1, 2. (a) Tanbasá mak guarda sira neʼebé simu knaar atu kaer Jesus fila fali ho liman-mamuk? (b) Tanbasá mak Jesus hanorin iha dalan neʼebé furak?

 EMA fariseu sira sai hirus tebetebes tanba sira haree Jesus hanorin kona-ba ninia Aman iha templu laran. Ema sira neʼebé rona ba nia iha hanoin neʼebé la hanesan. Sira barak tau fiar ba Jesus, maibé sira seluk hakarak atu kaer nia. Ulun-naʼin relijiaun sira la bele ona kontrola sira-nia hirus, no tan neʼe sira haruka guarda sira atu kaer Jesus. Maibé, guarda sira-neʼe fila fali ho liman-mamuk. Amlulik nia xefe sira no fariseu sira husu: “Tansá imi la lori nia mai?” Guarda sira-neʼe hatán: “Ema ida seidauk koʼalia hanesan ema neʼe!” Sin, sira hakfodak tebes ho Jesus nia hanorin toʼo sira lakohi atu foti liman hasoru nia. a—João 7:45, 46.

² Tuir loloos, laʼós deʼit guarda sira-neʼe mak sai hakfodak ho Jesus nia hanorin. Durante ninia serbisu haklaken, ema barak halibur an tanba hakarak tebes atu rona Jesus hanorin. (Marcos 3:7, 9; 4:1; Lucas 5:1-3) Tanbasá mak Jesus bele hanorin iha dalan neʼebé furak? Hanesan ita haree ona iha Kapítulu 8, Jesus hadomi lia-loos neʼebé nia hanorin, no nia hadomi ema neʼebé nia hanorin. Nia mós iha matenek atu uza dalan oioin atu hanorin. Mai ita koʼalia kona-ba dalan tolu neʼebé nia uza no oinsá ita bele banati-tuir dalan sira-neʼe.

3, 4. (a) Tanbasá mak Jesus uza liafuan neʼebé simples atu hanorin? (b) Oinsá mak Jesus nia diskursu iha foho hatudu katak nia hanorin ho simples?

³ Ita bele fiar katak Jesus hatene liafuan aas barak neʼebé  nia bele uza atu hanorin. Maibé, kuandu nia hanorin, nia nunka koʼalia hodi uza liafuan neʼebé susar atu komprende, tanba nia hatene katak ema barak neʼebé rona nia mak “ema baibain neʼebé la matenek”. (Apóstolu 4:13) Nia hanoin kona-ba sira-nia situasaun, no tan neʼe nia nunka hatodan sira hodi hatoʼo informasaun neʼebé barak liu. (João 16:12) Jesus hatene oinsá atu hanorin lia-loos neʼebé importante hodi uza liafuan neʼebé simples.

⁴ Porezemplu, hanoin toʼok kona-ba diskursu neʼebé Jesus hatoʼo iha foho, neʼebé hakerek iha Mateus 5:3–7:27. Jesus nia konsellu iha diskursu neʼe iha kbiit atu book ita-nia hanoin no nia hatudu sai hun husi problema oioin. La iha ideia ka liafuan neʼebé susar atu komprende. Tuir loloos, labarik sira mós bele komprende liafuan barak neʼebé Jesus uza! Tan neʼe, kuandu Jesus ramata ninia diskursu, ema-lubun neʼebé rona “hakfodak ho nia doutrina”. (Mateus 7:28) Sin, maski ema-lubun neʼe karik inklui toʼos-naʼin, bibi-atan, no peskadór sira, maibé sira hotu kontente ho ninia hanorin.

5. Fó toʼok ezemplu kona-ba Jesus nia dalan atu hatoʼo buat importante tebes ho liafuan simples.

⁵ Kuandu Jesus hanorin, dala barak nia hanorin lisaun importante ho liafuan uitoan deʼit neʼebé fasil atu komprende. Iha Jesus nia tempu la iha livru barak, no baibain ema aprende buat foun hodi rona ba ema seluk. Tan neʼe, hodi hanorin iha dalan neʼebé simples, Jesus bele hatama informasaun ba ema nia neon no laran. Hanoin toʼok ezemplu balu tuirmai neʼe: “Keta hanoin aat ema, atu ema labele hanoin aat imi.” “Laʼós sira neʼebé isin-diʼak mak kuran doutór, maibé sira neʼebé moras.” “Espíritu hakarak maibé isin kbiit-laek.” “Fó fali ba César buat neʼebé César nian; no ba Maromak buat neʼebé Maromak nian!” “Diʼak liu fó liu fali simu.” b (Mateus 7:1; 9:12; 26:41; Marcos 12:17; Apóstolu  20:35) Liafuan sira-neʼe Jesus hatoʼo maizumenus tinan 2.000 liubá, maski nuneʼe sei furak hela toʼo ohin loron.

