tahan primeiru komesa mosu, toʼos-naʼin tau matan ba nia toʼos ho diʼak liután, no nia haksolok atu haree buat neʼebé nia kuda sai boot ba daudaun. Depois fulan balu liu tiha, tempu toʼo ona ba nia atu koʼa buat neʼebé nia kuda, no simu kolen husi ninia serbisu makaʼas. Maibé nia hasoru susar ida: Toʼos luan liu ba nia atu koʼa mesak. Atu rezolve situasaun neʼe, nia halo desizaun atu selu ema balu no haruka sira atu halo serbisu iha ninia toʼos. Desizaun neʼe matenek tanba tempu koʼa nian mak uitoan deʼit no nia lakohi lakon buat folin-boot neʼebé iha ninia toʼos.

 ² Jesus mós hasoru situasaun neʼebé hanesan toʼos-naʼin neʼe. Durante tempu neʼebé Jesus haklaken iha rai nia kuda fini lia-loos nian. Maibé, iha tinan 33, Jesus neʼebé moris hiʼas ona hatene katak tempu koʼa nian toʼo ona, no toʼos neʼe boot tebes. Tempu toʼo ona atu halibur ema sira neʼebé rona mensajen lia-loos nian hodi sai nuʼudar dixípulu. (João 4:35-38) Oinsá mak Jesus hadiʼa situasaun neʼe? Iha foho ida iha Galileia, antes Jesus saʼe ba lalehan, nia haruka ninia dixípulu sira atu buka serbisu-naʼin barak tan, nia dehan: “Laʼo bá no hanorin ema husi nasaun hotu atu sai haʼu-nia dixípulu, fó batizmu ba sira . . . . Hanorin sira atu halo tuir mandamentu hotu neʼebé haʼu fó ona ba imi.”—Mateus 28:19, 20, MF.

³ Atu ema ida bele sai nuʼudar Kristu nia dixípulu, nia tenke halo tuir Jesus nia mandamentu neʼe. Entaun, mai ita koʼalia kona-ba pergunta tolu tuirmai neʼe. Tanbasá mak Jesus haruka atu buka serbisu-naʼin barak tan? Oinsá mak nia fó treinu ba ninia dixípulu sira atu buka serbisu-naʼin tan? Oinsá mak ita bele halo tuir Jesus nia mandamentu neʼe?

4, 5. Tanbasá mak Jesus mesak la bele halo hotu serbisu neʼebé nia hahú? Sé mak tenke kontinua atu halo serbisu neʼe kuandu Jesus fila fali ba lalehan?

⁴ Kuandu Jesus hahú ninia serbisu haklaken iha tinan 29, nia hatene katak nia mesak la bele halo hotu serbisu neʼe. Nia iha tempu badak deʼit atu hela iha rai, no nia mós la bele laʼo ba fatin barak atu fahe ba ema hotu mensajen kona-ba Maromak nia Ukun. Tuir loloos, nia haklaken deʼit ba ema judeu no ema husi rai seluk neʼebé tuir relijiaun judeu nian, katak “bibi sira neʼebé lakon husi umakain Israel nian”. (Mateus 15:24) Maibé “bibi sira neʼebé lakon” namkari iha fatin oioin iha rai-Israel tomak, no rai neʼe luan kilómetru atus ba atus. Liután neʼe, Maromak mós hakarak atu ema seluk iha mundu tomak rona lia-foun diʼak.—Mateus 13:38; 24:14.

⁵ Jesus rekoñese katak sei iha serbisu barak tan atu halo  depois nia mate. Jesus hatete ba ninia apóstolu naʼin-11 neʼebé laran-metin, hodi dehan: “Tebes, tebes, haʼu dehan ba imi: ema neʼebé fiar iha haʼu sei halo mós hahalok sira [ka, “serbisu”, MF] neʼebé haʼu halo; nia sei halo hahalok [“serbisu”, MF] boot liu fali hirak-neʼe, tan haʼu atu laʼo ba Aman.” (João 14:12) Tanba Oan atu fila fali ba lalehan, ninia dixípulu hotu, inklui mós dixípulu sira iha tempu agora, tenke kontinua atu halaʼo serbisu haklaken no hanorin. (João 17:20) Ho haraik-an Jesus hatete katak sira sei halo serbisu neʼebé “boot liu fali” ninian. Oinsá? Mai haree toʼok dalan tolu.

