1, 2. Kona-ba atividade halimar nian, ita presiza deside atu halo saida?

HANOIN toʼok, Ita atu han ai-fuan neʼebé gostu, maibé Ita haree iha ai-fuan nia sorin iha uitoan neʼebé dodok. Ita sei halo saida? Karik Ita sei han ai-fuan neʼe tomak. Ka, karik Ita la han no soe deʼit ai-fuan neʼe. Karik Ita koʼa sai sorin uitoan neʼebé dodok no han deʼit sorin neʼebé diʼak. Ita sei deside atu halo saida?

² Dala ruma, Ita hakarak halo atividade halimar nian hanesan joga, lee livru, haree filme, uza ínternet no buat seluseluk tan. Maibé, Ita hatene katak buat barak iha mundu neʼebé ema halo atu hetan haksolok mak aat iha dalan morál. Tuir loloos, ita bele kompara atividade halimar nian neʼebé aat hanesan ho ai-fuan neʼebé dodok. Ita sei halo saida? Porezemplu, ema balun simu deʼit atividade halimar nian hotu husi mundu neʼe maski balun mak aat. Karik ema seluk sees husi atividade hirak-neʼe, nuneʼe buat aat la kona sira. Karik ema seluk tan kuidadu no sees an husi atividade neʼebé aat, maibé sira gosta atividade neʼebé diʼak. Atu hela nafatin iha Maromak nia domin, ezemplu ida-neʼebé mak Ita tenke hili atu halo tuir?

3. Ita sei koʼalia kona-ba saida?

³ Ita barak sei hili ezemplu ikus. Ita hatene katak ita presiza halo atividade halimar nian, maibé ita hakarak halo buat hirak-neʼe hodi hili deʼit buat neʼebé moos iha dalan morál. Entaun, ita presiza hanoin kona-ba oinsá ita bele deside ida-neʼebé mak diʼak no aat. Maibé ulukliu, mai ita koʼalia  kona-ba oinsá desizaun neʼebé ita halo bele kona adorasaun neʼebé ita fó ba Maromak Jeová.

4. Oinsá mak ita-nia dedikasaun tenke book ita kuandu ita hili atividade halimar nian?

⁴ Tinan balun liubá, katuas Testemuña ida neʼebé hetan batizmu iha tinan 1946, hatete: “Haʼu hakaʼas an atu sempre asiste diskursu batizmu nian iha reuniaun boot ida-idak. Haʼu rona didiʼak ba diskursu neʼe, hanesan haʼu rona ba diskursu kuandu haʼu hetan batizmu.” Tanbasá? Nia esplika: “Hodi hanoin nafatin haʼu-nia dedikasaun, neʼe mak buat neʼebé importante loos atu laran-metin nafatin.” Ita mós sente hanesan neʼe, loos ka lae? Hodi fó-hanoin nafatin ba Ita-nia an katak Ita promete tiha ona atu uza Ita-nia moris tomak atu serbí Maromak Jeová, bele hametin Ita atu halo ida-neʼe. (Eclesiastes 5:4; Ebreu 10:7) Tuir loloos, hanoin kleʼan kona-ba Ita-nia dedikasaun sei ajuda oinsá Ita haree kona-ba serbisu kristaun, no mós kona-ba buat seluk tan iha Ita-nia moris, hanesan hili atividade halimar nian. Kuandu Apóstolu Paulo hakerek ba ema kristaun, nia hametin lia-loos ida-neʼe: “Imi han ka hemu, ka buat naran deʼit neʼebé imi halo, halo buat hotu-hotu ba Maromak nia glória.”​—1 Korinto 10:31.

