LISAUN 34
Oinsá mak ita bele hatudu ita-nia domin ba Jeová?
Husi tempu neʼebé Ita hahú estuda Bíblia, Ita sente besik liután ba Maromak ka lae? Ita hakarak hametin liután Ita-nia relasaun nuʼudar belun ho nia ka lae? Se nuneʼe, keta haluha katak kuandu Jeová haree Ita haburas Ita-nia domin ba nia, nia mós sei hadomi no hanoin liután Ita. Oinsá mak Ita bele hatudu domin ba nia?
1. Oinsá mak ita hatudu ba Jeová katak ita hadomi nia?
Ita hatudu ita-nia domin ba Jeová hodi halo tuir nia. (Lee 1 João 5:3.) Nia la obriga ema atu halo tuir nia. Duké halo nuneʼe, nia fó oportunidade ba ita ida-idak atu hili hodi halo tuir nia ka lae. Tanbasá? Jeová hakarak ita halo tuir ‘husi ita-nia laran’. (Roma 6:17) Neʼe katak, nia hakarak ita halo tuir nia tanba domin, laʼós tanba nia obriga ita. Parte 3 no 4 husi livru neʼe sei ajuda Ita atu hatudu domin ba Jeová hodi halo tuir buat neʼebé halo nia kontente no hasees an husi buat neʼebé nia la gosta.
2. Tanbasá dala ruma susar atu hatudu katak ita hadomi Jeová?
“Ema laran-loos hetan susar barak.” (Salmo 34:19) Ita hotu luta hasoru ita rasik nia fraku nuʼudar ema neʼebé la perfeitu. No ita mós karik hasoru problema ekonomia, situasaun neʼebé la iha justisa, no susar seluk tan. Bainhira ita hasoru problema oioin, karik ita sente susar atu halo tuir Jeová nia hakarak. Dala ruma ita sente hanesan neʼe duni tanba fasil liu atu halo buat neʼebé sala. Maibé kuandu Ita halo tuir buat neʼebé Jeová haruka, Ita hatudu katak Ita hadomi nia liu fali buat seluk no Ita laran-metin ba nia. No se Ita halo nuneʼe, Jeová mós sei laran-metin ba Ita. Nia sei nunka husik Ita.—Lee Salmo 4:3.
KEʼE KLEʼAN
Buka-hatene tanbasá Jeová kontente kuandu Ita halo tuir nia. No aprende kona-ba saida mak bele ajuda Ita atu kontinua halo tuir nia.
3. Satanás duun Ita
Tuir livru Job iha Bíblia, Satanás hasaʼe lia laʼós deʼit hodi duun Job, maibé nia mós duun ema hotu neʼebé hakarak serbí Jeová. Lee Job 1:1, 6–2:10, depois koʼalia hamutuk kona-ba pergunta tuirmai:
-
Tuir Satanás nia hanoin, tanbasá mak Job halo tuir Jeová?—Haree Job 1:9-11.
-
Satanás hatete saida kona-ba ema hotu, inklui Ita rasik?—Haree Job 2:4.
Lee Job 27:5b, depois koʼalia hamutuk kona-ba pergunta tuirmai:
-
Oinsá mak Job hatudu katak nia hadomi duni Jeová ho laran?
Job hatudu katak nia hadomi Jeová hodi laran-metin halo tuir ninia hakarak
Ita hatudu katak ita hadomi Jeová hodi laran-metin halo tuir ninia hakarak
4. Halo Jeová nia laran haksolok
Lee Provérbios 27:11, depois koʼalia hamutuk kona-ba pergunta tuirmai:
-
Jeová sente oinsá se Ita hatudu matenek no halo tuir nia? Tanbasá?
5. Ita bele laran-metin ba Jeová
Ita-nia domin ba Jeová book ita atu fó-hatene ema seluk kona-ba nia. Ita-nia laran-metin ba nia book ita atu halo nuneʼe maski iha tempu susar. Loke VÍDEO, depois koʼalia hamutuk kona-ba pergunta tuirmai.
-
Dala ruma Ita sente susar atu fó-hatene ema seluk kona-ba Jeová ka lae?
-
Iha vídeo neʼe, saida mak ajuda Gerson atu kontrola ninia sentimentu taʼuk?
Fasil liu atu laran-metin ba Jeová se ita hadomi buat neʼebé nia hadomi no odi buat neʼebé nia odi. Lee Salmo 97:10, depois koʼalia hamutuk kona-ba pergunta tuirmai:
-
Tuir buat neʼebé Ita aprende ona, saida deʼit mak Jeová hadomi? Saida deʼit mak nia odi?
-
Saida mak bele ajuda Ita atu hadomi buat neʼebé diʼak no odi buat neʼebé aat?
6. Halo tuir Jeová lori benefísiu mai ita
Halo tuir Jeová mak dalan neʼebé diʼak liu. Lee Isaias 48:17, 18, depois koʼalia hamutuk kona-ba pergunta tuirmai:
-
Ita rasik fiar ka lae katak Jeová sempre hatene buat neʼebé diʼak liu mai ita? Tanbasá?
-
Toʼo agora, Ita hetan benefísiu saida deʼit tanba estuda Bíblia no aprende kona-ba Maromak Jeová?
EMA BALU DEHAN: “Haʼu-nia hahalok diʼak ka aat, Maromak la interese.”
-
Eskritura saida mak Ita bele uza atu hatudu katak ita-nia hahalok bele halo Jeová kontente ka triste?
PONTU IMPORTANTE
Ita bele hatudu ita-nia domin ba Jeová hodi halo tuir nia no laran-metin nafatin maski hasoru susar oioin.
Rezumu
-
Saida mak Ita aprende husi Job nia ezemplu?
-
Oinsá mak Ita sei hatudu katak Ita hadomi Jeová?
-
Saida mak bele ajuda Ita atu laran-metin nafatin ba Jeová?
BUKA-HATENE LIUTÁN
Buka-hatene oinsá Ita bele laran-metin ba Jeová no mós ba kongregasaun.
Aprende liután oinsá mak Satanás duun ema.
“Job nafatin laran-metin” (Bíblia nia Mensajen mak Saida? parte 6)
Haree toʼok oinsá mak labarik sira mós bele hatudu sai sira-nia domin ba Jeová.
Oinsá mak joven sira bele nafatin laran-metin ba Maromak maski hetan tentasaun husi joven seluk?
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