6, 7. (a) Iha dalan saida deʼit mak Jesus nia dixípulu sira halo serbisu neʼebé boot liu fali Jesus nian? (b) Oinsá mak Ita bele hatudu katak Jesus bele tau fiar ba Ita nuʼudar ninia dixípulu ida?

⁶ Primeiru, Jesus nia dixípulu sei haklaken iha fatin barak liu. Ohin loron, sira haklaken ona toʼo mundu nia rohan. Sira haklaken iha fatin sira neʼebé dook husi rai neʼebé Jesus rasik uluk haklaken. Segundu, sira sei haklaken ba ema barak liu. Kuandu Jesus bá fali lalehan nia husik hela dixípulu uitoan, maibé lakleur deʼit sira aumenta barak liután. (Apóstolu 2:41; 4:3, 4) Agora sira hamutuk millaun ba millaun, no ema rihun ba rihun seluk hetan batizmu tinan-tinan. Terseiru, sira sei haklaken ba tempu neʼebé kleur liu. Sin, sira haklaken toʼo ohin loron, neʼe katak sira haklaken maizumenus tinan 2.000 ona husi tempu neʼebé Jesus ramata ninia serbisu ba tinan tolu ho balu iha rai.

⁷ Jesus tau fiar ba ninia dixípulu sira, tan neʼe mak nia dehan katak sira ‘sei halo serbisu neʼebé boot liu fali’ ninian. Jesus entrega serbisu importante ida ba ninia dixípulu sira-nia liman. Serbisu neʼe mak haklaken no hanorin “lia-foun diʼak Maromak nia reinu nian”. (Lucas 4:43) Nia fiar duni katak sira sei halaʼo serbisu neʼe ho laran-metin. Oinsá mak ida-neʼe kona ita ohin loron? Kuandu ita haklaken ho laran-manas no laran tomak, ita hatudu katak ita mós Jesus nia dixípulu neʼebé nia bele tau fiar. Neʼe mak buat neʼebé espesiál tebes ba ita, loos ka lae?—Lucas 13:24.

8, 9. Jesus hatudu ezemplu saida kona-ba serbisu haklaken? Oinsá mak ita bele halaʼo serbisu haklaken hodi tuir ninia ezemplu?

⁸ Jesus fó treinu neʼebé diʼak liu ba ninia dixípulu sira atu halo serbisu haklaken. Primeiru, nia hatudu ezemplu neʼebé diʼak ba sira atu banati-tuir. (Lucas 6:40) Iha kapítulu uluk, ita haree ona Jesus nia hanoin kona-ba serbisu haklaken. Hanoin toʼok kona-ba buat neʼebé Jesus nia dixípulu sira haree kuandu sira laʼo hamutuk ho Jesus atu haklaken. Sira haree katak nia haklaken iha fatin naran deʼit neʼebé iha ema, porezemplu iha tasi-ibun, foho ninin, sidade, merkadu, no iha ema nia uma. (Mateus 5:1, 2; Lucas 5:1-3; 8:1; 19:5, 6) Sira haree katak nia mak badinas tebes, nia hadeer sedu no halo serbisu toʼo kalan. Ba Jesus, serbisu haklaken laʼós hanesan atividade neʼebé nia halo kuandu nia iha deʼit tempu. (Lucas 21:37, 38; João 5:17) Sira bele haree ho klaru katak Jesus nia domin ba ema mak book nia atu halo serbisu haklaken ho laran-manas. Karik sira mós haree katak ninia oin haleno domin neʼebé iha ninia laran. (Marcos 6:34) Tuir Ita-nia hanoin, oinsá mak Jesus nia ezemplu kona ninia dixípulu? Se Ita hela iha tempu neʼebá, Jesus nia ezemplu neʼe bele book Ita ka lae?

