Iha neʼebé mak Ita bele hetan esperansa neʼebé loos?

ITA-NIA relójiu mate no haree hanesan aat ona. Bainhira Ita buka solusaun atu hadiʼa, Ita haree iha opsaun barak tebes. Promosaun atu hadiʼa relójiu barak tebes, sira hotu koʼalia iha dalan neʼebé halo Ita fiar, no sira balu fó sai sira-nia hanoin neʼebé la hanesan. Maibé, oinsá se Ita haree katak Ita-nia viziñu ida mak mane neʼebé matenek tebes no nia mak halo relójiu neʼe tinan balu liubá? No mós, mane neʼe fó-hatene ba Ita katak, nia prontu atu ajuda Ita no la presiza selu. Klaru katak Ita sei hili opsaun neʼe, loos ka lae?

Agora, kompara relójiu neʼe ho Ita-nia abilidade atu tau esperansa. Se Ita haree katak Ita lakon esperansa hanesan ema barak ohin loron neʼebé hasoru problema oioin, Ita sei buka ajuda husi neʼebé? Ema barak dehan katak sira bele rezolve problema sira, maibé se iha opiniaun barak demais ba problema neʼe, bele halo konfuzaun no mosu hanoin neʼebé kontra malu. Entaun, tanbasá la buka-hatene hanoin neʼebé loos husi Ida neʼebé kria ita ema ho abilidade atu hanoin kona-ba esperansa? Bíblia hatete katak “tuir loloos nia la dook husi ita ida-idak” no nia prontu tebes atu ajuda ita.​—Apóstolu 17:27; 1 Pedro 5:7.

Esplikasaun kleʼan liu kona-ba esperansa

Bíblia nia esplikasaun kona-ba esperansa mak diʼak liu fali ema nia hanoin kona-ba esperansa neʼebé mai husi doutór, matenek-naʼin, no psikólogu sira. Iha Bíblia, liafuan orijinál neʼebé tradús nuʼudar “esperansa” mak hein ho hakarak neʼebé makaʼas no hein ba buat neʼebé diʼak. Esperansa fahe ba aspetu rua, neʼe mak hakarak neʼebé makaʼas ba buat neʼebé diʼak no mós iha razaun neʼebé ita bele tau fiar katak buat neʼebé diʼak sei akontese. Esperansa neʼebé Bíblia fó mai ita mak buat neʼebé loos duni. Esperansa neʼe iha fundasaun neʼebé metin liuhusi faktu no evidénsia.

Ita bele dehan katak esperansa atu hanesan ho fiar. Fiar tenkesér bazeia ba faktu no evidénsia neʼebé loos. (Ebreu 11:1) Maski nuneʼe, Bíblia esplika diferensa entre fiar no esperansa.​—1 Korinto 13:13.

Nuʼudar ilustrasaun: Bainhira Ita husu apoiu husi belun, ita bele espera katak nia sei ajuda Ita. Ita tau esperansa ba nia tanba iha razaun. Ita fiar Ita-nia belun tanba Ita koñese didiʼak nia, no Ita haree ona buat diʼak no laran-diʼak neʼebé nia hatudu iha tempu pasadu. Entaun fiar no esperansa neʼe iha ligasaun neʼebé metin, maibé buat rua neʼe la hanesan. Oinsá mak ita bele tau esperansa hanesan neʼe ba Maromak?

Razaun atu iha esperansa

Maromak mak hun ba esperansa neʼebé loos. Bíblia temi Jeová nuʼudar “Izraél nia esperansa”. (Jeremias 14:8) Esperansa naran deʼit neʼebé ninia povu bele tau fiar mak mai husi Nia, tan neʼe nia mak sira-nia esperansa. Esperansa hanesan neʼe mak laʼós hanesan mehi deʼit. Maromak fó ba sira razaun neʼebé forte atu tau esperansa. Durante ninia povu nia moris ba tinan barak, nia hatudu katak nia sempre kumpre ninia promesa sira. Josué neʼebé dirije povu Izraél hatete: “Imi hatene didiʼak . . . katak Jeová, imi-nia Maromak, nia liafuan hotu neʼebé nia hatete ona sai loos duni.”​—Josué 23:14.

Tinan rihun ba rihun liutiha, liafuan neʼe nafatin sai loos. Bíblia hakerek kona-ba promesa furak sira husi Maromak no akontesimentu sira neʼebé klaru kona-ba oinsá ida-neʼe sei kumpre. Ninia promesa sira kona-ba futuru ita bele tau fiar. Tan neʼe dala ruma promesa sira-neʼe hakerek iha dalan neʼebé haree hanesan buat sira-neʼe akontese tiha ona.

Tan neʼe mak ita bele temi Bíblia nuʼudar livru kona-ba esperansa. Nuʼudar Ita aprende oinsá Maromak hatudu interese mai ita ema, neʼe sei fó Ita razaun barak liután atu tau esperansa ba nia. Apóstolu Paulo hakerek: “Buat hotu neʼebé hakerek ona horiuluk kedas, hakerek hodi hanorin ita. Neʼe fó ita esperansa tanba Eskritura sira-neʼe ajuda ita atu tahan no fó kmaan mai ita.”​—Roma 15:4.