5. Oinsá mak Levítico 22:18-20 ajuda ita atu komprende avizu iha Roma 12:1?

 ⁵ Buat hotu neʼebé Ita halo iha Ita-nia moris iha relasaun ho Ita-nia adorasaun ba Maromak Jeová. Paulo fó sai lia-loos importante neʼe iha nia surat ba ema kristaun iha Roma. Nia fó laran-manas ba sira hodi hatete: “Saran imi-nia isin nuʼudar sakrifísiu moris nian, santu no buat neʼebé Maromak bele simu; katak buat karan espirituál nian.” (Roma 12:1) Isin iha eskritura neʼe mós inklui Ita-nia hanoin, laran no kbiit isin nian. Ita uza buat hirak-neʼe hotu hodi serbí Maromak. (Marcos 12:30) Paulo hatete katak serbí Maromak ho moris tomak mak hanesan hasaʼe sakrifísiu. Liafuan “sakrifísiu” fó-hanoin mai ita kona-ba avizu ida. Tuir Moisés nia Ukun-Fuan, Maromak lakohi simu sakrifísiu neʼebé ladiʼak. (Levítico 22:18-20) Nuneʼe mós, se ema kristaun fó sakrifísiu espirituál nian neʼebé ladiʼak ka lamoos, Maromak sei la simu ida-neʼe. Maibé, oinsá mak ida-neʼe bele akontese?

6, 7. Oinsá mak ema kristaun ida bele hafoʼer nia isin? Rezultadu saida mak bele akontese?

⁶ Paulo fó avizu ba ema kristaun iha Roma: “Keta saran imi-nia isin nia liman ain ba sala.” Paulo mós fó-hatene ba sira atu ‘oho sira-nia isin nia hahalok’. (Roma 6:12-14; 8:13) Antes ida-neʼe, Paulo fó ezemplu balun kona-ba “isin nia hahalok”. Kona-ba ema sala-naʼin nia hatete: “Sira-nia ibun nakonu [ho] malisan.” “Sira-nia ain lalais atu fakar raan.” Iha sira-nia “[“matan”, MF] sira la taʼuk Maromak”. (Roma 3:13-18) Ema kristaun ida sei hafoʼer nia isin se nia uza parte isin nian hanesan “liman ain” atu halo hahalok sala. Porezemplu, karik ema kristaun ida ohin loron hili atu haree buat neʼebé aat tebes hanesan pornografia ka filme neʼebé hatudu ema neʼebé kontente atu fó-terus ba ema seluk. Se nia halo ida-neʼe, nia “saran [nia matan] ba sala”, entaun nia hafoʼer nia isin tomak. Saida deʼit neʼebé nia halo iha nia adorasaun ba Maromak mak hanesan sakrifísiu neʼebé  lamoos, la santu no Maromak sei la simu. (Deuteronômio 15:21; 1 Pedro 1:14-16; 2 Pedro 3:11) Loos duni, hili atividade neʼebé aat lori rezultadu neʼebé aat!

⁷ Klaru katak atividade halimar nian neʼebé ema kristaun ida hili atu halo bele lori rezultadu neʼebé diʼak ka aat. Entaun, ita hakarak duni atu hili atividade neʼebé la hafoʼer ita-nia sakrifísiu ba Maromak, maibé ita hakarak atu fó sakrifísiu neʼebé diʼak liu ba Maromak. Agora mai ita koʼalia kona-ba oinsá mak ita bele hatene atividade halimar nian neʼebé diʼak no ladiʼak.

8, 9. (a) Iha atividade halimar nian oin rua saida? (b) Ita sees an husi atividade hanesan saida deʼit? Tanbasá?

⁸ Baibain iha atividade halimar nian oin rua. Iha atividade balun neʼebé ema kristaun tenke sees duni, no seluk mak nia karik bele hili atu halo ka lae. Mai ita hahú hodi hanoin kona-ba atividade halimar nian neʼebé ema kristaun tenke sees duni.