⁹ Nuʼudar Kristu nia dixípulu, ita banati-tuir ninia ezemplu kuandu ita halo serbisu haklaken. Tan neʼe, ita hakarak atu uza oportunidade hotu atu “fó sasin” ho didiʼak. (Apóstolu 10:42) Hanesan Jesus, ita vizita ema iha sira-nia uma. (Apóstolu 5:42) Se presiza, ita prontu atu muda ita-nia programa hodi nuneʼe ita bele hasoru ema kuandu sira iha uma. Ita mós hakaʼas an atu buka ema no haklaken ho matenek iha fatin oioin, hanesan iha estrada, jardín, loja, no serbisu-fatin. Ita kontinua “hakaʼas an” atu halo serbisu haklaken tanba ita hatene katak serbisu neʼe mak importante duni. (1 Timóteo 4:10, MF) Ita-nia domin ba ema book ita atu buka ema iha tempu naran deʼit no iha fatin naran deʼit neʼebé ita bele hetan sira.—1 Tesalónika 2:8.

10-12. Lisaun importante saida deʼit mak Jesus hanorin ba ninia dixípulu antes nia haruka sira atu bá haklaken?

 ¹⁰ Dalan seluk neʼebé Jesus treinu ninia dixípulu mak hodi hanorin sira ho didiʼak kona-ba oinsá atu halaʼo serbisu haklaken. Porezemplu, antes Jesus haruka ninia apóstolu naʼin-12 no tuirmai dixípulu naʼin-70, nia halibur sira hamutuk no hanorin sira oinsá atu haklaken. (Mateus 10:1-15; Lucas 10:1-12) Treinu neʼebé nia fó lori rezultadu diʼak. Lucas 10:17 hatete katak dixípulu sira-neʼe “fila fali hodi haksolok”. Mai ita koʼalia kona-ba lisaun importante rua neʼebé Jesus hanorin ba ninia dixípulu sira. Nuʼudar ita koʼalia kona-ba informasaun neʼe, diʼak atu hanoin-hetan katak iha tempu neʼebá sira hotu moris tuir kostume judeu nian.

¹¹ Jesus hanorin ninia dixípulu sira atu tau fiar ba Maromak Jeová. Nia hatete ba sira: “Keta lori osan-mean, osan-mutin eh osan-riti iha imi-nia futu-kabun. Labele lori kohe tuir dalan, hatais tahan rua, sandálias, eh ai-tonka; basá serbisu-naʼin soʼi atu simu nia kolen.” (Mateus 10:9, 10) Iha tempu neʼebá, ema neʼebé laʼo rai baibain tau osan iha sira-nia “futu-kabun”, lori hahán iha kohe laran, no mós lori xinelus ida tan. Hodi haruka ninia dixípulu sira atu la hanoin kona-ba buat sira-neʼe, ida-neʼe hanesan Jesus hatete ba sira dehan: “Tau imi-nia fiar tomak ba Jeová, tanba nia sei tau matan ba buat neʼebé imi presiza.” Sin, Maromak Jeová ajuda sira hodi book ema neʼebé simu lia-loos atu hatudu laran-luak ba sira, tuir toman iha rai-Israel antigu.—Lucas 22:35.

