1-3. (a) Jesus sente oinsá iha jardín Getsémani? Saida mak halo nia sente nuneʼe? (b) Oinsá mak Jesus hatudu ezemplu diʼak kona-ba tahan? Ida-neʼe hamosu pergunta saida?

 JESUS sai laran-susar tebetebes. Durante ninia moris iha rai, nia seidauk sente hanesan neʼe. Iha oras balu tan Jesus sei ramata ninia moris iha rai. Jesus hamutuk ho ninia apóstolu sira laʼo ba fatin ida neʼebé sira vizita beibeik, fatin neʼe mak jardín Getsémani. Dala barak sira halibur malu iha fatin neʼe. Maibé, iha kalan neʼe, nia presiza tempu balu atu mesamesak. Jesus laʼo dook uitoan husi ninia apóstolu sira no hakneʼak hodi halo orasaun. Nia halo orasaun ho laran-manas no nia sente laran-susar toʼo ninia kosar-been sai hanesan “raan suli ba rai”.—Lucas 22:39-44.

² Tanbasá mak Jesus sente laran-susar tebes? Maski Jesus hatene katak lakleur tan nia sei hasoru terus neʼebé makaʼas, maibé neʼe laʼós buat neʼebé halo nia sente laran-susar. Nia hanoin kona-ba buat neʼebé importante liu. Nia hanoin kona-ba ninia Aman nia naran, no nia mós hatene katak ema nia futuru depende ba nia atu laran-metin ba Maromak. Jesus komprende katak importante tebes ba nia atu tahan toʼo rohan. Se nia rende an, ida-neʼe sei hafoʼer Maromak Jeová nia naran. Maibé Jesus laran-metin nafatin. Iha loron neʼe nia rohan no antes nia iis kotu, mane neʼe, ida neʼebé hatudu ezemplu diʼak liu hotu kona-ba tahan susar, hasaʼe lian manán nian, dehan: “Buat hotu tuir loos ona.”—João 19:30.

³ Bíblia fó laran-manas ba ita atu “hanoin didiʼak” kona-ba oinsá Jesus tahan susar sira. (Ebreu 12:3, MF) Entaun, mai ita hanoin kona-ba pergunta importante sira tuirmai neʼe: Jesus tahan hasoru susar saida deʼit? Saida mak ajuda  nia atu tahan? Oinsá mak ita bele halo tuir ninia ezemplu? Antes ita hatán pergunta sira-neʼe, mai ita hanoin uluk kona-ba liafuan “tahan” katak sá.

4, 5. (a) Liafuan “tahan” katak sá? (b) Konta toʼok ai-knanoik neʼebé hatudu katak tahan ho laran-metin la hanesan ho simu deʼit susar ruma?

⁴ Husi tempu ba tempu, ita ida-idak “hetan susar oioin”. (1 Pedro 1:6) Maibé oinsá mak ita bele hatudu katak ita tahan susar neʼe ho laran-metin? Liafuan gregu neʼebé tradús nuʼudar “tahan” signifika “hasoru susar hodi la rende an”. Kona-ba liafuan “tahan” neʼebé hakerek iha Bíblia, matenek-naʼin ida hatete: “Tahan mak hanesan kbiit atu laran-metin hodi hasoru susar ho esperansa, laʼós ho laran-todan . . . Tahan mak hahalok ida neʼebé ajuda ema atu hamriik metin hodi kontinua luta hasoru susar neʼebé mosu. Hahalok neʼe bele troka terus neʼebé boot sai fali buat neʼebé fó glória, tanba ema neʼe hanoin liuliu kona-ba rezultadu diʼak husi tahan ho laran-metin, duké hanoin deʼit kona-ba susar neʼebé nia hasoru.”

⁵ Entaun, kuandu ita hetan terus, importante atu tahan hasoru ida-neʼe hodi la rende an, laʼós simu deʼit susar sira-neʼe ho laran-todan. Tuir Bíblia, liafuan “tahan” inklui hamriik metin, no kontinua iha hanoin neʼebé loos, no la lakon esperansa kuandu hasoru susar. Hanoin toʼok ai-knanoik tuirmai neʼe: Mane naʼin-rua tama iha komarka ho razaun neʼebé la hanesan. Mane ida mak ema aat, no nia simu kastigu neʼe ho laran-todan. Mane ida seluk mak ema kristaun loos neʼebé hetan kastigu tanba ninia fiar. Nia hamriik metin no nafatin iha hanoin neʼebé loos kona-ba situasaun neʼe tanba nia haree ida-neʼe nuʼudar oportunidade atu hatudu ninia fiar. Ema aat neʼe laʼós ezemplu kona-ba tahan ho laran-metin, maibé ema kristaun neʼe hatudu duni hahalok furak neʼe.—Tiago 1:2-4.