⁹ Hanesan hatete tiha ona iha Kapítulu 1, buat barak iha mundu neʼebé ema halo atu hetan haksolok haleno buat neʼebé ho klaru Bíblia bandu. Porezemplu, hanoin toʼok kona-ba ínternet, filme, programa iha televizaun no múzika neʼebé konta kona-ba hahalok violénsia neʼebé aat tebes, matan-dook nia atividade ka pornografia. Maski buat hirak-neʼe aat tebes, mundu hatudu ida-neʼe hanesan buat baibain deʼit. Buat hirak-neʼe kontra Bíblia nia ukun-fuan no matadalan, tan neʼe ema kristaun neʼebé loos sees an husi buat sira-neʼe. (Apostolu 15:28, 29; 1 Korinto 6:9, 10; Apokalipse 21:8) Hodi hili atu la halo atividade neʼebé lamoos, Ita hatudu ba Maromak Jeová katak Ita loloos odi buat neʼebé aat no nafatin “sees husi buat neʼebé aat”. Se nuneʼe, Ita sei iha “fiar loloos” laʼós laran-makerek.—Roma 12:9; Salmo 34:14; 1 Timoteo 1:5.

10. Hanoin iha dalan saida mak bele lori perigu ba ita? Tanbasá?

 ¹⁰ Maibé karik ema balun sente katak la iha problema atu haree filme neʼebé hatudu hahalok foʼer. Sira hanoin: ‘Haʼu bele haree filme ka programa iha televizaun hanesan neʼe, maibé haʼu sei nunka halo tuir.’ Se ita hanoin hanesan neʼe ita lohi ita-nia an no bele hetan perigu. (Jeremias 17:9) Se ita gosta haree buat neʼebé Maromak Jeová bandu, tuir loloos ita bele hatete katak ita odi buat neʼebé aat ka lae? Se ita haree no rona beibeik hahalok neʼebé aat, ikusmai susar ba ita atu hatene buat neʼebé diʼak husi buat neʼebé aat. (Salmo 119:70; 1 Timoteo 4:1, 2) Hili atividade halimar nian neʼebé aat mós bele troka ita-nia hahalok no oinsá ita sente kona-ba ema seluk nia hahalok neʼebé sala.

11. Oinsá mak lia-loos iha Galasia 6:7 sai loos kona-ba ema neʼebé haree filme?

¹¹ Tuir loloos neʼe mak akontese tiha ona. Ema kristaun balun halo sala boot tanba sira haree beibeik filme neʼebé book sira atu halo hahalok aat. Husi sira rasik nia esperiénsia sira rekoñese lia-loos tuirmai neʼe: “Ema ida sei koʼa buat neʼebé nia kari.” (Galasia 6:7) Ita bele sees husi rezultadu aat neʼe. Se Ita hili didiʼak atu kari buat neʼebé moos iha Ita-nia neon, Ita sei kontente koʼa buat neʼebé diʼak iha Ita-nia moris.—Haree kaixa “ Haʼu tenke hili atividade halimar nian hanesan saida?”.

12. Oinsá mak Galasia 6:5 ajuda ita hili atividade halimar nian? Matadalan saida mak ita iha kuandu ita ida-idak halo desizaun?

¹² Mai ita koʼalia kona-ba atividade halimar nian ida seluk. Iha atividade ruma neʼebé Bíblia la fó-hatene se ema kristaun bele halo ka labele halo. Kuandu hili atividade hanesan neʼe, ema kristaun ida-idak presiza halo desizaun kona-ba buat neʼebé nia hanoin mak diʼak. (Galasia 6:5) Bíblia fó matadalan ka hanorin neʼebé loos no importante  atu ajuda ita hatene Maromak Jeová nia hanoin. Ida-neʼe mós sei ajuda ita atu hatene “buat neʼebé Maromak hakarak [ita] halo” kona-ba buat hotu-hotu, neʼe mós inklui atividade halimar nian neʼebé ita hili atu halo.​—Efeso 5:17.