 ¹² Jesus mós hanorin ninia dixípulu sira atu hasees an husi buat neʼebé hanetik sira atu haklaken. Nia hatete: “Keta kumprimenta ema ida iha dalan.” (Lucas 10:4) Iha neʼe Jesus haruka sira atu la liga ema ka la hanoin ema ka lae? Lae duni! Iha tempu Bíblia nian, kumprimenta laʼós hasé liu deʼit maibé envolve buat barak liu. Kumprimenta envolve toman oioin no koʼalia ba tempu kleur. Matenek-naʼin ida hatete: “Iha rai [Israel] kumprimenta laʼós deʼit hakruʼuk an, ka kaer liman hanesan ita baibain halo, maibé sira kumprimenta hodi hakoʼak malu dala barak no hakruʼuk toʼo rai. Atu halo ida-neʼe, presiza tempu barak.” Entaun, kuandu Jesus dehan ba ninia dixípulu atu la kumprimenta ema hodi tuir sira-nia toman, ida-neʼe hanesan Jesus hatete ba sira dehan: “Imi tenke uza imi-nia tempu ho didiʼak, tanba mensajen neʼebé imi hatoʼo mak importante no presiza halo hotu lalais.” a

13. Iha dalan saida deʼit mak ita bele hatudu katak ita simu matadalan neʼebé Jesus fó ba ninia dixípulu sira iha tempu uluk?

¹³ Ita mós hakarak duni atu halo tuir mandamentu neʼebé Jesus fó ba ninia dixípulu sira iha tempu uluk. Kuandu halaʼo ita-nia serbisu haklaken, ita tau ita-nia fiar tomak ba Maromak Jeová. (Provérbios 3:5, 6) Ita hatene katak ita sei nunka kuran buat neʼebé ita presiza iha ita-nia moris se ita “buka uluknanain Maromak nia reinu”. (Mateus 6:33) Sira neʼebé haklaken lia-foun diʼak ba tempu tomak haree ho matan rasik katak maski hasoru susar, maibé Maromak Jeová nunka husik sira mesak. (Salmo 37:25) Ita mós lakohi atu husik buat ida hanetik ita atu halo buat neʼebé importante liu. Se ita la kuidadu, mundu neʼe bele dada sees ita husi dalan loos. (Lucas 21:34-36) Agora laʼós tempu atu  husik buat neʼebé ladún importante dada ita-nia atensaun. Ita-nia mensajen importante tebes, no ita labele demora atu fahe ida-neʼe tanba neʼe envolve ema nia moris. (Roma 10:13-15) Hodi matan-moris nafatin, ida-neʼe bele ajuda ita atu la husik buat naran deʼit husi mundu neʼe atu hamenus tempu no forsa neʼebé ita bele uza iha serbisu haklaken. Hanoin-hetan katak tempu uitoan deʼit ona no toʼos luan tebes.—Mateus 9:37, 38.

14. Saida mak hatudu katak ema hotu neʼebé tuir Kristu presiza halo tuir buat neʼebé hakerek iha Mateus 28:18-20? (Haree mós nota-rodapé)

¹⁴ Jesus neʼebé moris hiʼas ona fó mandamentu atu ‘laʼo bá no hanorin ema atu sai ninia dixípulu’. Liafuan sira-neʼe hatudu katak nia fó responsabilidade neʼebé boot ba sira neʼebé laʼo tuir nia. Jesus nia mandamentu neʼe laʼós fó deʼit ba dixípulu sira neʼebé hamutuk ho nia iha foho ida iha Galileia. b Serbisu neʼebé Jesus haruka atu halo inklui haklaken ba ema husi “nasaun hotu” no ida-neʼe kontinua nafatin “toʼo mundu neʼe nia rohan”. Klaru katak, sira hotu neʼebé tuir Kristu presiza halo serbisu neʼe, ida-neʼe inklui mós ita ohin loron. Mai ita haree liután Jesus nia liafuan neʼebé hakerek iha Mateus 28:18-20.

