LISAUN 40
Oinsá mak ita bele moos tuir Maromak nia haree?
Imajina toʼok, inan ida ajuda ninia oan-mane neʼebé sei kiʼik prepara atu bá eskola. Inan neʼe haree se nia oan hariis ona, no hatais roupa neʼebé moos no la sabraut. Neʼe ajuda oan atu iha saúde diʼak, no hatudu mós ba ema seluk katak labarik neʼe nia inan-aman tau matan didiʼak nia. Nuneʼe mós ho ita-nia Aman Jeová. Nia hadomi ita no hakarak ita atu moos iha dalan fíziku no morál. Kuandu ita moos nafatin, neʼe lori benefísiu mai ita, no lori hahiʼi ba Aman Jeová.
1. Oinsá mak ita bele moos iha dalan fíziku?
Jeová hatete mai ita: “Imi tenkesér santu.” (1 Pedro 1:16) Atu bele santu, ita presiza moris ho moos iha dalan fíziku no morál. Ita bele moris ho moos iha dalan fíziku hodi hariis beibeik, fase ita-nia roupa, karreta ka motór, hamoos uma no arruma didiʼak sasán. Ita mós bele ajuda hamoos ita-nia Reuniaun-Fatin. Kuandu ita mantein buat hotu moos, neʼe bele lori hahiʼi ba Maromak Jeová.—2 Korinto 6:3, 4.
2. Atu moos nafatin, ita presiza hadook an husi toman saida deʼit?
Bíblia haruka ita atu “hamoos ita-nia an husi buat hotu neʼebé hafoʼer isin no neon”. (2 Korinto 7:1) Neʼe katak ita presiza sees husi buat naran deʼit neʼebé bele estraga ita-nia isin no neon. Ita-nia hanoin tenke halo Jeová kontente, tan neʼe ita hakaʼas an atu la simu hanoin neʼebé la loos. (Salmo 104:34) Ita mós hakaʼas an atu la uza liafuan foʼer.—Lee Koloso 3:8.
Saida tan mak bele halo ita la moos iha dalan fíziku ka morál? Ita lakohi simu buat neʼebé bele hafoʼer ita-nia isin, hanesan fuma tabaku, mama malus, no uza droga. Hodi sees husi buat sira-neʼe, ita bele proteje ita-nia saúde no hatudu katak ita hafolin moris nuʼudar prezente husi Maromak. Ita mós hakaʼas an atu iha morál neʼebé moos hodi kontra hasoru toman neʼebé foʼer hanesan halo masturbasaun ka haree pornografia. (Salmo 119:37; Éfeso 5:5) Karik ita sente susar atu halakon toman sira-neʼe, maibé Jeová bele ajuda ita.—Lee Isaias 41:13.
KEʼE KLEʼAN
Aprende oinsá moos nafatin iha dalan fíziku lori hahiʼi ba Jeová, no oinsá atu kontra hasoru toman neʼebé foʼer.
3. Moos iha dalan fíziku lori hahiʼi ba Jeová
Ita bele aprende Jeová nia hanoin kona-ba moos liuhusi ninia mandamentu ba ema Izraél iha tempu antigu. Lee Éxodo 19:10 no 30:17-19, depois koʼalia hamutuk kona-ba pergunta tuirmai:
-
Tuir eskritura sira-neʼe, Jeová hanoin oinsá kona-ba moos iha dalan fíziku?
-
Saida deʼit mak Ita bele halo atu moos nafatin iha dalan fíziku?
Atu moos nafatin iha dalan fíziku presiza tempu no hakaʼas an. Maibé ita hotu bele halo ida-neʼe, no neʼe la depende ba ita-nia hela-fatin ka kondisaun ekonomia. Loke VÍDEO, depois koʼalia hamutuk kona-ba pergunta tuirmai.
-
Se ita-nia hatais no sasán sira moos nafatin, oinsá mak ida-neʼe bele book ema atu respeitu ita-nia serbisu haklaken?
4. Hapara toman neʼebé aat
Jeová bele ajuda ita atu hapara toman neʼebé aat
Se Ita mak fumadór ka uza droga, karik Ita hatene susar tebes atu hapara toman neʼe. Saida mak bele ajuda? Haree toʼok oinsá mak toman neʼe afeta Ita. Lee Mateus 22:37-39, depois koʼalia hamutuk kona-ba oinsá tabaku ka droga bele afeta . . .
-
ema nia relasaun ho Jeová.
-
ema neʼe nia família no ema seluk neʼebé besik.
