1, 2. Tanbasá mak aman neʼebé domin kontente atu haree ninia oan halo tuir nia? Oinsá mak ida-neʼe haleno Jeová nia sentimentu?

 AMAN ida hamriik besik janela hodi hateke ba nia oan kiʼik neʼebé joga hela bola ho ninia kolega sira. Sira-nia bola sai toʼo estrada klaran. Labarik neʼe hakarak tebes atu foti fali bola neʼe. Ninia kolega ida hatete ba nia atu laʼo ba estrada no foti bola neʼe, maibé labarik neʼe doko ulun tanba nia lakohi. Labarik neʼe hatete: “Haʼu-nia apá bandu haʼu atu labele halai ba estrada klaran.” Ita bele fiar katak aman neʼe kontente duni iha laran kuandu nia haree ida-neʼe!

² Tanbasá mak aman neʼe sente kontente? Tanba ninia oan halo tuir lei neʼebé nia fó atu labele laʼo mesak iha estrada no ninia oan halo tuir duni, maski nia la hatene katak ninia aman haree nia. Aman neʼe hatene katak ninia oan aprende ona atu halo tuir no nia mós hatene katak ida-neʼe sei proteje ninia oan. Ita-nia Aman iha lalehan, Jeová, mós sente hanesan neʼe. Maromak hatene katak atu ita laran-metin nafatin iha mundu neʼe, no atu haree futuru diʼak neʼebé nia promete atu fó ba ita, ita presiza aprende atu tau fiar no halo tuir buat neʼebé nia hatete. (Provérbios 3:5, 6) Atu ajuda ita halo ida-neʼe, Maromak Jeová haruka mestre neʼebé diʼak liu ema hotu mai iha rai.

3, 4. Oinsá mak Jesus “aprende atu halo tuir” no “sai loos”? Konta toʼok ai-knanoik ida.

³ Bíblia esplika buat furak ida kona-ba Jesus hodi dehan: “Maski nia Oan-Mane, nia aprende atu halo tuir husi buat neʼebé nia terus; no wainhira nia sai loos ona, nia sai bee-matan maksoin rohan-laek nian ba sira hotu neʼebé halo tuir nia hakarak.” (Ebreu 5:8, 9) Oan neʼe moris ona iha lalehan tinan rihun ba rihun. Nia haree oinsá Satanás no anju balu seluk hili atu kontra Maromak, maibé Oan-Mane boot nunka apoia sira. Bíblia fó-hatene nanis kona-ba nia hodi dehan: “Haʼu . . . la kontra.” (Isaias 50:5) Entaun, se Oan nunka kontra, tanbasá mak Bíblia  dehan “nia aprende atu halo tuir”? Se Oan la iha sala ida, entaun tansá mak Bíblia dehan nia “sai loos”?

⁴ Hanoin toʼok kona-ba ai-knanoik tuirmai neʼe. Badain-ai ida hakarak atu sosa martelu foun. Nia sosa martelu neʼebé kualidade diʼak. Maibé, oinsá mak nia bele hatene ho loos katak martelu neʼe diʼak? Maski ida-neʼe kualidade diʼak, maibé nia presiza uza lai martelu neʼe hodi bele hatene katak neʼe diʼak duni. Nuneʼe mós ho Jesus. Antes nia mai iha rai, nia halo tuir Maromak Jeová iha buat hotu, maibé depois nia hela tiha iha rai no halo tuir Maromak mak ninia hahalok neʼe sai diʼak liután. Jesus hetan koko ho terus sira neʼebé nia nunka hetan iha lalehan. No tan neʼe, agora nia aprende ona atu halo tuir maski hasoru susar, no hahalok neʼe sai metin liután.