6, 7. (a) Tanbasá mak importante atu hanorin hodi uza liafuan neʼebé simples? (b) Oinsá mak ita la hatodan ita-nia estudante ho informasaun neʼebé barak liu?

⁶ Oinsá mak ita bele hanorin iha dalan neʼebé simples? Dalan ida mak uza liafuan neʼebé ema hotu komprende. Lia-loos importante husi Maromak nia Liafuan la susar liu atu komprende. Maromak Jeová fó sai ninia hakarak ba sira neʼebé laran-moos no haraik-an. (1 Korinto 1:26-28) Hodi hili ho matenek liafuan neʼebé simples, ita bele hanorin ho didiʼak lia-loos husi Maromak nia Liafuan.

⁷ Atu hanorin Bíblia iha dalan neʼebé simples, ita tenke kuidadu atu la hatodan ita-nia estudante ho informasaun neʼebé barak liu. Tan neʼe, kuandu ita estuda Bíblia ho ema, ita la presiza atu esplika buat hotu, no mós la presiza ansi tanba ita planu ona atu estuda informasaun barak. Duké halo ida-neʼe, diʼak atu estuda informasaun tuir estudante nia matenek no nia presiza. Ita-nia hakarak mak atu ajuda estudante ida atu sai Kristu nia dixípulu no atu adora Maromak Jeová. Atu halo ida-neʼe, ita presiza uza tempu tuir estudante nia situasaun, atu nuneʼe nia bele komprende buat neʼebé nia  estuda. Hodi halo nuneʼe deʼit mak lia-loos husi Bíblia bele kona ninia laran no book nia atu halo tuir buat neʼebé nia aprende.—Roma 12:2.

8, 9. (a) Tanbasá mak Jesus husu pergunta? (b) Oinsá mak Jesus uza pergunta atu ajuda Pedro atu bele komprende ho loloos kona-ba selu impostu templu nian?

⁸ Maski hodi esplika deʼit informasaun ba rona-naʼin sei la gasta tempu barak, maibé Jesus la hanorin iha dalan hanesan neʼe. Jesus sempre husu pergunta. Entaun, tansá mak nia husu pergunta? Dala ruma nia uza pergunta sira atu hatudu sai ninia inimigu nia laran-aat, hodi nuneʼe sira bele sai nonook. (Mateus 21:23-27; 22:41-46) Maibé, iha situasaun barak, nia uza pergunta atu book ninia dixípulu sira atu fó sai saida mak iha sira-nia laran, no atu hadiʼa no treinu sira-nia hanoin. Tan neʼe, nia husu pergunta hanesan, “Imi hanoin oinsá?” no “Ó fiar neʼe?” (Mateus 18:12; João 11:26) Hodi husu pergunta, Jesus bele book ninia dixípulu sira-nia laran. Hanoin toʼok ezemplu ida tuirmai neʼe.

⁹ Iha tempu ida, kobradór impostu sira husu Pedro se Jesus selu impostu templu nian ka lae. c Pedro hatán kedas dehan: “Selu.” Tuirmai, Jesus hanorin Pedro hodi husu: “Simão, ó hanoin oinsá? Liurai sira simu impostu rai ninian husi sé: husi sira-nia oan rasik, ka husi ema seluk?” Pedro hatán: “Husi ema seluk.” Jesus hatete: “Neʼe duni, oan sira la selu.” (Mateus 17:24-27) Pedro karik komprende ho didiʼak buat neʼebé Jesus hakarak hanorin liuhusi pergunta sira-neʼe. Ema hotu hatene katak liurai nia família sira la presiza atu selu impostu. Tan neʼe, Liurai Boot iha lalehan nia Oan-Mane mesak, Jesus, la presiza atu selu impostu templu nian tanba templu neʼebé ema uza atu halaʼo adorasaun mak ninia Aman nian.  Iha situasaun neʼe Jesus la fó-hatene deʼit informasaun neʼebé loos, maibé nia ho respeitu uza pergunta atu ajuda Pedro komprende ho loloos, no mós karik atu hanorin Pedro atu hanoin didiʼak uluk, antes hatán ba pergunta ruma.

