Apéndise
1. Buka-hatene Babilónia Boot reprezenta saida
Oinsá mak ita bele hatene katak “Babilónia Boot” reprezenta relijiaun falsu hotu? (Apokalipse 17:5) Haree toʼok razaun balu tuirmai:
-
Nia fó influénsia ba mundu tomak. Bíblia dehan Babilónia Boot neʼe tuur iha “ema-lubun sira” no “nasaun sira” nia leten. Nia “ukun liurai sira iha mundu”.—Apokalipse 17:15, 18.
-
Nia laʼós organizasaun polítiku ka komersiál nian. Bainhira Babilónia Boot lakon, “liurai sira iha mundu” no “negósiu-naʼin sira” sei iha.—Apokalipse 18:9, 15.
-
Nia reprezenta Maromak iha dalan la loos. Babilónia Boot mak feto-aat ida, tanba nia iha relasaun besik ho governu sira hodi bele hetan osan no benefísiu seluk. (Apokalipse 17:1, 2) Nia lohi ema husi nasaun hotu. No nia tenke responsabiliza kona-ba ema barak nia raan.—Apokalipse 18:23, 24.
2. Bainhira mak Mesias mosu mai?
Bíblia fó-hatene nanis katak presiza sura semana 69 toʼo tempu neʼebé Mesias mosu mai.—Lee Daniel 9:25.
-
Horibainhira mak semana 69 komesa? Iha tinan 455 AEC, bainhira Governadór Neemias toʼo iha Jeruzalein atu “hadiʼa no harii fali” sidade neʼe.—Daniel 9:25; Neemias 2:1, 5-8.
-
Semana 69 mak kleur oinsá? Iha Bíblia nia profesia balu, loron ida reprezenta tinan ida. (Números 14:34; Ezequiel 4:6) Tan neʼe, semana ida reprezenta tinan hitu. Iha profesia neʼe, semana 69 mak tinan 483 (semana 69 x loron 7).
-
Horibainhira mak semana 69 remata? Kuandu sura tinan 483 husi tinan 455 AEC, tempu neʼe remata iha tinan 29 EC. a Neʼe mak tinan neʼebé Jesus hetan batizmu no sai nuʼudar Mesias!—Lucas 3:1, 2, 21, 22.
3. Prosesu médiku neʼebé envolve raan
Iha prosesu médiku oioin neʼebé uza pasiente rasik nia raan. Dala ruma doutór balu rekomenda atu rai pasiente ka ema seluk nia raan, no liutiha loron balu ka semana balu mak uza fali ida-neʼe kuandu halo operasaun. Ema Kristaun sei la simu prosesu hanesan neʼe.—Deuteronómio 15:23.
Maibé iha mós prosesu balu neʼebé karik la kontra Bíblia nia matadalan. Neʼe inklui teste raan, emodiálize, emodiluisaun, rekuperasaun raan ka uza mákina korasaun-pulmaun. Kona-ba prosesu hanesan neʼe, ema Kristaun ida-idak mak deside oinsá mak prosesu, teste ka terapia ruma sei halaʼo. Doutór ida-idak uza prosesu iha dalan neʼebé la hanesan. Tan neʼe antes atu simu prosesu médiku ruma, ema Kristaun presiza buka-hatene saida mak doutór sira sei halo ho ninia raan. Hanoin toʼok pergunta sira tuirmai:
-
Oinsá se haʼu-nia raan suli liuhusi mákina ida no karik prosesu neʼe para tiha ba tempu balu? Haʼu-nia konxiénsia husik haʼu atu haree raan neʼe nafatin parte ba haʼu-nia isin no la presiza ‘fakar ba rai’ ka lae?—Deuteronómio 12:23, 24.
-
Oinsá se durante tratamentu médiku, doutór hasai haʼu-nia raan balu, depois halo mudansa ruma no hatama fali ba haʼu-nia isin? Haʼu bele simu prosesu hanesan neʼe, ka haʼu-nia konxiénsia sente la diʼak?
4. Feen-laʼen haketak malu
Maromak nia Liafuan fó sai katak ema Kristaun labele haketak malu ho ninia kaben ho razaun neʼebé kiʼik, no ema neʼebé haketak malu labele kaben fali ho ema seluk. (1 Korinto 7:10, 11) Iha situasaun balu neʼebé karik ema Kristaun hanoin atu haketak an husi ninia kaben.
-
Lakohi tau matan ba família nia presiza: Laʼen lakohi sustenta ninia família, toʼo kuran buat neʼebé presiza atu halaʼo moris.—1 Timóteo 5:8.
-
Halo violénsia makaʼas: Feen ka laʼen halo violénsia makaʼas no hakanek ninia kaben toʼo lori perigu ba ninia kaben nia moris.—Galásia 5:19-21.
-
Lori perigu boot ba relasaun ho Jeová: Feen ka laʼen kontra makaʼas ninia kaben toʼo labele tan serbí Jeová.—Apóstolu 5:29.
5. Loron-boot no selebrasaun sira
Ema Kristaun la hola parte iha loron-boot sira neʼebé Jeová la simu. Maibé sira ida-idak tenke uza sira-nia konxiénsia neʼebé hetan ona treinu husi Bíblia no deside oinsá atu hasoru situasaun oioin neʼebé mosu bainhira ema barak selebra loron-boot sira-neʼe. Hanoin toʼok ezemplu balu.
-
Ema ruma fó boas-festas ba Ita. Karik Ita bele hatete deʼit “Obrigadu”. Se nia hakarak hatene liután kona-ba Ita-nia fiar, Ita bele esplika tanbasá Ita la selebra loron-boot neʼe.