Esperansa saida mak Maromak fó mai ita?

Bainhira mak ita sente presiza tebes atu iha esperansa? Bainhira ita besik ona atu mate? Maibé ba ema barak, kuandu ema neʼebé sira hadomi mate, neʼe mak halo sira susar liu atu iha esperansa. Mate mak buat neʼebé duni hela ita loroloron. Dala ruma ita bele halai sees ba tempu uitoan deʼit, maibé ikusmai ita sei mate duni, ita la iha kbiit atu hapara. Ho klaru, Bíblia temi kona-ba mate mak nuʼudar “inimigu ikus”.​—1 Korinto 15:26.

Entaun, oinsá mak ita bele hetan esperansa bainhira hasoru situasaun kona-ba mate? Tuir loloos, eskritura neʼebé temi mate mak nuʼudar inimigu ikus mós dehan katak inimigu ikus neʼe “sei halakon” tiha. Maromak Jeová iha forsa boot liu fali mate. Nia hatudu ona ida-neʼe iha situasaun barak. Oinsá? Hodi halo moris fali ema neʼebé mate ona. Bíblia konta akontesimentu sia kona-ba oinsá Maromak uza ninia kbiit atu fó moris-hiʼas ba ema mate.

Akontesimentu neʼebé úniku mak kuandu Jeová fó ba ninia Oan-Mane Jesus kbiit atu fó moris-hiʼas ba Jesus nia belun ida neʼebé nia hadomi naran Lázaro, neʼebé mate ba loron haat ona. Jesus la halo ida-neʼe ho subasubar, maibé iha ema barak nia oin.​—João 11:38-48, 53; 12:9, 10.

Karik ita hanoin, ‘Se ikusmai ema sira-neʼe sai ferik-katuas no mate fali, entaun tanbasá fó moris-hiʼas ba sira?’ Tuir loloos istória husi Bíblia kona-ba moris-hiʼas hanesan neʼe laʼós deʼit bele ajuda ita atu iha hakarak neʼebé makaʼas katak ita bele hasoru fali ema neʼebé ita hadomi neʼebé mate ona, maibé ita mós iha razaun atu fiar katak sira sei moris fali. Neʼe katak ita iha esperansa neʼebé loos.

Jesus hatete: “Haʼu mak moris-hiʼas no moris.” (João 11:25) Nia mak ida neʼebé Jeová fó kbiit atu fó moris-hiʼas iha dalan neʼebé boot liu. Jesus hatete: “Oras sei toʼo mai kuandu ema hotu neʼebé iha rate laran sei rona ninia lian no sai husi rate.” (João 5:28, 29) Sin, ema hotu neʼebé toba iha rate laran iha esperansa atu hetan moris-hiʼas no moris iha mundu paraízu.

Profeta Isaias uza liafuan neʼebé kona loos ita-nia laran hodi dehan: “Imi-nia ema neʼebé mate sei moris fali. Haʼu-nia povu nia mate-isin sira sei moris fali. Oh imi neʼebé hela iha rai-rahun, hadeer bá no haklalak ho kontente! Tanba imi-nia mahobeen mak hanesan mahobeen iha dadeer, no rai sei fó moris ba ema neʼebé mate ona no kbiit-laek.”​—Isaias 26:19.

Promesa neʼe halo ita sente kmaan, loos ka lae? Ema neʼebé mate nia kondisaun mak hanesan sira hein iha fatin neʼebé seguru liu hotu, hanesan bebé neʼebé hetan protesaun iha inan nia kabun. Tuir loloos ema neʼebé mate ona, sira hotu rai didiʼak iha Maromak neʼebé Aas Liu Hotu nia memória. (Lucas 20:37, 38) No lakleur tan, sira sei hetan moris-hiʼas, tama ba mundu neʼebé nakonu ho kontente, no ema sei fó benvindu ba sira hanesan ho domin família sira fó benvindu ba bebé neʼebé foin moris! Entaun, ita nafatin iha esperansa maski hasoru situasaun mate.

Oinsá esperansa bele fó impaktu ba Ita

Apóstolu Paulo hanorin ita buat barak kona-ba esperansa. Nia temi esperansa nuʼudar buat neʼebé importante tebes husi ekipamentu iha funu espirituál nian, neʼe mak kapasete. (1 Tesalónika 5:8) Neʼe katak sá? Iha Bíblia nia tempu, soldadu sei uza kapasete kuandu halo funu. No tanba uza kapasete, se buat toos ruma kona kapasete neʼe, ita-nia ulun sei iha buat ruma mak salva. Saida mak Paulo hakarak atu hanorin mai ita? Hanesan kapasete neʼebé proteje ita-nia ulun, esperansa mós bele proteje ita-nia neon. Se ita iha esperansa neʼebé metin ba Maromak nia promesa sira, ita-nia neon sei nafatin dame no hakmatek maski mosu situasaun neʼebé la diʼak ka kuandu hasoru situasaun susar. Klaru katak ita hotu presiza kapasete hanesan neʼe loos ka lae?