5. Tanbasá mak importante ba Jesus atu halo tuir? Saida mak ita sei estuda iha kapítulu neʼe?

⁵ Importante tebes ba Jesus atu halo tuir Maromak, hodi nuneʼe nia bele kumpre ninia knaar iha rai. Jesus, “Adão ikus”, mai atu halo buat neʼebé ita-nia inan-aman primeiru la halo, neʼe mak nafatin halo tuir Maromak Jeová, maski hetan koko. (1 Korinto 15:45) Liután neʼe, Jesus halo tuir Maromak laʼós husi liʼur deʼit. Jesus halo tuir ho ninia hanoin, laran no kbiit tomak. No nia halo ida-neʼe ho ksolok. Tuir loloos, halo ninia Aman nia hakarak mak importante liu ba nia duké han! (João 4:34) Saida mak bele ajuda ita atu banati-tuir Jesus nia ezemplu kona-ba halo tuir? Primeiru, mai ita hanoin toʼok kona-ba buat neʼebé book Jesus atu halo tuir. Hodi haburas hanoin no sentimentu hanesan Jesus nian sei ajuda ita atu tahan tentasaun no mós atu halo Maromak nia hakarak. Tuirmai, ita mós sei koʼalia kona-ba bensaun neʼebé ita bele simu hodi banati-tuir Jesus nia ezemplu kona-ba halo tuir Maromak.

6, 7. Saida deʼit mak book Jesus atu halo tuir Maromak?

⁶ Jesus nia laran mak book nia atu halo tuir Maromak. Hanesan ita aprende ona iha Kapítulu 3, Kristu hatudu haraik-an husi laran. Hahalok foti-an halo ema la gosta atu halo tuir Maromak Jeová, maibé hahalok haraik-an ajuda ema atu halo tuir Jeová ho  hakarak rasik. (Éxodo 5:1, 2; 1 Pedro 5:5, 6) Liután neʼe, buat neʼebé book Jesus atu halo tuir Maromak mak domin ba nia Aman no domin ba buat neʼebé loos, no nia mós odi buat neʼebé aat.

⁷ Jesus hadomi Jeová, ninia Aman iha lalehan, liu fali buat hotu. Ita sei koʼalia liután kona-ba ida-neʼe iha Kapítulu 13. Jesus nia domin book nia atu hatudu taʼuk ba Maromak. Tanba Jesus hadomi tebes Jeová, no hatudu respeitu neʼebé kleʼan, ida-neʼe halo Jesus taʼuk atu hakanek ninia Aman nia laran. Maromak Jeová rona Jesus nia orasaun tanba nia hatudu taʼuk ba Maromak. (Ebreu 5:7) Taʼuk ba Maromak mós sai nuʼudar sinál ida neʼebé hatudu katak Jesus mak Liurai Mesias.—Isaias 11:3.

8, 9. Hanesan liafuan neʼebé Bíblia fó-hatene nanis, oinsá mak Jesus sente kona-ba buat loos no buat neʼebé aat? Oinsá mak nia hatudu sai buat neʼebé nia sente?

⁸ Hadomi Maromak Jeová inklui mós odi buat neʼebé Jeová odi. Porezemplu, haree toʼok liafuan neʼebé Bíblia fó-hatene nanis kona-ba Liurai Mesias: “Ita hadomi hahalok loos, no odi  hahalok aat. Tan neʼe mak Maromak, Ita-nia Maromak, hili ona Ita hodi fui mina ba Ita no fó ba Ita ksolok neʼebé boot liu fali Ita-nia maluk sira.” (Salmo 45:7) Jesus nia “maluk” mak liurai sira seluk neʼebé mai husi Liurai David nia umakain. Liu fali liurai sira-neʼe, Jesus iha duni razaun atu sente kontente iha tempu neʼebé Maromak kose mina ba nia. Tanbasá? Tanba kolen neʼebé nia hetan boot liu fali sira-nian. No mós, Jesus nia ukun sei haraik bensaun barak liu ba ninia povu. Jesus hetan kolen neʼe tanba nia hadomi buat loos no odi buat neʼebé aat, no ida-neʼe book nia atu halo tuir Maromak iha buat hotu.

⁹ Oinsá mak Jesus hatudu sai katak nia hadomi buat loos no odi buat neʼebé aat? Hanoin toʼok kona-ba ezemplu tuirmai neʼe. Kuandu Jesus nia dixípulu sira halo tuir matadalan neʼebé nia fó kona-ba serbisu haklaken no sira hetan rezultadu diʼak, saida mak nia sente? Nia sente haksolok tebes. (Lucas 10:1, 17, 21) No kuandu ema iha Jerusalém kontinua atu la halo tuir Maromak, no la simu Jesus nia hakaʼas-an atu ajuda sira, oinsá mak Jesus sente? Nia tanis tanba sidade neʼe nia hahalok aat. (Lucas 19:41, 42) Sin, Jesus hanoin duni kona-ba ema nia hahalok diʼak no mós hahalok aat.