6. Oinsá mak ita bele haburas kbiit atu tahan?

⁶ Atu hetan salvasaun ita tenke tahan toʼo rohan. (Mateus  24:13) Maibé, hahalok neʼe la mosu mesak deʼit. Ita presiza haburas ida-neʼe. Oinsá? Roma 5:3 hatete: “Terus neʼe halo ita makaʼas atu tahan.” Sin, se ita hakarak duni hetan kbiit atu tahan toʼo rohan, ita labele hasees an husi situasaun sira neʼebé koko ita-nia fiar. Ita presiza hasoru susar sira-neʼe. Hodi hasoru no manán susar oioin loroloron, maski neʼe mak kiʼik ka boot, ida-neʼe sei fó ita kbiit atu tahan. Susar ida-idak neʼebé ita hakat liu ona bele aumenta ita-nia kbiit atu tahan kuandu mosu fali susar seluk. Maski nuneʼe, ita presiza ajuda atu haburas ita-nia kbiit atu tahan. Ita tenke sadere ba “kbiit neʼebé Maromak fó”. (1 Pedro 4:11) Maromak Jeová fó ona buat neʼebé diʼak liu atu ajuda ita hamriik metin nafatin, neʼe mak ninia Oan nia ezemplu. Mai ita haree toʼok Jesus nia ezemplu kapás kona-ba tahan ho laran-metin.

7, 8. Saida mak Jesus presiza atu tahan nuʼudar nia besik ona ramata ninia moris iha rai?

⁷ Kuandu Jesus besik ona atu ramata ninia moris iha rai, nia tahan susar barak. Hanesan temi tiha ona, Jesus laran-susar tebes iha ninia kalan ikus. Liután neʼe, nia mós hasoru susar seluk tan. Ninia belun ida saran nia ba ema aat, no ninia belun sira seluk halai husik hela nia. Ema lori nia ba tribunál maski nia la halo sala, no ema-boot relijiaun nian hamoe nia, tafui kabeen ba nia, no baku nia. Maibé, nia tahan buat sira-neʼe ho kalma no aten-brani.—Mateus 26:46-49, 56, 59-68.

⁸ Oras balu antes Jesus mate, nia tahan terus neʼebé boot tebes. Ema baku Jesus ho xikote, no tuir matenek-naʼin sira, baku hanesan neʼe “halo ema nia isin naklees ho kanek boot no lakon mós raan barak”. Ema hedi Jesus iha ai-riin, kastigu hanesan neʼe bele “halo ema hetan terus barak no mate neineik-neineik”. Hanoin toʼok kona-ba terus neʼebé nia sente nuʼudar ema hedi pregu boot ba ninia liman no ain, hodi bele tara nia iha ai-riin. (João 19:1, 16- 18) Hanoin mós kona-ba moras neʼebé nia sente nuʼudar ema hiʼit saʼe ai-riin neʼe no ninia isin tara deʼit iha ai-riin ho pregu iha liman no ain, no mós ninia kotuk neʼebé kanek kose ba ai-riin. Sin, Jesus tahan buat hotu neʼe no nia mós tahan hasoru ninia laran-susar hanesan temi ona iha kapítulu neʼe.

9. Lori ita-nia “ai-riin terus nian” hodi tuir Jesus katak sá?

⁹ Nuʼudar Kristu nia dixípulu, susar saida mak ita presiza tahan? Jesus hatete: “Ema ruma hakarak tuir haʼu karik, nia . . . sei lori nia krús [“ai-riin terus nian”, MF] hodi tuir haʼu.” (Mateus 16:24) Liafuan “ai-riin terus nian” reprezenta susar, moe no mate. Laʼo tuir Jesus mak laʼós buat neʼebé fasil atu halo. Lei kristaun nian neʼebé ita tuir halo ita sai la hanesan ho ema seluk. Mundu neʼe odi ita tanba ita laʼós parte husi mundu neʼe. (João 15:18-20; 1 Pedro 4:4) Maski nuneʼe, ita prontu atu lori ita-nia ai-riin terus nian. Sin, ita prontu atu hasoru susar, no mós mate duké rende an no la banati-tuir tan Ida neʼebé hatudu ezemplu diʼak mai ita.—2 Timóteo 3:12.

10-12. (a) Tanbasá mak moris hamutuk ema sala-naʼin koko Jesus nia kbiit atu tahan? (b) Situasaun susar saida deʼit mak Jesus tenke tahan?