13. Saida mak book ita atu sees husi atividade halimar nian neʼebé la halo kontente Maromak Jeová?

¹³ Ita hatene katak ema kristaun hotu iha esperiénsia no matenek neʼebé la hanesan. (Filipe 1:9) Liután neʼe, ema kristaun ida hatene katak atividade halimar nian neʼebé nia  gosta karik la hanesan ho ema seluk. Tan neʼe, ita la hein katak ema kristaun hotu sei halo desizaun neʼebé hanesan. Maski nuneʼe, hodi husik Maromak nia matadalan book ita-nia hanoin no laran, ita sei laran-manas atu sees husi atividade neʼebé la halo kontente Maromak Jeová.​—Salmo 119:11, 129; 1 Pedro 2:16.

14. (a) Kuandu hili atividade halimar nian ita tenke hanoin kona-ba saida? (b) Oinsá mak ita nafatin tau uluk adorasaun ba Maromak iha ita-nia moris?

¹⁴ Kuandu deside atu halo atividade ruma, iha buat importante ida tan neʼebé ita presiza hanoin: Ita-nia tempu. Ita halo atividade balun tanba ita sente katak atividade sira-neʼe mak diʼak. No mós, se Ita uza tempu barak liu atu halo atividade sira-neʼe, neʼe hatudu katak atividade neʼe importante liu ba Ita. Maibé, ba ema kristaun buat neʼebé importante liu mak sira-nia adorasaun ba Maromak. (Mateus 6:33) Entaun, Ita bele halo saida atu hatudu katak adorasaun ba Maromak mak buat neʼebé Ita tau uluk nafatin iha Ita-nia moris? Apóstolu Paulo hatete: “Haree oinsá imi moris. Keta moris hanesan ema beik, maibé hanesan ema matenek. Uza buat hotu neʼebé diʼak.” (Efeso 5:15, 16) Loos duni, hodi deside atu la uza tempu barak liu atu halo atividade halimar nian sei ajuda Ita atu iha tempu barak ba “buat hotu-hotu neʼebé diʼak liu” iha Ita-nia moris. Entaun Ita bele halo atividade espirituál nian neʼebé hametin Ita-nia adorasaun ba Maromak.​—Filipe 1:10.

15. Tanbasá mak diʼak atu kuidadu no la halo atividade ruma se Ita sente ladún diʼak kona-ba neʼe?

¹⁵ Se Ita sente katak atividade ida karik ladún diʼak ka sente dúvida uitoan, diʼak liu atu kuidadu no la halo atividade neʼe. Hanoin fali ba ezemplu kona-ba ai-fuan. Atu la han sorin neʼebé dodok Ita la koʼa sai deʼit sorin neʼebé dodok, maibé Ita koʼa haleʼu husi ninin neʼebé moos, hanesan dezeñu iha pájina 63. Hanesan neʼe, se Ita sente dúvida uitoan, diʼak liu atu sees husi atividade neʼe. Ema kristaun  neʼebé matenek sees husi atividade halimar nian neʼebé kontra Bíblia nia matadalan, no mós atividade neʼebé karik bele estraga sira-nia relasaun ho Maromak Jeová. (Provérbios 4:25-27) Hodi kaer metin ba Maromak nia Liafuan sei ajuda Ita atu halo ida-neʼe.

16. (a) Oinsá mak ita hatudu katak ita hanoin tuir Maromak Jeová kona-ba buat morál? (b) Oinsá mak Ita bele sai toman atu halo tuir Bíblia nia matadalan iha Ita-nia moris?