10. Ita presiza haburas hanoin saida kona-ba hahalok loos no hahalok neʼebé aat? Saida mak sei ajuda ita atu halo nuneʼe?

¹⁰ Kuandu ita hanoin kleʼan kona-ba saida mak book Jesus atu halo tuir Maromak Jeová, ida-neʼe mós ajuda ita atu hanoin fali kona-ba ita-nia an rasik no kona-ba buat neʼebé book ita atu halo tuir Maromak. Maski ita mak ema sala-naʼin, maibé ita bele haburas iha ita-nia laran domin ba buat loos no aprende atu odi hahalok aat. Ita presiza halo orasaun ba Jeová, hodi husu nia ajuda atu ita bele iha hanoin hanesan nia no mós ninia Oan. (Salmo 51:10) Ita mós presiza hasees an husi buat sira neʼebé bele estraga ita-nia domin ba buat loos no ita-nia hakaʼas-an atu odi buat neʼebé aat. (Provérbios 13:20; Filipe 4:8) Se ita haburas hakarak neʼebé loos hodi tuir Kristu nia ezemplu, ita sei halo tuir Maromak laʼós husi liʼur deʼit. Ita sei halo buat neʼebé loos tanba ita-nia laran book ita atu halo ida-neʼe. Ita mós sei hasees an husi hahalok sala, laʼós deʼit tanba ita taʼuk atu ema haree ita, maibé tanba ita odi hahalok aat sira-neʼe.

11, 12. (a) Saida mak akontese kuandu Jesus hahú ninia serbisu? (b) Oinsá mak Satanás tenta Jesus ba dala primeiru? Nia uza lasu saida?

¹¹ Sin, Jesus odi buat neʼebé aat. No kuandu Jesus hahú ninia serbisu haklaken, Diabu koko nia kona-ba neʼe. Depois Jesus hetan tiha batizmu, nia hela iha rai-fuik maran ba loron 40 no kalan 40, no nia la han buat ida. Iha loron sira-neʼe nia rohan, Satanás mai atu tenta nia. Haree toʼok kona-ba Satanás nia laran-makerek.—Mateus 4:1-11.

¹² Primeiru Satanás hatete: “Ó Maromak nia Oan karik, haruka fatuk sira-neʼe nakfila ba paun.” (Mateus 4:3) Oinsá mak Jesus sente depois nia la han ba tempu kleur? Bíblia hatete: “Nia hamlaha.” (Mateus 4:2) Satanás matenek atu uza oportunidade neʼe. Klaru katak nia planu atu hein toʼo Jesus ladún iha forsa tanba hamlaha. Hanoin toʼok mós oinsá Satanás goza Jesus. Satanás dehan: “Ó Maromak nia Oan karik.” Tuir loloos Satanás hatene katak Jesus mak “Oan boot liu sasán hotu-hotu”. (Koloso 1:15) Maski nuneʼe, Jesus la husik Satanás nia liafuan dada nia hodi la halo tuir Maromak. Jesus hatene katak Maromak lakohi atu Jesus uza ninia forsa hodi halo kontente ninia an. Tan neʼe, Jesus la halo tuir buat neʼebé Satanás hatete, ida-neʼe hatudu katak Jesus ho haraik-an sadere ba Maromak Jeová atu tau matan no fó matadalan ba nia.—Mateus 4:4.

13-15. (a) Oinsá mak Satanás tenta Jesus ba dala rua no dala tolu? Saida mak Jesus halo? (b) Tanbasá mak Jesus presiza matan-moris nafatin atu la monu ba Satanás nia tentasaun?

¹³ Kuandu Satanás tenta Jesus ba dala rua, nia lori Jesus ba fatin aas iha templu tutun. Satanás ho laran-makerek uza Maromak nia Liafuan iha dalan neʼebé sala. Satanás tenta Jesus atu hatudu an iha ema nia oin hodi soe nia an tun husi fatin aas hodi nuneʼe anju sira bele salva nia. Se ema-lubun iha templu haree milagre hanesan neʼe, karik sira hotu sei fiar kedas katak Jesus mak Mesias neʼebé Maromak promete nanis atu mai, loos ka lae? No se ema-lubun simu Jesus nuʼudar Mesias tanba sira haree nia halo milagre neʼe, karik Jesus sei la hetan susar no terus, loos ka lae? Maski karik neʼe loos, maibé Jesus hatene katak Maromak Jeová hakarak Mesias atu halaʼo nia serbisu ho haraik-an, laʼós atu  dada ema atu fiar nia hodi hatudu an liuhusi milagre sira. (Isaias 42:1, 2) Dala ida tan, Jesus la simu Satanás nia tentasaun atu la halo tuir Jeová. Jesus la buka atu hetan naran-boot ba nia an.