¹⁰ Durante Jesus halaʼo ninia serbisu haklaken iha rai, nia hasoru koko oioin husi ema sala-naʼin sira. Hanoin-hetan katak nia mak Maromak Jeová nia “badaen neʼebé matenek”, ida neʼebé Maromak uza atu kria rai no moris hotu neʼebé iha rai. (Provérbios 8:22-31) Tan neʼe, Jesus hatene kona-ba saida mak Maromak Jeová nia hakarak ba ema. Jeová hakarak ema atu haleno ninia hahalok no atu moris ba nafatin ho ksolok no saúde neʼebé diʼak. (Génesis 1:26-28) Maibé, sala lori mai buat aat barak. Kuandu Jesus iha rai, nia bele sente buat neʼebé ema sente. Ita bele fiar katak Jesus sente triste loos atu haree ho matan rasik oinsá ema nia moris dook ona husi Maromak nia hakarak uluk nian, kuandu nia kria Adão no Eva! Situasaun neʼe mós koko Jesus nia laran-metin atu tahan. Nia sai  laran-tun no rende an hodi hanoin katak saugati deʼit atu ajuda ema ka lae? Mai ita haree toʼok.

¹¹ Ema judeu la simu mensajen neʼebé Jesus haklaken no ida-neʼe halo nia sente laran-susar toʼo nia tanis iha ema nia oin. Maibé, neʼe halo nia lakon ninia laran-manas no para atu haklaken ka lae? Lae! Duké para, Bíblia dehan: “Loron-loron nia hanorin iha templu.” (Lucas 19:41-44, 47) Loron ida, fariseu sira hamriik hodi hateke se Jesus sei kura mane ida iha loron Sábadu ka lae. Fariseu sira-neʼe la hanoin ema no ida-neʼe halo Jesus sente “laran-susar”. Jesus sai taʼuk ba ninia inimigu sira-neʼe neʼebé halo sira-nia an loos liu hotu ka lae? Klaru katak lae! Nia hamriik metin no nia kura mane neʼe. Nia halo ida-neʼe iha sinagoga nia laran.—Marcos 3:1-5.

¹² Iha buat ida tan neʼebé lori susar ba Jesus, neʼe mak ninia dixípulu sira-nia fraku. Hanesan ita aprende ona iha Kapítulu 3, dixípulu sira hakarak nafatin atu hetan pozisaun  aas. (Mateus 20:20-24; Lucas 9:46) Jesus fó konsellu ba sira beibeik kona-ba importante atu haraik an. (Mateus 18:1-6; 20:25-28) Maski nuneʼe, sira la halo tuir kedas ninia konsellu neʼe. Hanoin toʼok kona-ba buat neʼebé akontese iha Jesus nia kalan ikus ho ninia dixípulu sira. Dixípulu sira “haksesuk malu” makaʼas kona-ba sé mak boot liu iha sira-nia leet. (Lucas 22:24) Jesus rende an, hodi hanoin katak sira sei nunka troka sira-nia hahalok ka lae? Lae. Jesus sempre hatudu pasiénsia no hanoin buat neʼebé loos kona-ba dixípulu sira. Nia iha esperansa katak sira sei troka, no nia kontinua atu hanoin kona-ba buat diʼak neʼebé sira halo. Jesus hatene katak iha sira-nia laran, sira hadomi Maromak Jeová no hakarak duni atu halo Maromak nia hakarak.—Lucas 22:25-27.

13. Susar saida deʼit mak ita hasoru?

¹³ Karik ita mós hasoru susar balu neʼebé Jesus hasoru. Porezemplu, karik ita hasoru ema neʼebé la simu ka kontra ita-nia serbisu atu habelar mensajen kona-ba Maromak nia Ukun. Ita sei husik sira-nia hahalok neʼe halo ita sai laran-tun, ka ita sei kontinua atu haklaken ho laran-manas? (Tito 2:14) Ita mós bele hetan koko husi ita-nia irmaun-irmán sira neʼebé sala-naʼin. Karik sira koʼalia arbiru deʼit ka halo buat neʼebé hakanek ita-nia laran. (Provérbios 12:18) Ita sei husik ita-nia maluk fiar-naʼin nia fraku halo ita atu la ajuda tan sira, ka ita sei kontinua atu tahan sira-nia fraku no buka atu haree ba buat diʼak neʼebé sira halo?—Koloso 3:13.