Paulo mós uza ilustrasaun seluk neʼebé book ita-nia hanoin kona-ba esperansa ba Maromak nia promesa sira. Nia hatete: “Esperansa neʼe hanesan ankor neʼebé loos no metin ba ita-nia moris.” (Ebreu 6:19) Nuʼudar ema neʼebé dala barak hasoru ona situasaun kuandu ró mout, Paulo hatene ho didiʼak kona-ba ró nia ankor. Kuandu laloran baku makaʼas, ema sira neʼebé kontrola ró neʼe sei hatún ró nia ankor. Se ankor neʼe toʼo tasi-kidun, no kaʼit metin iha okos, neʼe sei halo metin ró neʼe atu bele tahan laloran sira no la xoke fatuk.

Nuneʼe mós, se Maromak nia promesa sira mak hanesan esperansa neʼebé “loos no metin”, esperansa neʼe sei ajuda ita atu tahan kuandu ita hasoru situasaun moris neʼebé haree hanesan laloran neʼebé boot. Jeová promete katak tempu sei toʼo mai kuandu ema hotu sei livre husi funu, violénsia, laran-triste, no mós mate. (Haree kaixa iha pájina 10.) Hodi kaer metin ba esperansa neʼe sei ajuda ita atu hasees an husi susar, no fó ita motivasaun neʼebé ita presiza atu moris tuir Maromak nia matadalan sira duké rende an ba hahalok la morál neʼebé nakonu iha mundu ohin loron.

Esperansa neʼebé Jeová oferese mós kona Ita rasik. Nia hakarak Ita atu goza moris neʼebé tuir ninia hakarak. Ninia hakarak mak “atu ema hotu hetan salvasaun”. Oinsá? Primeiru, ema ida-idak tenke “hetan koñesimentu neʼebé loos kona-ba lia-loos”. (1 Timóteo 2:4) Testemuña ba Jeová hakarak tebes ita atu hetan koñesimentu neʼebé fó ita moris, neʼe mak koñesimentu kona-ba Maromak nia Liafuan. Esperansa neʼebé Maromak sei fó ba ita liuhusi koñesimentu neʼe mak esperansa neʼebé folin-boot liu fali buat seluk neʼebé ita bele hetan husi mundu neʼe.

Ho esperansa hanesan neʼe, ita la presiza sente tan la iha folin, tanba Maromak bele fó ba ita forsa neʼebé ita presiza atu kumpre ita-nia planu naran deʼit neʼebé tuir Maromak nia hakarak. (2 Krónikas 4:7; Filipe 4:13) Esperansa hanesan neʼe mak ita presiza, loos ka lae? Entaun, se Ita presiza esperansa, no buka hela esperansa, fiar metin bá katak esperansa neʼe besik ona atu sai loos, no Ita bele hetan ida-neʼe!

[Kaixa/Dezeñu]

Razaun atu iha esperansa

Bíblia nia hanorin sira tuirmai bele ajuda Ita hametin Ita-nia esperansa:

▪ Maromak promete kona-ba futuru neʼebé lori kontente.

Ninia Liafuan hatete katak ema sei kontente hodi moris ho unidade iha mundu paraízu.​—Salmo 37:11, 29; Isaias 25:8; Apokalipse 21:3, 4.

▪ Maromak labele bosok.

Nia odi lia-bosok hotu. Jeová mak moos no santu, tan neʼe nia labele bosok.​—Provérbios 6:16-19; Isaias 6:2, 3; Tito 1:2; Ebreu 6:18.

▪ Maromak nia kbiit la iha limite.

Jeová mak ida neʼebé kbiit boot liu hotu. La iha buat ida mak bele hanetik nia atu kumpre buat neʼebé nia promete.​—Éxodo 15:11; Isaias 40:25, 26.

▪ Maromak hakarak Ita atu moris ba nafatin.

​—João 3:16; 1 Timóteo 2:3, 4.

▪ Maromak tau esperansa mai ita.

Nia la fokus ba ita-nia fraku no sala sira, maibé ba ita-nia hahalok diʼak no hakaʼas an. (Salmo 103:12-14; 130:3; Ebreu 6:10) Nia tau esperansa katak ita sei halo buat neʼebé loos, no nia kontente bainhira ita halo nuneʼe.​—Provérbios 27:11.

▪ Maromak promete atu ajuda Ita serbí nia.

Jeová sempre prontu atu ajuda ninia atan sira. Ho laran-luak, Maromak fó ninia espíritu santu neʼebé kbiit boot ba Ita.​—Filipe 4:13.

▪ Tau esperansa ba Maromak sei la saugati deʼit.

Ita bele tau fiar tomak ba Maromak tanba nia sei kumpre duni ninia promesa sira.​—Salmo 25:3.

[Dezeñu]

Hanesan kapasete proteje ita-nia ulun, esperansa proteje ita-nia hanoin

[Dezeñu]

Hanesan ankor, esperansa neʼebé loos no metin sei ajuda ita tahan

[Credit Line]

Courtesy René Seindal/Su concessione del Museo Archeologico Regionale A. Salinas di Palermo