¹⁴ Maibé oinsá ho lasu atu sai ukun-naʼin? Kuandu Satanás tenta Jesus ba dala tolu, Satanás promete atu fó ba Jesus ukun hotu iha mundu neʼe se Jesus adora nia ba dala ida deʼit. Jesus hanoin kona-ba buat neʼebé Satanás promete ka lae? Jesus hatán hodi dehan: “Dook tiha, Satanás.” Jesus mós aumenta tan dehan: “Basá hakerek ona: ‘Ó sei adora [Jeová], ó-nia Maromak; Nia deʼit mak ó sei hanaʼi.’” (Mateus 4:10) Sin, la iha buat ida neʼebé bele dada Jesus atu adora maromak seluk. Jesus la simu tentasaun hotu neʼebé dada nia atu la halo tuir Maromak, inklui mós tentasaun atu sai ukun-naʼin ba mundu neʼe.

¹⁵ Satanás rende an ka lae? Maski Satanás husik hela Jesus, maibé Evanjellu Lucas hatete katak “Diabu husik nia toʼo tempu diʼak seluk”. (Lucas 4:13) Sin, durante Jesus nia moris tomak iha rai, Satanás kontinua buka oportunidade oioin atu tenta Jesus. Bíblia dehan katak Jesus “hetan mós babeur iha buat hotu”. (Ebreu 4:15) Tan neʼe, Jesus matan-moris nafatin atu halo tuir Maromak, no ita mós presiza atu tuir ninia ezemplu.

16. Iha dalan saida deʼit mak Satanás tenta Maromak nia povu ohin loron? Oinsá mak ita bele kontra hasoru ninia tentasaun?

¹⁶ Ohin loron, Satanás kontinua atu tenta Maromak nia atan sira. Triste katak, tanba ita mak ema sala-naʼin, dala ruma fasil ba ita atu monu ba ninia tentasaun. Porezemplu, Satanás bele tenta ita liuhusi ita-nia hakarak isin nian hanesan buka ita-nia hakarak rasik, sai foti-an, ka buka atu hetan pozisaun aas iha mundu neʼe. Satanás bele tenta ita kona-ba buat hotu neʼe, hodi uza lasu atu buka sasán barak. Tan neʼe dala ruma ita presiza atu hanoin didiʼak kona-ba ita-nia laran. Ita bele hanoin kleʼan kona-ba liafuan iha 1 João 2:15-17 no husu ita-nia an: ‘Haʼu-nia hakarak isin nian, ka haʼu-nia hakarak atu hetan sasán, ka hakarak atu hetan naran-boot, estraga ona haʼu-nia domin ba haʼu-nia Aman iha lalehan ka lae?’ Ita presiza hanoin-hetan katak mundu neʼe besik ona atu hotu, nuneʼe mós mundu neʼe nia ukun-naʼin, Satanás. Tan neʼe, mai ita hakaʼas an atu keta simu Satanás nia tentasaun  oioin atu halo ita monu ba sala! Mai ita tuir ita-nia Mestre neʼebé “la halo sala ida”.—1 Pedro 2:22.

17. Oinsá mak Jesus sente kona-ba halo tuir ninia Aman? Maibé ema balu dehan saida?

¹⁷ Halo tuir Maromak laʼós deʼit kona-ba hasees an husi sala. Kristu halo tuir buat hotu neʼebé ninia Aman haruka. Nia hatete: “Haʼu halo nafatin buat neʼebé fó ksolok ba Nia.” (João 8:29) Halo tuir Maromak halo Jesus kontente. Maski nuneʼe, karik ema balu sei dehan katak Jesus nia situasaun la hanesan ita-nian. Tuir sira-nia hanoin Jesus la presiza halo tuir ema sala-naʼin nuʼudar ulun, Jesus presiza halo tuir deʼit Maromak Jeová, ulun-naʼin neʼebé nunka halo sala. Maibé ita ema presiza halo tuir ema sala-naʼin nuʼudar ita-nia ulun no ida-neʼe buat neʼebé susar atu halo. Neʼe loos ka lae? Lae, hanoin hanesan neʼe sala! Tuir loloos, Jesus mós halo tuir ema neʼebé sala-naʼin neʼebé iha pozisaun nuʼudar ulun.