10. Oinsá mak ita bele uza pergunta ho didiʼak kuandu haklaken uma ba uma?

¹⁰ Oinsá mak ita bele uza didiʼak pergunta iha ita-nia serbisu haklaken? Kuandu haklaken uma ba uma, ita bele uza pergunta neʼebé book uma-naʼin atu hakarak rona ita, hodi bele loke dalan ba ita atu fahe lia-foun diʼak. Porezemplu, se ita koʼalia ho katuas ka ferik ida, ho respeitu ita bele husu pergunta hanesan: “Oinsá mak situasaun iha mundu agora la hanesan uluk kuandu Ita sei joven?” Depois hetan tiha resposta, ita bele husu tan dehan: “Tuir Ita-nia hanoin oinsá mak mundu neʼe bele sai fali fatin neʼebé diʼak ba ita atu moris?” (Mateus 6:9, 10) Se ita koʼalia ho inan ida ho oan kiʼik, ita bele husu: “Dala ruma Ita hanoin ona kona-ba mundu nia situasaun sei sai oinsá kuandu Ita-nia oan sai boot ka lae?” (Salmo 37:10, 11) Liután neʼe, hodi haree didiʼak uluk situasaun iha uma ninin antes tama, karik ida-neʼe bele ajuda ita atu hili pergunta neʼebé sei book uma-naʼin sira atu hakarak rona ita-nia mensajen.

11. Oinsá mak ita bele uza didiʼak pergunta kuandu halaʼo estuda Bíblia ho ema?

¹¹ Oinsá mak ita bele uza didiʼak pergunta kuandu ita halaʼo estuda Bíblia ho ema? Hodi hili ho matenek pergunta sira, ida-neʼe bele ajuda ita atu kuru sai buat neʼebé iha estudante nia laran. (Provérbios 20:5) Porezemplu, karik ita  estuda ho ema hodi uza livru Moris Haksolok ba Nafatin d iha lisaun 43 ho títulu: “Saida mak Bíblia hatete kona-ba hemu tua?” Lisaun neʼe esplika oinsá Maromak nia haree kona-ba hemu tua demais no lanu. Maski estudante nia resposta hatudu katak nia komprende buat neʼebé Bíblia hanorin, maibé nia simu duni buat neʼebé nia aprende ka lae? Karik ita bele husu: “Ita sente oinsá kona-ba Maromak nia hanoin sira-neʼe?” Ita mós bele husu: “Oinsá mak Ita bele uza informasaun neʼe iha Ita-nia moris?” Maibé, hanoin-hetan katak ita presiza atu husu pergunta iha dalan neʼebé hatudu respeitu ba estudante neʼe. Ita lakohi atu husu pergunta sira neʼebé hamoe nia.—Provérbios 12:18.

12-14. (a) Iha dalan saida deʼit mak Jesus uza ninia matenek atu esplika ka fó razaun loos kona-ba buat neʼebé nia hanorin? (b) Kuandu ema fariseu sira dehan katak ninia kbiit mai husi Satanás, oinsá mak Jesus hatudu katak sira-nia hanoin la loos?

¹² Jesus iha neon neʼebé perfeitu, tan neʼe nia iha matenek atu esplika ka fó razaun loos kona-ba tansá buat neʼebé nia hanorin mak loos. Dala ruma Jesus hanorin hodi fó razaun neʼebé hatudu sai ho klaru katak liafuan neʼebé ninia inimigu sira koʼalia hasoru nia mak la loos. Dala barak, Jesus hanorin ninia dixípulu sira lisaun neʼebé importante hodi fó razaun ba sira kona-ba tansá diʼak atu halo tuir. Mai ita haree toʼok ezemplu balu.