15. Tanbasá mak matenek atu halo tuir Jesus nia mandamentu atu halo dixípulu?

¹⁵ Antes fó mandamentu ba sira, Jesus hatete: “Kbiit tomak iha lalehan no rai fó tiha ona mai haʼu.” (Versíkulu 18) Jesus simu duni kbiit tomak ka lae? Sin, nia simu duni! Nia mak arkanju ka xefe ba anju sira, no ukun anju rihun ba rihun. (1 Tesalónika 4:16; Apokalipse 12:7) Nuʼudar ulun ba kongregasaun, nia iha kbiit atu ukun ninia dixípulu sira iha rai. (Éfeso 5:23) Komesa husi tinan 1914,  nia ukun ona iha lalehan nuʼudar Liurai Mesias. (Apokalipse 11:15) Nia mós ukun sira neʼebé iha rate laran, tanba nia iha kbiit atu halo sira moris hiʼas fali husi mate. (João 5:26-28) Hodi koʼalia uluk kona-ba ninia kbiit nuʼudar ukun-naʼin, Jesus hatudu katak buat neʼebé nia hatoʼo mak laʼós lia-menon deʼit maibé mandamentu ida. Ita hatudu matenek hodi halo tuir mandamentu neʼe, tanba Maromak mak Ida neʼebé fó kbiit neʼe ba Jesus.—1 Korinto 15:27.

16. Hodi dehan “laʼo bá”, Jesus fó mandamentu ba ita atu halo saida? Oinsá mak ita bele kumpre ida-neʼe?

¹⁶ Tuirmai Jesus fó mandamentu hodi dehan: “Laʼo bá.” (Versíkulu 19) Ho liafuan sira-neʼe, Jesus fó mandamentu ba ita atu hakaʼas an hodi bá koʼalia ho ema no fahe mensajen kona-ba Maromak nia Ukun. Ita bele uza dalan oioin atu kumpre mandamentu neʼe. Haklaken husi uma ba uma mak dalan diʼak ida atu hasoru ema. (Apóstolu 20:20) Ita mós hakarak buka oportunidade atu haklaken iha dalan la formál. Neʼe katak ita laran-manas atu fahe lia-foun diʼak iha tempu naran deʼit nuʼudar ita halaʼo ita-nia moris loroloron nian. Sin, maski ita bele haklaken iha dalan oioin, hodi tuir situasaun no buat neʼebé ema presiza, maibé ita hotu halo buat ida neʼebé hanesan, neʼe mak “laʼo bá”. Sin, ita bá no buka ema sira neʼebé laran-diʼak.—Mateus 10:11.

17. Oinsá mak ita hanorin ema atu sai Jesus nia dixípulu?

¹⁷ Jesus esplika razaun tansá nia haruka sira atu “laʼo bá”. Razaun neʼe mak atu ‘hanorin ema husi nasaun hotu atu sai ninia dixípulu’. (Versíkulu 19) Oinsá mak ita hanorin ema atu sai Jesus nia dixípulu? Liafuan dixípulu katak ema neʼebé aprende, ka ema neʼebé hetan hanorin husi ema seluk. Maibé, ‘hanorin ema sai dixípulu’ laʼós deʼit fahe informasaun. Kuandu ita estuda Bíblia ho ema, ita-nia hakarak mak atu ajuda sira sai Kristu nia dixípulu ida. Tan neʼe, diʼak atu fó sai beibeik kona-ba Jesus nia ezemplu hodi nuneʼe ita-nia estudante bele aprende atu haree Jesus nuʼudar sira-nia mestre no bele banati-tuir nia. Sira bele aprende  atu moris tuir Jesus nia ezemplu no atu halo serbisu neʼebé nia halo.—João 13:15.

18. Tanbasá batizmu mak hakat importante liu iha dixípulu ida nia moris?

¹⁸ Parte importante husi Jesus nia mandamentu mak atu “fó batizmu ba sira hodi Aman, Oan no espíritu santu nia naran”. (Versíkulu 19) Batizmu mak hakat importante liu iha dixípulu ida nia moris, tanba ida-neʼe mak nuʼudar sinál neʼebé hatudu katak nia dedika an ona ba Maromak ho laran tomak. Tuir loloos, batizmu mak importante atu hetan salvasaun. (1 Pedro 3:21) Sin, hodi kontinua hakaʼas an atu serbí Maromak Jeová, dixípulu neʼebé hetan ona batizmu bele hein atu simu bensaun ba nafatin iha mundu foun neʼebé atu mai. Ita ajuda ona ema ida atu sai Kristu nia dixípulu neʼebé hetan ona batizmu ka lae? Ida-neʼe lori haksolok neʼebé boot liu iha ita-nia serbisu haklaken.—3 João 4.