18. Nuʼudar labarik, Jesus hatudu ezemplu saida kona-ba halo tuir inan-aman?

¹⁸ Nuʼudar labarik, Jesus hakruʼuk an ba ninia inan-aman, José no Maria, maski sira ema sala-naʼin. Se kompara ho labarik sira seluk, karik Jesus bele haree ho klaru ninia inan-aman nia fraku. Entaun saida mak Jesus halo? Nia kontra hodi la halaʼo knaar neʼebé Maromak fó ba labarik sira ka lae? Nia fó konsellu fali ba ninia inan-aman kona-ba oinsá tau matan ba família ka lae? Haree toʼok saida mak Lucas 2:51 hatete kona-ba Jesus neʼebé tinan 12 hela. Eskritura neʼe dehan katak Jesus “halo tuir sira-nia hakarak”. Hodi halo tuir ninia inan-aman, Jesus fó ezemplu diʼak liu ba joven kristaun sira neʼebé hakaʼas an atu hatudu respeitu no halo tuir sira-nia inan-aman.—Éfeso 6:1, 2.

19, 20. (a) Jesus hasoru susar saida kona-ba halo tuir ema sala-naʼin? (b) Tanbasá mak importante ba ema kristaun sira ohin loron atu halo tuir sira neʼebé tau matan ba kongregasaun?

¹⁹ Jesus hasoru susar balu neʼebé ema kristaun loos la hasoru ohin loron hodi bele halo tuir ema sala-naʼin nuʼudar ulun. Porezemplu, hanoin toʼok kona-ba ulun-naʼin sira iha Jesus nia tempu kuandu nia iha rai. Iha tempu neʼebá relijiaun judeu nian, inklui templu iha Jerusalém no amlulik sira, mak arranju ida  neʼebé Maromak Jeová uza ba tempu kleur ona. Maibé Jesus hatene katak lakleur tan Maromak sei la simu ona arranju neʼe hodi troka fali ho kongregasaun kristaun. (Mateus 23:33-38) Maibé antes Maromak troka arranju neʼe, ulun-naʼin relijiaun barak hanorin lia-bosok sira neʼebé mai husi filozofia gregu nian. Iha templu, ema barak halo korrupsaun, no tan neʼe Jesus dehan katak templu sai ona hanesan “naʼok-teen sira-nia luhan!” (Marcos 11:17) Situasaun neʼe halo Jesus hadook an husi templu no sinagoga sira ka lae? Lae! Iha tempu neʼebá Maromak Jeová sei uza hela arranju sira-neʼe. Jesus ho laran-metin laʼo ba templu atu tuir festa sira no nia mós bá sinagoga sira, tanba Maromak seidauk troka arranju neʼe.—Lucas 4:16; João 5:1.

²⁰ Entaun, se Jesus halo tuir Maromak nia arranju iha situasaun susar sira-neʼe, klaru katak importante liu ba ema kristaun loos ohin loron atu nafatin halo tuir Maromak nia arranju hotu! Tuir loloos, ita-nia situasaun la hanesan duni ho Jesus nian. Hanesan Bíblia fó-hatene nanis, agora Maromak hadiʼa fali ona adorasaun neʼebé loos. Maromak promete katak nia sei nunka husik Satanás atu hafoʼer ninia povu neʼebé sai moos ona. (Isaias 2:1, 2; 54:17) Maski nuneʼe, ema iha kongregasaun kristaun mak ema sala-naʼin no iha fraku oioin. Entaun, se ema seluk halo sala ruma, ida-neʼe sei sai nuʼudar razaun ba ita atu la halo tuir Maromak Jeová ka lae? Ka ida-neʼe mós sei sai nuʼudar razaun atu hadook an husi reuniaun kristaun sira ka koʼalia aat kona-ba katuas  sira ka lae? Lae! Ita apoia ho laran tomak sira neʼebé tau matan ba kongregasaun. Ita halo tuir Maromak hodi tuir reuniaun kristaun sira no halo tuir Bíblia nia konsellu neʼebé ita simu iha reuniaun.—Ebreu 10:24, 25; 13:17.