-
Ita-nia kaben neʼebé laʼós Testemuña ba Jeová konvida Ita atu bá han hamutuk ho família sira iha tempu neʼebé ema barak selebra loron-boot. Se Ita-nia konxiénsia husik Ita atu bá, Ita bele esplika nanis ba Ita-nia kaben katak Ita sei la hola parte iha toman ruma neʼebé mai husi relijiaun falsu se ema ruma halo buat sira-neʼe durante han hamutuk.
-
Ita-nia patraun fó bonus ba Ita iha tempu neʼebé ema barak selebra loron-boot. Ita labele simu bonus neʼe ka lae? Neʼe depende. Ita-nia patraun fó osan neʼe nuʼudar prezente ba selebrasaun neʼe, ka nia aumenta Ita-nia saláriu hodi hatudu deʼit katak nia hafolin Ita-nia serbisu diʼak?
-
Ema ruma fó prezente ba Ita iha tempu neʼebé ema barak selebra loron-boot. Karik nia hatete: “Haʼu hatene ó la selebra loron-boot neʼe, maibé haʼu hakarak fó ida-neʼe ba ó.” Karik ema neʼe hakarak deʼit atu hatudu laran-diʼak ba Ita. Ka, Ita sente ema neʼe koko Ita-nia fiar atu hola parte iha selebrasaun neʼe? Hanoin didiʼak no Ita rasik mak sei deside atu simu prezente neʼe ka lae. Iha situasaun hotu, ita hakarak mantein ita-nia konxiénsia moos no laran-metin ba Jeová.—Apóstolu 23:1.
6. Moras neʼebé bele hadaʼet
Tanba ita hadomi ema, ita kuidadu tebes atu la hadaʼet moras ba ema seluk. Ita mós presiza kuidadu nafatin se ita hanoin katak ita kona moras neʼebé bele hadaʼet maski ita seidauk hatene ho loloos. Ita hakarak halo nuneʼe tanba Bíblia hatete: “Imi tenke hadomi imi-nia maluk hanesan imi-nia an rasik.”—Roma 13:8-10.
Oinsá mak ema neʼebé kona ona moras neʼebé hadaʼet bele aplika mandamentu neʼe? Nia tenke kuidadu atu la hakbesik ema seluk hodi kaer liman, hakoʼak, ka reʼi. Nia mós labele hanoin negativu se ema seluk la konvida nia ba sira-nia uma tanba hakarak proteje sira-nia família. No antes atu hetan batizmu, nia tenke fó-hatene ba koordenadór ba grupu katuas kona-ba ninia situasaun atu nuneʼe irmaun sira bele halo arranju hodi ema seluk neʼebé sei hetan batizmu labele kona ninia moras. Antes atu namora, se ema ida sente katak nia kona ona moras ruma neʼebé bele hadaʼet, nia presiza prontu atu koko raan. Hodi halo nuneʼe, ita hatudu katak ita hanoin ema seluk hodi halo tuir konsellu atu ‘la buka diʼak deʼit ba ita-nia an rasik, maibé buka mós ema seluk nia diʼak’.—Filipe 2:4.
7. Negósiu no buat legál
Ita bele sees husi problema barak hodi halo dokumentu kontratu kona-ba osan ka negósiu maski neʼe mak ho ita-nia maluk Kristaun. (Jeremias 32:9-12) Maibé dala ruma problema kiʼik bele mosu entre ema Kristaun tanba la konkorda malu kona-ba osan ka buat seluk. Se ida-neʼe akontese, sira presiza hadiʼa lalais problema neʼe ho dame no labele fó sai problema neʼe ba ema seluk.
Maibé oinsá se iha problema neʼebé sériu hanesan hamatak ema ka koʼalia bosok hodi hafoʼer ema nia naran? (Lee Mateus 18:15-17.) Jesus fó-hatene mai ita hakat tolu neʼebé ita bele halo atu rezolve:
-
Koko rezolve problema entre Ita ho ema neʼebé iha problema ho Ita.—Haree versíkulu 15.
-
Se la susesu, husu ajuda husi ema Kristaun ida ka rua neʼebé maduru iha kongregasaun atu koʼalia hamutuk.—Haree versíkulu 16.
-
Se problema neʼe labele rezolve, Ita bele husu katuas sira-nia ajuda.—Haree versíkulu 17.
Baibain, diʼak liu atu la lori ita-nia maluk Kristaun ba tribunál tanba neʼe bele hafoʼer Jeová nia naran no mós kongregasaun. (1 Korinto 6:1-8) Maibé iha duni situasaun balu neʼebé ema Kristaun presiza lori ba tribunál atu rezolve, porezemplu kazu kona-ba divórsiu, desizaun kona-ba sé mak sei tau matan ba oan, osan atu sustenta família, trata dokumentu legál atu hetan asuransi, deklara katak labele selu fali debe (bangkrut), ka fahe liman-rohan. Se ema Kristaun ida lori problema sira hanesan neʼe ba tribunál atu rezolve ho dame, nia la kontra Bíblia nia matadalan.
Kuandu ema ida halo krime neʼebé sériu, hanesan estraga ema, abuza labarik, asalta, naʼok buat neʼebé folin-boot, ka oho ema, no se ema Kristaun ida kesar ba autoridade sira, nia la kontra Bíblia nia matadalan.
a Husi tinan 455 AEC toʼo 1 AEC mak tinan 454. Husi tinan 1 AEC toʼo 1 EC mak tinan ida (tanba la iha tinan 0). No husi tinan 1 EC toʼo 29 EC mak tinan 28. Totál mak tinan 483.
