Ba lee-naʼin doben sira:

“Mai tuir haʼu.” (Marcos 10:21) Ho liafuan sira-neʼe, Jesus Kristu konvida ita atu laʼo tuir nia. Ita simu ona ninia konvite neʼe ka lae? Desizaun neʼebé ita halo sei kona ita-nia moris tomak. Tanbasá?

Maromak Jeová haruka ninia Oan-Mane mesak mai iha rai atu fó ninia moris nuʼudar sakrifísiu. (João 3:16) Liután neʼe, Oan neʼe mós hatudu dalan ba ita oinsá atu halaʼo ita-nia moris. Iha buat hotu neʼebé Jesus halo, nia hatudu laran-metin no ida-neʼe lori ksolok ba ninia Aman. Jesus mós hatudu ba ita oinsá ita bele hatudu hahalok hanesan ninia Aman. Buat neʼebé Oan koʼalia no halo haleno ho perfeitu Aman nia hanoin no hakarak.​—João 14:9.

Bíblia dehan katak Jesus ‘fó ezemplu ba ita atu ita mós laʼo tuir nia ain-fatin’. (1 Pedro 2:​21) Se ita hakarak atu hakbesik liután ba Maromak Jeová, se ita hakarak atu hetan moris kontente agora, no se ita hakarak atu laʼo nafatin iha dalan ba moris rohan-laek nian, ita tenke laʼo tuir ho didiʼak Kristu nia ain-fatin.

Atu laʼo tuir Jesus Kristu, ita presiza hatene didiʼak Jesus nia moris iha rai. Tan neʼe, importante duni atu estuda didiʼak buat neʼebé hakerek iha Bíblia laran kona-ba Jesus. Hodi hanoin kleʼan kona-ba buat neʼebé Jesus koʼalia no halo, no mós hodi hanoin kleʼan kona-ba oinsá ita bele banati-tuir nia liuhusi ita-nia hahalok no dalan neʼebé ita koʼalia, ida-neʼe sei ajuda ita atu hatene ho loloos oinsá atu laʼo tuir nia.

Ami hein katak livru neʼe sei ajuda Ita atu haburas Ita-nia domin ba Jesus no ba Jeová. Ami mós hein katak domin neʼe sei book Ita atu laʼo tuir ho didiʼak Jesus nia ain-fatin, hodi nuneʼe Ita bele fó ksolok ba Aman Jeová agora no ba nafatin.