¹⁶ Ema kristaun neʼebé loos hanoin uluk kona-ba Maromak Jeová nia hanoin kuandu sira hili atividade halimar nian. Bíblia fó-hatene oinsá Maromak Jeová nia sentimentu no buat neʼebé nia hakarak ita atu halo. Porezemplu, Liurai Salomão hakerek kona-ba buat balun neʼebé Maromak Jeová odi. Hanesan “nanál neʼebé bosok, liman neʼebé fakar raan husi ema neʼebé la halo sala, laran neʼebé futu lia atu fó-terus, ain neʼebé halai lalais atu halo aat”. (Provérbios 6:16-19) Oinsá mak Maromak Jeová nia hanoin tenke book Ita-nia hanoin? Ema neʼebé hakerek salmo ida hatete ho laran-manas: “Hei, imi neʼebé hadomi Jeová, odi buat neʼebé aat.” (Salmo 97:10) Buat neʼebé Ita hili atu halo tenke hatudu katak Ita loloos odi buat neʼebé Maromak Jeová mós odi. (Galasia 5:19-21) No mós ita presiza hanoin nafatin katak laʼós buat neʼebé ema haree ita halo mak importante liu, maibé buat neʼebé ita halo kuandu mesak mak  hatudu kona-ba ita loloos ema hanesan saida. (Salmo 11:4; 16:8) Entaun, se Ita hakarak duni atu haleno Maromak Jeová nia hanoin kona-ba buat morál iha Ita-nia moris tomak, Ita sempre hili buat neʼebé tuir Bíblia nia matadalan. Ida-neʼe sei sai Ita-nia toman.—2 Korinto 3:18.

17. Antes deside atu haree filme ruma, diʼak atu husu pergunta saida ba ita-nia an?

¹⁷ Saida tan mak Ita bele halo atu hatene se atividade neʼebé Ita hili mak tuir Maromak nia hanoin? Hanoin didiʼak kona-ba pergunta ida-neʼe: ‘Atividade neʼebé haʼu hili sei book haʼu no haʼu-nia relasaun ho Maromak iha dalan saida?’ Porezemplu, antes deside atu haree filme ruma, husu ba Ita-nia an: ‘Haʼu-nia laran sei sente oinsá se haʼu haree filme neʼebé hatudu buat ruma neʼebé ladiʼak?’ Mai ita hanoin kona-ba matadalan neʼebé bele ajuda ita atu halo ida-neʼe.

18, 19. (a) Oinsá mak matadalan husi Filipe 4:8 bele ajuda ita atu deside se filme neʼebé ita haree mak diʼak? (b) Matadalan saida tan mak bele ajuda Ita atu hili filme neʼebé diʼak atu haree? (Haree nota-rodapé.)

¹⁸ Filipe 4:8 hatudu matadalan neʼebé importante: “Halo nakonu imi-nia neon ho buat neʼebé loos, santu, diʼak, moos, furak no aas.” Sin, iha eskritura neʼe Paulo la koʼalia kona-ba haree filme, maibé kona-ba buat neʼebé ita presiza hanoin kleʼan iha ita-nia laran hodi halo kontente Maromak. (Salmo 19:14) Maibé, ita bele uza Paulo nia liafuan nuʼudar matadalan atu deside kona-ba buat neʼebé ita haree. Oinsá?

¹⁹ Husu ba Ita-nia an: ‘Filme, múzika, no video games, no mós halimar sira seluk neʼebé haʼu haree mak hatudu katak haʼu hatama buat neʼebé moos iha haʼu-nia hanoin?’ Porezemplu, Ita haree tiha filme ida no depois neʼe Ita sempre hanoin saida? Se buat neʼebé Ita hanoin mak moos no halo Ita sente kmaan, neʼe hatudu katak Ita hili filme neʼebé diʼak. Maibé, se Ita haree filme neʼebé halo Ita hanoin buat  neʼebé lamoos, neʼe hatudu katak Ita hili filme neʼebé ladiʼak, mós bele lori perigu ba Ita. (Mateus 12:33; Marcos 7:20-23) Tanbasá? Tanba hanoin kona-ba buat neʼebé lamoos iha dalan morál bele halakon dame iha Ita-nia laran, hakanek Ita-nia laran neʼebé Ita treinu tuir Bíblia, no bele estraga Ita-nia relasaun ho Maromak. (Efeso 5:5; 1 Timoteo 1:5, 19) Tanba halo atividade halimar nian neʼebé aat hanesan neʼe bele lori perigu ba Ita-nia an, nuneʼe laran-metin bá atu sees husi buat hirak-neʼe. * (Roma 12:2) Banati-tuir ema neʼebé hakerek Salmo nia orasaun neʼebé hatete: “Keta husik haʼu-nia matan atu haree buat neʼebé la iha folin.”​—Salmo 119:37.