Halo planu atu hapara toman neʼebé aat. a Loke VÍDEO.
Lee Filipe 4:13, depois koʼalia hamutuk kona-ba pergunta tuirmai:
-
Oinsá mak halo orasaun beibeik, estuda Bíblia, no tuir reuniaun bele ajuda ita hapara toman neʼebé aat?
5. Kontra hasoru hanoin no hahalok neʼebé la moos
Lee Koloso 3:5, depois koʼalia hamutuk kona-ba pergunta tuirmai:
-
Oinsá ita hatene katak pornografia, sexting, b no masturbasaun mak la moos tuir Jeová nia haree?
-
Tuir Ita-nia hanoin, ita bele ka lae iha morál neʼebé moos tuir Jeová nia hakarak? Tanbasá?
Haree liután oinsá atu kontra hasoru hanoin neʼebé la moos. Loke VÍDEO.
Jesus uza ilustrasaun atu hatudu katak ita presiza halo buat ruma atu nafatin iha morál neʼebé moos. Lee Mateus 5:29, 30, depois koʼalia hamutuk kona-ba pergunta tuirmai:
-
Jesus la dehan katak ita tenke hakanek ita-nia isin, maibé nia fó sai katak ita presiza halo buat ruma. Ita bele halo saida atu hasees an husi hanoin neʼebé foʼer? c
Se Ita luta hela atu halakon hanoin neʼebé foʼer, Jeová hafolin Ita-nia hakaʼas an. Lee Salmo 103:13, 14, depois koʼalia hamutuk kona-ba pergunta tuirmai:
-
Se Ita sente susar atu hapara toman neʼebé aat, oinsá mak eskritura neʼe ajuda Ita atu kontinua hakaʼas an?
Keta rende an!
Fasil atu hanoin: ‘Haʼu labele, karik diʼak liu haʼu rende an deʼit.’ Maibé hanoin toʼok kona-ba neʼe: Ema neʼebé halai maratona maski nia sidi no monu, neʼe la dehan katak nia lakon ona ka tenke hahú fali husi primeiru, maibé nia bele kontinua halai nafatin. Nuneʼe mós, se Ita monu fali ba toman aat, neʼe la dehan katak Ita lakon ona atu luta hasoru toman aat neʼe. No neʼe mós la dehan katak Ita-nia hakaʼas an hotu saugati deʼit. Normál se ita monu fali ba toman neʼe, tanba neʼe mak parte husi ita-nia hakaʼas an atu hetan susesu. Keta rende an! Ho Jeová nia ajuda, Ita bele hapara toman neʼebé aat.
EMA BALU DEHAN: “Haʼu toman ona. Haʼu labele hapara ida-neʼe.”
-
Eskritura saida mak Ita bele uza atu hatudu ba nia katak ho Jeová nia ajuda, nia bele hapara toman aat neʼe?
PONTU IMPORTANTE
Ita halo Jeová kontente hodi nafatin moos iha dalan fíziku, hanoin, no hahalok.
Rezumu
-
Tanbasá importante tebes atu moos nafatin?
-
Oinsá mak Ita bele moos nafatin iha dalan fíziku?
-
Oinsá mak Ita bele iha hanoin no hahalok neʼebé moos nafatin?
BUKA-HATENE LIUTÁN
Buat simples saida mak Ita bele halo atu bele moos iha dalan fíziku maski Ita-nia kondisaun ekonomia mak limitadu?
Buka-hatene hakat sira neʼebé Ita bele halo atu para fuma.
Buka-hatene impaktu husi pornografia.
“Pornografia—Bele estraga ita ka lae?” (Livru Haklaken, 1 Outubru 2013)
Haree toʼok oinsá mane ida konsege husik ninia toman atu haree pornografia.
“Haʼu monu dala barak mak foin hetan susesu” (Livru Haklaken No. 4 2016)
a Informasaun ho títulu “Oinsá atu para fuma?” husi parte “Buka-hatene liután” iha lisaun neʼe esplika kona-ba hakat sira neʼebé ita bele halo atu hapara toman neʼe.
b Sexting refere ba haruka mensajen, foto, ka vídeo neʼebé la morál liuhusi sasán eletróniku.
c Atu hetan ajuda hapara toman atu halo masturbasaun, haree “Oinsá haʼu bele hapara toman atu halo masturbasaun?” iha livru Pergunta Husi Joven Sira—Resposta neʼebé bele ajuda, Volume 1, kapítulu 25.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