14. Buat rua saida mak ajuda Jesus atu hamriik metin?

¹⁴ Saida mak ajuda Jesus atu hamriik metin no tahan ho laran-metin maski nia hasoru susar no terus oioin? Iha buat rua neʼebé ajuda Jesus. Primeiru, nia buka ba Maromak nia “tulun”. (Roma 15:5) Segundu, Jesus haree ba futuru, hodi hanoin kona-ba rezultadu husi ninia laran-metin. Mai ita hanoin kona-ba buat rua neʼe.

15, 16. (a) Saida mak hatudu katak Jesus la sadere ba nia kbiit rasik atu tahan? (b) Jesus fiar saida kona-ba ninia Aman? Tanbasá?

 ¹⁵ Maski Jesus mak Maromak nia Oan neʼebé sala-laek, maibé nia la sadere ba ninia kbiit rasik atubele tahan ho laran-metin. Nia buka ajuda husi ninia Aman iha lalehan hodi halo orasaun. Apóstolu Paulo hakerek: “[Kristu] hasaʼe orasaun no harohan ho lia makaʼas no matabeen ba Ida neʼebé bele soi nia husi mate.” (Ebreu 5:7) Eskritura neʼe la dehan deʼit katak Jesus “hasaʼe orasaun”, maibé dehan mós katak nia “harohan”. Liafuan gregu neʼebé tradús nuʼudar “harohan” koʼalia kona-ba halo orasaun ho laran tomak hodi husu ajuda. Liafuan neʼe mós hatudu katak Jesus halo orasaun ba Maromak Jeová laʼós dala ida deʼit. Tuir loloos, iha jardín Getsémani Jesus halo orasaun beibeik ho laran tomak.—Mateus 26:36-44.

¹⁶ Jesus fiar metin katak Maromak Jeová sei hatán ninia orasaun, tanba Jesus hatene katak ninia Aman mak Ida “neʼebé rona ba orasaun”. (Salmo 65:2) Antes Oan primeiru neʼe mai toʼo rai, nia haree ona kona-ba oinsá ninia Aman hatán ba ninia atan sira-nia orasaun. Porezemplu, iha lalehan Oan neʼe haree rasik kuandu Jeová hatán profeta Daniel nia orasaun hodi haruka anju ida atu koʼalia ho Daniel, maski nia seidauk ramata ninia orasaun. (Daniel 9:20, 21) Tan neʼe, klaru katak Aman sei hatán duni ninia Oan-Mane mesak nia orasaun neʼebé nia hatoʼo husi laran ho “lia makaʼas no matabeen”. Maromak Jeová hatán Oan nia orasaun hodi haruka anju ida atu hametin nia hodi bele tahan susar neʼebé nia hasoru.—Lucas 22:43.

17. Atu tahan, tanbasá mak ita presiza buka ajuda husi Maromak? Oinsá mak ita bele halo ida-neʼe?

¹⁷ Atu tahan ho laran-metin, ita mós tenke buka ajuda husi Maromak atu “fó kbiit” mai ita. (Filipe 4:13) Se Maromak nia Oan neʼebé sala-laek sente katak nia presiza harohan hodi husu Maromak Jeová nia ajuda, klaru katak ita ema sala-naʼin presiza liután atu halo ida-neʼe. Hanesan Jesus, karik ita presiza husu beibeik Jeová nia ajuda.  (Mateus 7:7) Maski ita la hein atu anju ida vizita ita, maibé ita bele fiar katak Maromak neʼebé hadomi ita sei hatán ita-nia orasaun. Maromak sei hatán duni ba orasaun neʼebé ema kristaun laran-metin hasaʼe hodi “harohan no hamulak kalan-loron”. (1 Timóteo 5:5) Se ita husu Maromak Jeová atu haraik matenek, aten-brani no kbiit atu tahan hasoru susar oioin hanesan sai moras, ema neʼebé ita hadomi mate, ka ema kontra ita, nia sei hatán duni ita-nia orasaun neʼe.—2 Korinto 4:7-11; Tiago 1:5.