¹³ Depois Jesus kura tiha mane ida neʼebé matan-delek no monok no neʼebé anju aat sira mak domina, ema fariseu sira duun nia dehan: “Nia duni sai diabu sira hodi Belzebu [Satanás], diabu sira-nia ulun.” Fariseu sira rekoñese katak atu hasai anju aat sira, Jesus presiza kbiit neʼebé laʼós ema nian. Maibé, sira dehan katak Jesus nia kbiit mai husi Satanás. Buat neʼebé sira duun laʼós deʼit sala, maibé mós beik. Atu hatudu sai katak sira-nia hanoin neʼe mak la loos, Jesus hatán hodi dehan: “Reinu neʼebé fahe an hodi funu hasoru nia an,  reinu neʼe sei mohu. Sidade ka umakain neʼebé fahe an hodi funu hasoru nia an rasik sei la hamriik metin. Neʼe duni Satanás duni sai karik Satanás, nia fahe an hodi funu hasoru nia an rasik: oinsá nia reinu bele hamriik metin?” (Mateus 12:22-26) Ida-neʼe hanesan Jesus hatete: “Se haʼu mak simu kbiit husi Satanás hodi estraga buat neʼebé Satanás halo, neʼe katak Satanás halo serbisu atu kontra ninia hakarak rasik no nia sei monu.” Klaru katak sira labele nega razaun loos neʼe!

¹⁴ Jesus seidauk ramata atu koʼalia ho sira. Jesus hatene katak fariseu sira-nia dixípulu balu mós duni sai anju aat sira, tan neʼe nia husu pergunta ida neʼebé simples maibé importante. Nia dehan: “Se haʼu duni sai anju aat ho kbiit husi Belzebu, ho sé-nia kbiit mak imi-nia dixípulu duni sai sira?” (Mateus 12:27, MF) Neʼe hanesan Jesus hatete: “Se haʼu duni sai anju aat sira ho Satanás nia kbiit, neʼe katak imi-nia dixípulu mós uza Satanás nia kbiit.” Fariseu sira-neʼe sei hatán saida? Sira sei nunka dehan katak sira-nia dixípulu sira halo buat oioin ho Satanás nia kbiit. Hodi koʼalia iha dalan neʼe, Jesus halo sira simu buat neʼebé sira lakohi atu simu, neʼe katak nia duni sai ‘diabu’ ho Maromak nia kbiit. Kuandu ita lee kona-ba Jesus nia matenek atu hanorin, ida-neʼe halo ita sente hakfodak no kontente, loos ka lae? Maibé, hanoin toʼok ema-lubun sira neʼebé haree ho matan rasik no rona Jesus koʼalia. Sira sente oinsá? Klaru katak sira hakfodak tebetebes, loos ka lae?

15-17. Konta toʼok ezemplu kona-ba oinsá Jesus kompara ninia Aman nia hahalok ho buat neʼebé ema bele haree loroloron.

¹⁵ Jesus mós hanorin ho matenek hodi book rona-naʼin nia laran kuandu nia fó sai ninia Aman nia hahalok furak. Dala barak nia hanorin hodi kompara ninia Aman nia hahalok ho buat neʼebé ema haree loroloron, atu nuneʼe ninia rona-naʼin bele komprende diʼak liután ninia Aman. Hanorin iha dalan hanesan neʼe bele book duni rona-naʼin nia laran. Mai ita hanoin toʼok ezemplu rua tuirmai neʼe.

¹⁶ Kuandu Jesus nia dixípulu sira husu nia atu hanorin sira kona-ba oinsá halo orasaun, Jesus mós esplika katak maski  inan-aman sira mak ema sala-naʼin, maibé sira sempre prontu atu “fó buat diʼak” ba sira-nia oan. Tuirmai nia dehan: “Maski imi ema laran-aat, hatene fó buat diʼak ba imi-nia oan sira, oinsá liután mak imi-nia Aman iha lalehan sei haraik espíritu santu ba sira neʼebé husu ba nia?” (Lucas 11:1-13) Iha neʼe Jesus hanorin hodi kompara ema ho Maromak. Se inan-aman neʼebé sala-naʼin sempre tau matan ba sira-nia oan, oinsá liután ho ita-nia Aman iha lalehan! Ita-nia Aman iha lalehan mak sala-laek no sempre halo buat loos, no nia prontu atu fó ninia espíritu santu ba ninia atan sira neʼebé laran-metin no neʼebé hakbesik nia liuhusi orasaun!

¹⁷ Jesus mós hanorin iha dalan neʼebé hanesan kuandu fó konsellu diʼak kona-ba oinsá tahan hasoru laran-susar. Nia dehan: “Haree ba manu-metan sira neʼebé la kuda eh sohi, sira uma la iha atu rai ai-han, no Maromak fó han sira. Maibé imi folin boot liu fali manu sira! Hanoin bá oinsá ai-funan sira sai boot: sira la serbisu ka hakaʼas an, sira mós la soru; . . . Neʼe duni, Maromak neʼebé fó hatais ba duʼut iha toʼos laran neʼebé ohin iha no aban ema soe tiha ba ahi, liután mak Maromak sei fó hatais imi, ema fiar kiʼik!” (Lucas 12:24, 27, 28) Se Maromak Jeová tau matan ba manu no ai-funan sira, oinsá liután ho ema neʼebé hadomi no adora nia? Hodi hanorin iha dalan hanesan neʼe, ita bele fiar katak Jesus book duni ninia rona-naʼin nia laran.