20, 21. Oinsá mak 1 Korinto 10:23, 24 bele ajuda ita atu hili atividade halimar nian neʼebé diʼak?

²⁰ Paulo koʼalia kona-ba matadalan importante neʼebé ita presiza hanoin kuandu ita halo desizaun kona-ba buat neʼebé ita rasik halo. Nia hatete: “Buat hotu tuir ukun-fuan, maibé laʼós buat hotu harii. Ema keta buka nia rasik nia diʼak, maibé nia maluk nian.” (1 Korinto 10:23, 24) Oinsá mak matadalan ida-neʼe ajuda ita atu hili atividade halimar nian neʼebé diʼak? Ita presiza husu ba Ita-nia an: ‘Oinsá mak ema seluk sente kona-ba atividade neʼebé haʼu hili?’

²¹ Karik Ita-nia laran husik Ita atu halo atividade ruma neʼebé Ita sente “tuir ukun-fuan”. Maibé, se Ita hatene katak maluk fiar-naʼin seluk nia laran bandu sira atu la halo atividade hanesan neʼe, karik Ita mós deside atu la halo. Tanbasá? Tanba Ita lakohi halo susar liu ba Ita-nia maluk fiar-naʼin atu mantein sira-nia laran-metin ba Maromak. Hanesan Paulo hatete katak Ita lakohi “halo sala” hasoru  Ita-nia maluk sira ka “halo sala hasoru Kristu”. Ita simu ho laran eskritura neʼebé hatete: “Hadook an husi fó laran-susar ba ema.” (1 Korinto 8:12; 10:32) Paulo hanoin ema kristaun sira no fó konsellu neʼebé matenek. Hodi sees husi atividade halimar nian neʼebé karik “tuir ukun-fuan” maibé la “harii”, ema kristaun ohin loron simu Paulo nia konsellu diʼak neʼe.​—Roma 14:1; 15:1.

22. Tanbasá mak ita nuʼudar ema kristaun la obriga ita-nia maluk atu halo desizaun tuir ita-nia hanoin?

²² Iha buat ida tan neʼebé ita presiza hanoin kuandu ita buka ema seluk nia diʼak. Ema kristaun ida nia laran neʼebé bandu nia atu la halo atividade ruma, labele obriga ema kristaun hotu iha kongregasaun atu tuir nia hanoin-kloot kona-ba atividade neʼebé nia hanoin katak diʼak atu halo. Se nia halo ida-neʼe, nia hanesan ho ema neʼebé kaer karreta no obriga ema seluk neʼebé kaer karreta atu halai tuir nia. Nia labele duni obriga ema seluk atu tuir nia hakarak. Domin kristaun mak book nia atu hatudu respeitu ba ema seluk nia hanoin neʼebé la hanesan ho ninian kona-ba atividade ruma neʼebé la kontra matadalan kristaun nian. Hanesan neʼe nia hatudu “laran-diʼak” ba ema kristaun hotu-hotu.​—Filipe 4:5; Eclesiastes 7:16.

23. Oinsá mak Ita bele hili atividade halimar nian neʼebé diʼak?

²³ Entaun, oinsá mak Ita bele hili atividade halimar nian neʼebé diʼak? La hili atividade neʼebé hatudu hahalok aat no foʼer, neʼebé mak kontra Maromak nia Liafuan. Se iha atividade ruma neʼebé envolve hahalok neʼebé Bíblia la bandu, halo tuir Bíblia nia matadalan hodi ita bele hatene se ita bele halo ka lae. Sees husi atividade neʼebé bele hakanek Ita-nia laran. Sai prontu atu husik atividade hotu neʼebé karik bele hakanek ema seluk nia laran, liuliu maluk fiar-naʼin sira. Laran-metin bá atu halo buat hirak-neʼe, hodi Ita bele fó glória ba Maromak, no hamutuk ho Ita-nia família bele hela nafatin iha nia domin.