18. Oinsá mak Jesus hateke deʼit ba futuru duké ba terus neʼebé nia hasoru?

¹⁸ Buat ida tan neʼebé ajuda Jesus atu tahan mak hodi haree ba futuru. Neʼe katak nia hanoin liu kona-ba rezultadu husi ninia laran-metin. Kona-ba Jesus, Bíblia hatete: “Tan ksolok neʼebé nia atu hetan, nia simu krús [“ai-riin terus nian”, MF] la hodi moe.” (Ebreu 12:2) Sin, Jesus bele tahan toʼo rohan tanba nia iha esperansa, no nia mós nunka lakon ninia ksolok. Neʼe hatudu katak esperansa, ksolok, no kbiit atu tahan iha relasaun ba malu. Ita bele dehan katak esperansa halo ita ksolok, no ksolok fó kbiit ba ita atu tahan. (Roma 15:13; Koloso 1:11) Jesus iha esperansa neʼebé kapás. Nia hatene katak hodi hatudu laran-metin, nia sei ajuda atu halo ninia Aman nia naran santu. Nia mós hatene katak hodi laran-metin nia bele sosa fali ema husi sala no mate. Liután neʼe, Jesus iha  esperansa atu ukun nuʼudar Liurai no serbí nuʼudar Amlulik Boot. No hodi halaʼo knaar sira-neʼe, nia bele haraik bensaun barak tan ba ema neʼebé halo tuir nia. (Mateus 20:28; Ebreu 7:23-26) Hodi hanoin kona-ba kolen no esperansa neʼebé nia iha, Jesus sente haksolok tebes, no ksolok neʼe ajuda nia atu tahan toʼo rohan.

19. Kuandu hasoru susar, oinsá mak esperansa, ksolok no kbiit atu tahan bele ajuda ita?

¹⁹ Hanesan Jesus, ita mós presiza esperansa, ksolok no kbiit atu tahan. Apóstolu Paulo hatete: “Haksolok iha esperansa, tahan iha terus laran.” (Roma 12:12) Agora daudaun Ita hasoru situasaun susar neʼebé koko Ita-nia fiar ka lae? Se nuneʼe, importante atu hateke ba futuru. Hanoin-hetan katak hodi tahan ho laran-metin, ida-neʼe sei lori hahiʼi ba Maromak Jeová nia naran. Tau uluk ita-nia esperansa kona-ba Maromak nia Ukun. Hanoin toʼok katak Ita hela ona iha Maromak nia mundu foun neʼebé besik ona atu mai, no hanoin mós kona-ba bensaun sira neʼebé Ita hetan iha neʼebá. Bensaun sira-neʼe inklui Maromak nia naran sai santu, la iha tan buat aat iha mundu, la iha tan moras no mate. Kuandu ita hanoin kona-ba bensaun sira-neʼe, ida-neʼe bele halo ita-nia laran haksolok, no ksolok neʼe bele ajuda ita atu tahan susar naran deʼit neʼebé ita hasoru. Kuandu ita kompara bensaun sira-neʼe ho susar neʼebé ita hasoru iha mundu aat neʼe, ita sei sente duni katak terus neʼe mak buat neʼebé “kmaan” no lakleur tan sei lakon.—2 Korinto 4:17.

20, 21. Kona-ba tahan hasoru susar, saida mak Maromak Jeová hakarak ita atu halo? Ita prontu atu halo saida?

²⁰ Jesus hatene katak ema neʼebé laʼo tuir nia sei hetan susar oioin no sira presiza atu tahan ho laran-metin. (João 15:20) Nia hatudu ezemplu ba ema atu banati-tuir no nia hatene katak ninia ezemplu sei hametin sira. (João 16:33) Sin, Jesus hatudu ezemplu diʼak liu hotu kona-ba tahan  toʼo rohan, maibé oinsá ho ita ema neʼebé sala-naʼin? Saida mak Maromak Jeová hakarak ita atu halo? Pedro esplika: “Kristu rasik terus tanba imi, hodi fó ezemplu ba imi atu imi mós laʼo tuir nia ain-fatin.” (1 Pedro 2:21) Sin, Jesus hatudu ezemplu furak kona-ba oinsá atu tahan hasoru susar sira, no tan neʼe diʼak ba ita atu banati-tuir ninia ezemplu. a Ninia laran-metin neʼebé nia hatudu iha rai mak hanesan “ain-fatin”. Loloos ita la bele laʼo tuir ninia ain-fatin neʼe ho perfeitu, maibé hodi hakaʼas an ita bele laʼo tuir ho didiʼak.

²¹ Entaun, mai ita hakaʼas an atu halo tuir Jesus nia ezemplu. Mai ita nunka haluha katak nuʼudar ita laʼo tuir Jesus nia ain-fatin, ida-neʼe sei ajuda ita atu tahan “toʼo rohan”, neʼe katak tahan toʼo mundu aat neʼe nia rohan, ka tahan toʼo ita mate. Ita la hatene ida neʼebé mak sei mosu uluk. Maski nuneʼe, ita hatene katak Maromak Jeová sei haraik nafatin bensaun ba ita se ita tahan ho laran-metin.—Mateus 24:13.