18, 19. Oinsá mak ita bele hatán se ema hatete katak nia la fiar ba Maromak neʼebé nia la bele haree?

¹⁸ Kuandu ita haklaken, dala ruma ita presiza atu fó razaun hodi esplika tansá hanorin balu neʼebé ema fiar ona mak la loos. Ita mós hakarak atu hanorin lia-loos kona-ba Maromak Jeová iha dalan neʼebé bele book rona-naʼin nia laran. (Apóstolu 19:8; 28:23, 24) Entaun, neʼe katak ita presiza sai ema neʼebé matenek tebes hodi bele hanorin ho diʼak ka lae? Lae duni! Jesus nia ezemplu hatudu katak hanorin neʼebé diʼak mak hodi esplika iha dalan neʼebé simples no klaru.

¹⁹ Porezemplu, oinsá mak ita bele hatán se ema hatete katak nia la fiar ba Maromak neʼebé nia la bele haree? Ita bele  koʼalia kona-ba buat neʼebé ema hotu hatene. Porezemplu, ema hotu hatene katak kuandu buat ida akontese, iha mós buat ruma neʼebé hamosu ida-neʼe. Entaun, karik ita bele dehan: “Se ita laʼo iha rai-luan ida, no ita haree uma diʼak ida no uma neʼe nakonu ho ai-han, ita sei hanoin kedas katak ema ida mak halo ida-neʼe, loos ka lae? Nuneʼe mós, kuandu ita haree ba mundu neʼe, neʼebé halo ho diʼak no iha hahán barak, ida-neʼe fó razaun ba ita atu fiar katak iha Ida neʼebé halo buat sira-neʼe, loos ka lae? Bíblia mós esplika iha dalan neʼebé hanesan hodi dehan: ‘Ema harii uma ida-ida, maibé Maromak harii buat hotu-hotu.’” (Ebreu 3:4) Maski nuneʼe, hanoin-hetan katak laʼós ema hotu sei fiar ba buat neʼebé ita esplika maski ita halo ida-neʼe iha dalan neʼebé klaru.—2 Tesalónika 3:2.

20, 21. (a) Oinsá mak ita bele kompara Maromak Jeová nia hahalok no nia dalan sira ho buat neʼebé rona-naʼin sira hatene ho didiʼak? (b) Saida mak ita sei aprende iha lisaun tuirmai?

²⁰ Kuandu ita haklaken ka hanorin iha kongregasaun, ita  mós bele kompara Maromak Jeová nia hahalok no dalan sira ho buat seluk neʼebé rona-naʼin sira hatene ho didiʼak. Porezemplu, atu hatudu katak doutrina kona-ba infernu la hatudu respeitu ba Maromak Jeová, karik ita bele hatete: “Tuir Ita-nia hanoin, aman neʼebé hadomi ninia oan sei fó kastigu ba nia oan hodi tau oan nia liman iha ahi laran ka lae? Se nuneʼe, oinsá mak ita-nia Aman iha lalehan neʼebé iha domin boot hanoin kona-ba doutrina infernu?” (Jeremias 7:31) Atu ajuda ita-nia maluk fiar-naʼin neʼebé laran-tun atu fiar katak Maromak Jeová hadomi nia, karik ita bele dehan: “Se Jeová hafolin manu-liin sira neʼebé kiʼik, oinsá liután nia hafolin no hadomi ema ida-idak neʼebé adora nia, neʼe inklui mós Ita-boot!” (Mateus 10:29-31) Koʼalia iha dalan hanesan neʼe bele ajuda ita atu book ema seluk nia laran.

²¹ Depois aprende tiha dalan tolu neʼebé Jesus uza atu hanorin, ida-neʼe ajuda ita atu komprende tansá mak guarda sira neʼebé la kaer Jesus hatete: “Ema ida seidauk koʼalia hanesan ema neʼe!” Iha kapítulu tuirmai, ita sei koʼalia kona-ba dalan ida tan neʼebé Jesus uza beibeik atu hanorin, dalan neʼe mak uza ai-knanoik.