21. Saida mak Jesus halo kuandu ema koko atu hapara nia atu la halo tuir Maromak? Oinsá mak ita bele tuir Jesus nia ezemplu neʼe?

²¹ Jesus nunka husik ema ida atu hapara nia atu la halo tuir Maromak, ida-neʼe inklui mós ninia belun sira. Porezemplu, apóstolu Pedro dehan ba nia mestre katak nia lalika hasoru terus no mate. Maski Jesus hatene katak Pedro hakarak atu ajuda nia, maibé Jesus hatudu ho klaru katak nia la simu Pedro nia konsellu atu hanoin uluk ninia an. (Mateus 16:21-23) Ohin loron, Jesus nia dixípulu sira dala barak hetan susar husi sira-nia família neʼebé koko atu hapara sira hodi la halo tuir Maromak nia lei no matadalan. Karik família sira-neʼe hanoin katak sira halo buat neʼebé loos. Maibé, hanesan Jesus nia dixípulu iha tempu uluk, ita laran-metin hodi “halo tuir Maromak nia hakarak liu ema sira-nian”.—Apóstolu 5:29.

22. Jesus fó resposta ba pergunta saida? Oinsá?

²² Iha Jesus nia loron ikus iha rai, nia hasoru koko neʼebé boot liu iha ninia moris. Iha loron triste neʼe, “nia aprende atu halo tuir” iha dalan neʼebé kompletu. Nia halo ninia Aman nia hakarak, laʼós nia hakarak rasik. (Lucas 22:42) Hodi halo nuneʼe, nia hatudu laran-metin toʼo rohan. (1 Timóteo 3:16) Liuhusi ninia laran-metin, nia fó resposta ba pergunta importante tebes neʼebé mosu kleur ona. Pergunta neʼe mak: ‘Ema perfeitu ida bele halo tuir nafatin Maromak Jeová maski hetan koko ka lae?’ Adão la laran-metin, nuneʼe mós ho Eva. Maibé Jesus la hanesan neʼe. Jesus mai iha rai, no liuhusi ninia moris no nia mate, nia fó resposta ba pergunta neʼe. Sin, Jesus mak fó resposta neʼebé diʼak liu hotu. Nia halo tuir Maromak ho laran-metin maski nia hetan terus barak no ikusmai mate.

23-25. (a) Oinsá mak halo tuir Maromak kona hahalok laran-metin? Konta toʼok ai-knanoik ida. (b) Ita sei koʼalia kona-ba saida iha kapítulu tuirmai?

²³ Ita hatudu laran-metin ba Maromak Jeová hodi halo tuir nia.  Tanba Jesus halo tuir Maromak no laran-metin toʼo rohan, ida-neʼe lori bensaun ba ema hotu. (Roma 5:19) Jeová haraik bensaun barak ba Jesus. Se ita halo tuir Kristu, Maromak Jeová mós sei haraik bensaun ba ita. Halo tuir Kristu sei lori ita ba “maksoin rohan-laek nian”!—Ebreu 5:9.

²⁴ Hatudu laran-metin mós lori bensaun seluk tan. Provérbios 10:9 hatete: “Ema neʼebé laʼo ho laran-metin sei laʼo ho seguru.” Ita bele kompara hahalok laran-metin ho uma boot neʼebé halo husi bloku. Bloku ida-idak mak hanesan hahalok ida-idak neʼebé ita hatudu atu halo tuir Maromak. Maski bloku ida deʼit karik haree hanesan folin kiʼik, maibé sira ida-idak importante. Kuandu bloku hotu tau hamutuk, bele sai uma neʼebé folin-boot. Nuneʼe mós kuandu ita hatudu hahalok atu halo tuir Maromak, loron ba loron no tinan ba tinan, ikusmai ita sei harii hahalok laran-metin neʼebé hanesan uma furak ida.

²⁵ Kuandu ema halo tuir Maromak ba tempu kleur, ida-neʼe halo ita hanoin kona-ba hahalok furak ida seluk. Hahalok neʼe mak tahan maski hetan susar. Jesus mós hatudu ezemplu diʼak kona-ba tahan maski hetan susar, no ita sei koʼalia kona-ba ninia ezemplu neʼe iha kapítulu tuirmai.