Jesus mak Ulun ba kongregasaun Kristaun. (Éfeso 5:23) Ohin loron, Jesus nuʼudar liurai iha lalehan dirije ninia dixípulu sira iha rai liuhusi “atan laran-metin no matenek”. (Lee Mateus 24:45.) Tanba atan neʼe simu knaar husi Jesus rasik, atan neʼe iha podér atu foti desizaun balu. Maibé, atan neʼe tenke halo tuir Kristu no serbí ninia alin sira. Sé mak atan neʼe? Oinsá mak atan neʼe tau matan mai ita?

1. Sé mak “atan laran-metin no matenek”?

Jeová sempre uza mane ida ka grupu kiʼik ida atu fó matadalan ba ninia povu. (Malaquias 2:7; Ebreu 1:1) Depois Jesus mate, apóstolu no katuas sira iha Jeruzalein mak dirije kongregasaun. (Apóstolu 15:2) Hanesan tempu uluk, ohin loron mós grupu katuas balu neʼebé serbí nuʼudar Grupu Administradór husi Testemuña ba Jeová mak fó ai-han espirituál no dirije serbisu haklaken. Grupu neʼe mak “atan laran-metin no matenek” neʼebé Jesus hili. (Mateus 24:45a) Membru hotu husi Grupu Administradór mak irmaun Kristaun neʼebé hetan knaar liuhusi espíritu no iha esperansa atu ukun hamutuk ho Kristu iha Maromak nia Ukun iha lalehan kuandu sira remata ona sira-nia moris iha mundu.

2. Atan laran-metin fó ai-han espirituál hanesan saida?

Jesus hatete katak atan laran-metin sei “fó ai-han ba [maluk Kristaun sira] iha tempu neʼebé loos”. (Mateus 24:45b) Hanesan ai-han ajuda ita atu iha saúde diʼak no forte, ai-han espirituál neʼebé mai husi Maromak nia Liafuan mós bele fó ita forsa neʼebé ita presiza atu laran-metin ba Jeová no halaʼo serbisu neʼebé Jesus fó ona mai ita. (1 Timóteo 4:6) Ita simu ai-han espirituál neʼe liuhusi reuniaun sira, reuniaun boot, publikasaun no vídeo sira kona-ba Bíblia neʼebé bele ajuda ita komprende Maromak nia hakarak no hametin ita-nia relasaun ho nia nuʼudar belun.

 KEʼE KLEʼAN

3. Jeová hakarak ninia povu organiza ho didiʼak

Jesus dirije Grupu Administradór atu organiza Testemuña ba Jeová nia atividade sira. Iha apóstolu sira-nia tempu, Jesus mós dirije ema Kristaun sira iha dalan hanesan neʼe. Loke VÍDEO.

Lee 1 Korinto 14:33, 40, depois koʼalia hamutuk kona-ba pergunta tuirmai:

• Husi eskritura neʼe, oinsá mak ita hatene katak Jeová hakarak ninia Testemuña sira organiza ho didiʼak?

4. Atan laran-metin organiza serbisu haklaken

Haklaken mak serbisu neʼebé importante liu hotu ba ema Kristaun iha tempu uluk. Lee Apóstolu 8:14, 25, depois koʼalia hamutuk kona-ba pergunta tuirmai:

• Iha apóstolu sira-nia tempu, sé mak dirije serbisu haklaken?

• Saida mak Pedro no João halo bainhira simu matadalan husi apóstolu sira?

Atividade importante liu neʼebé Grupu Administradór organiza mak serbisu haklaken. Loke VÍDEO.

 Jesus hatete katak serbisu haklaken mak importante duni. Lee Marcos 13:10, depois koʼalia hamutuk kona-ba pergunta tuirmai:

• Tanbasá serbisu haklaken mak importante tebes ba Grupu Administradór?

• Tanbasá ita presiza “atan laran-metin no matenek” atu organiza serbisu haklaken iha mundu tomak?

5. Atan laran-metin fó matadalan

Grupu Administradór fó matadalan ba ema Kristaun loos iha mundu tomak. Oinsá mak sira deside atu fó matadalan ruma? Haree toʼok oinsá grupu administradór iha apóstolu sira-nia tempu halo ida-neʼe. Lee Apóstolu 15:1, 2, depois koʼalia hamutuk kona-ba pergunta tuirmai:

• Ema Kristaun balu iha tempu uluk haksesuk malu kona-ba saida?

• Paulo, Barnabé, no sira seluk bá hasoru sé atu rezolve problema neʼe?

Lee Apóstolu 15:12-18, 23-29, depois koʼalia hamutuk kona-ba pergunta tuirmai:

• Antes halo desizaun, saida mak grupu administradór halo atu hetan matadalan husi Maromak kona-ba problema neʼe?​—Haree versíkulu 12, 15, no 28.

Lee Apóstolu 15:30, 31 no 16:4, 5, depois koʼalia hamutuk kona-ba pergunta tuirmai:

• Kuandu ema Kristaun iha tempu uluk simu matadalan husi grupu administradór, sira sente oinsá?

• Tanba sira halo tuir, oinsá mak Jeová fó bensaun ba sira?

Lee 2 Timóteo 3:16 no Tiago 1:5, depois koʼalia hamutuk kona-ba pergunta tuirmai:

• Ohin loron Grupu Administradór buka matadalan husi neʼebé antes halo desizaun?

 PONTU IMPORTANTE

Grupu Administradór mak “atan laran-metin no matenek” neʼebé Jesus hili atu dirije no fó ai-han espirituál ba ema Kristaun iha mundu tomak.

Rezumu

• Sé mak hili “atan laran-metin no matenek”?

• Oinsá mak Grupu Administradór tau matan mai ita?

• Ita fiar katak Grupu Administradór mak “atan laran-metin no matenek” ka lae?