Hametin Ita-nia motivasaun

“Iha motivasaun atu para fuma mak hakat importante liu hotu atu fumadór sira bele hetan susesu hodi para fuma.”​—“Stop Smoking Now!”

SE ITA hakarak para fuma, Ita tenke iha motivasaun boot atu halo nuneʼe. Oinsá Ita bele iha motivasaun boot atu para fuma? Dalan ida mak hanoin kona-ba oinsá Ita-nia moris sei sai diʼak liu se Ita para fuma.

Ita sei poupa osan. Se ita fuma sigarru masu ida loroloron, ita sei gasta osan dolar rihun ba rihun tinan ida. “Uluk haʼu nunka hatene katak haʼu gasta osan barak atu sosa sigarru.”​—Gyanu, husi rai-Nepál.

Ita sei moris kontente liu. “Haʼu komesa goza haʼu-nia moris depois haʼu para fuma, no situasaun kontinua sai diʼak liután.” (Regina, husi rai-Áfrika Súl) Bainhira ema para fuma, sira-nia sentidu atu horon no koko hahán sai diʼak liu, no baibain sira iha enerjia barak liu no mós sira-nia oin sai nurak liu.

Ita-nia saúde sei sai diʼak liu. “Para fuma bele lori kedas benefísiu boot ema nia saúde.”​—The U.S. Centers for Disease Control and Prevention.

Ita sei sai fiar an liután. “Haʼu para fuma tanba haʼu lakohi sigarru sai hanesan haʼu-nia patraun. Haʼu hakarak haʼu mak ukun haʼu-nia isin.”​—Henning, husi rai-Dinamarka.

Lori benefísiu ba Ita-nia família no belun sira. “Fuma sigarru . . . bele lori problema saúde ba ema sira neʼebé besik ita. . . . Matenek-naʼin sira dehan katak ema rihun ba rihun mate tinan-tinan ho kankru pulmaun no moras fuan tanba horon sigarru suar husi ema seluk neʼebé fuma.”​—American Cancer Society.

Ita sei halo kontente Ita-nia Kriadór. “Maluk doben sira . . . mai ita hamoos ita-nia an husi buat hotu neʼebé hafoʼer isin.” (2 Korinto 7:1) “Fó imi-nia isin nuʼudar sakrifísiu neʼebé . . . santu, no Maromak simu.”​—Roma 12:1.

“Bainhira haʼu komprende katak Maromak la gosta buat neʼebé hafoʼer ita-nia isin-lolon, haʼu deside atu para fuma.”​—Sylvia, husi rai-España.

Maibé dala barak, motivasaun deʼit la toʼo. Ita mós presiza ema seluk nia ajuda, inklui Ita-nia família no belun sira. Saida mak sira bele halo atu ajuda Ita?