Ema Kristaun neʼebé loos deside metin atu la husik buat ida ka ema ida atu hanetik sira-nia adorasaun ba Jeová. Klaru katak Ita mós sente hanesan neʼe. Jeová hafolin Ita-nia laran-metin. (Lee 1 Krónikas 28:9.) Situasaun saida mak bele koko Ita-nia laran-metin, no saida mak bele ajuda Ita?

1. Oinsá mak ema seluk bele koko ita-nia laran-metin ba Jeová?

Ema balu sei koko hapara ita atu serbí Jeová. Sé mak sei halo nuneʼe? Ema balu neʼebé husik ona lia-loos koʼalia bosok kona-ba Maromak nia organizasaun atu estraga ita-nia fiar. Ema hanesan neʼe mak bolu nuʼudar apóstata sira. Ulun-naʼin relijiaun balu mós habelar informasaun falsu kona-ba ita, hodi halo ema neʼebé la kuidadu bele monu ba sira-nia lasu no husik lia-loos. Perigu tebes atu halo diskusaun ho sira, lee sira-nia livru ka informasaun liuhusi internét, ka haree sira-nia vídeo. Kona-ba sira neʼebé koko hanetik ema seluk atu la laran-metin tan ba Jeová, Jesus hatete: “Husik deʼit sira. Sira hanesan ema matan-delek neʼebé hatudu dalan ba matan-delek seluk. Entaun, se matan-delek ida lori matan-delek seluk, sira naʼin-rua sei monu ba rai-kuak.”​—Mateus 15:14.

Oinsá se ema neʼebé ita koñese lakohi tan sai nuʼudar Testemuña ba Jeová? Se neʼe mak Ita-nia família ka belun ida, ita sei sente triste tebes. Ema neʼe mós karik obriga ita atu hili nia ka Jeová. Ita tenke deside metin atu kontinua laran-metin ba Maromak liu fali buat seluk hotu. (Mateus 10:37) Tan neʼe, ita halo tuir Jeová nia mandamentu atu la ransu ho ema hanesan neʼe.​—Lee 1 Korinto 5:11.

2. Oinsá mak ita bele hatudu laran-metin ba Jeová liuhusi ita-nia desizaun?

Domin ba Jeová sei book ita atu la hola parte iha relijiaun falsu. Tan neʼe, ita la envolve ho serbisu, organizasaun, ka atividade ruma neʼebé iha ligasaun ho relijiaun falsu. Jeová fó avizu mai ita: ‘Haʼu-nia povu, sai husi Babilónia Boot.’​—Apokalipse 18:2, 4.

 KEʼE KLEʼAN

3. Kuidadu ba mestre falsu sira

Saida mak ita presiza halo se ita rona buat negativu kona-ba Jeová nia organizasaun? Lee Provérbios 14:15, depois koʼalia hamutuk kona-ba pergunta tuirmai:

• Tanbasá mak ita presiza kuidadu atu la fiar kedas buat hotu neʼebé ita rona?

Lee 2 João 10, depois koʼalia hamutuk kona-ba pergunta tuirmai:

• Ita presiza halo saida ba apóstata sira?

• Maski ita la koʼalia ho apóstata sira, oinsá mak ita bele hetan influénsia husi sira-nia hanorin?

• Tuir Ita-nia hanoin, Jeová sente oinsá se ita tau atensaun ba liafuan negativu kona-ba nia ka ninia organizasaun?

4. Laran-metin ba Maromak kuandu maluk ida halo sala

Se ita hatene katak ema ruma iha kongregasaun halo sala neʼebé sériu, ita tenke halo saida? Haree toʼok prinsípiu ida husi Maromak nia Ukun-Fuan ba ema Izraél antigu. Lee Levítico 5:1.

Hanesan eskritura neʼe hatete, se ita hatene katak ema ida halo sala neʼebé sériu, ita presiza fó-hatene ba katuas sira. Maibé antes halo ida-neʼe, ita hakarak hatudu laran-diʼak hodi anima nia atu nia rasik mak hakbesik ba katuas sira no fó sai ninia sala. Se nia la halo ida-neʼe, ita-nia domin ba Jeová sei motiva ita atu koʼalia ba katuas sira kona-ba buat neʼebé ita hatene. Oinsá mak neʼe hatudu katak ita hadomi no laran-metin ba . . .

• Maromak Jeová?

• ema neʼebé halo ona sala?

• ema seluk iha kongregasaun?

 5. Hadook an husi Babilónia Boot

 PONTU IMPORTANTE

Atu kontinua laran-metin ba Jeová, ita labele ransu ho ema neʼebé la laran-metin ba nia. Ita mós presiza duni haketak an husi relijiaun falsu.

Rezumu

• Tanbasá mak ita labele haree, lee ka rona ba apóstata sira-nia ideia?

• Saida mak ita presiza halo ba ema neʼebé lakohi tan sai nuʼudar Testemuña ba Jeová?

• Oinsá mak ita bele halo tuir avizu kona-ba sai husi relijiaun falsu?