19. Saida mak ita hanorin ba ema foun? Tanbasá mak dala ruma ita presiza atu kontinua hanorin sira depois sira hetan batizmu?

¹⁹ Jesus esplika parte ida tan husi ninia mandamentu neʼe, hodi dehan: “Hanorin sira atu halo tuir mandamentu hotu neʼebé haʼu fó ona ba imi.” (Versíkulu 20) Ita tenke hanorin ema foun sira atu halo tuir Jesus nia mandamentu, neʼe inklui mandamentu atu hadomi Maromak, hadomi ita-nia maluk, no atu halo dixípulu. (Mateus 22:37-39) Ita presiza  hanorin sira neineik-neineik kona-ba oinsá atu esplika lia-loos husi Bíblia no atu defende sira-nia fiar neʼebé sai boot ba daudaun. Kuandu sira tuir ona kritériu atu haklaken ho kongregasaun, ita presiza haklaken ho sira no hanorin sira liuhusi ita-nia liafuan no ezemplu kona-ba oinsá halo serbisu neʼe ho didiʼak. Dala ruma ita presiza kontinua hanorin dixípulu foun maski sira hetan ona batizmu. Karik ema sira-neʼe presiza matadalan liután atu ajuda sira tahan hasoru susar oioin neʼebé mosu tanba sira laʼo tuir Kristu.—Lucas 9:23, 24.

20, 21. (a) Tanbasá mak ita lalika sente taʼuk kuandu ita halaʼo knaar neʼebé Jesus fó ba ita? (b) Tanbasá mak agora laʼós tempu atu hamenus ita-nia serbisu? Ita sei hakaʼas an atu halo saida?

²⁰ Jesus nia liafuan ikus ba ninia dixípulu sira fó laran-kmaan duni. Nia dehan: “Haʼu sei hamutuk nafatin ho imi toʼo mundu neʼe nia rohan.” (Mateus 28:20, MF) Jesus hatene katak knaar neʼebé nia fó mak importante tebes. Nia mós hatene katak kuandu ninia dixípulu sira halaʼo knaar neʼe, dala ruma ema sei fó susar ba sira. (Lucas 21:12) Maibé, ita la iha razaun atu sente taʼuk. Ita-nia ulun-naʼin la husu ita atu halo knaar neʼe mesamesak ka la ho ajuda. Ita sente laran-kmaan atu hatene katak Ida neʼebé iha “kbiit tomak iha lalehan no rai” mak hamutuk ho ita atu apoia ita hodi kumpre ita-nia knaar.

²¹ Jesus promete ba ninia dixípulu sira katak nia sei hamutuk ho sira iha sira-nia serbisu haklaken durante tinan atus ba atus toʼo “mundu nia rohan”. Ita tenke kontinua halo tuir Jesus nia mandamentu toʼo tempu neʼe mai. Agora laʼós tempu atu hamenus ita-nia serbisu. Tuir loloos, agora mak tempu koʼa nian no toʼos luan tebetebes! Maromak halibur daudaun ema barak neʼebé laran-diʼak. Nuʼudar Kristu nia dixípulu, mai ita hakaʼas an atu kumpre knaar importante neʼe neʼebé nia fó tiha ona ba ita. Mai ita hakaʼas an uza ita-nia tempu, forsa, no rikusoi atu halo tuir Kristu nia mandamentu: ‘Laʼo bá no hanorin ema atu sai haʼu-nia dixípulu.’